老婆這陣子身體唔多好, 所以星期六晚上打算吃粥, 見富達廣場有間叫西關粥麵的店子開了一段日子都未試過, 於是乘機一試.

店子雖然唔大, 但非常光猛企理, 地面亦唔會有很多的垃圾, 清潔上做得幾好! 點了肉丸粥, 菜心燒骨粥, 义燒腸及炒麵.

肉丸粥的粥底唔錯, 唔會太鹹, 肯定不是味精粥, 但啲肉丸唔好食, 寫明是手打肉丸, 但一啲都唔彈牙, 肉質非常散, 而且無肉味. 唔多得!

义燒腸啲皮厚了少許, 义燒份量唔算太多, 不過都比海皇的多些, 味道尚可.

菜心燒骨粥個名幾特別, 其他地方未試過, 所以叫來試吓. 菜心很多, 不過用來做粥感覺上唔係太夾, 燒骨得幾件, 有些仲要係骨來的, 無肉! 而且個粥加了燒骨亦唔覺特別有味, 雖然有新意, 但味道上唔算出色.

炒麵竟然是全餐最好食的, 非常夠味, 比起很多地方的做得出色, 可惜的是芽菜唔夠多, 否則會更好.

整體而言, 這兒的粥單論粥底其實唔錯, 起碼唔會是味精粥, 但餡料方面就比較差. 幸好環境上真的幾好, 令客人吃得舒服, 這點比起元朗其他的粥店實在勝一籌, 所以都會再來嘅.

上星期六, 去了彪記牛丸附近的咖喱至尊餐廰吃午餐兼下午茶, 點了咖喱雞扒飯跟凍檸茶. 等了很久才有得吃, 心想應該唔錯, 但入口卻很失望, 咖喱有大中小辣, 我要了小辣, 不過原來小辣竟然等於唔辣, 失去了食咖喱的意義, 而且咖喱的香味唔夠出, 非常一般. 嗰兩件雞扒唔夠熱, 明顯是預先炸定的. 肉質好鞋, 一點都唔好食. 杯飲品無特別, 一般茶餐廰水準.

這兒號稱咖喱至尊, 但味道絕對達不到至尊水平, 當然這個價錢都唔敢期望有高質的咖喱, 不過味道上真的嘛嘛, 唔會再來了.

星期日的晚上, 去了坤記吃粥. 這間店子是我第一次幫趁, 可能因為我多數只會到屯門市廣場, 很少去新墟仁愛堂這邊. 我叫了一碗柴魚花生豬骨粥, 老婆則要一碗碎牛粥. 柴魚花生很多, 不過豬骨就好少, 而且真的是"骨", 沒有甚麼肉, 味道上都叫夠味, 又不太鹹, 可以啦! 碎牛粥牛肉很多, 雖然味道只是一般, 但絕不難食.

總結這兒的粥品價錢上我個人認為稍為貴了少許, 但份量上都算不俗, 味道就一般水準, 不太差.

上星期日, 跟老婆去了又新街的佳記糖水, 對於這間店子, 我們極之少來, 因為從來唔覺得它是有水準的甜品舖, 但冬天的時候在沒有其他更好的選擇時才會來一兩次, 今天點了熱芋頭西米露, 龍眼馬蹄露及腸粉魚蛋.

熱芋頭西米露是這兒都算比較似像的熱糖水之一, 芋頭味夠濃, 有芋頭的香味, 而且唔算稀, 又大碗. 龍眼馬蹄露就唔得啦, 稀得交關, 一啲都唔似露的質感, 而且馬蹄非常之小, 反而龍眼就好多, 可能因為龍眼是罐頭貨的關係吧. 腸粉魚蛋加了價, 以前可以叫5元魚蛋及5元腸粉, 現在全部最少要6元, 腸粉一啲都唔爽滑, 魚蛋細粒又無魚味, 一點都唔彈牙, 屬下價貨式.

整體來說這兒的質素非常之一般, 除了比起其他的糖水店大碗外, 味道上一點都唔覺好食, 所以我們只會偶一為之而已.

