朋友生日話想去呢間"海鮮站"試試，但食完之後一行6個人，有5個都話以後唔再幫襯

1) 老火花膠湯 - 似例湯(超咸)
2) 麵包蟹 - 根本隻蟹就係梅左，d肉死實實冇味! 我地同老闆娘(操大陸口音)講隻蟹有問題，但佢竟然答:麵包蟹係咁架，d肉質係咁架!! 大佬呀，你唔好檔我地係大陸哩未食過麵包蟹至得架???
3) 海鮮湯飯 - 根本個海鮮湯就係史雲生清雞湯, 仲要係冇埋d海鮮煲過，就咁將白飯加上湯再加幾假蝦係面，淡而冇味!!
4) 上湯豆苗 - 當然都係史雲生湯啦，d豆苗係苦既!
5) 焗豬扒飯 - 個樣好靚! 面層焗到燶燶地，點知一打開入面就水"料料"，茄汁還茄汁，飯還飯...真係難食呀!!

今日同朋友去食....見到哩到咁多食評,滿心歡喜去啦.叫左一隻麵包蟹,中蝦沙津同白汁焗龍利魚柳飯.

首先講下隻麵包蟹($230)先啦.....我覺得唔多靚囉.唔係好多膏...用中式浙醋,個感覺怪怪地....之前去過金凱鮮庭,以咁既價錢,隻蟹都大隻D,膏又多D先啦.同埋,無記錯既話佢地用白酒醋...好味好多.

中蝦沙津得果兩隻蝦,佢比我印象係勁似許留山芒果撈咁.....

朋友話最好都係白汁焗龍利魚柳飯.唔係因為佢D魚柳定係個白汁(其實佢個白汁好淡囉....)好,而係佢落得芝士多......

今餐好失望.完全無其他食評講到咁抵食,咁驚喜.....應該唔會再去.(唯一讚讚係佢D服務員態度唔錯~~~)

之前睇依到見好多人讚依間海鮮好食,於是一行五人,尋晚去試下.一去到見到店舖好細, d坐位非常唔好坐,而且好擠迫. 叫左以下食物(忘記影相):

1 翡翠螺 ($68-) 6隻, 本人非常鐘意食翡翠螺,但食完同酒店buffet食既分別不大, 唔覺得依到特別好食, 而且仲好貴添!!!

2 龍蝦沙律 & 龍蝦上湯伊麵 ($480-), 先講沙律, 生果尚算新鮮,但龍蝦就好非唔掂,似食塑膠. 到個伊麵, 因為同一隻龍蝦既關係,所以都估到唔會出色,結果d龍蝦肉食到火水味,個上湯入唔到伊麵到,個麵非常淡,而且好細份,唔夠5個人食.

3 麵包蟹 ($240-), 依隻蟹勁唔掂,勁大雪味,d肉又霉,蟹膏又少又唔靚,簡直把鬼.

4 椒鹽瀨尿蝦 ($88-一隻,叫左兩隻), 瀨尿蝦尚算大隻,佢已經剪開左4段, 但一拎上手已經滿手是油, 肉質尚可接受,唔霉有膏.

食完依5個餸,已經唔敢再叫其他野食了,侍應見我地坐係到吹水,就走埋來要我地讓檯比下一批客人, 埋單唔洗一千蚊,但就唔會再有下一次.

周一本來諗住去東海大閘蟹，不過蟹之外又想食其他海鮮，
就試下尖東呢間 --- 海鮮站。

店子超細，座位不過十五個，好在有訂位，時值9:00pm都仲係滿座。

先來一碟翡翠螺﹗
肉質超爽甜，食家本來係唔食呢o的巨螺的，不過佢試完一隻之後即時對佢改觀。
平日我地都會0係citysuper買來食，不過呢度吃到的更鮮甜彈牙，肉質口感好實淨，正﹗

呢晚既主角來喇，麵包蟹，$240一隻﹗
成日在citysuper等見到，不過食就真係第一次﹗
相當大隻，一隻夠兩個人分享﹗
嘩，你地睇下0的膏多到呢﹗爪上全部都係來架﹗

