芽莊越式料理，提供一般越式美食，感覺還是有點港式化，地道味不足。

先來一碗生熟牛肉河，湯底牛肉都無乜特別。大蝦柚子沙律，燒大蝦和柚子沙律兩款食材感覺有點格格不入，所謂柚子沙律，其實和單吃柚子無異。沙爹雞肉串，雞肉用燒烤方法烹制，肉質難免乾韌了一點，沙爹醬味道亦不是太突出。最後是蝦多士，更和我所想的有分別。平日的蝦多士，係新鮮嘅蝦肉放在白麵包上炸至金黃香脆，而這兒的蝦多士，則把切碎了的蝦膠放在法包上焗，蝦味不足，口感亦比炸的多士略遜一籌。

[16/11/2009; Mon]

今日跟去年暑假的 intern 同事食飯，好耐無見喇。

大家都想食越南菜，係灣仔我覺得芽莊最好。認識芽莊因為以前係中環工作時同事介紹的，午飯時間真係好多人，灣仔店的情況無咁嚴重。

記得幾個月前見到隔離檯order的燒牛肉撈朦，牛肉大大舊又好香，印象深刻，所以今日就叫黎試下。

朋友仔話想食沙律就發版叫了一個大蝦柚子沙律。

1. 大蝦柚子沙律 – 兩隻蝦烤得好靚，食落蝦頭有膏，柚子唔酸，好多好多炸過的蒜片，蒜味唔大可以接受，配上腰果，有咬口又好味。

2. 燒牛肉撈朦 – 牛肉兩大串，好香lemon grass味，食落仲有一絲絲的香茅，撈朦的配料好足有青瓜絲、甘荀絲、生菜絲、炸過的蒜片，汁料用樽另上，個樽幾靚而且乾淨，要讚下。

點菜時聞到隔離檯的牛肉湯河，香濃的牛骨湯味又突然諗起佢的蒜蓉飽都好好味，好想食呀，不過見好瘦的朋友仔無咩興趣，自己都算減緊肥所以放棄了。

臨走時見到牆上的海報，佢地係Ocean Terminal開左新鋪呀。雖然Rice Paper都好味，不過始終有少少fusion的味道而且若貴，以家係TST想食越南菜又多一個選擇喇。

因為在灣仔上班，所以放工後與太太去芽莊嘗試越南菜晚餐。由於當時是平日大約6時半，餐廳有大量空位。裝修有點像尖沙咀海港城同樣是吃越南食物的Rice Paper，幾雅致。

我們二人點了以下食物：雞絲河粉(有湯)、蔗蝦、咖喱牛排配蒜容法飽。越式湯河可以說是越南餐廳的靈魂，雞絲河粉有可口的湯，十分對口味。蔗蝦中規中舉，勝在大大隻，一碟兩件可以分成四件。咖喱牛排不是印度式咖喱，配料有菠蘿粒和茄子條，香而不辣，配蒜容法飽是絕配。不過，牛排用香茅調味，老婆認為像香茅豬排。可能點咖喱牛腩會更好吃。老婆亦點了菠蘿冰。菠蘿是用糖漿調味，味道不能與一般茶餐廳用罐頭菠蘿比較。

服務方面，只是一般，特別是越南女待應欠缺笑容，相信可以有改善空間。

可惜是吃完這一餐引起皮膚敏感，不知是花生粒的問題還是味精?

黎左芽莊已經幾十次。返工日子1點就一定要等位，重要人齊先入得去，所以每次都係lunch time 自己一個人黎食碗生牛肉河粉加一杯越南咖啡。好食又可以好快走，價錢又OK，我又可以有QRE分。

今次因為有人請，所以weekend黎食lunch。原來星期六日係可以訂位，不過意外地星期日都係咁多人，見到出面排哂隊。今日點左好多野食。越南春卷OK啦。個蒸粉巻同stuffed chicken wings就好正。我個人唔係好食乳豬，所以佢地叫左我冇試，不過個個都話好好食。重有食左個蛋包入面有豬肉（因我黎前已經叫左，所以唔知係乜），我個人覺得非常之麻麻。當然就唔少得叫我平時食開既生牛肉河粉同越南咖啡啦

