今日同阿女出街，去完準備食午餐，記得d人話呢間自家製瀨粉好食，所以慕名而來試一次。 今日可能星期六，下午唔多人，入到即有位。之後叫咗個高明瀨粉加魚蛋（因為阿女鍾意食）同牛腩，同埋韮菜餃。 等咗一陣先嚟個瀨粉，見到粗幼不一所以應該唔係機器做。個湯頭唔錯蛋就正常外面買到嘅白魚蛋，牛腩味道唔差，但真係好鬆化，阿女平時對牛肉麻麻哋都叫食，不過就搭咗一舊薑，都算啦。但瀨粉份量唔似其他食評講咁多份量，只係一般而已。 至於餃子就耐咗d，食落熱辣辣，應該係新鮮煎，食落真係爆汁，稍為放耐咗（因為餵阿女食粉）都一樣有汁。 價錢嚟講算係合理，下次可以再幫襯。

尋日去考試, 因為試場喺嗰頭, 所以特意搵呢間嘢 - 一直宣傳係傳統口味嘛...

入去即叫招牌食物雲吞麵啦. 

嚟到, 份量算係差唔多, 雲吞SIZE叫做正常, 第一時間即刻試個湯頭, 第一啖真係食到兒時味道, 佢好似真係用豬油, 份香味真係令我好開心, 但係味道真係淡囉...

跟住食個麵, 似乎真係有用油撈過, 夠滑又真係幾彈牙, 蛋味可能因為小弟條脷冇咁叻, 唔多覺有蛋香...

再講返食雲吞麵梗係要用浙醋同辣醬或辣油, 但傳統雲吞麵我就喜歡辣醬多D, 但佢唔係用余均益, 而且都因為唔想破壞湯頭, 特意落得少D浙醋, 少辣油同辣醬, 但係結果破壞咗個湯頭, 而且食到鹼水味了...

跟住食完俾錢, $32 大元嚟講可能佢出咗名D租貴咗, 但係如果用返余均益同個湯頭濃返D先覺得值囉...

可能都係一次起兩次止了...

今天原本諗住去同一條街既餃子店, 但原來今日休息, 所以即時上網搵到呢間都幾好評, 所以走入去試下.

韮菜餃麵: D韮菜味夠濃郁, 而且非常熱辣辣, D麵更正, 十分彈牙, 估佢係自製, 因為出面未食過咁彈牙的白麵條, (唔記得問嗰度D人係咪自製麵添), 但D湯味道唔得囉, 可能北方口味啩....

豆苗鮮肉餃: 一口咬落去已有豆苗味走出黎, 真材實料, 肉既份量都唔算多, 都幾好味.

大葱羊肉餡餅: 有羊肉味, 但D餡好少囉,

但點解冇北方常備既芥辣油, 醋佢哋都係用浙醋而唔係鎮江醋.

佢哋D茶唔係茶樓嗰隻, 老婆話好好味喎....唔知係唔係佢哋都有賣嗰隻磱山綠茶. 飲咗便算了, 冇諗過買.

老婆話D味精都幾勁...

不過嗰度似乎真係北方人主理, 因為包緊餃子的姐姐們都係用好流利既北方普通話溝通.

而嗰度有位服務態度非常好好既嬸嬸, 因為佢既好服務加埋所以值得俾個笑臉.

下次計劃試下佢既小菜同埋拔絲山藥.

因為幾耐之前雜誌話呢間嘢幾好，尋日同老婆去尖沙咀特意試下呢間韓國快餐店。

去到都要排隊等點餐同等佢哋安排入座，幸好都唔算等好耐，仲可以睇下揀乜食。

牛肉鍋飯：之前仲以為係石鍋，原來係鐵鍋 (可能易洗但又唔易爛啩)，D料同味道都OK, 但老婆覺唔多夠味喎，之但係落咗韓式辣醬後就覺得都幾好食
韓式炒年糕：諗住只係有年糕，點知仲有韓式魚蛋同埋一隻雞蛋，D年糕炒得唔夠均勻，有少部份年糕黐埋，軟熟度就覺得如果可以軟DD會更好食。而佢炒年糕既辣醫剛開始食唔多覺辣，但係一路食就發現佢都辣既。
韓式壽司 (魷魚餡)：食落真係同日本卷壽司唔同，味道幾好，不過塊紫菜唔脆，脆的話覺得好食D (個人喜好)
炒粉絲：覺得最正係呢個，幾大陣蒜蓉味，有中式的味道。
玉竹茶：冇乜特別
凍梅實茶：初初飲落直情覺得飲川貝批杷膏陣味，不過我LIKE!