呢晚食好野我都唔同佢慳喇﹗開番支白酒先﹗$98一支﹗
有蟹有酒，倍感一流﹗
爪上蟹爪實淨而甘香，蟹肉不是一梳梳的而係比較散，味道鮮甜，爪同鉗都十分多肉呀﹗

不過重點係個殼，一陣再介紹﹗

大蝦芒果沙律，全是鮮果沒有薯仔之流，芒果汁不會做得太甜，很實在，清一清味蕾﹗正﹗

再來是清蒸超巨蟶子，蒜蓉蒸，我地都係第一次見到咁大既蟶子，即時嘩嘩嘩﹗
未食在欣賞拍攝的過程中，口水已充斥口腔﹗
邊有蟶子咁大隻架﹗
有埋個scale，同我隻手掌一樣咁大。
蟶子肉不單大隻，仲要係鮮甜到不得了，是一種新鮮的甜美，不是蟹、螺可以做到的肥美滿足感，十萬個滿分的蟶子呀﹗

趁熱食完蟶子，再處理個蟹殼，原來入面全部都係羔來架.......係滿哂頂哂角0個隻﹗
我地最後就係以蟹羔送白酒再傾計作結，蟹羔既香在口腔內長留左成個幾鐘，返到屋企還不散，那種濃郁的甘香可想而知﹗

友人放學來吹水，佢自己睇住我地食海鮮都頂唔順叫左個金牌海鮮焗飯吃﹗
入面超多海鮮，個芝士同白汁做得好吃，不過飯不是炒底佢話要扣分喎﹗

成個殼0的羔清哂﹗膽固醇唔超就有鬼﹗

食家最後補一補要左個花膠湯，原盅燉，喝落清甜無味精，口感好膠好足料，$30抵飲﹗

埋單我地兩個人計埋酒都係五百蚊左右，食到咁靚既海鮮真係超抵，一百分呀﹗

更多相:
http://hk.myblog.yahoo.com/smallsmalllin/article?mid=18662

此小店就在我公司附近，平時中午很喜歡光顧。但可惜因為坐位不多，很多時都是"腳快有、腳慢無"，去遲一步，都要"明天請早"。午市都很繁忙！又因為坐位不多，一般一行有六、七位同事想一齊食飯亦很難有位。所以多數都是選大家都各自各忙，各自"搵食"時，我才去此處獨食。最喜歡的菜式是：
1. 蒜蓉蒸聖子 - 聖子好大隻，好彈牙及鮮味。雖然一碟兩隻，但每次都令我食得好滿足。
2. 芝士海鮮焗飯 - 我的另一至愛。有新觧海蝦、墨魚、石班魚等等。配合芝士一分好呆。午市只係$38，好抵食。外賣返公司食仲送例湯。正！
因為menu 專門有十多種美食，不是特別多，所以可能因為咁，水準可以保持得好好啦。希望佢可以快d擴充下，我下次易d有位啦。

慶祝相識一周年, 我們依然在尖沙嘴食飯, 不過食海鮮. 近期好想食海鮮, 為滿足我的食慾, 都不用佢諗驚喜, 我已sugguest要去擦一餐. 好懷念上次去擦麵包蟹的經驗, 所以都係去海鮮站啦.

我們叫了以下海鮮:

加拿大翡翠螺 - 肉爽, 好正呀, 依然係咁好食

上次食麵包蟹, 今次本想叫澳洲嘉菲蟹, 但無貨, 所以選擇加拿大蟹 - 蟹膏軟香, 好好味. 蟹肉實, 好香蟹味, 唯獨蟹箝的肉唔知點解苦

龍蝦湯, 比我想像中要稀, 而且顏色唔太橙色, 味道ok, 但唔係我印象中的味道. 如果creamy d 會更喜歡. 現在像喝中式湯水. 龍蝦湯配埋老闆娘的蒜蓉包, 熱辣香脆, 舔落湯度, 係味覺享受.

金牌海鮮焗飯 - ok 啦, 由於我食到有點飽, 所以呢道菜我已無大食慾, 不過料係俾足, 大大隻蝦, 又有魷魚, 魚塊等.

service亦不錯, 經常換碟, 亦換熱茶. 是舖位有點擠迫感, 環境好屋企feel, 我們後面就是雪櫃.

anyways, 呢餐真係好滿足, 好開心.

見之前的食評不錯，我倆又很喜歡吃海鮮，於是就去試一試!

翡翠螺: 很新鮮，又大隻...而且好爽!
西非蠔 + 澳洲;蠔: 好鮮甜，好好味，值得一試!而且侍應好細心的介紹! 比個good佢!
: 龍蝦湯: 太結，無龍蝦味! 扣分!!
: 蒜溶蒸扇貝: 蒸到o岩o岩好，粉絲夠淋，又唔會太咸，帶子好新鮮!!
: 芝士龍蝦伊麵: 芝士不夠濃，龍蝦亦不算太靚! 一分錢一分貨吧!!

