食日式料理太多, 真係好想食一餐清清地既湯粉, 北角健威坊又有新店開張啦 ! 呢間名為 "Pho18 越南地道美食" 既越南小店, 剛同隔離舖 "吉野家" 新店同一日開市營業, 本人好有興趣即時一試!去到店門前, 有一張黃色紙貼響門上玻璃, 寫住 "試業期間, 未能盡善, 敬請原諒" , 個心即刻離一離, 心想, 會有幾唔盡善呢? 一進店內, 真的好細, 只可容納24位客人, 但無需等位, 即時翻開餐牌.......咦, 點解咁多項食物都用白貼紙貼住既呢? 店主解釋試業期間唔會全部食物都有供應, 飯係沒有, 咁就叫粉啦! 本人叫了三款食物 : 食評如下 : ~

雞絲湯河 ~

只見一碗河粉內, 有少許雞絲, 少許蔥花, 及 另外小碟附上的半邊青檸及紅椒, 河粉 OK 爽滑, 湯底清而不口渴, 雞絲沒有雪藏味, 但係....越南粉中少不了的配菜 "芽菜" 卻完全不見影蹤, 吃到最後一啖, 都未見到一條, 不禁問問店主, 店主再問廚師, 廚師答覆 : "今日無芽菜!" 原來正如門口黃紙所講 "試業期間, 未能盡善" 但廚師有親自到我枱前向我道歉, 本人亦很認真表達 越南粉 不能少了芽菜, 如沒有亦應告知客人, 他們答應一定改善. 香茅炒豬肉撈檬 ~

都好大碗, 豬肉用特製方法調味過才炒, 好香, 加上花生, 及此店既好味魚露 (一般越南食店既魚露都偏酸味, 但此店既魚露帶甜, 撈檬粉好好味), 本人覺得口味合香港食客, 不錯.鮮蝦米紙卷 ~

食物一上枱, 感覺有點貴, $55/ 四件, 又無伴碟......但食落口後口感豐富, 內有原隻蝦, 扎肉, 蘿蔔絲, 米粉, 菜, 花生, 夾得好好, 又沒有油, 可以好清晰食到卷內每種材料既原味, 店主更提議我用魚露提升美味, 果然又真係幾好味喎!服務方面 ~ 禮貌不錯, 店主幫客人開門送客, 講晒"多謝" , "拜拜"好有誠意, 但第三日試業真的好似同員工未有默契, 加上本人發覺本身係 越南人 既廚師唔係好聽得明廣東話, 所以佢地成日要重複多次廚師先明佢地既需要.

總括黎講, 好過又開多間茶餐廳既, 都叫有 d 新選擇, 各位得閒可以去試試囉. 

眾所周知, 北角七姊妹道, 滿佈茶餐廳, 工作或附近居民, 每日面對差不多, 而且三高既餐牌, 真係未食都飽, 十分無奈, 但15年12月終於有好消息, 大家可以食得健康, 食得清新啦! 因為響北角地鐵站 B2 出口對面, 開左 "糙米家", 裡面既餐牌一睇落已經覺得有肚餓感覺, 配搭清新, 正餐都包一杯健康飲料, 咁以後想食得飽又唔超標, 就有新選擇啦! 

南瓜汁雞扒糙米飯 ~ 糙米比例高, 一見到時直覺會好硬, 食完實胃病, 但食左一啖後即時改觀, 煮得好軟熟, 好香, 雞扒有2塊, 呎吋大約4x5吋大一塊, 外皮煎得香脆但無焦, 內裡肉質依然多汁嫩滑; 最欣賞南瓜汁, 係南瓜打蓉, 加入蘿蔔及香草, 令成件事天然又額外美味.香蔥煎蛋豬扒糙米飯 ~ 一見到實物時, 豬扒顏色好啡, 觀感似牛扒, 煎蛋又無甚特別, 心諗唔會好食, 但實話實說, 煎蛋係完全無特別, 但豬扒味道極好, 雖然未知用什麼汁料去調味, 但有一種韓國風味, 而且無骨, 不鞋, 不乾, 亦不硬, 是不錯之選.最令大家感到滿意的是, 全張餐單都免費跟一杯飲品, 可選 "奶茶", "咖啡", "牛蒡茶", "檸茶", "檸水" 或 "糙米茶", 以本人所見, 可能食客都愛健康, 因此 "牛蒡茶" 及 "糙米茶" 較受歡迎.服務方面 ~ 有改進空間, 本人入坐時, 選擇與親友並排而坐, 侍應即時對本人說將需要與其他人搭枱, 這個完全無問題, 點餐後, 餐都已送到面前, 突然要求本人與友人必須面對面而坐, 只好照做, 再及後比較多人, 侍應再次要求我們調到另一坐位, 以便一班6人客人可以一齊坐, 自問雖然係一個好脾氣既人, 但都俾佢地既安排弄至有點不耐煩, 此點必須改善.總括黎講, 食物不錯, 令大家可以脫離茶餐廳的魔咒, 食得清新健康點, 算是一個新選擇.

