11:40am 以為自己咁早放lunch, simply life 會少人d, 點知已經排緊隊囉！排隊時留意到，其實佢唔係完全無位嘅，只係入唔切，見d 侍應已經無停手咁又serve 客又執枱，我估佢地唔夠人掛！其實真係好喜歡simply life, 野又好食，價錢又合理，環境又唔錯，係等位果下耐，不過都值得等。 每次都食完佢個麵包都好想再買一袋返公司下午茶再食，但次次都唔記得左，無左回事！佢地嘅麵包真係好好味，好有麥味架！

露筍配香煎鱸魚：本身唔太好煎魚，不過同事就讚好！ 香橙鴨胸：鴨胸肉剛剛好，真係要讚！因為我最怕就係有d 生而又咬唔開嘅鴨胸肉，但今次係好味到我食曬！配個橙醬，酸酸地幾開胃，但疏菜就太油 最後講下個蘋果茶，好欣賞佢地凍茶嘅offer, 你知啦，平時凍飲係要加錢架嘛！飲過咁多次，都覺得佢地係偏甜，我每次都要另外叫杯水自己溝不過整體都好滿意，值得再來光顧！

原本係約左筲箕灣之友去食安利，但朋友見我黎親東大街都獨沽一味，就介紹我試新野！佢話係筲箕灣最出名嘅豬扒酸辣米綫，當然，本住八掛又為食嘅心態，梗係試下啦！ lunch time 12:30 已經開始等位，都算快，價錢都算大眾化，$30+ 就有交易。 叫左最出名嘅豬扒酸辣米線，果然豬扒真係堅得， 炸得好香口，肉質適中，而且唔算好油，佢件豬扒放湯上嘅，都無浸到碗湯油曬。酸辣 湯底就重辣味，其實我覺得佢係偏麻辣，酸味只係靠湯入面放嘅酸菜。所以，如果好似我依類唔喜歡麻辣嘅人就會覺得個酸辣米線唔岩食。整體黎講， $32 有如此水準都算唔錯啦！

其實對韓國菜興趣不大， 咁啱有朋友想試，咪試下囉。 我地食早場，6:30 到個場都幾乎都full 曬， 心諗係咪真係咁好食呀！朋友對韓國菜好有研究， 仲話依樹非常正宗，同佢係韓國食嘅一樣味道咁話喎。我本身對韓國菜無研究嘅，不過我都覺得係可以一試。不過佢地每張枱限時90分鐘，其實有d 趕，唔係慢慢歎style! 一坐低就見到一檯都係野，有韓式醬料、前菜幾款，芽菜湯，一壺凍玄米茶。感覺上同韓國街d 餐廳一樣咁正宗。
豬肉果d 都好新鮮，ok 好味，唔多講。海鮮餅就普通。豬大腸好勁腸味，平時喜歡食豬腸嘅人一定要試。 反而印象最深刻就係豬皮， 我之前食韓燒都冇試過燒豬皮，覺得好特別，原來係咁好味！ 燒豬皮好煙韌 , 又香口, 有d 甜甜地，而且唔會成口油！推介推介 ！

過去試過幾間銅鑼灣嘅樓上cafe, 食物都係麻麻地，但今次cafe my dear 就有驚喜喇。環境優靜，無人食煙，適合傾下計慢慢食咁。 老闆都好好人，又借差電比我地， 見我地未齊人又介紹我地過隔離行下韓國護膚品。 三文魚凱撒沙律：個沙律有螺絲粉，如果全部都係菜會比較好。沙律醬係要自己落嘅，可能我地太餓所以唔記得落汁，食到尾先加返。其實唔知點解餐廳唔直接落埋，又唔係有好多款沙律醬比我揀。
瑞士雞翼：好味，有一半好明顯係新煮，唔夠入味。 煙鴨胸蘑菇蒜香意粉：朋友話好驚食到d 咬唔開嘅鴨胸，好在依個咬得開，幾好味，因為無汁所以意粉就乾左d 喇。
番茄牛油蒜蓉蝦球意粉：個汁煮得好好味，令意粉好醒胃，蝦球大大粒！ 日式鰻魚炒飯：普通，可能因為我唔太好鰻魚。
牛干菌汁蘑菇雞柳飯：好鹹， 牛干菌汁同雞柳有少少唔夾，下次唔洗試。 蛋黃醬吞拿魚雞蛋意粉： 溫泉蛋加蛋黃醬好creamy, 非常美味，加上吞拿魚份量都幾多，必食！ 棉花糖朱古力雪糕窩夫： 之前睇食評見到好多人都推介依個甜品，雖然我地自己有蛋糕，但因為太為食叫左一個試試！ 好味，但如果窩夫厚d 會更好。 依間cafe 都算唔錯，野食大部份幾好，適合傾下計，又有得玩card/board games, 而且唔貴，我地6個人好似都係食左大約$800! 下次都會再黎！

星期五晚成班朋友想搵個地方傾下計，食宵夜，但又唔想去酒吧，有人建議黎依度食雞煲，大家無反對就起行喇。老實講，上次黎創興廣場真係中學年代，印像就係永遠都好多人企係廣場樓下。 上到去18/f, 雖然唔洗等，但都幾surprised, 成1am, 都仲多人打邊爐，幾乎full 曬。
叫左個招牌雞煲，少少辣，味道都ok唔差，普普通通啦，勝在有個地方有野食有啤酒飲。其他火鍋料就真係麻麻地，唔知係咪因為夜，好多野都無。佢有d 好特別嘅丸類，叫咩龍蝦沙拉丸呀，芝士蛋呀咁，仲有d係台灣丸，我第一次响任食火鍋食到d 咁特別嘅丸。 講到飲品就選擇多喇，有提子汽水，青蘋果汽水，芒果汁，7喜，百事，泰國啤酒, 仲有d 唔係好記得。 最後準時2個鐘，佢就叫你埋單趕你走，不過都接受到，因為都成 2:30am，而且我地不停飲啤酒，食埋野，都只不過係百幾銀落樓，去酒吧嘅一半價錢都唔止啦！