值得一讚的是服務態度很好，無論老板還是侍應都好nice!

朋友介紹尖咀有正海鮮食, 好海鮮既我, 梗係口累飯應啦

我地七個人, 叫左

1. 翡翠螺 - 就咁灼, 都新鮮既, 無乜特別
2. 麵包蟹 - 多膏囉, 但無乜蟹味, 蟹肉又唔掂又無味, 大隻咩? 又唔覺喎
3. 加拿大蟹 - 唔掂呀, 有陣怪味
4. 中蝦沙律 - 中規中矩啦, 其實得陣芒果味
5. 花膠湯 & 響螺湯 - 夠濃, 好味.
6. 珍寶蠔 - 其中五個揀左生食, 都覺得good, 另外兩個揀左芝士焗同薯蓉焗就唔得喇
7. 黃金瀨尿蝦 - 全晚最好, 但其實又唔係特別出色
8. 砵酒象拔蚌仔 - 我覺得怪怪咁, 但朋友覺得好味
9. 豉汁蒸蟶子 - 無乜味, 有d "un"
10. 蒜蓉白菜仔 - 都幾好

埋單每人$238, 食左好多種海鮮, 但其實又唔太出色, 尤其是煮得麻麻, 二佰幾蚊, 都係入西貢食好過

不過service就好好, d 侍應姐姐好主動換碟同加茶

海鮮, 我個人喜歡食佢個鮮甜….. 可惜呢次既”海鮮”晚餐我覺得幾唔得… 可能我嘴鵰掛…
食左好多樣野…

翡翠螺, 冷盤, 都幾fresh既, 有夠大隻~

龍蝦沙律, 我本身唔好呢樣野, 因為食左好幾次, 都食唔到隻龍蝦既味, 今次都唔例外, 我只係食到d雪味… 平時食龍蝦伊麵, 伊麵係會比龍蝦消失得快好多, 因為龍蝦既汁煮左落去個伊麵到, d伊麵會好食d, 但龍蝦沙律既沙律係唔會吸收到味道, 仲有可能搶晒d味…

麵包蟹, 凍食, 真係好大隻, 大到喊, 同其他人所講既一樣係好多膏, 不過我覺得d膏無其他蟹咁香…

食完三個冷盤都飽左大半lu…

魚, 唔知我既朋友order左d咩魚, 我都未食過咁蒸魚, 將d魚切成一片先蒸, 我只係見到d紅色既魚皮, 都唔敢確定佢係咩魚, 咁蒸法, 明明好滑既魚都”鞋”晒啦…

豉汁蒸大蟶子, size夠大, 味道鮮, 不過蒸得過左火, 好un…

蒜蓉蒸海中蝦, 呢個係全晚最好味果個, 基本上好難會整得唔好食, 隻蝦雖然唔係好大, 不過好多肉, 同埋有好好味蒜蓉…

魚湯豆苗, 好多時魚湯都會有d奶白色, 不過呢個唔係, 唔知係咩魚湯, 不過都幾清甜, d菜夠嫩, okok !

龍蝦焗飯, 好香芝士味, ok既, 不過大家都已經好飽, 食唔晒…

蒜蓉包, 味香, 新鮮熱辣, 牛油多左d, 所以個包唔多脆~

二百幾蚊食到咁多樣海鮮, 仲要o係TST, 算係咁啦….
請不要怪我太嘴鵰…

個日我地睇林海峰talk show, 放是就黎食海鮮站~

當然第一樣叫既就就係麵包蟹啦~
好大隻啊!! 比上次黎食個隻仲要大d
超多膏~~~~~~~正!!!
除左d膏又多又好味之外, d蟹肉都好食呀

之後我地叫左:
龍蝦湯 - 有蒜蓉包送~ 蒜蓉包超熱, 脆卜卜, 但個湯就無乜特別, 唔係我飲過最好的, 不過都有幾舊龍蝦肉, 哈哈
薯蓉焗元貝 - 薯蓉好好味啊~~ 不過就蓋過左元貝既味
芝士焗龍蝦伊麵 - 其實食完隻蟹已經飽左, 呢個真係食唔落~ 只係食左隻龍蝦~ 幾新鮮~ 肉質彈牙, 唔錯!! 不過下次唔叫呢樣啦...太"漏"