食包係有人想叫甜品，我諗住張QRE card會送甜品，點知原來星期日冇，咁其他人就睇menu，點知只係有gelato，所以就埋單走人。

有樣奇怪事，就係餐廳入面有越南waitress，唔識英文又唔識中文搞到唔知點，要揾其他人先order 得，真係玩野。

外面的格掉像很雅緻的高級的餐廳，見 lunch time 總是好多人排。

有機會食入到去自然有一定期望。

先說空調，實在太冷了，叫了換位或較細冷氣幾次都好像沒反應。同事為了證明真的尚有風仲特登摺了檯紙的角去證明有風。

叫了 Garlic Bread - 完全無乜 garlice 味，一定咁難失手既都失左手。

粉卷with 扎肉 - ok ，味不算太濃，扎肉唔夠彈牙。

生牛河 - 我唔食生牛肉，所以試了浸熟左的，成碗都係above average 既。

越式抄碎米飯 - 個飯極似 cous cous，粒粒都似得好埋，真係好易無晒口感同無味。炸豬扒夠香口，挽回 d 分。個 mushroom 蛋都係無乜味，要架酸辣 sauce。本來想問清楚個 waitress呢樣係咩黎，但佢好似唔識定唔想解釋咁樣對我。

蔗蝦 - 蔗味不多，蝦肉都夠既，外表賣相都幾靚

舖頭裝飾還蠻有特式像有好多Saigon圖片但就與食物水準不付。

服務不 professional，聽錯我地要乜都仲會笑？

因為對其有期望而落得如此收場，應該不會番桌了。

同女朋友食午飯，本來想去QRE Plaza，但臨時改去芽莊。
以前食過D牛河都OK，今次想試下新野。
1.蒜燒大頭蝦：大大隻，足有8、9吋長，蝦頭有膏，但D肉就淋既，絕對冇花竹蝦咁好食。
2.紅酒燜牛尾：Ok喇，但係康華茶餐廳D牛尾仲好食過佢，人地賣40蚊咋。
3.法飽：暖暖地，嚴格黎講就唔合格。
Order左之後等左30鐘先至上菜，Lunch Hour最好Order粉面算數。
而且要搭檯，叫多D野都唔知擺在邊度好。

之前朋友去過中環店但係店面細要等好耐，於是去灣仔。一去到見到幾個人怒氣沖沖咁離開，話「咁多位都話要等... (下刪數百字)」。去到冇人理咗一陣(ok 啦, 人多)，之後有位面黑黑嘅小姐叫︰「lum bar fee, lum bar fee, lum bar four, lum bar four, lum bar fi (音: wi-fi 個 fi), lum bar fi...」。心想，ok 噃，咁多人走咗應該唔使點等。果然好快...

面黑黑嘅小姐帶咗我地去個好大風嘅位，咁啱有個衣著似係高級啲嘅uncle行過, 我話：「唔好意思，個冷氣好勁...」，點知未講完佢就一輪咀話：「冇架，個冷氣唔開會滴水，又焗...」，之後走人... 我嗰friend已經話似佢係客多個你，佢好似冇咩禮貌... 不過唔係咁凍的話，環境的確係好舒服(環保署成日叫人25.5度，好似冇人理你噃)。

點咗啲食物好隨意咁送到，即係不分前中後... 牛河最快，跟住仲有其他主食，反而沙拉未見... 次序其實我地香港人都唔係太care, as far as 好味... 不過當生牛河同熟牛河冇分別，仲"鞋鞋"地就真係唔係咁接受到。其他食物亦完全冇驚喜... (下刪數百字)

不過印象最深刻嘅都係佢地嘅服務態度，由頭到尾都冇一個server係有笑容... 亦冇人會講任何服務行業會用的客氣說話，可能太好生意太忙而老闆又未識做分多少少。食得8899，有server問：「係咪唔要」，我「唔該」都未講完就已經收走咗，效率超快。最後俾錢，終於有人講「多謝」。

餐廳有咁好嘅裝修, hardware真係唔差，又收得呢個價錢，點解要俾茶餐廳嘅server呢?

