十一個人, 叫咗十四樣野
燒豬仔 - 皮夠脆, 夠熱
海蜇頭 - 味道唔錯
椒鹽豆腐 - 好香口
酸薑皮蛋 - 我無食, 但係見到個皮蛋係流心既
杞子豆苗 - 菜囉, 無乜特別
艷影纱窗 - 功夫菜, 清清地囉
拔絲咕嚕肉 - 好味
脆皮牛坑腩 - 炸過既牛腩, 呃......
雀籠點心 - 去美心大酒樓都食到既質素
臘味飯 - 多飯少臘味, 飯太硬
扣肉 - 睇起上黎好肥, 但係好好味
是日湯 - 同茶餐廳既差唔多
炒飯 - OK
炒米粉 - 太鹹

去到坐低, 先叫菜, 然後同侍應講咗要等埋個朋友先上
到朋友黎, 話上得菜, 之後都等咗成十五分鐘起碼

八點半開始食, 食到尾唔夠於是加咗個炒飯同炒米粉
食埋個飯同米粉點知個雀籠點心都未黎
催咗兩次哥仔都話廚房整緊
十點幾頂唔住搵個部長過黎問, 攪一輪佢先話原來漏咗單, 要再等多十分鐘

收得咁既價錢唔係咁做野架吓嘛
全程起菜都係經過我地頭上飛落枱
去美心大酒樓食飯侍應換碟都換得勤過佢地
唔叫唔會收枱面上既吉碟
一肚氣!!!

友人生日在即,約她和她老公出來慶祝.她想於尖沙嘴晚膳,於是便在OpenRice搜尋,發覺此餐廳評價幾高,於是便在此訂位.

是日準時到達,友人也看了OpenRice,看別人網上推介美食,也參考了餐牌上有推介標記的菜色,便叫了:

(1) 土雞湯: 用茶壺上,樣子精緻,味道也可以,但只有約四茶杯的份量.
(2) 脆皮牛腩: 牛腩應該炆熟了再炸,幾得意,但味道無什特別.
(3) 一口飯: 有三碗飯,分別是紅米飯,白糯米飯及鼓油糯米飯.好像很健康的樣子,味道也可以.
(4) 招牌燒雞半隻: 皮頗脆,肉就幾肥,味道也可以.
(5) 麥片蝦:有六隻,用麥片作脆章炸蝦,頗厚,本人不太喜愛.

此餐廳是美心屬下,服務也可以.是日用恒生 Enjoy 卡找數,有九折優惠.

三人共花了不$480, 以食物份量和質素,我覺得算幾貴.

茶錢,我們叫了龍井,好像要每位$16,另外,有一碟指定前菜,好像也要約$20.即是說,不叫任何東西,已經要$68了 (未計加一).

生日當然不能少得同班好姐妹慶祝!地點定了尖沙咀, 便求其search一間中菜, 見八月居坊間comment也不錯便book了.

茶都要逐位計, 那不如叫了特式飲品吧, 叫了蜜糖香薑梳打, 桂花柚子蜜, 桂圓香桃蜜及青檸香薑蜜, 味道不錯, 青檸香薑蜜較甜, 要加入熱水才沒那麼甜!

前菜叫了青瓜海蜇, 超細碟, 味道普通吧!

椒鹽豆腐, 炸得很不錯, 豆腐外脆內軟滑, 而且灑上香蒜很惹味!

艷影纱窗, 個名好玄, 哈哈, 其實是竹苼卷, 清清地也ok!

這個拔絲咕嚕肉超正, 炸醬少少脆, 厚度剛剛好, 肉不乾, 汁味道很好味!

脆皮牛坑腩, 比想像中差點點, 炸得不算很好, 很油.

杞子菜芯, 菜心都算很甜; 菜苗炒什菌, 這個味道不錯, 雖然細碟d.

這個蟹子蟹肉伊麵很好味, 蟹子脆脆卜卜, 蟹肉也很多.

炸子雞, 炸得不很好, 皮脆, 雞肉卻很滑!