已經有一兩個月沒有再到過松記了, 今晚再次幫趁, 我們點了熱的紅豆沙以及凍蛋花馬蹄露. 紅豆沙一般貨式, 沒有起沙的質感, 一定唔係煲得很久, 亦沒有陳皮的味道, 最可取之處只是唔太甜漏, 但跟綠林的紅豆沙比起來就相差極遠了. 蛋花馬蹄露馬蹄份量多, 啲馬蹄幾爽口, 唔太甜, 算係咁.

二月十七日, 是老婆生日的大日子, 之前從openrice的食評中得知日航酒店的自助餐有生日優惠, 加上感覺上認為這兒的自助餐應該唔會太差, 所以就訂了位於這晚跟老婆一同慶祝.

去到時七點多, 已經人頭湧湧, 想不到現在的自助餐連平日都這麼多人, 入座後先送上了兩杯免費的橙汁, 之後馬上去拿食物, 但行了一圈後, 發覺整體食物的種類唔多, 跟以前比好像少了很多的款式, 可能因為食材的成本上漲了的關係吧. 食物的種類大致有:

凍海鮮類
有長腳蟹, 青口及另一種比較大的蟹, 味道尚算鮮味, 可惜款式實在太少.

魚生類
有三文魚, 吞拿魚, 八爪魚, 甜蛋以及另一種唔記得叫甚麼名稱的魚, 大致上都幾新鮮, 但沒有帶子, 可惜.

白灼海鮮類
是自助的, 自己選好後廚師會幫你灼熟, 有生蝦, 魷魚, 花蟹仔, 魚片等, 味道一般, size好細隻, 唔多有肉.

熟食類
都是那些大路的貨式, 種類唔多, 而且唔夠熱, 大部份都麻麻地.

日式燒物類
有章魚丸子, 鐵板牛柳粒及鵝肝, 前兩者好好味, 非常之香, 鵝肝因我們唔食, 所以無要.

自選即煮中式麵食
有麵, 河粉, 烏冬等, 可自行配搭不同的餸, 有雲吞, 牛丸及魚片, 味道唔錯, 我叫了一個幼麵, 麵質都幾爽口, 湯底有豬骨味, 唔係味精湯, 牛丸不過不失, 比想像中出色.

甜品類
除海鮮外, 甜品是酒店自助餐的主打類別, 但這兒的甜品非常之令人失望, 種類少得可憐, 連切餅, 朱古力噴泉等這些普通的甜品都無, 只有些一杯杯唔知叫甚麼的東西. 唔只無款式, 連味道都唔得, 大部份唔係太酸就是太甜, 難食到不得了, 只可用一個字來形容, 就是差!

整體來說, 食物的款式實在非常之少, 而且味道亦唔算太出色, 勝在有生日優惠之餘亦可以用信用咭的折扣, 計起來每人大約三百元, 這個價錢還算可以一吃, 如果是正價($388)的話就唔抵了, 不過我們都有相同的結論, 就是一次便算, 應該唔會再來了.

星期日的下午, 去了川味食米線, 老婆點了貢丸魚皮鮫米線,而我則要了豬腸魚蛋撈粗紅薯粉. 米線一般, 偏淋了, 唔夠爽口. 貢丸亦唔多得, 唔爽又無味. 粗紅薯粉我是第一次食這種粉的. 感覺有些怪怪哋, 樣貌有些似河粉, 但沒有河粉的爽滑, 下次唔會再叫, 個豬腸唔夠味, 魚蛋是比較出色的, 幾爽口彈牙, 不過就唔多有魚味啦.

整體質素非常一般, 勝在唔貴, 加餸每款都只是3-4元, 不過唔會再去了.

年初二看完煙花表演後, 打算去五代同糖食甜品, 但等候的人多到得人驚, 見到斜對面的沛公新店反而唔駛等位, 反正之前只有荃灣店時我已經想試一下它們的千層pancake, 於是決定幫趁一次, 點了最受歡迎的榛子千層以及紅豆腸粉.