和亭日本料理終於響 12月28日, 響北角開張啦! 當日下午5時正開張, 到做晒成個開幕儀式後, 都已經日落西山, 即時有大批街坊響店外等待, 可惜熱情不及北風冷, 大家都等左起碼半個鐘頭先可以入座, 本人與友人叫左一客二人餐, 依家講講此店各方面俾大家知先!

食評如下 : ~

牛肉火鍋 ~ 好味, 豆腐好香滑, 配菜亦鮮甜, 可惜牛肉好少, 比起 "吉x 家" 既一人火鍋更少.

和訂精選沙津 ~ 份量好少, 都唔夠 2 人食用, 而且用料碎濕濕, 令人難起興趣.

雞肉網燒 ~ 得 10 粒好細既雞肉, 完全唔覺係網燒 (網燒會有網紋), 相信只係用油煮熟, 味道淡而無味, 故此會有一碟濃汁跟埋

薯仔年糕餅 ~ 全個餐最好食既食物! 熱騰騰既年糕餅, 巧妙地配以牛油, 一咬落口, 煙刃可口, 暖暖既年糕響咀內徘徊, 好幸福既感覺.

豪華鮭魚盛合 ~ 唔好食!!! 三文魚好腥! 全碟都無一件係好食既, 失望!

枝豆 ~ OK, 因為只係烚熟, 無任何工夫, 所以唔會難食.

柚子蜜梳打 ~ 凍到飛起, 好多冰粒, 柚子蜜未能與梳打水溶合一起, 最終只有凍冰冰既梳打水味, 建議冬季唔好選擇, 因為本人食火鍋食到好熱, 一飲落去都打冷震!

總括黎講, 食物一般, 要求唔高既絕對可以一試再試, 而且價錢唔算貴, 叫做多一個選擇.

服務方面, 店員都好有禮貌, 可惜店主完全無為客人細心想過, 等位地方只有可容立 5個人身位既一條小巷, 無椅可坐, 大門更對正街口, 當日大家都食飽西北風至有得入座, 此點應要儘快改善.

太興終於響北角健威坊開張啦! 等左幾個月, 開張日期更由12月13日, 改為 12月15日, 中午 12 點開幕時, 簡直係人山人海, 本人完全唔夠一眾公公婆婆迫, 唯有係等到夜晚去食晚飯啦, 點知..........去到已經大部份燒味賣晒, 大家都好熱情好捧場, 而且首日開張有 2012年既音樂月曆送, 等位等得有道理, 食評如下 : ~

柑桔蜜 ~ 沖得好濃, 無將貨就價, 有咸柑桔既果蓉, 加上淡淡蜜糖水, 最o岩依家乾燥既冬季

老火湯 ~ 跟油雞飯套餐既例湯, 都好多材料, 都幾清甜, 飲完無咩口渴感覺, OK 架.

台南肉燥煎蛋飯 ~ 肉燥唔夠多, 而且都頗多肥肉, 屋企人話咁先好食, 但本人覺得太多肥肉唔鍾意, 伴碟得一條菜, 唔係幾均衡.

油雞飯 ~ 雞都食得出係冰鮮雞, 不過比 "大x樂" 既油雞好食少少, 但同 "美x " 其實差唔多, 但價錢差一折, 人地雙拚套餐先賣緊三十幾蚊, 太興要成五十幾蚊, 仲要同我地講 : "跟餐既油菜賣晒, 無菜你地介唔介意?" 我地心諗, 當然介意啦, 但都無辦法, 唯有叫佢俾多一件半件雞肉補償, 但被拒絕, 後來神奇地又有油菜送黎, 真係莫名其妙!

總括黎講, 食物其實一般, 無咩特別, 本人覺得, 食下午茶會最化算, 因為 $26有一碟細叉燒飯連飲品, 當中必選既當然係 "冰鎮奶茶"

服務方面 : 第一日惠顧, 發現職員雖然互相未有十足既默契, 但依然態度良好, 落單會講 "多謝晒", 食物送到客人前會講 "小心熱, 請慢用", 但有一樣奇怪地方, 本人發現全部女職員(包括清潔員工), 都清一色塗上淺藍色眼影, 令人有點吃驚, 未知其他分店是否一樣.

價錢實在比其他同類型食店貴, 但環境尚算清潔衛生, 本人會再惠顧架!

