好耐都冇踩過單車啦!所以都好耐冇入過大尾督.
而且細細個入去,都係去BBQ.都唔知道,原來而家有好多美食.
踩完單車就順便開餐,朋友就一早訂位.
第一次,除了過節之外去食盆菜,所以都幾有新鮮感.
地方就偏左少少...但都唔難搵,環境唔錯,比較寧靜.
我地一行七個人,所以就點個家鄉傳統中盆菜
賣相都幾吸引,仲砌得幾靚.
蝦:全部大大隻,又新鮮,味道唔差
雞:豉油雞,多肉少骨good.
鴨:味道一般,太瘦冇乜肉
斑肉:炸成一條條,方便,但偏淡
魚球:粒粒Size都差唔多,又彈牙,好味
花菇:夠淋...但唔夠入味
豬肉:夠淋,又入味...正!
其他配料:豬皮,魷魚,支竹,芋頭,蓮藕,蘿蔔
這幾種配料都較淋同入味
可能放得比較低,煮既時間又耐D.
另外仲加左幾個(薑粒砵仔蒸飯)
味道唔錯,又幾香噴噴,但略嫌多油.

係前一日突然打黎話又冇魚蛋又話冇乜冇乜要轉咩發菜個d
突然咁打黎跟本冇可能話唔要而去訂其他地方
迫於無耐就由得佢轉
到左個日 本來訂左係7點前話送黎點知成9點先送到
本來一家人開開心心都等到冇心情
好喇!送到黎
一打開
唔係呀芋頭成手掌咁大仲要成5-6舊咁多
仲要係唔熟既
再試下其他
雞又係唔熟既
豬肉食三舊有一舊係臭既
得隻蝦係正常小小
魚蛋方面冇咩好講，只係用街邊個d10蚊6粒既魚蛋

團年飯食到成肚火
再有機會
請我都唔會食

年初三赤口
一家人在家中吃盆菜,
本來有好多間選擇, 因每逢過時過節都是吃盆菜,
朋友說這家盆菜好食,所以黎試下就訂了個大的. (於年三十)
點知
送來的人兄來到時面口唔好不特只,
我問佢是否有餐具的,
佢話你有無落order, 無落就無的 wor,
間間都不用講的la, 我訂的時候你地又無問,
我十幾人食, 又住村屋, 荒原九百里無超市,
用什麼食呀, 你地都 xxzz,
又要駕車去買, 無法
終於都有得吃了,滿心歡喜地
嘩d 蝦:...... 霉的,
蘿蔔.......唔入味,
魚旦......可以,
門蟮..... 唔覺眼
魷魚..... 唔入味, 唔覺眼
冬菇......入味, 數量唔多
芉頭...... 大大(夠)麻麻地,超覺眼
雞.......無野講因唔想提..... 未食到底已經燶咗因無送竹格.

什麼正宗盆菜...... 真真假假....唉.....

成仟元(因送貨要加一)食到一肚火,
一句講晒, 祝佢生意興隆.

一定唔會再訂.......

2009年2月1日為 己丑年正月初七, 亦即 人日. 人的生日咁解.
所以約埋一班朋友去食盤菜, 睇朋友D相, 話哩間好食, 所以黎試下

Book 左7點, 但由於人未齊.....所以等到 8點先叫.....真係唔好意思
但都無人催我地, 幾好幾好.
經一輪討論後, 難得入到黎, 叫個 〝一品〞喇.

網上睇有
鮑魚- 味道ok, 無咩特別
海參- 麻麻地, 有好大陣類似藥材ge味
花膠- 一般若
鱔 -(唔覺眼-,-)
魚球- 正, 好彈牙, 可惜只夠1人1粒
大蝦- 由於我有時食完會有耳仔〝痕〞, 所以比左 女朋友食, 聽講好好味 亦都係1人1隻份量
雞 - 幾好味, 啖啖肉
豬肉- 數量非常之多, 味道都幾好, 肉質較硬, 有一層厚厚脂肪. 可以接受
魷魚- 唔係好入味, 數量亦唔多
枝竹- 好味, 軟硬適中, 吸左d湯正
豬皮- 亦都係因為湯汁正, 所以味道一流
蘿蔔- 夠入味, 亦都夠甜
蓮藕- 夠甜
芉頭- 麻麻地, 唔係好有芉頭味, 可能係因為d 湯汁影響
冬菇- 夠入味, 但數量唔多
送生菜另外叫菜苗, 2隻菜都好食, 無爛無沙. 菜苗夠嫰, 加上湯汁正.
所以成盤清晒(除左d湯)