好累呀！

出去覓食，大熱天時由皇后大道東尾一路行到去 PP ，但諗唔到食咩好，結果又行返去皇后大道東尾胡忠大廈。選擇了好耐冇去的芽莊。

被安排入座於落地玻璃窗的傍邊。餐廳刻意裝修成法式小店的樣子。人不多，但都幾嘈，做不到法式情懷的效果。

之前已經來過兩次，印象中最好的還是最基本的牛肉河。

生牛肉湯河 ($42)：湯底幾清但又夠味，應該是味精湯吧？河粉又滑又彈牙，浸了一會河粉也沒有變淋。粗幼得宜的河粉加上洋蔥、蔥、芽菜、金不換、青檸等，次層豐富。生牛肉下得超多，超碼有 8 片，都是比較肥的部位。
烤牛肉撈檬 ($39)：又大片又厚的香蒜烤牛肉，以 $39 的價錢來說也算抵食。花生下得超多，只是略嫌不夠生菜絲和青瓜絲。個人還是比較喜歡湯河。

見好多POST都話SERVICE唔好，但我又唔覺喎，可能因為當日冇乜客，唔需要趕人走。看見別人的煎蛋餅好像不錯，下次再試。

食物一舨, 不是特別, 又不是不好吃, 只是 ok. 生牛河係好食, only one!

最突出係 service, 差到不得了!

我們遲了 10 mins, once 去到, staff 帶有老師罵學生的態度說:下次唔好遲到! 我地真係估佢唔到咁. 之後我friend問, 我地遲左幾多呀! 佢 reply: 你地遲左 10 幾分鐘啦! 呢邊啦 !

嘩.... 我地真係興! 雖然我地唔啱, 都唔洗咁呀 !

之後食左一輪,開始有一兩個人等枱,但我地打算慢慢坐, 傾下計, d staff 就不停想收左我地 d dishes. 仲問小姐唔要啦, 我幫你收左佢. 我地話仲要架, 佢竟是說: 咁我攞去幫你打包呀! 我 friend 好興的說: 我地仲要架! 未食完!

佢仲要收, 唔係收 dish 啦! 係收左我地 d 碟 & 匙! 大佬, 你收左我點食呀! 我地立即 hold 住對筷子!

如是有幾次都係咁! 如果態度好的話, 讓比你都無所謂, 但態度超差! NO WAY!

佢地仲要睥住我地, 指指點點個種! 更加激起我地打死唔走的決心! 吹咩 ~

終於到無人再等枱, 又有位剩, 我地就埋單, 一毫 tips 都唔比 !

以後一定唔再幫襯!

有朋友响英國返黎，想食越南菜，經open rice搜尋過，選擇左呢間。中環店full了﹐打電話到灣仔店，訂四個大人一個bb車，七點有位，於是選擇左黎呢度了。
去到七點二，遲左少少，好彩果陣人未多，所以仲有位比我。佢安排左我响一個很好的位置，可安放我的bb車，但由於佢的bb椅是高椅而唔係加上坐椅上的櫈仔，所以我個十個幾月大的bb終於可以登上大枱，摺埋bb車响側邊了。
朋友聚舊，飲番幾杯冰凍啤酒，hsbc卡有買一送一，very good。
共點了8道菜+一藍包，食物好新鮮，亦有平時食唔到的一些越南菜，很讚。
prawn salad roll - 蝦甜，一份兩條四件，good
deep fried soft shell crab - 唔太乾，唔太濕，好似有 6件，下次要帶媽咪黎食
sweet potato shrimp spring fritter - 幾得意，第一次食，有隻蝦stick with一個煙un既餅
sizzling crepes saigon - serve with 一籃菜香葉，幾特別，good
hanoi tomato crab noodle - 湯味濃茄，good，不過唔好期望係濃蟹味，佢係整碎左，個湯有啲肉，同有兩粒丸
ox tail ragout - 牛尾好味，有大約三大三細件，入面有蘿蔔
braised vegetables - 有青椒，西芹，椰菜等的雜菜，值得一讚係，雜菜都唔係下欄菜，都係好新鮮的。
fillet of sole rolls - 都係salad roll但係魚黎既，呢個無咩特別印象，not bad but not special
baguette - 法包，佢係烘過的，有heart啊。
加埋18枝啤酒，但係9個order，因為買一送一，埋單加埋一都係791，very worthy！酒果度佔277，食物佔514。

實在太久沒有見舊朋友, 上次也只略談一會, 似乎未足夠. 她說要吃越南菜, 就來這裡吃一頓吧, 反正我也未試過嘛~!
來到的時候尚早, 還有大量空位, 轉過頭已是滿座, 還要取飛仔等位, 要來請早.
這裡的地方很有 rice paper 的影子, 侍應也挺足夠, 不時鑽來鑽去服務客人. 要了四味菜, 運動之前對於我來說就幾足夠的了.
生牛湯河刻意的牛肉要另上, 牛湯有餘韻, 也是個不錯的生牛湯河來的.
軟殼蟹米紙卷, 沒有魚露當然不行, 這裡的魚露客人就坐時已經有一碗在左近, 不過似乎不合夏天細菌滋長 + H1N1 時期的措施. 說回軟彀蟹, 一客四件味道也挺不錯的.
蕃茄蟹湯檬檬是對辦的, 耐何蕃茄不太夠濃, 芫萎反而頗足夠的，算挽回點分數.
芽車快我倒喜歡, 有點青檬汁就perfect.

