今日難得工作時間都有得抖抖, 正所謂偷得浮生半日閒, 即刻過去揾老婆食過Lunch先, 行過間見到間紫色招派既吉吉點, 其實我本人對紫色係特別有情意結的, 再加上我亦喜歡點心, 就擔粗粗入去試下啦.

入到去睇餐牌, 發覺D野食都幾特別, 有中西混合既感覺, 但由於只係Lunch, 我地都只係試下幾樣野,

鮑片冬菇鴨胸荷葉籠仔飯 - 鴨胸俾我感覺係屬於西餐一派, 但估唔到配埋鮑片冬菇蒸飯, 又出奇地夾wor
青芥牛肉漢堡 - 完全無諗過中式點心會出現漢堡, 仲要配青芥, 真係唔係個個啱架, 我老婆都無乜興趣, 結果我一個人食哂, 結論係好好食, 牛肉新鮮, 配青芥令人感覺無咁油, 好清新.
蝦餃 - 典型中式點心, 亦係我既喜愛, 蝦皮鬆軟但唔會一夾即爛, 蝦肉鮮甜, 唔係用D死蝦, 讚!!
鐵觀音咖啡 - 鐡觀音飲得多, 咖啡都飲唔少, 但兩者溝埋, 其實真係飲唔出有特別~~

有機會都會再同老婆黎試下其他, 好似血燕千層糕及黑毛豬腐皮卷等等.

今日同個朋友同埋佢仔仔向屯門食飯, 佢帶左我去呢間Cafe 1950, 雖然只係屋村餐廳, 但俾人感覺好似走進另一個空間咁, 呢度既裝修好有品味, 格調, 令人忘記自己係身處屋村內, 好似去左高級餐廳咁.入到去, 見到個餐牌有好多野食, 但發現周圍都叫石板燒扒餐, 小朋友話要食旦包飯, 所以我地兩個大人就跟大隊試下D 石板燒餐啦. 最後我地叫左,安格斯肉眼扒石板燒 - 本人喜歡食牛, 特別係肉眼, 因為呢個部位好鬆軟, 跟石板上其他同鐡板差唔多(只係個人感受), 但最重要係上到枱仍然係熱辣辣, 感覺一流呀!!!

紐西蘭羊仔架石板燒 - 朋友叫的, 一向對羊都麻麻地, 好驚個種騷味, 不過朋友試完叫好仲誠意拳拳邀請我試下, 咁都無妨既; 試完又真係如佢所講無騷味, 下次可以自己叫黎試下

白咖喱雞扒旦包飯 - 小朋友叫的, 其實我對旦包飯都有興趣的, 但牛扒在前, 唯有放棄後者啦. 見塊雞扒都好足份量, 對小朋友黎講一定夠食, 當然, 結果佢都係食唔哂啦

服務方面, 可能我地係較為早食, 又有足夠既侍應, 可以話係反應非常快, 呢點都好滿意.
下次有機會, 一定會再黎食過.

尋晚過左大埔同班老死打籃球, 由於約既時間早, 所以只係食個面包就開始,
連場大戰過後, 當然換來又攰又餓之軀啦, 難得兄弟聚首, 決定去食番餐勁既補充下~~

最後我地選擇左Oppa燒肉, 揀呢間既原因係肉類能夠最快填補失去既元氣....
其實邊有咁多道理, 成班男人, 梗係要食下燒肉飲下酒先爽架ma...唔通去食個D靜到無人講野既西餐咩