總結: 味道好, 價錢合理, 但個人認為〝傳統家鄉盤菜〞會抵d, 因為佢d 鮑魚, 海參等無咩特別之處. 下次試佢 〝傳統家鄉盤菜〞

今日星期一去旅行

全檯11人叫左兩個小盆菜

一盆都係$2XX

先講面層既餸 干燒蝦碌同豉油雞都唔錯

特別係豉油雞 應該用左新鮮雞去整 所以個個都讚好

其他仲有班腩同瓊魚球 不過由於應該放上去個時係凍,而且放係面層既旁邊

搞到食落口都係凍 呢度有少少扣分

再落D有豬腩肉 不過因為我唔鍾意食就冇試到

跟住浸住南乳汁既餸料就有豬皮,枝竹同蘿蔔等

豬皮同枝竹就好正常 但係蘿蔔就帶苦味


最後值得一提就係服務態度都幾好

因為我坐係騎樓位 俾太陽曬住

一叫到侍應就即刻落簾

可能個時得我地一檯人既關係

不過之後個到真係好多人 好彩我地有人預先訂位

1Oct2007 1827

老遠入黎目的都係兩家人好耐冇咁人齊。

趁家從忠誠訂了家鄉傳統盆菜，與我上次寫的一模一樣，閒置時間越短時間，味道始終會比較好。

而另一盤是自己村內煮，材料沒有買番來的名貴，但味道再加上家庭式的煮法，點都會好一點。

不論如何，大家過了一個愉快的晚上。

我是居住北區的新移民(由市區搬入來)，經常食盆菜，自取或到會都有，價錢都係七佰多元，通常叫幾圍都包飯，我朋友喺三月經電話預訂咗三圍忠誠大盆菜及一圍中齋盆菜，果位小姐答覆佢\\\\\\\無得包飯，飯要三十元一盆，仲要唔可以訂三盆飯(因為我地訂咗四圍)，明知浪費都無辦法，惟有要四盆飯，但結果他們送來一盆飯(都食唔晒)，食物同我食開都差不多，賣相都OK，豬肉都好入味，但蘿蔔就完全無味，魷魚個個都話有牙都食唔到，未食到底已經燶咗，因無放竹隔在盆底，環境尚算乾淨，但背對背坐，太逼了，我們一團42人，埋單計數是三圍$780加一圍$480(齋盆)連飯合共$2940(未計飲料)，但找數時收銀先同我講，四圍以上包飯及有團體價，即$730一圍包飯連同增加齋盆變大盆，合共$2790，用$150買一個令人食完唔敢回頭o既口碑，除非你祇做生客啦！值得咩？仲要上佢\\\\\\\網頁都睇到的優惠，做咩要呃人，唉！

上次食o既時候發覺差左, 隔左咁耐, 屋企人又想食盤菜, 今次o既水準又正常返ｄ。
茄汁蝦夠入味, 肉爽頭又多糕, 腩肉又幾好味，可惜肉質較實, 炆唔腍呢,　翻煮後就好好多，白切雞都仍有雞味, 肉質略鞋,都不打緊，都係我唔喜歡ｏ既雞胸肉，另有東菇魷魚沒吃, 豬皮試了一啖好似有點羶味就掉了, 最好吃的是鯪魚球, 沒有粉粉的口感, 彈力適中, 又有鯪魚ｏ既味道。

