今日第一次黎食晚餐，叫左滑蛋雞肉飯。 來到已經見到啲雞透明！立刻叫個貌似經理既人(白色恤衫帶眼鏡) 更換，佢都幫我地拎入廚房，等左大概十分鐘後，佢拎返碟雞出泥，結果同之前冇分別，我地再次問經理，要求轉其他菜式，我地表明啲肉唔熟(粉紅色)，食落有生味！但佢堅稱係100%熟！ 仲話已經煮左兩次一定熟，但我想講生雞可以食病人！佢無視我地既要求。從未試過食野食到一肚火結果我一舊雞都冇食，正一貼錢買難受 大家認住呢間食店，食物唔熟都照比人客食！

朋友買了團購$268加―,便前來試試,怎料喜出望外

我們被安排坐於室外,由於室外氣溫較低,故他們特別放了兩個暖器,貼窩心的。而烤物也在室外,由廚師哥哥一人操刀,陣陣烤味引發食慾不過由於小妹是較傳統的,因此我選擇先吃沙律丶海鮮、然後再吃烤物。

首先沙律配菜怎多,各色各樣,最終我選擇了凱撒沙律以及鮮雜果沙律。
沙律清新怡人,好fresh
海鮮有蝦,長腳蟹。雖然種類不多,但勝在夠新鮮!蝦肉彈牙爽口,不用點豉油都美味,吃出鮮味。
長腳蟹更加無得頂,啖啖肉,非常滿足。輪到熱食時間,熱食種類不多,但全部都很美味,雖然都是簡單菜式,但往往愈簡單愈難煮！就好像芝士蕃茄肉醬長通粉為例.雖然是簡單之作,但食落完全不漏,而且蕃茄醬的酸甜度適中,愈食愈開胃沙嗲串燒一流,很有馬來風味,而且愈食愈辣,富刺激感
有雞串,燒帶子,燒羊架以及炭燒鵝肝等。黎到尾聲,又點少得我最中意既甜品。
大致上都OK,種類很多,而且雪糕是我最中意食的H品牌,只可惜綠茶味比人拿哂
但朱古力味同士多啤利ｃｈｅｓｅｃａｋｅ都不錯

總括而言,平令正既自助餐不多,呢郅就是其中之一

一個人的晚餐食乜好？食麵？食拉麵！ 冇錯！呢間真係好適合個人去，因為坐位寬廣，而且唔係太多人，唔洗同人迫，最緊要既係食耐啲都冇人趕 我點左芝士吉列豚肉拉麵同炸雞粒，拉麵爽口彈牙，濃濃既豬骨湯底更是成碗麵既精髓，每啖麵都散發住豬骨既香味，不會一味死咸。 芝士豚肉真係好正，淡淡既芝味溶入豚肉裏面，香而不漏，配埋拉麵簡直一流 至於個炸雞粒冇乜特別，不過勝在夠熱，即叫即炸，雞肉新鮮，冇雪味。 總括黎講食物質素同環境服務係唔錯既，但係貴左啲囉

放工經過見到好吸引，於是買返屋企試下，點知一試難忘 中間既綠茶cream非常濃郁，不太甜，食落仲有綠茶既苦澀味，所以唔會漏，外面既蛋卷亦做得出色，非常鬆軟，連埋啲cream一齊食簡直入口即溶，連唔中意綠茶既爸爸都食左2件 可見係幾咁好食，下次一定要再encore!

小妹係中環已領教過佢既滋味，今日黎荃當然要encore!! 我就比較鍾情藍色既vanilla,貪佢顏色夠搶，而且雲呢拿味好足，就好似置身於雲呢拿世界咁，岩哂我地呢啲雲呢拿怪 唯一美中不足既係竟然冇左底下既窩夫餅，因為我去到既時候已經9點幾，所以賣哂，如果唔係就Perfect了！

每次黎到甘味，一定要order佢既鐵板牛柳粒蕃茄烏冬！ 自從試過佢之後，其他烏冬都要行埋一面 皆因佢茄味濃郁，每啖烏冬都散發住蕃茄既香味，簡直冇得輸！加上牛柳粒非常惹味，由於已切粒粒既關係，所以食落唔會漏，而且牛肉既鮮味仲可以中和湯底既酸甜味，兩者非常夾 所以黎甘味點鐵板牛柳粒蕃茄烏冬是常識吧