呢到d海鮮又新鮮又唔貴又好味, 值得一試架~

ummm... 其實想試好耐, 奈何的唔起心肝黎試...
尋晚講起就話黎試,, BK位又有喎... 好! 就去啦~

食物方面............ 2個人食飯... 吃左::::::

翡翠螺 - 鮮甜度欠奉!! 爽口嗎?! 一般啦!! 下次唔會再叫~
珍寶蠔 - 無蠔味/ 無海水味/ 無鮮甜味... 可以唔駛食!!!
東非蠔 - 蠔味較重... creamy~ $2X/ pc... not bad la~!!
澳洲蠔 - 海水味比東非蠔多D~ 可以一試
中蝦沙律 - 新鮮生果整, 但隻蝦有少少霉~ 但算唔錯啦!! [[不過好大碟]]
砵酒鮑魚仔 - 成晚覺得最好食呢個! 個汁唔錯(但濃返少少會更好), 鮑魚都新鮮好味!!
芝士焗元貝 - 元貝本身係食到鮮甜味的!! 但個烹調手法唔得! 焗到不知所謂 :@
龍蝦湯 - $28,, 算係咁啦... 可以1試~ 個蒜蓉包唔錯!!
花膠湯 - 火候唔夠! 唔知係咪唔夠賣之後加水呢?! 好淡好淡~ 但絕對唔係味精湯!!
蒜蓉蒸象拔蚌仔 - 其實好難想像蒜蓉蒸會唔好味的 T^T, 但呢個真係麻麻!!!!

overall黎講D食材其實叫做新鮮的, 但個廚就..... 煮得一般!!
但平心而論, 價錢與質素係 worth 的!!!
全日仲要免 service charge, 仲想點呀?!
埋單盛惠$550........ 服務? okay~ 主動換碟執野加茶!! 係坐得迫少少啦~

我們一行6人..睇到呢間野d海鮮真係吾錯..所以就黎試試啦..去到間鋪頭好細...幸好我們有book位, 所以吾洗等...

叫了:
翡翠螺 - 味道幾fresh..好爽口..吾錯吾錯...

中蝦沙律 - 呢個好好味...因為佢個汁係用鮮芒果做..好fresh..同埋好多水果...好好味..唯一吾好既係d蝦太少lu

麵包蟹 - 一黎到覺得都吾係好大隻..不過食落真係幾好味..勁多膏呀...yummy...

豉汁蒸大蟶子 - 真係超大隻呀..要分五啖先食得完...但食完後..都係覺得normal size會好d..

焗海鮮飯 - 呢個超多cheese呀..感覺都幾膩, 好彩6個人分...

overall都吾錯..但上菜真係好慢好慢..要吹幾次先得...真係要改善一下...

早陣子我在數個博都看到關於一間海鮮店的文章，博主們都對這間店有不錯的評價，而且相片中的食物看似很美味，價格又相宜。早陣子是男朋友的生日，雖然我知道店內的座位有點狹窄，談不上會有什麼浪漫氣氛，但我還是選了它作為生日飯的地點。

當天晚上七時半左右，我和男朋友到達海鮮站便開始點菜。其實我早在前一個星期就已準備了我倆的點菜名單，唯一是要看看有沒有男朋友想吃的長腳蟹。

我們點了中蝦沙律、翡翠螺（一客六隻）、珍寶蠔（兩隻）、加拿大蟹、蒜蓉蒸象拔蚌仔（一客三隻）和一枝紅酒。其實原本我想叫阿拉斯加長腳蟹和四隻珍寶蠔的，但店員說阿拉斯加長腳蟹的體積比較大，怕我們會吃不完，所以建議我們改吃其他的蟹。另外，她又說珍寶蠔可以先點兩隻（當然又是體積的問題），覺得好的話才加。這間店的員工真是老實啊！

我們沒有拍太多的照片，因為整晚都忙著在吃，所以拍了數張便收工了，而且照片都不算太漂亮。

- 翡翠螺 HK$48 －很爽口，又新鮮

- 珍寶蠔 HK$35/ 隻－差不多有我的手掌那麼大，難怪店員會叫我先試試才決定會否加點兩隻，很美味啊！

- 加拿大蟹 HK$280（忘記揭蓋後再影一張相！）－男朋友比較喜歡吃軟膏，所以選了加拿大蟹，我相信我們吃的那一隻不算有很多膏，但整體都算可以，點醋吃都很美味，我們花了很長時間才消滅它呢！