對於一個大尾篤人而言，搵食係最慘最慘的事。唔係食忠誠就係食木偶。話係咪特別好食呢，ｓｏｒｒｙ，　唔係囉。不過呢，咁多樣大尾篤野食而言，　忠誠ｄ盤菜係我至愛。

次次都係呀姨訂左之後自取，　之後返佢屋企一堆人企ｏ係度食。次次食親都食乾隆盤，　有鮑魚有蝦有海蔘有花膠。　咁多樣至好食呢，　係枝竹蘿蔔五花腩南乳汁。　

至愛的人走得的都走曬。　都真係唔知以後仲有冇呢ｄ一齊圍埋食盤的日子…

話時話，　點解大尾篤ｄ食肆咁唔爭氣！？　

過去既星期日與這裡的網友踩單車，落番大霸後便去忠誠泰國菜休息番下兼補給。數下數下，四個月內第5次入大埔，對於自己係香港人兼有點'自閉'來講都算係個記錄。
有兩次都係pre-trip project，到上兩個月真係黎料既時候，這間餐廳便是行程的最後一站，組員早已訂了一個家鄉傳統盆菜(大)，材料分別干煎大蝦、酥炸斑肉、玫瑰油雞、發財魚球、五香糟鴨(細盆不包在內)，紅炆菇、魚露蘿蔔、香滑豬皮、南乳支竹、爽脆魷魚及家鄉炆豬肉，客人(同學)食左冇耐好心急在底夾蘿蔔食，結果當然係難於入口啦，最好食還是蝦、魚球及支竹，還附送生菜一碟，最後都要叫多碟，侍應還幫我們加汁。一行十四人(包括Miss)食到剛剛好。
材料及賣相對要求高既人來講不算有乜特別，但始終對於budget-orientated及唯一一組有飯開，功課及人情已經超額完成。這裡還有以鮑魚、海參及翅為主的盆菜，和素食盆菜，可以任供選擇。當然可以堂食、自取及送貨。
過多四個月就grad，在此多謝Miss這年半的教導，期間雖然發生了極不愉快的事，一度大家都短暫傷心過，最後一堂之後的謝師宴當然係我地俾啦。

相隔一月又食盤菜, 今次d 料好入味, 尤其係D 腩肉, 不過食完就有D口渴現象。

今晚係第一次食盆菜, 家人話想去呢間食. o個度係一間村屋的地下, 坐得唔係好多圍, 但都差唔多滿.

本來佢俾張細少少o既枱我地, 但係我地人較多, 後尾佢一有枱就即刻同我地換, 而且, d waiter哥哥相當好服報, 講晒唔好意思之餘, 又幫我地拎張椅擺o野.

我地要左一個一品盆菜(中盆, $950), d料都ok, 但覺得佢都係較貴, 與傳統o個隻係爭左鮑魚, 海參, 花膠同埋鱔, 價錢就爭左$400, 但以上提及o既o野都唔係好多. 所以如果再食o既話我實會要返個傳統就算.

後來要左個鮮雜果涼粉(大, $60), 生果多, 涼粉亦多, 我地叫d哥哥仔俾花奶同糖水都好有禮貌咁俾我地, 服務相當好.

呢間o既盆菜巳經食過好幾次,但佢地水準保持得唔夠穩定, 而揀料較優的有雞同豬肉, 有雞味之餘又有豉油味, 豬肉燜得又林又入味, 因為食過比佢地更差o既盆菜, 所以都覺得算唔錯。
因為送貨司機要看車, 只可以送到屋企樓下, 自己落樓比錢自取, 連送貨費合共$330.00

上個星期六同自己班朋友仔去左其中一位多年好友o既新居渡過一個美好o既周末. 其中一個戲碼, 就係o係呢個咁舒服o既環境下食盆菜.

之前我地己經有人試過食過忠誠o既盆菜, 又覺得幾好, 所以今次都o係o個度訂.

我地要左個中型o既盆菜. 原價都要成五百大元. 但我個朋友住得好近, 所以我地搵左o的壯丁去自己搬個盆菜返去朋友個屋企, 免加一不特只, 仲有九折!

至於個盆菜裡面(以我所見及記得) 有炸魚, 炸鯪魚球, 腐竹, 炆豬肉, 好大隻o既煎蝦碌, 雞, 鴨(唔係太肯定係咪鴨...), 冬菇, 蘿蔔, 蓮藕... 等.

作為客家人o既我, 都覺得個盆菜幾正宗. 整體o黎講, 味道可以接受. 起碼都唔會離譜到搵普通o既魚蛋代替炸鯪魚球. o個o的蝦碌都應該係新鮮o既, 蘿蔔都夠腍, 豬肉炆得入味但有人話硬左少少, 唔似以前食過o既靚炆豬肉咁腍同入口會化咁, 但係我食o個件雞好似唔熟得晒.

如果有一大班朋友, 而大家又想食下o的風味家鄉食品, 盆菜都係一個幾好o既選擇.