好耐無試過食北方菜，睇完某雜志介紹過君悅酒店既滿堂彩，加上真系好想食片皮鴨，所以同老婆BB一起去試試。

另一個原因想試呢間野就系之前我去北京既時候當地朋友想帶我去食片皮鴨，佢話全北京最好食就系君悅酒店既“長江壹號”（無記錯系呢個名），但因為無訂位，爆滿，聽講要早起碼一個禮拜訂位添，所以系我心里埋下左不憤...

聽講滿堂彩系同呢間長江壹號有D關系的，所以點都想試一下。

真系好掂。

一個個菜講啦，以下是我地食既野：

北京烤鴨（MOP320）

可以兩食，片皮鴨就一定要架啦，另外可以選擇鴨湯或椒鹽。因為想清淡D，所以叫了鴨湯。

順便講句，如果要食烤鴨要提早預訂的，提早講好要食鴨的時間。

師傅會系預訂時間拿出烤鴨系你面前開始片皮，基本上會片出4樣野：鴨頭、凈鴨皮、鴨胸（唔連皮）、鴨髀（連小皮）。我老婆就唔識食鴨頭啦，我試了，無咩肉，可能有人喜歡食鴨頭，我就麻麻。凈鴨皮食落好香，很奇怪地服務員建議凈鴨皮應該系點沙塘，我就無試過咁食，鴨皮好香、夠脆，點沙塘都幾特別。重頭戲當然系“鴨肉夾餅”啦，佢地會提供兩籠既包皮，一籠大概有10塊左右。一籠食完再上第二籠。食過真系好正，睇包皮的厚度（好薄）已經知道師傅既功架，鴨肉好香，加上我覺得最特別系醬油，味道好特別，有D甜。加埋D蔥一齊食，個Combination真系好正。強烈推薦。不過有少少意見就系，由于當日我BB好中意食青瓜，所以到最後唔夠青瓜夾，想欏D青瓜，但系要另外收錢，所以最後都無再點。

講下個湯，睇起黎真系好好飲，但系一飲，覺得怪怪的，唔系因為難飲，而系覺得好似無落鹽咁，比較清淡。因為正常黎講娃娃菜煲鴨湯應該好野味的，但呢個就比較清淡，我想會唔會忘記落鹽？最後好奇問服務員，佢話其實好多客都咁講，但師傅系故意的，由于片皮鴨味道較濃和感覺較油膩，所以故意湯整得淡D。總既黎講如果你中意野味D既湯你系唔會好中意呢個鴨湯的，但我飲兩口後覺得還可以，亦清一清口內味道。

酸菜肉碎豆腐（類似名字吧）（MOP50 - 60）

叫呢個菜主要系因為想叫D清淡野比我BB食，同佢中意食豆腐。但估唔到呢個餸比我同老婆好大驚喜，雖然睇落無特別，但D酸菜配肉碎好好味，最特別既系D豆腐，唔系平時食個D一磚磚既豆腐，系師傅自己整的，好軟同好香豆腐味，好有北方味道，加上唔貴，好低食。

香辣蓮藕片炒牛肉（類似名字）（MOP120）

好味，非常香口，夠辣，牛肉都好靚，有北方風味。蓮藕片系爽的，加上大蔥既香味，非常唔錯。

北方豬肉煎餃（MOP60）

我比較中意食餃子，所以食過之前既餸之後對呢個煎餃比較期待，但老實講有D失望，除了賣相夠靚之外，其實味道無咩特別，都唔系話唔好食既，但系就無之前既餸咁有驚喜。

總結

有驚喜既餐廳，基本上除左煎餃之外真系無咩可以挑剔的，非常好食，最令我深刻既系餸菜真系有濃厚既北方菜味道。環境唔錯，open kitchen設計，坐落好舒服。順帶一提，呢度既service亦系無可挑剔，服務員非常細心，態度好好，但有D服務員既廣東話麻麻地（內地人），有時唔系聽得好清楚佢講咩。雖然3個人食左六百幾蚊，但以餸菜既質量、環境同服務黎講，我覺得真系唔貴。以後仲會去幫襯。

之後我哋仲系酒店大堂既餅點買左D蛋糕同葡撻，D蛋糕好好食，$15一件都唔算好貴。葡撻我老婆食過覺得個皮超好食，但D餡就甜左D，但$10一件可以一試。