大家去 Mc Donald 惠顧, 通常最普遍會買 '超值套餐" , 裡面除左主食外, 都會有大薯條一包, 汽水一杯, 所以不少香港人都視此為 "垃圾食物", 因炸薯條含高 "反式脂肪", 但其實有無留意到, Mc Donald 都有好全面, 好健康既食品? 今日就黎介紹一下 ~

食評如下 : ~

雞扒沙津 (跟一款沙津醬汁) ~ HK$24.3 一份, 好大份, 內有雞扒一大塊, 車尼茄, 紅腰豆, 粟米, 青瓜, 生菜, 蘿蔔絲.......等等配料, 本人已連續進食 4日, 都未有生厭既感覺, 因有 3 款沙津醬汁可供選擇, 蔬菜都好新鮮, 只係唔多喜歡雞扒有黑椒既辣味, 怕長期食會熱氣, 但如果閣下想更加清淡, 可選擇唔要雞扒, 售價為 HK$21

總括黎講, 好鍾意呢款沙津, 因為蔬菜種類多, 新鮮, 價錢大眾化, 而且好衛生, 如果可以選擇配其他肉類更吸引.

服務方面, 都不能要求好似大餐廳一樣, 店員都係收完錢後, 就招呼下一位, 點都叫做快餐店, 大家既交易都係來去衝衝.

中秋節, 及一班親朋好友生日過後, 體重突然多左 5磅, 為左有恆心減磅, 相約朋友一齊進行 "沙津午餐療程", 銅鑼灣一帶食 Lunch 想 Relax 但又想食得健康, 其實都唔易, 今次選左去 Time Square 既 Tony Roma's, 午餐有 2 款沙律選擇, 連餐湯, 餐包, 飲品都只係 $58, 坐得又舒服, 立即叉滿電!

食評如下 : ~

餐包 ~ 配以香草牛油, 餐包外硬內軟, 好味!

蘑菇餐湯 ~ 賣相似一杯咖啡, 飲落好香蘑菇味, 夠濃, 我連朋友o個碗都搶埋黎飲!

雞肉凱撒沙律 ~ 麵包粒好甘香脆口, 但蔬菜好單調只得一種菜, 雞肉略厭有點 "鞋" 口, 不過份量夠大, 食完好飽

總括黎講, 咁既地區, 咁既環境, 只係五十幾蚊一個 Lunch, 本人覺得物有所值!

服務方面, 都好細心, 一叫即到, 而且永無 Say No, 由落單至埋單, 聽左好多次 "多謝晒", 都幾滿意! 定必會經常再惠顧!

北角七姊妹道以茶餐廳居多, 今個月4號, 開左新食店 "水晶晶泰國餐廳", 基於本人一樣名叫水晶, 當然要捧場啦, 見未到夜晚7點已全場爆滿, 一於價錢都唔睇, 衝入去試試先!

食評如下 : ~

原個鳳梨海鮮炒飯 ($88) ~ 好味之選! 飯粒軟硬適中, 材料新鮮, 菠蘿好甜, 而且好多肉鬆, 必食!

鮮什菌炒露筍 ($72) ~ 食材都好新鮮, 露筍好清甜, 只係賣相完全唔覺有任何泰國 Feel, 而且食完有點口渴

串燒雞肉/豬肉 ($66) ~ 可以3串雞肉3串豬肉, 肉身唔乾, 仲幾 Juicy, 醬汁都幾惹味, 半打唔夠食可以叫夠一打!

泰式千層糕 ($30) ~ 餐牌圖片係4件綠色既糕點, 但食品送到客人面前時係2件綠色2件啡色, 食落口好煙韌, 唔會甜到打冷震, 綠色係椰汁味, 啡色係咖啡味, 都幾好食.

總括黎講, 食物都唔錯, 但價格以同七姊妹道其他食店比較, 算係較高價既一間, 2人晚餐埋單要 $280, 而且見餐牌內, 一個椰青都賣 $36, 飲品價錢唔吸引, 大部份客人都選擇飲水.

服務方面, 女店員中有香港本土人, 亦有泰國人, 禮貌不錯, 但當中有一位戴眼鏡打呔的男性高層職員, 態度麻麻, 語氣令人不舒服, 有客人問可否坐卡位, 居然以不耐煩語氣答 : "卡位要有3,4個人架!" 以一間未站穩腳既新店黎講, 呢位先生態度應加以檢討.

生日通常都會去間平時少去既餐廳慶祝, 有新鮮感嘛! 就試試去皇家太平洋酒店既 Cafe on the Park 啦!

一去到, 見到大約有 20人企響門口等, 原來要等到夠鐘先安排入坐, 平時好多餐廳都俾人坐低先, 所以覺得呢點要考慮改善.

食評如下 ~

安排坐位後, 沿途都係食物, 種類不少, 而且以甜品居多, 睇落都唔錯.