榛子千層果然份量十足, 真的有十幾層, 每層的蛋皮做得非常之薄, 但蛋香味就唔太吃得出. 榛子mousse的味道尚算滑溜及夠味, 但吃到一半之後已經覺得有少許漏, 吃完整個pancake後簡直有很飽濟的感覺. 我個人還是喜歡鮮果餡料的pancake多些, 起碼這種飽漏的感覺少得多, 味道上這兒的千層pancake唔算差, 但唔係我杯茶囉.

紅豆腸粉有兩條, 紅豆味道合格, 唔算太甜, 可惜自從吃過菓匠茶屋的十勝紅豆後, 沛公這種層次的紅豆已經不能再滿足我了. 腸粉皮標榜是用椰汁所做, 但椰汁味非常之淡, 淡到唔多吃得出, 之前看過有位食家說是因為紅豆味遮蓋了椰汁味, 但我認為根本是榔汁味太弱, 因為我單吃皮時都唔覺幾有椰汁的味道.

大致上這兒的出品除了那個千層pancake稍為特別些之外, 其他的甜品只是大路的貨式, 唔覺有太大的驚喜, 味道上亦不見得有幾出眾, 那個招牌千層pancake賣點其實只是份量上給人很抵食之感, 但味道上只是一般水準, 所以沒有令我回頭再來的慾望, 唔怪之得人流和斜對面的五代同糖比差咁遠了.

看完花車巡遊後, 肚子有些餓, 於是去了老麥醫肚, 試了最新出的黃金蜜糖芥苿魚堡. 和之前的和風特盛魚堡相比, 個包大個了些, 而且餡料亦多了, 件魚柳一般, 味道跟最原始的魚柳包沒有分別, 反而最好的地方是包入面多了生菜和蕃茄, 令到個包無咁漏, 有少許食至尊漢堡的感覺. 賣點之一的蜜糖芥苿醬幾好, 比起以往的沙律醬好味得多. 一個套餐賣30元, 比起一般魚柳包餐貴了幾元, 味道來說唔算特別出色, 但以老麥的水準而言都叫唔錯的了, 值唔值這個價錢就見人見智啦.

大年初一晚, 和老婆到尖沙咀看花車巡遊, 之前當然要吃晚餐, 但初一開業的食肆真的不多, 其中位於愉景新城的翔龍小籠包卻是小數之一, 於是不用考慮便決定在這兒吃.

由於六點左右便到達, 所以客人並不太多, 仲可以安排到一張非常闊落的卡位, 這天合共點了四款食物.

手撕雞拉麵
麵條幾爽口, 但雞肉唔算多, 而且啲肉既味道偏淡了少許, 湯底唔係好夠味, 整體水準一般. 小籠包
一籠四隻, 個皮比較厚, 唔夠薄, 入面的肉亦唔算多, 可能因為現在成本上漲的關係, 幸好包裏面的湯汁唔錯, 味道尚可, 但談不上好出色.雪菜肉絲炒年糕
啲年糕非常煙韌, 雪菜味道剛好, 唔會太鹹, 肉絲比較淡, 而且唔多, 但整體份量尚算大碟. 炆排骨
唔記得過全名, 只知道叫甚麼炆排骨, 味道有些像南乳, 但無南乳咁濃味, 排骨唔多, 似乎這兒和肉類有關的食物肉的數量都唔多, 唔通成本增加後連啲肉都相對地減少了? 排骨是一般的雪藏貨, 肉味唔太有, 反而個汁幾好味, 不過只是一般的炆排骨, 唔覺有甚麼特別之處.這兒的菜很特別, 每一款上枱時碟邊都會有貼上一張小紙條, 寫上了由哪位廚師所制作, 我想這樣的安排是當客人對食物的質素有意見時, 可以即時找到負責的大廚來跟進, 想不到連廚房都興起責任制來了, 不過這種安排的確可以令管理的人更容易控制食物的質素, 站在客人來說是好事, 不過對廚房而言就可能會增加壓力了.綜合而言質素唔算極出色, 但都唔差, 個人覺得比現在的南翔小籠包好, 不過每碟菜肉的份量偏少, 吃完唔算太飽, 當然如果唔太介意的話質素都OK既.