會長還推介燒春雞好好味, 下次來要再灣仔店先.

26-6-2009

唔睇 Openrice 都唔知呢度有檬饒供應, 呢日到灣仔開飯難得朋友提議嚟食, 當然要試試蕃茄蟹湯檬 ($45):
- 湯底: 有唔少橙色的浮油 (蟹油?), 聞落蟹味十足, 飲落蟹味反而無乜, 只有淡淡的蕃茄味, 仲要幾稀. 味道唔係差的, 但實在幾失望.
- 檬粉: 滑溜, 彈牙, 其實都好難會難食?
- 配料有扎肉, 無味的碎濕濕蕃茄, 碎濕濕炒蛋, 腍腍又帶腥的蝦丸, 仲有大量香葉及芽菜, 除咗令湯底多少少草香的 herbs 之外, 其他都感覺可有可無.

朋友食生牛河, 湯底賣相幾淺色, serve 時牛肉已全熟, 比蟹檬更唔吸引...

另外 share 食了一份 (姍姍來遲的) 龍利魚卷... 幫襯中環店 (http://www.openrice.com/restaurant/commentdetail.htm?commentid=1884025) 的 B 姨姨曾經話呢樣「超好味」, 我哋呢碟都不錯, 不過一定唔係「超好味」 -- 米紙皮夠薄, 紮得夠實, 餡料的蔬菜類新鮮爽脆, 炸魚熱辣脆口, 不過就油咗 d; 而魚露就絕對係點晴之作, 酸酸甜甜又帶點鹹香, 好.

食物叫 ok, 環境亦靚裝; 中環店 service 已經夠衰了, 不過呢度仲更加不知所謂 -- 鋪內明明大把位, waitress #1 又係都要我哋坐門口的「搭檯」二人位; 龍利魚卷好耐都未嚟, 我哋舉手向 waitress #2 追單, 佢 d 態度又好乞人憎 -- 首先用不屑眼神 bear 一 bear 我哋, 我哋一路講, 佢就一路皺住眉, 跟住用個背脊 "dud" 住我哋, 繼續 "bung" 住 counter 同另一 waitress 吹水, 好似無聽過我哋講嘢一樣. 真奇怪, 莫非「趕客」係呢度「賣點」之一?

每人約 $70 埋單, 食物一般, 會唔會再幫襯, 唔使講吧?

即將當新娘子的好友為我補祝生日,既然她要KEEP FIT,不如吃越南菜吧,順道滿足我這撈檬怪!
在op選呀選,看到芽莊,才記起曾光顧中環店,印象是好擠迫,好嘈吵,灣仔店見食評不俗,試試吧!

地點算方便,環境/裝修亦舒適,一入座便放下一碗檬汁和青檸辣椒,幾細心,2人選了:

蕃茄蟹湯檬:落單後,最先上檯的,湯底唔夠熱,雖然紅噹噹,好似好濃,但實質味道比較淡,少少香味來自湯面的芫萎,要自己加青檸汁,才有少少味道,有點失望
肉丸撈檬:肉丸是一件件的,味道一般,蘿蔔絲,生菜絲等配料亦算多,還有花生碎,乾荵,好香,呷一口檬汁,調較得幾好,有魚露香,酸度適中,配合檬粉,好正,但花生碎好像多了點,食到底有點糊口
邊和燒大蝦柚子沙律:燒蝦唔會好乾,而且,中間部份已經脫殼,幾細心,柚子份量幾多,而且juicy,好味
軟殼蟹米紙卷:軟殼蟹還有少少脆,幾好, 但包2條青瓜粗條,似乎多了點!
6:45來的時候,還有很多位,8點幾離開時,已經大部份滿座了,價錢不貴,環境服務都幾好!
最重要是我愛的撈檬幾好食,可以encore

芽莊在中環及灣仔都有分店，在中環店經常看到人頭湧湧，門外無時無刻都有一條小人龍，而且有許多外籍人士光顧。在中環這情況是可以理解，但想不到連在灣仔店也是一樣，是夜跟太座同臨時，就看見有不少單身外籍人士在座，只叫一碗牛河就攪掂一餐....