其中以 紅酒燴牛胸, 藥膳雞湯, 長腳蟹, 燒羊扒最令本人感興趣,

而甜品方面, 好多都係布甸, 但 芝士餅, 金薄咖啡撻一定要試, 而且有小杯裝名牌雪糕以供不停享用, 很多客人都食 2 杯以上

不滿意的是, 刺身全都要配給制, 大家都要捧住碟向師傅講出想要的刺身, 以 $398 自助餐價錢來說, 此舉令人有點無奈

服務方面, 侍應大多以二十歲出頭的年青人為主, 但很有耐性及禮貌, 其間不時會有推廣東西捧到客人面前供試食, 因將近中秋節, 今晚有月餅試食, 可說是錦上添花.

總括黎講, 都好滿意, 下次會再黎架 !

順帶一提, 如有揸車朋友, 請記得問職員取回收據, 可以享有中港城 2 小時免費泊車架!

去過一間叫 JUBI 既酪雪糕店, 口味得 2 款, 無得自己斟雪糕, 只可以自己加配料, 配料款式少, 員工態度又差.....

今次唔同啦, 食得好開心, 所以影低為大家介紹, 就係一間叫 "Tutti Frutti" 既低脂乳酪雪糕店啦, 見到佢全自助即刻好開心走去拎紙杯開始斟雪糕, 一共有十種口味, 本人每款斟左少少, 再加上朱古力片, 芒果珠珠, 荔枝珠珠, 百力枝, 鮮蜜瓜, 西瓜, 真係覺得自己整得好靚!

整既期間, 職員極有禮貌介紹邊個口味最受歡迎, 原來最多人鍾意食益力多味, 綠茶味.

我同朋友每斟少少, 又走去磅, 磅完見未係好貴又再斟, 職員依然笑笑口好 Nice.

最後加埋配料(再加上朱古力片, 芒果珠珠, 荔枝珠珠, 百力枝, 鮮蜜瓜, 西瓜,), 覺得夠靚啦, 就去俾錢, 玩得好開心既代價只係 $39, 朋友就 $34, 一人一大杯又影相又滿足到肚皮, 真係好!

環境好乾淨, 應該開左無幾耐, 後尾佢地打開左個房門, 我見裡面個雪櫃有好多某品牌既低脂牛奶, 益力多, 蒸餾水, 所以食得更加放心, 講真, 如果唔係見到佢地用呢 d 食材, 都會懷疑係唔係低脂, 係唔係落色素, 化學香料去整架!

總括黎講, 好滿意既一個甜品, 大家都黎試o下啦!

由於2月17日係中國情人節, 相信都一定需要等位, 所以預早 Book 定枱, 去到完全唔駛等, 但見餐廳內已滿客, 而且十分熱鬧. 中國情人節唔駛一定食中國菜既, 同心愛既人, 据o下扒, 傾o下計, 已經好開心, 今次我地響黃埔花園 OUTBACK 叫左一個名為 "Italian Inspiration this Winter" 套餐, 食得好飽, 食評如下 ~

Italian Inspiration this Winter (HK$438)
包括 ~

黑糖麵包 ~ 好食!!! 賣相好似一氣煨蕃薯, 配以特製忌廉醬, 我地2人一口氣食晒!

周打蜆湯 ~ 稠到好利害, 完全係槳狀, 但好好味好多材料, 只係咁稠飲埋個餐湯已經飽左 30%

雞肉蘑菇意大利飯 ~ 全個餐只得呢個飯唔好食, 個味好悶, 雞肉有雪味, 加上已經有少許飽肚感覺, 完全引唔起食欲

炭燒肉眼扒拼龍蝦 ~ ~ 嘩! 一個大碟上, 內有蔬菜, 薯角, 肉眼扒, 龍蝦, 即時令我地又胃食鬼上身, 蔬菜好新鮮, 著角好香脆, 肉眼扒雖然咸左少少, 但依然多汁惹味, 好有咬口, 龍蝦整得好細心, 廚師已經將整件蝦肉挑出並放置於蝦殼上, 龍蝦肉好爽甜, 而且啖啖肉, 大家一定要黎試試!

士多啤梨特飲 ~ 勁大杯, 但味道無什特別, 如喜歡飲餐酒既朋友可選擇紅酒

總括黎講, 食物唔錯, 值得一試, 如不喜歡此套餐也可散叫, 黑糖麵包好似係送既, 因為見每枱客人都無 Order 過但人人都有一個.

服務方面, 算係唔錯, 侍應即叫即到永無話扮睇唔到, 而且態度好好令人舒服, 幫客人落單時都好細心問清楚客人需要, 值得一讚.

環境方面, 一般美式餐廳裝潢, 四處都係以木材裝飾為主, 令人舒服 relax, 好多外國人都把酒談笑, 氣氛不錯.

各方面都幾好, 相信會再次惠顧!