甜品有部份是西式, 很特別, 本想試它的拿破倫, 可惜已經估清,因飽, 只要了這個糯米糍, 它面煎過, 但吸晒d油, 超難吃!

雖然這裡偏貴, 但因位於尖沙咀海洋中心及部份枱能看到維景景色, 尚算可接受. 可惜最不令人滿足是他們的服務, 服務生大多黑臉不在話下, 之前因人未齊未叫飲料, 他們就不斷催促, 但當我們寫單時, 他們又三催四請先行埋黎落單.

仲有我們明明下了單叫炸子雞, 等極都未黎, 我們查問, 她們竟反過來說是因我們剛才未下定論叫, 所以無落單; 有無搞錯?! 咁樣的價錢, 咁樣地點, 但竟然有咁差的服務態度?!

若侍應服務差而令客人卻步, 真的太可惜!

由於壽星女鍾情中國菜.. 所以選了這間餐廳為她慶祝生日! 早於三個星期前去過一次, 服務雖然一般, 但食物質素很不錯, 價錢亦合理, 所以雖然只能訂到第二輪8點半的枱, 但也鎖定這間餐廳, 可是, 這次的光顧真的令人失望, 服務之差, 令全枱包括壽星女也為之氣結!

一行六人入到餐廳坐下, 一位女待應便過來問大家要甚麼茶, 大家沒甚麼主見, 便點了最簡單平常不過的香片, 但怎也想不到, 如此簡單的茶, 卻要經過"三催四請"並由壽星女發出充滿怒意的第五次催促後, 才在20分鐘後才到.

喝過茶後, 便點菜了, 另一位女待應見到我們舉手示意點菜後, 掛著很不情願的臉行到過來, 好像我們再了不該做的事一般, 真的令人討厭!!

吃飯中途, 殷勤的服務當然欠奉, 直至準備點甜品時, 上述那位寫菜的待應再次行近打算清理枱面, 但態度卻極差, 甚至厭棄朋友阻礙她收拾枱面!而為我們落甜品單時, 站在我身邊的她更發出濃烈的煙味, 十分趕客!

說句實話, 這間餐廳的菜的確不錯, 但在尖沙咀區, 相信要找一間菜做得不錯的餐廳不難, 所以服務這是取勝之處, 但這間餐廳的服務如此不濟, 實在很難令人會有再次惠顧的衝動.

今晚幫我個好朋友慶祝生日,好似未試過d有景睇,又有feel d野又好食既地方....
終於係openrice 搵到lee 間啦!!
所以立即打電話去book 位啦!! book 到露天啦!! 點知琴日落雨...so sad !! >.<
去到之後等左一陣佢地就arrange到枱比我地啦!!
原來入邊都幾大0家wor!!
坐得好舒服又唔算好吵幾好....幾好!! 如果有埋維港景就更好啦!!

我地2個人叫左:

1. bb豬 - total 4舊,2舊骨2舊肉...都幾好味! d汁好味!另外估唔到碟內的菜沙律又係超好味
2. 雀籠點心 - 有2籃好多款食物...全部都好好食! 但因為食得太飽最後既砵仔糕唔係好食得落
3. 艷影纱窗 - 個色澤好清,味道很清新,仲有埋杞子伴碟
4. 麻醬茄子 - 係前菜凍凍地咁食,好香同埋軟軟地咁,好好味!
5. 擔擔麵 - 凍左d 食...麵開始漿在一起,但味道尚可

整體來說是above average,這個價錢吃到這樣的質素還算acceptable,
連茶都好香好飲,沖好多次都仲有味.
但我好想食既疏乎里甜品原來冇左...dessert menu 會成日轉的...少少失望!!
服務不錯,不斷為我們加水收拾..但如多一點點笑容會更加賓至如歸
希望下次可以試下坐到維港景啦!