一去到見到個門口, 樓底好高, 仲有個吧枱, 一望而知, 應該係前身係酒吧改建而成, 空間感好大, 唔會俾人好迫既感覺, 坐位亦好寬敞, 枱與枱之間都有段距離, 唔會好似去食日本放題咁, 枱貼胸, 椅背貼背脊, 仲要同隔離好似搭枱咁近, 值得一讚!!但無椅背, 對於我地一班剛做完劇烈運動既中年人難免有D為難, 不過無緊要既, 當練下腰力啦. 話說, 由於大家都太肚餓啦, 已經唔諗得咁多, 即時開始叫野食, 成班仔仔, 當然主攻肉類啦, 所以立即order左牛拼盤, 豬拼盤同雞肉 眨下眼就黎啦, 嘩!!我最愛係食牛架啦, 個牛拼盤實在令我喜出望外,

M6和牛肩胛肉 - 肉質脂肪分佈均勻, 燒個陣香味四溢, 令人流哂口水(當然可能係我地太肚餓啦)
牛肋肉 - 調味後令到原味有影響, 但更加惹味有層次, 讚!!
牛脷 - 其實我一向少食, 總覺得會好"奀", 不過兄弟們叫到, 點都要俾下面, 但結果係出奇咁香口wor, 帶左一個新既體驗俾我, 哈牛拼盤內最令我期待的, 莫過於以下呢個牛排骨, 佢既設計係將一片片好長既薄牛肉, 一層一層咁將舊後骨包起黎, 好有心思, 相信亦好考功夫! 牛肉之中, 薄牛又係我其中最喜愛的, 因為佢易熟易煮, 滿足到我呢亭心急又無乜煮食技巧既人, 同埋每一次燒完塊薄牛, 將佢熱辣辣放入口, 慢慢咀嚼, 慢慢享受牛脂融出黎既肉汁, 真係令人好感動!另類食法 - 薄牛燒熟後, 加塊菜, 加舊飯, 係咪成舊壽司咁呢?哈哈 豬拼盤都唔弱, 有日本豬西冷, 豬頸肉, 五花腩及豬排骨, 一樣咁出色, 但由於我全力瞓身向牛到, 所以都無幾多力分到向豬度啦其他仲叫左D料理好似炒年糕, 海鮮餅等(都係飽肚野)

兄弟聚舊食燒肉, 吹水; 梗係少不了啤酒啦. Oppa仲要有我最愛既1664, 當然要整番啦, 飲勝!!

好日都唔會入新界食飯, 今日難得向屯門收工, 就約D屯門友出黎食下飯,
原本打算近近地向屯門食下日本野, 點知朋友推介話過去元朗食一間叫雋太的日本料理放題,
見時間尚早, 朋友又講到推介咁誇張, 就即管過去試試啦.

由於去到時間尚早, 所以唔駛點等就有位,
食放題, 一入到去第一樣野梗係睇下佢張刺身清單啦, 又真係款式多多wor, 有三文魚, 帶子, 榮螺片, 甜蝦，油金魚, 吞拿魚等等.....唔駛講, 即刻全部叫齊試一試先,
第一輪刺身黎到, 第一個感覺係喜出望外, 只講少少, 

三文魚唔止新鮮, 仲要D脂肪係好平均既, 食落非常鬆軟, 口感一流

油甘魚亦係我其中較為喜愛的, 呢度亦無令我失望, 質素滿足到我既期待

生蠔夠大隻, 亦都好甜！雖然要加幾十蚊，但我地呢亭係生蠔迷，一定食到回晒本啦！

最令我喜出望外既係我最愛既甜蝦, 佢唔係用個D細細隻既甜蝦仔, 而係奉上連頭既大隻甜蝦 ,即刻忍唔住讚左我個FD一下, 話佢果然好介紹, 我最鍾意食連頭甜蝦, 因為可以享受埋蝦膏, 而呢度既頭甜蝦真係好新鮮

開開心心同朋友享受左一餐, 已經諗定下次約埋其他朋友一齊黎食過, 
只係加幾十蚊就有生蠔任食, 仲要係高質素, 鮮甜既生蠔, 相信個個都爭住黎食呀

另外, 重點想讚一下侍應生, 每位都好有笑容, 又有禮貌, 雖然好忙, 但仍然Keep到服務質素, 難得!