- 中蝦沙律 HK$48 －雖然只有兩隻蝦，但新鮮生果做的沙律真的很難在街上吃到，芒果汁令人欲罷不能

- 蒜蓉包（送）－很燙口，因為是剛焗起的

- 蒜蓉蒸象拔蚌仔 HK$68 －比想像中大隻，味道不錯

- 紅酒 HK$85 －甜甜的，很易入口

我們大約在九時十五分結賬，二人共付 HK$609（全日免收加一，我相信我記錯了一種食物的價錢，所以和以上的總和有 HK$10 的差距）。我原本計劃要到附近的甜品店吃芭菲，但由於男朋友實在太飽了，結果我們就起程回家。

下次光顧目標：
- 龍蝦湯
- 砵酒鮑魚仔
- 蒸龍躉球
- 焗芝士龍蝦伊麵

五一勞動節，放假一天，同honey晚上飯聚，一早已book了尖東的海鮮站，這裡是主力食海鮮的，我們點了幾道菜：先來翡翠螺，$48有6隻，很抵食而且亦很鮮味，就連不好海鮮的我也大讚美味，我同honey齊齊分食哂！還有超多膏的麵包蟹，我真係唔係好識食，所以honey拆好哂先畀ｄ肉食，比想像中多肉，而且真係超多膏，我雖然唔食膏，但睇見honey食到笑哂個樣就知真係超正，而且佢多膏多到我食完過沙律，佢都未食完呢！仲有我覺得最好食的中蝦什果沙律，可能有芒果汁係面，好似食緊甜品一樣，而我們亦各點了一客好濃味的龍蝦湯，配埋蒜蓉包就一絕！

最後來多過中蝦燴伊麵及上湯芥蘭，其實已經食到超飽，但因為已點了在先，所以我們無奈要繼續食下去，但我只食了很少伊麵，其他都是honey搞掂，伊麵味道ｏｋ架，中蝦有炸過，所以好香口，但個菜就冇影相，不過係超大碟，所以食唔哂要打包呢！最後埋單$450，以市區食海鮮來說也不是太貴，所以下次會再幫襯，或者試下佢間炮台山既姊妹店！
而飯後我們就轉場到旺角朗豪坊地下間雪糕店SLOWLY by da dolce食甜品，原來做緊勞動節優惠，平日一球$28，但今日就$60元兩杯珍寶裝，每杯仲可以揀三隻味，超抵！

星期五晚陪完 bf 媽媽在佐敦買太陽眼鏡
一心想和她一起去擦海鮮～海鮮站好評咁多，心想行遠 d 都值得～
bf 即日下午先訂位，因為睇眼鏡耐左
我地出發前都預早打去問下可唔可以把 booking 改遲
店方話八點，因為係我地要改，所以即使最後早到等位到到八點都無所謂

在尖東 hea 了 25 mins 後，店方話後舖有位
一心歡喜～

一見到個位～實在．．．．．．
係一張二人大的摺枱，係側邊加多張椅．．．．
枱的大細已令我好懷疑如何放三個人的食物
其次係位置～～

根本唔係舖位內，係後舖的外邊，仲要對正廚房後門
雖然在商場之內
但感覺超似在餐廰後街開張枱比你～～

我地唔係好鐘意張枱，想問可唔可以轉其他枱
店方堅持店內的位將會開八人大枱
並這個 size 的枱是三人枱

即是說，就算我地肯等其他枱埋單，他們都不會砌兩張二人枱
三人，就一定要二人枱加椅～～

我好明白店方想令所有想黎食的人客都有位
可是，除了食物，人客對坐的地方都有 expectation 的～
就算，大酒店的 buffet 如何好味，如果，在後樓梯開張枱比你
你都未必坐吧？肯坐，都食得未必開心吧？

假如，我們是 walk-in 客，你一早講明今晚 full-house，先問這枱要不要
叫我決定等不等～
那很合理～因為是我們沒有 booking

但是，我們 booking 了，即是代表你留了位
sorry, 我真的唔覺得有客會期待是這樣的位～
假如 booking 時你講明 "舖入邊的位 full 了，如果在商場走廊可以嗎？"
甚至你可以講 "對不起，今晩有兩張大枱，所以 full-house 了，book 另一個日子好嗎？"
生意是做少了，不過，以海鮮站今日的名氣，今天 book 不到，人客也會 book 下星期吧？

一心想去大擦海鮮，結果落得晚上八點還在尖咀揾飯食～
希望海鮮站快快搬去個較大的舖位
令到環境可以配上食物的質素吧～

還望快速上升的人氣不會是海鮮站的絆腳石。