在"米芝蓮"效應下、有一段時間没有來八月居。
毎次不是有Function,就是人多没位置。

今次在TST、不知吃甚麼好、記得AE白金咭(美心集團)半価、就來了八月居碰運気。
當天有Function,但剛好有位。
Menu有点更新。

我們点了如下菜式：
子薑皮蛋
非常好味、他們用的皮蛋很新鮮、毎次我都会点這个前菜
湯：老雞湯
火候OK、沒Feel到味精味
話梅蒸茄子
甜甜酸酸好味道
龍眼黒椒鴨肉
黒椒太濃、蓋過龍眼清味、不好
炒飯
毎人一份、軟度和乾身恰到好處
甜品
花膠鴿蛋：糖水非常好味
心太軟：很普通、沒必要点
（個人推介：之前食過杏仁茶、超好味、下次都Order杏仁茶了）

*他們有Starbruck Coffee 提供、果然同是美心集團！
埋単（2人）、折後：＄300、這環境、抵吃！

同朋友慶祝生日, 要諗去邊度食野真係諗到頭都爆, 最後友人決定來呢間試下,結果我地大部份人都覺得呢間唔錯, 第一, 呢度的裝修都好有格調, 如果Book到露天仲有無敵維港景, 我同朋友去望過都真係唔錯~~, 第二, 食品味道都好味。當晚唯一有少少問題的地方就係同經埋溝通不足, 因為我地有些朋友要遲少少先到, 我地諗住點左菜, 等朋友來到order上菜就有得食, 但係我地等左好耐些少動靜都無,跟住我地就同經埋講,經埋話原來orfer上菜都要等至少半個鐘先有得食, 我地當場都呆左,心諗你又唔早d講.....。但係總括來話呢間都ok。

推介:
艷影纱窗 - 清新的菜式,但係好夠味。
炸麥皮蝦 - 好好味。
蟹籽xxxx妙飯 - 炒飯乾身, 蟹籽夠香。

自小就習慣每週總要 "一盅兩件". 但自從有了小b後,可選擇的酒樓就越來越小了。來來去去都是港島果幾間，真是有些膩！

不是賣廣告,但八月居是我近期的新選擇。原因有三:

1. 有別於一般食店, 這裏是sell懷舊菜(滲有新派元素)和好食材(中上)。
2. 有少見既菜式,例如: 豬油撈飯。
3. 近香港! (對我來講，方便，是十分重要！)

老實說, 在味道、菜式種類方面仍有相當既改空間!

今曰點心包括:

1. 豬油撈飯 - 飯不夠熱而導致"油"香不足。
2. 煎魚嘴 - 好!
3. 煎耦餅 - 乾身味道適中！
4. 古法牛河 - 一般。

p.s. 友人"牢騷" 我的食評太多英文，希望這次滿意吧！

人数：3大人1小童
菜式：
脆脆BB猪1客（4件）
艳影纱窗1客
雀笼点心1客（粤式点心6款各2件）
迷你桶仔饭1位
担担面1位
芒果三弄1客
结帐：HKD448，人均HKD112。

餐厅的环境、装饰、餐具的搭配、以至菜式的色、香、味，均十分到位和传神地体现出粤菜的精髓。虽然菜式分量不大，但适合食家与三两知己来细细品尝。

虽然只试了几个品种，但肉类、素菜、点心、主食和甜品都有，已经感受到厨师的心思和工艺。相信整体的水平都会不错。

强烈推荐给对饮食要求高的朋友。

這期HSBC卡和美心集團有優惠推廣,我們選了一個「晚市自選1+1套餐」

海鮮錦繡冬瓜盅或廣東片皮鴨 + 白灼海生蝦或陳皮蒸大連鮑魚(8隻)

這個套餐6折後是$304...而我們選了

土法燉雞湯($38/位):我們當然要了2位份量,每人一湯壺,好像喝茶似的飲法很有趣...每份可喝上3杯...這個燉湯很不錯,我和老公也很滿意~

陳皮蒸大連鮑魚(8隻):雖然細細隻,不過也算新鮮,味道不過不失啦~

脆皮牛坑腩($88):這個是各方食客都推介的菜式...而我覺得真的做得不錯,反而愛吃牛的老公又沒有我那麼喜愛吃,他不覺得太特別~

廣東片皮鴨:真的是一大隻的啊....靚仔部長幫我地片鴨呢,都片得不錯,很少肥膏....熱辣辣的,我和老公都覺得很好吃~不得不提的就是酒樓很細心,每片皮皮也會用蒸爐紙相隔,就算凍了也不會痴住啊,方便很多呢~!