下次要去試下佢個泡菜煎餅，因為 2 個人食唔得多，點咗幾個韓國食品都唔記得點呢個。。。

嗰日同老婆同埋個FD聚下舊，見到網上評價唔錯，加上問埋一D鍾意周圍食既朋友都話食物可以，所以管試試。

上到去即時有位，OK。避免佢哋漏單同埋出完第一輪要長等第二輪，所以第一輪已叫咗大部份嘢。所以只能講一D印象比較深既食物。

三文魚刺身：正! 夠肥美 叫咗3輪共30片以上。(最好食)
馬刀貝刺身：OK，夠爽
虎蝦刺身：SIZE OK，肉都夠爽，唔錯。
炸蝦天婦羅：粉比較多但蝦夠大，又熱辣辣，幾好食
燒菠蘿：燒得唔夠, 水汪汪又唔甜
燒羊架：羶到冇朋友，食開羊肉既FD都頂唔順吐返出黎 (好彩我冇食...)
玉子壽司：玉子比較薄，但勉強OK
軟殼蟹手卷：軟殼蟹份量勁少。
海膽手卷：海膽好差又係份量少
燒牛肉壽司：塊肉又細，粒壽司又細....
燒三文魚壽司：同牛肉壽司同樣COMMENT
雪糕：有三種口味 (芝麻、綠茶、,紅豆)，只有芝麻比較好，綠茶冇綠茶味，紅豆都有紅豆皮但味唔多似囉...

雖然知價錢 168+10% 唔可以預佢高質素囉，所以都 OK。而最差係服務態度，第一輪點既手卷，居然到接近埋單，總共催咗3次先至整俾我哋，人哋遲入場既，都點到囉... 而且我點嗰時，都未滿座，仲有好幾張"吉"枱。到送手卷時，唔係擺上枱，直情係跣過黎 - 冇乜禮貌。

我諗唔會再幫襯了。

老婆近生日，佢特意放假休息。之前成日都想試豚王，所以都安排去一次。
12點左右到，真係排晒長龍，等咗個幾鐘先有得食。
試咗佢哋既OUT OF MENU - 元氣王同海老王。

元氣王 - 點咗濃味，咖哩味濃郁，但係湯唔夠熱，湯都杰D。D麵掛晒汁都OK，但多D湯會更好 (食完成碗麵差唔多冇晒D湯 - 但我唔係飲佢D湯而冇囉)。D叉燒唔係一片圓形咁，有D失望。

海老王 - 老婆話覺得有好濃既蝦湯味，但裡面冇蝦。希望佢哋會加蝦就會更加襯海老王個名。叉燒佢話都OK。但D麵普通D喎。D待應姐姐問佢加唔加湯 - 點解冇問我既。。。問我一定要加湯。而老婆都覺得D麵湯唔夠熱。

D配菜以芽菜嗰隻好食D，我同我老婆都加咗唔少

食咗又唔覺點口渴 - 我老婆對味精比較敏感都覺得好似冇味精咁

但我諗下次試下原味先至得。。。同埋要早D去搵位。。。仲要加多D湯。。。

之前見到食評寫呢間既重慶涼麵好正但踫唔啱時機, 今日老婆話想出街, 所以特意去呢間試下.

去到見到原來呢間店以外賣為主, 但即場食又得, 因為佢哋都有膠椅喺店旁, 不過係路邊囉...

咁第一時間梗係叫個涼麵先啦, 我食中辣, 我老婆食少辣.

原以為佢哋即場煮麵再攤涼, 原來係已經一盒盒整好晒.

佢哋D涼麵係攤涼咗既麵, 唔係雪柜雪凍嗰隻...

買嗰時店舖位仁兄同我哋講"記得要撈勻D食先"

講下D料:

麵: 係幼身既冷麵, 涼涼哋, 但個麵身夠爽. 老婆買嗰時話唔想食凍嘢, 但食咗之後佢都覺得都幾好味, 冇抗拒 (冇叫我幫佢食埋)
配料: 我哋食到既有芫荽, 葱, 芝麻, 但食唔到花生.
醬汁: 喺碗麵既底部, 應該係鎮江醋,
麻辣醬: 鋪喺麵上面. 少辣少D, 中辣多D. 好似只係用咗麻辣米線嗰隻麻辣醬. 撈麵食的話, 個人感覺稍為多渣 (但個個麻辣醬係咁, 冇計)

撈到D麵勻晒之後食, 整個味道配搭幾好, 之但係麻辣度過輕 - 連我老婆試咗一啖我個中辣, 都覺得佢可以食到, 我就覺得我下次食大辣都唔會有問題. 之但係食完之後約5分鐘左右, 終於感受到舌頭有點麻, 又有D辣味走出黎. 不過呢個麻辣既回馬槍都係覺得唔多夠辣. (與我食過既麻辣米線中辣比較)

$7 黎講份量OK, 比起成日食街邊魚蛋, 多咗個又平又幾正既選擇.