我們當然不會只甘心叫一碗粉便算，牛肉河固然是小弟試越南新店之例牌動作，當看到餐牌上有法式三文治吃，更是大樂，再加上一份湄江燒肉丸卷，已足令兩人飽飽矣....

生熟牛肉河先發登場，趁湯還熱騰騰時先喝一口，風格是偏濃的一派，而且隱隱然還帶少許辣度 (可能是跟湯底下了少許紅辣椒粒的關係吧)，而且香菜如金不換葉子及葱亦落得不算太少，算是合格有餘的；兩款肉之中當以生的較好，入口頗嫩滑，不過醃味不算太夠，很淡。熟牛肉相反卻是韌如在吃鞋履，絕對是像橡筋般咬不動，實在令人失望。幸好一撮好的pho河粉就能挽回頹勢 ---- 這裡用的不是平常普通連鎖越式菜館的廣東沙河粉，而是真正的越式河粉，是呈長扁型的，入口帶些嚼勁，又有米香，很出色....

粉還沒有吃完，三文治就徐徐送到。配料中的扎肉、薄五花肉、牛展肉等樣樣落齊，但就偏偏欠了自己覺得是靈魂所在的醃酸蘿蔔絲，有的只是索然無味的普通蘿蔔絲，味道自然跟法式三文治界翹楚添記及邦美蜀相去甚遠了。包焗得不夠香也不夠脆，而且搽在麵包裡頭的不是傳统越式稔肉醬而是用了最普通的沙律醬是完全不對味兒的....

以生菜包入米粉、青瓜條及燒過的肉丸的湄江燒肉丸卷，口感很清新，肉丸是燒得挺惹味的，醮點味不太死酸卻又不夠鮮的魚露吃，算是還可以.....

一向這店給自己的印象是頗"遊客"的，但試過後又覺比想像的好。不過，要說她是十分出色，那又卻不是.....

二月初九‧驚蟄

事情總算辦完，了卻心事，跟爸去處理一些手尾。在灣仔，要找地方吃飯，原來我很少與他單獨吃飯，想著去那裡吃，一時也考起。忽爾下著滂沱大雨，不便遠走，不如就來這裡吃牛湯河吧。

先介紹爸，他是個口講什麼也吃，但其實很少東西會吃的人，所以想地方跟他吃飯，範圍很窄。他未吃過越南菜，但喜歡喝湯，我想湯粉也合他口味。又喜歡吃甜甜酸酸的東西，那酸甜的魚露應是他那杯茶，就試試這裡吧。

已過二時，人客不多。選了餐廳埋邊的位置，看著外面來往的行人及大雨連天，聽著輕音樂，舒適的。吃湯粉之前，先來點點心吃吃，就要了蒸粉包及煎蛋餅。這裡的蒸粉包很一般，一客四件，沒有一件是完整無缺，件件也「爆餡」的。吃起來餡是肉多菜少，也不大吃得到沙葛，粉皮不滑，調味雖沒有問題，但還有大幅進步的空間；煎蛋餅是很地道的越南小吃，雞蛋混上麵粉，煎成脆蛋皮，裡面灑了綠豆扁，餡料是肉、芽菜及蝦。用生菜包著吃，放點羅勒及薄荷葉，下大量魚露，有蛋香又有蝦及肉的鮮甜美味，很好吃的。雖然這裡的蛋皮煎得一般，夠脆而不鬆軟，但想吃地道越南食物的，值得一試；

再來兩碗粉，我吃的是蕃茄蟹湯檬。湯底鮮濃，是甜美的蕃茄及蟹肉的味道，加上不少芫萎在內的，美味。而最好吃的是配料之一的蛋餅，索滿了鮮甜湯汁，美味；爸不吃生肉，就要了碗熟牛肉湯河。牛湯不算很鮮濃，但也算有水準。河粉用上幼條窄身的，索牛湯很「有效率」，不錯的。

問他喝什麼，竟然說要喝椰青，我不知他喝這個的。

侍應服務不錯，有禮貌又會對食物有建議，值得一讚。

埋單230蚊，不便宜，但難得父親對他第一次吃的越南菜也很受落，而食物亦有相當水準，滿意滿意。

坐了一會，談了媽很多的往事，時間就這樣悄悄的過去。