豬油撈飯($2x):老公叫的,我見很多豬油啊...不過老公說客家好棧的豬油撈飯比較好吃~

迷你一桶飯($20):這是我叫的,味道不錯,而且吃到瑤柱呢...雖然說是迷你,但和一碗普通白飯的份量差不多~

芒果三弄($38):雖然我們已經吃得很飽,但我還想吃甜品啊...最後決定叫一個兩份,這個芒果三弄是有3款芒果甜品造型:

芒果pancake:入面好多cream,肥死人~

芒果黑燸米:這個是熱食,由於我不太好,所以覺得麻麻地~

芒果雪糕配楊枝金露:味道不錯啊,只是實在太少不夠分,哈哈~

上次光顧同集團的八月花，感覺良好，心想八月居的水準應該同樣值得期待。論裝潢、舒適程度及食物款式，其實兩店都差不多。論食物質素，八月居令人有點失望。

春卷：大大條，夠脆口，OK。
脆皮豬：豬皮唔算好脆，味道普通，不似推介之選。
脆皮肮腩：賣相味道麻麻，和八月花差多了。
大連鮑魚仔：味道偏淡，口感較韌，唔好食。
片皮鴨：肥咗DD，味道OK。包皮和包皮之間用點心紙隔着，安排細心。
蟹籽蟹肉伊麵 / 瑶柱海鮮炆米：普通。

[21/8/2009; Fri]

下面個食評個title係新派中菜，但我今日去到佢變左懷舊菜喎，哈哈，證明佢個menu都轉得幾快呀。由於去完泰國牙肉痛呀，所以今日特登要求食得清淡d，諗住食中菜或者日本菜，最後就黎左呢度食啦。

原本打去book位，點知佢話無得book，因為full-booking，叫我地去拎飛wor。咁我地就諗住去左先，到時無位再算。

睇完戲成8點幾9點，好肚餓呀!!! 希望即刻有得食，好彩等左 5 mins就有位啦，非常開心，發現去到真係非常之多人，有得坐出面，但實在太熱啦，都係入面有冷氣舒服d。 但佢d位都好似有少少窄，開頭好易撞到後面個個人，如果再闊絡D應該會好D。

由於兩個人實在太肚餓，所以就要盡快叫野食啦。我地兩個人都叫左唔少野食架，首先係個脆皮BB豬，原本都驚熱氣，不過佢唔係好大碟姐。呢個真係幾好食，超脆呀，而且一D都唔會有好肥既感覺，真係好好味。佢底到有D醬汁，好惹味，隔離有D菜加左一D酸酸既沙律汁，好好味，可以開下胃口 XD

之後仲有個蓮耦餅，係佢個SPECIAL MENU上面架，呢個都好味，唔係太油膩，成日食到一粒粒蓮耦，幾爽口，好有口感。之後仲叫左一個竹笙扒鴿蛋，又係懷舊菜式一之，我都好耐無食過鴿蛋啦，佢個表層有少少脆，好得意，不過食完有種膽固醇好高既感覺。其他配料如竹笙，草菇等等清清地幾好味。

之後叫左個桶仔飯，佢係逐位計架，我地叫左一位咋，佢係好細碗架，呢個就一般啦，唔係特別好食，但都唔算差既。最後就叫左個菜居陳村粉，呢個幾特別，佢D陳村粉係一層層架，但係佢整到好薄，好味，D陳村粉本身無咩味，但佢有D類似炒烏冬既物體係上面，仲有D瘦肉呀咁，個D係幾鹹架，所以連埋D陳村粉一齊食就剛剛好。

最後係個度叫埋甜品，D甜品就OK啦，唔係特別好食，個薑茶濃到爆，有少少辣既感覺，食完我個人好鬼熱，哈哈。D湯圓就麻麻地，一來我地食唔出佢係咩餡，同埋佢個皮太黏性，麻麻地。