而佢哋又有重慶雲吞, 見到都有唔少人幫襯. 下次再黎要試試, 睇下會唔會有另一個驚喜. (不過就唔會考慮喺街邊食了, 門口所謂既枱太細, 仲係得一張, 外賣返屋企慢慢歎妳好過...)

今日下午出完街, 忽然想食佢哋既麵, 所以走咗入去叫咗碗牛雜麵 (走肺, 因個人覺得比較污糟).
之前都想寫架嘞, 但係時時都唔記得(開始老人痴呆症了)
講返個麵先:

湯: 廣東雲吞湯味, 仲要係自家煲既 (佢煮麵個位有個長身大鋼桶, 原來用黎煲湯架) 呢個真係比較唔易搵, 因好多都係潮州湯底, 魚湯底, D湯可能係交黎....加埋五香汁, 味道豐富咗好多.

之但係可能個五香汁既問題, 個湯稍稍有苦味.

牛膀(3件): 稍嫌表層個膜好似厚咗少少 (上次食都係咁), 但味道OK.
牛腸(2件): OK啦, 唔會過稔.
金錢肚(好似3-4件): 夠軟身, 好味
而食食下個口感覺到有陳皮既味道, 同埋食到有少少薑塊, 相信係來自五香汁...
麵: 夠彈同爽口.

整體黎講都唔錯, 只不過煮麵位老兄要舀湯(從大鋼桶舀到細水桶), 唔知乜原因, 之但係因為咁就要多等少少時問先有得食, 加上佢舀完湯見唔到佢有洗手就攞碗淥麵了, 所以扣D分啦...

順帶一提, 佢哋近排又加價了, 盛惠15大元, 不過在同區內仍算最便宜, 不過冇以前咁便宜了...

尋晚去慶祝朋友生日, 其中有個朋友話呢間嘢都幾平幾抵食, 所以走去食下啦...

但真係失望囉.

叫咗個炸腐竹胡椒豬肚湯底, 湯黎咗但係D火鍋料差唔多成半個鐘, 仲要催佢哋先開始黎. 所以我哋都食咗腐竹同豬肚先 但味道又真係幾好既

多汁韮菜餃: 裡面唔覺有汁, 所謂多汁係浸完火鍋湯之後啩可能 但味道都唔差既, 夠多韮菜)
魚片頭: 冰格攞出黎咁囉, 隱約見到D雪仲係面...
肥牛: 做緊$10/碟, 每碟得4-5片, 但都好薄...但$10貨仔就唔要求得多了...
炸手捲腐皮: 俾埋酸甜汁, 就咁食都得, 但係黎食火鍋架喎...不過索咗火鍋湯汁後都幾正
三文魚生: 送咗2小碟, 但唔夠新鮮, WASABI得少少又冇辣味
羊肉: 唔羶, 都叫OK
蝦: 都見到係生猛既, 不過又係到佢醒起先俾我哋(嗰時已經係食到後半部份, 但我哋係一開始已經點咗...)
仲有叫埋其他火鍋料, 大部份都係普通貨仔啦...
隊咗十幾支大啤

但係我哋都冇乜叫貴嘢, 最後埋單要成千有多....

早知去幫襯D一人百零任食嗰D啦, 叫埋啤酒我估都冇咁貴囉...

不過個阿姐笑容都夠, 但係可能員工比較少, 要搵佢哋都要等佢哋有時間先招呼得到我哋囉...

我諗個人唔會再幫襯了...

今晚朋友聚舊, 約咗喺呢間食(我住附近都唔知,,,)

泰式墨魚: 墨魚份量少, 但味道酸甜度非常好.
沙薑雞腳 x 2: 我老婆話非常好味喎.
啫啫雞煲: 老婆話雞只係OK, 豬潤俾其他人夾晒, 冇得試
油浸笋殼魚: 外表炸得夠香口, 魚肉夠滑
沙拉骨: 唔得, 覺得稍為過鹹, 沙律醬唔夠均勻
椒鹽鮮魷: 炸份啱啱好包住, 唔會太多或太少, 肉非常嫩滑
椒鹽九肚魚: 同椒鹽九肚魚一樣, 魚又唔老, 細骨食唔到, 只係食到脊骨但都夠軟身, 食埋落肚都冇問題
炒通菜: 唔知係馬拉盞定蝦醬炒, 味道都係OK既
豆豉鯪魚炒油麥菜: 味道都都幾好咁啦
白灼蝦 x 2: 有D唔夠新鮮囉, 有部份稍稍發霉, 但都勉強食得既
生蝦刺身: 非常正, 肉夠滑, 尤其點咗D泰式醋汁, 味道好夾
揚州炒飯: 夠爽身, 味道都唔錯, 不過蝦就少咗D
仲有10幾支大啤

計埋都係一人一百左右, 非常抵食!! 最重要係大部份都好味道!!!

不過D位好迫囉, 仲會撞到後面枱既人