首先~ 我要怪開飯啦~ 好大個老點呀~ 我在佳寧娜接女友放工~ 沿著友誼路行左半個鐘行到皇室假期~ 週圍問人置地係邊~ 最後上左的士問司機大佬~ 點知佢話就係佳寧娜後面!!! 仲比司機串我 "速進深圳發展" 吃完去坐地鐵經過佳寧娜只好苦笑~ 仲要行番友誼路見到 "深圳發展中心" 的石柱~

講笑正題~ 圖片中的照片是錯的~ 在2樓不是地鋪~ 環境十分美觀~ 但坐位卻沒有梳化~ 失色了一點~ 我同女友都行到好肚餓(多得那位人兄的地標)~ 叫了白粥底~ 4色丸~ 生蠔~ 懷山~ 滿一百蚊奉送2條油條~ 打邊爐size的白粥煲得好希~ 但卻好滑好入喉~ 4色丸是即手打/機打肉丸~ 生蠔新鮮香口一點也不腥~ 懷山普通~

總括來講~ 好食但唔多抵食~ 兩個人就咁計埋加一都146人仔~

留得知己好友相聚一堂是權叔最愛做的事。總覺得坐下喝一口鐵觀音或錫蘭紅茶肯定就會發生化學作用，談上一整天。當然也少不得出於漁米粥順德廚子的菜肴和功架，雜菜蒸雞、香菜撈牛肉、蝦醬茄子煲各有特色，滑嫩、酒香、蒜香、與榨菜鹹香爽口，嫩雞的黃酒清香。真好讓我們體現順德菜的精髓所在。雙皮奶也值得慢食品賞一番，好讓水牛奶的獨特口感留給自己！自私歸自私，但漁米粥的裝潢確實令我歡喜不斷，西關大門，精緻茶具，小溪流水，竹林的寧靜加上特意保留的磚瓦牆壁，曾在廣州遇到的西關大宅騎樓情形回想不斷！

樓上講嘅奶皇糯米滋,可能係叫脆皮糯米滋,外型一流,一口咬落去個脆皮............正(似波蘿包的皮),心諗呢件加埋內裏的奶皇應該好得,可惜裹面D唔係奶皇,係椰絲花生,可惜佢做得太差嘞,椰絲粗又靭,花生大又淋.............................極難食

其他食品都可以,不過不失
特別的是有侍應用一煱熱水幫你清潔食具

作為一日之內第三餐火鍋，一定有過人之處，就等我帶大家一齊體會下．

早在月前已經有網友提及，而上次試食全羊宴時經過，心中已盤算著一定要拉隊試試．

門口處的魚池，設有大大小小十幾個魚缸，全都是淡水魚，當中更有生劏鱷魚供火鍋之用，其實都幾殘忍．

原先訂了相連廂房，但由於人數太多，根本容納不下，其實當時還未到七點，大堂已經有八成客，果然人氣火熱．

幾經轉折，在大堂一角佔了兩張檯，好不容易先可以廿二人坐好，（但仲有幾位未到）二話不說直奔魚池，鱘龍魚除了係鴻福品嚐過之後，好耐都未踫見過，為公為私，就選了最大的一條，雖然一斤不過６８元，但申算下來，都要近二百蚊人仔，因利成便，就一分為二，骨腩作粥底，魚肉用粥灼好了．

此店除主打粥火鍋外，小菜是以順德菜為主，五花八門，單是菜譜已經睇到頭痛．

粥底分白粥及粟米粥兩款，簡簡單單的就白粥，其實白粥亦不過是粥水，當中沒半點粥花在內，而且是半點鹽都不下，要從配料中提味，所以配料多少同事後碗粥有莫大關連．

牛相連：一個幾怪既名，聽侍應介紹，是牛心附近的附肉，份量不多，果然每塊都是碎上，但入口唔覺牛味，總算有點咬口．
竹腸：說穿了不過是粉腸，切成半寸來長，清洗得乾乾淨淨，感覺幾好．
牛柳：入口嫩滑，但好奇怪，牛味都係唔濃．
牛’月展’：算好少少，三種火鍋料中，算最好肉味，亦都最快清．
鯪魚丸：打得鬆散，魚味輕柔，美中不足．
菜心頭：滾幾滾再混入什錦粥內食，有嚼口又清清地，幾好．
鱘龍魚：肉質與平常踫到的淡水魚真的有所不同，只須灼半分鐘左右已經食得，入口爽脆，魚味充盈，肉質嫩滑，雖然叫價唔平（以淡水魚而言），但係值得一試．


順德菜早享盛名，求求其其都可以叫到好野．

[b]順德釀豆腐：煎釀豆腐一向是拿手菜，再加入炆過的黃豆埋茨汁，豆味好出，但豆腐表面吸收茨汁後，少了一朕咬口．
英德隔水蒸走地雞：有時想食靚雞，真係要返大陸，雖然貴相不佳，但幼雞經高溫蒸煮過後，沒半點肥油，雞味洶湧而出，所以唔到五分鐘都無晒．超好味．
鹵水碌鵝：入味得不得了，又係唔肥，肉質幼嫩．
煎魚餅：原先有另一道煎雞餅，但竟然無做，唯有退而求其次，只見熱辣辣上之餘，時間拿捏得好，表面微帶金黃，不用蘸點蜆介汁都已經好香．
雞蛋煎魚腸：焗魚腸食得多，煎魚腸真係第一次食，由於用煎式作法，而且魚腸亦因為碎上再混入蛋醬中再煎，將魚腸的腥味壓到好低，怕腥又想食既人最合心意．
蒸三臘：即是臘腸、臘肉、臘鯪魚，又係第一次食，估唔到臘鯪魚吸收左臘腸、臘肉香味之外，肉質又唔太硬，總之用作送粥就一流．
拆魚肉扒柚皮：小弟一向對柚皮情有獨鐘，問我點解？我答你唔到，一句講晒～～～個人喜好．講真呢個柚皮真係麻麻，鯪魚肉打碎埋茨燴，兩個貌合神離，真可憐，分手算啦！
手抓山東羊：比起老院子好得多，不單有微溫，既煙韌肉質又帶有甘草，桂皮香味．
炸鮮奶：好出色，色澤金黃，外脆內熱，又嫩滑，香港都唔多地方有咁高水準，結果想再要都賣晒．．．．．．
榴槤酥：真係好奇怪，呢度點心水準比起坊間好多名店好得多，就算豫園或者王子國宴都比不上，雖然對榴槤一點都不喜好，但一試之下，又係果句～～外脆內熱，又嫩滑，榴槤味濃郁．
奶黃糯米滋：造型獨特，晶瑩剔透，不過唔夠分，無食到，可惜．
奶黃流沙包：奶黃唔夠流質，雖然好香奶黃味，但話明流沙，咁都做唔到，有點可惜．
油條：真係即叫即炸，脆卜卜，送粥又係好得之作．

小插曲：有侍應中途打瀉汽水，但一句道歉都無，反而同經理講完，佢好想捉個侍應出黎ｓａｙ　ｓｏｒｒｙ．有咁既態度，係值得比分．

ｐ．ｓ：真係諗唔到小菜比火鍋更出色，而火鍋檯有獨特設備，當轉動到特定位置時，可以調教火力大小，真係諗得周到．

小貼士：最好先訂檯，真係勁多人，而且好多魚一賣晒就無，食早好過食遲．