但OVERALL都係幾好架，SPECIAL MENU上面既野有HSBC卡有折，我地一直坐係度傾計傾到人地收工先走 XD

補返之前既食評~

呢間餐廳成日都fully booked, 今次提早幾日book終於ok了

兩個人用AE card有半價~

一開始問飲咩茶, 普通野要$12位, 特別既就貴d, 叫左白牡丹, $20位, 比多$8有個透明茶壺,下面用蠟燭hing住, 佢又比瘧一碟酸瓜花生我地, 我地唔要, 最後冇收到錢~

今晚叫左:
半熟牛肉沙律--d肉幾嫩, 有牛味, 下面有好多青瓜絲,洋蔥絲, 紅黃椒絲, d汁甜甜地, 好fresh~~

脆皮bb豬--有4件, 好脆口, 夾住d肥肉都唔太溜, 個底已經預先塗左d醬, 旁邊有d沙律菜, d汁酸酸地可以中和下~

蟹肉玉子卷--佢即場幫你切開6件, 呢樣比較淡口, 用蛋包住蟹肉成條腸粉咁, 蟹肉唔太多, 麻麻地

瑤柱雞粒石鍋飯—好足料, 上面好多蔥花, d飯比較濕潤, 石鍋又可以保溫好耐, 正

麥皮蝦—好好味, 蝦好大隻, 好爽, 有6隻, 中間有咸蛋黃, 之後用好薄既脆漿包住, 上面碌左d炒過既麥片

芒果三弄—個presentation好好, 有芒果pancake, 芒果lo米, 雪糕楊枝甘露, 芒果甜, 又可以試曬三樣~

服務好好, 如果冇discount要$607, 而家$350, 折左就ok~~可以再來

來到八月居享用晚飯，要了椒鹽豆腐、一口飯及BB脆豬。各食物份量的確偏少，大食人士要注意了。

基本上我那次去﹐侍應的服務態度不俗，也用心講解每道菜的特色，倒沒有網友說的黑面情況。

食物方面，脆脆BB豬的確又香又脆，實在是這店的必叫之選。其他則屬不過不失，有其應有的水準。


除食物外，整體餐廳環境也不錯，又面對海景，單是這方面也值得加分

今年所有的生日飯都要推遲，唯獨與家人就例外。幸好細妹好醒目，一早訂定位，當晚全場滿座，不接受walk-in客人。由大門而入，經過的位置較為濶落，再入到大廳，樓底較矮、枱椅較密，有點局束及擠迫感，而當坐滿客人時，聲音又非常噪雜，不似一間中檔食肆，與其集團酒樓無異。

點菜餐牌很有特色，每頁翻開也有南生圍、大澳等地作背景，藉以介紹香港一些生態環境。

脆脆BB豬-是中西日的混合菜，皮薄脆肉鬆化，雖然有點油膩，但另附上日式芝麻醬汁的沙律，減少肥膩。

拔絲咕嚕肉-每夾一件咕嚕肉，一絲一絲的可見，甜酸味調校的恰好，而肉質又鬆化，沒有一陣雪味的幣病。

瓦撐彭公鵝-陣陣濃酸醋傳出，與豬腳薑味道相似，只是酸汁欠缺膠質的質感，而鵝肉深黑，原來不夠入味，真是被它騙到。

冰梅肉碎煎茄子-又是甜甜酸酸的，但用茄子做主角，兩者有點格格入不。

古法炒牛河-其實是菜遠炒牛河，這個普通的炒河，又做得不錯，河粉夠滑不會黐在一齊，牛肉沒有流打粉的難食味道。

到最精彩的甜品，西式部份每款也吸引，可惜有人制止我，只好叫了心頭好的朱古力。

麻麻朱古力餅伴雪糕-Pan身還是暖暖的，軟身的朱古力曲奇加上雲呢拿雪糕，大家很快地把它幹掉。

得得地溫心朱古力-我揀這裡就是想食它，當然是心滿期待，切開也是漿糊成河，奈何入口只得橙味，雖然橙與朱古力是無敵組合，但無可能一點朱古力味也沒有。

與家人開開心心的食飯，就算多忙，也要與他們渡過快樂時光。