趕住下場，又唔想食快餐店所以就去左food court求其食，但求快！原本唔係諗住食韓國野，但我見到佢個番茄湯好似幾正，試下無 妨啊反正$45 一個set 。 個set 分別有湯，飯同小食一款，$45有3 樣野食，份量又唔算少，無論湯/飯/小食都有2-3個選擇，感覺都幾抵食！

番茄雜錦海鮮湯： 大碗，幾足料，有蝦，帶子，紅蘿蔔，番茄，洋蔥，薯仔，西蘭花。蕃茄湯底有用茄膏。 可惜洋蔥有d生，薯仔紅蘿蔔西蘭花都有d 硬，令原本應該好好味既湯減曬分！ 韓式泡菜豬肉飯：kim chi唔夠正中，嚴格黎講都唔算係kim chi, 完全無辣味而且豬肉份量少。建議試其他。 小食：魚腐配菇，好鹹，兩樣野一齊嘅味道有點怪。建議試其他。 可能我今次揀嘅，咁啱都唔係我口味，唯有下次再試其他款喇。

唔行落supermarket 都唔知原來除左food court 仲有其他餐廳。


行左幾個圈，我都係被Riso SEGRETO 嘅裝修吸引住， 華麗水晶吊燈，牆上有d 威尼斯嘅畫，天花板嘅牆紙又特別，仲有威尼斯面具，個裝修好有誠意！
由於我掛住影相，我唔係好記得我係order 左lunch set 定係main menu 嗰啲野。總之就係有湯+麵包，有main, 有餐茶架啦！ 湯：都係紅/白，無特別。 麵包：唔係蒜蓉包/查牛油而係蜜糖麵包，好好味！好少餐廳會食蜜糖麵包， 所以我印像好深刻。唔係生命麵包(蜜糖), 係烤麵包查蜜糖！

Main： 番茄 risotto 配雞脾，risotto 嘅番茄汁酸左d, 食頭一兩啖覺得好醒胃，之後愈食愈酸。雞脾就普通。
Main：魚柳配沙律， 魚柳炸得好好味，但如果個沙律返多少少野更好。 餐茶：蜜桃茶太甜，甜到我要叫佢比清水我自己溝淡佢。 整體上其實都唔錯, 一定會再黎。唔係我埋單所以完全唔記得幾錢，只係記得唔貴。

維記豬潤面，真係每次黎深水埗都想食佢。除左豬潤之外，其實我係超少食內臟，而維記豬潤更係我暫時覺得最好味嘅。

雖然係好好味，不過個賣相又真係求其左D, 因為煮豬潤時有血水，所以碗面煮出黎就有好多泡泡，係維記先係咁，其他餐廳都唔會有咁多泡。面唔會太淋，豬潤切得薄，爽口彈牙，洗得好乾淨，無腥味而且有比姜放湯。我每次都係湯都飲曬先收口！

一班朋友食完大排檔，唔食返個甜品邊夠喉 因為時間仲早，所以黎到都唔洗點等， 侍應幫我地開張大檯坐出面。 其實之前都試過好多次依間野， 佢嘅招牌甜品都差不多試過曬， 今次試法式焦糖燉蛋！ 平時我就唔係太好燉蛋， 好少食。 見佢個燉蛋都幾靚，又有雪糕，士多啤梨， 即管試下啦。

唔知佢d 焦糖係咪即叫即整，都等左幾耐下， 我嘅焦糖燉蛋幾乎係全檯最後一個到。士多啤梨同vanila雪糕好夾， 焦糖燉蛋唔太甜， 雪糕球同燉蛋個比例剛剛好。不過可能我根本唔喜歡食蛋，覺得個燉蛋太重蛋味，而且都幾飽肚， 所以下次都係試其他！如果喜歡食蛋嘅人不妨試試

晚飯時間，但唔係咁肚餓，所以淨係食左個甜品。 因為等埋男朋友，所以9點先食飯， 唔洗等，而且餐廳冇乜人， 任我坐。 餐枱椅以深色為主， D櫈好特別， 如果一班女仔黎食飯，依度影相應該幾靚。 睇住個甜品餐牌， 好在佢有圖，唔係我都唔知法式班戟、同美式班戟有咩分別。 三心兩意，又想食黑朱古力班戟，又想食香蕉班戟， 又想食d生果 咁就請左個侍應過黎問問佢啦， 但係個侍應好似第一日返工咁，對menu 唔太熟識。我首先問佢黑朱古力班戟有冇生果，佢話唔清楚，要幫我check 下。侍應返黎答我冇，咁我就決定食香蕉班戟喇。仲未完......我再問侍應，雪糕球有冇得揀味道， 佢又唔知，最終搵左經理黎答我。其實我問d問題都係好基本嘅啫，點解搞到好似我好麻煩咁架 更何況呢d問題應該好多人都會問。 講返個甜品， 賣相幾好

香蕉分量適中， 面頭嘅焦糖唔太甜，班戟2 塊中間有cream, 但我 覺得太多， 下次我會直接走cream, 淨係用原本雪糕個甜味。 唔知係咪要夾cream 嘅關係，班戟係唔熱嘅，可以話係凍添， 所以個雪糕係冇乜融到， 如果班戟熱，雪糕可以融到小小，咁就會更好味！