朋友建議到呢間泰越餐廳試下，原來星期一至五都唔洗加一，一於試下佢 入面好細，大多二至四人坐位，好似我地五個人就要加多張枱，而且好迫好嘈，不過我地至在食，所以都冇乜所謂。 我地叫左木瓜絲大蝦沙律，諗住清清地，點知原來好辣，酸酸辣辣好開胃，確實係一個不錯的前菜，如果多番啲蝦就perfect^^ 要左個越式炒粉皮，好有獲氣，不過稍微咸左啲，但都接受到。咖哩豬排農夫包則較為失色，好乾身，冇乜汁，而且好少豬排，淨係得薯仔，個人覺得呢個麻麻，可以不試。 小食方面就叫左拼盤，樣樣都有啲，唔洗諗，拼盤有豬排，雞翼，紮肉，蝦餅，魚餅同春卷，岩哂我地呢班食肉獸，由於蝦餅同春卷實在太好味既關係，決定再叫呢2樣！ 食到最後原來仲有甜品送，係芒果椰汁西米路，椰味相當濃郁，為這頓晚餐送上完美既句號。

今晚突然想食韓國嘢，於是放工到葵芳韓食家。 因時間尚早，很快便有位坐，我叫左$70泡菜豬肉石頭飯跟餐，朋友則要$80純豆腐海鮮湯配飯. 石頭飯唔好食，同埋啲豬肉好肥，一個字'油'完全冇意慾想食哂去 至於朋友嗰個我冇試，但望落色水好靚，朋友亦話ok,只係海鮮好少。 以前好中意到韓食家食石頭飯，因為材料充足夠惹味，但今天卻令我失望了

適逢假日，都會相約友人吃餐便飯，聚下舊，今天也不例外。 今晚我們到荃灣的泰皇吃飯，小妹一早已想試了，因為每次搭車排隊都會被他店內的串燒香味吸引，今晚終於試到啦 我地4個女生叫左6樣嘢食，對於我地呢啲食量驚人既大胃王黎講just a piece of cake 我地叫左$88泰式併盤(香葉包雞，春卷，蝦餅，魚餅) 我只係試左香葉包雞同蝦餅，雞肉鮮嫩，食落仲有香葉既味道，清新怡人。至於蝦餅也不錯，爽口彈牙，炸得乾身不油膩。 肉碎生菜包$58,佢有豬肉同雞肉比你簡，我地選擇前者。肉碎帶點微辣且重味，加埋生菜食好正，而且肉碎多，我地食哂啲生菜仲有肉淨，真抵食 再黎就係我既菲彿，泰式串燒(每串)$10，小妹點了雞肉串燒，齋聞已經食指大動，每串都烤至金黃色，皆因門口有個姨姨專門付責烤，即叫即烤，姨姨忙個不停呢，雞肉充斥沙嗲既味道，簡直好食到一串接一串 黎食泰國嘢點可以唔飲冬蔭公!! 呢到既$52冬蔭公湯都唔錯，齋睇色水已知其味，就係辣！！一開始飲都還可以，然後啲辣味慢慢標升上黎，愈飲愈刺激！ 由於我地都比較傳統，認為晚餐應有飯、麵，所以我地叫左蝦皇炒飯同泰式金邊粉，個飯ok,冇乜特別，不過好有鑊氣，泰式金邊粉$52 也不錯，顏色相當吸引，食落酸酸甜甜，好開胃，而且仲有蝦，好惹味 最後埋單仲有甜品送，就係每人獲得椰汁西米糕一小件，食完啲重味既食物，黎一件甜品，可中和番，為這個晚餐送上完美既句號 聽說呢到既串燒可外賣，下次一於買返屋企慢慢嘆

放工便相約同事到葵芳食飯，原本想食全潮，但由於太多人以及之前都食過既關係，今日決定試新嘢，就係金潮隔離既上海菜館 去到即有位坐，由於啲人去哂隔離，所以呢到好少人，但坐得舒適。 我地叫左5餸1湯。 上海粗炒不錯，用料充足，但偏油。紅燒豆腐不是用鍋上，而是用碟上，但夠熱夠火喉，而且豆腐非常滑，每人都可以食到2件^^ 酸辣湯更是我的最愛，酸而微辣，配料多，係正既 椒鹽豬排好惹味，送飯一流 反而醬爆雞丁就麻麻，本身以為辣，可能係醬既關係，偏甜左，但雞肉多，甚少連皮且啖啖肉，只係同我預期既味道有啲出入，最後就係炒飯，呢個同普通茶記一樣，都係夠鑊氣 埋單時先知原來唔洗加一，食左咁多嘢都係$346,真係抵食夾大件 黎葵芳除左金潮外，呢到都係唔錯既選擇