本來是為食入新界搞的一個局, 但因為考慮到價錢同預算唔到自選海鮮要收幾多錢而決定改為私人局. 是日星期日, 一行20人, 來西貢試下呢間俾車呔人送左粒星俾佢既海鮮館子, 有什麼來頭.

由我同南瓜二人去街市揀海鮮, 再加上店內有的材料. 2圍既中小局, 就在一個好多人都未食過既海鮮小食開始, 名叫狗爪螺 (又名鬼瓜螺). 此狗爪螺, 係街市買$20一兜. 問了街市婆同酒樓待應, 就咁烚已經是最好食的了. 所以就簡簡單單的, 每檯烚一碟. 狗爪螺, 其實冇乜肉食, 待應好醒目的當頭盤先上, 大家如搣瓜籽般, 慢慢細心的咬開個殼, 食裡面果粒螺肉仔. 在我身旁的兩位資深食家, 一個就不停的, 當瓜籽咁食, 另一對伉儷就不斷回憶起以前既味道.

因為象拔蚝要雪凍, 所以第二道菜才上, 不過, 因時間關係, 都係雪得未夠凍. 不過, 新鮮是非常新鮮的, 由我同南瓜二人親自去一間我伯父熟識的海鮮檔揀的, 質素應該有返咁上下, 不然, 我們應該上晒白車架啦. 食象拔蚝, 總覺得剌身才好食, 不過一大隻象拔蚝, 切出黎其實冇幾多肉, 同海參, 海謄一樣, 大部份內臟都是不能吃的, 而且, 象拔蚝, 只是皮包水, 見佢咁厚咁肥....其實只係水腫乍...

熱食了, 油鹽水浸花蛤. 好過老是豉椒炒, 油鹽水, 加上花蛤的鮮味, 湯底是新鮮的蜆湯, 花蛤爽口, 加上鮮味湯底, 實在是有師父之作. 之後, 又是我們的自來海鮮, 蟶子. 平常食開細蟶子, 食慣了豉椒炒, 然而這次, 我們用了粉絲鋪面蒸, 蒜蓉粉絲蒸, 平常蒸帶子, 扇貝既做法, 效果都不錯. 而且食材新鮮生猛, 份外的爽甜.

來一些六福的自家菜式了, 首先是椒鹽豆腐, 由南瓜先生點菜, 始終雜不開香口既菜式. 這個椒鹽豆腐, 非常之香脆, 伴上啤酒更是上佳. 而且, 外層炸得夠哂金黃香口, 而裡面依然是嫩滑非常.

之後是他們的客家咸菜炆豬腩肉. 正式來說, 就是我們客家圍村的炆豬肉. 用上濃郁的南乳汁, 伴上咸酸菜同木耳. 再加上極肥的腩肉, 看落好像不健康, 但為求把美味的食物食落肚, 肥肉嘛, 不就是客家炆豬肉的精髓嗎.....而且用公碗上, 非常非常之傳統.

瀨尿蝦, 這就是我們要摘下你五個福的原因, 次次都食椒鹽瀨尿蝦, 南瓜就要求了另一種整法, 就是油鹽水煮. 不過, 也許是廚房手慣(因為極少人用油鹽水浸), 最後都整出了椒鹽, 而且因為是自來料加工, 冇得叫佢再整多一次. 而且少了一隻, 無從稽考. 算了, 免了我地油料加上道歉就照樣食. 試了椒鹽豆腐, 椒鹽瀨尿蝦, 同椒鹽鮮魷, 發現六福既星級大廚, 椒鹽炒....是他的拿手之作.

苦瓜蒸蛋, 風沙雞, 同炒茶, 就是作為是次晚宴的尾聲. 三者都表現不俗. 而最後, 是魚湯, 侍應建議我們去街市買魚時, 叫魚檔執多一包煲湯料. 魚湯鮮甜不腥, 若是再老火一點, 味道會更濃更佳. 可惜的是, 他們不慣保留湯渣, 沒有嚐到煲湯用海鮮魚仔既美味.

總括一說, 六福的確是有水準的菜館. 而且收費亦算公道. 問我覺得佢值唔值得有星. 呢個我答唔到, 我只能說, 這次海鮮宴, 是甚有水準的一餐. 的確是值得推介的一間.

舊同事聚會，來探探這個米芝蓮1星地方， 這個場是同事居住地點附近，所以跟老闆老虎哥很熟絡，電話訂菜，只告訴他想吃甚麼海鮮，他全部幫你辦妥，因為不是第一次幫襯，所以可絕對放心。

食海鮮，最緊要盡情，而且人多才可以吃多點款式。
先來三個頭盤，象拔蚌剌身﹑大墨魚剌身﹑日本海膽…..wow wow wow，不得了，又鮮又甜，隨即喝下半杯白酒，更期待餘下的餸菜，因為同事事前鄭重吩咐，餸菜一定要一碟隨一碟上檯，因為海鮮一但凍了便不好吃，真夠細心，廚房果然依循吩咐，下來的每一碟，都能得到我們全檯人的讚賞。

蒜蓉粉絲蒸扇貝，原以為好普通，但一夾便可夾起，(即已清理扇貝尾的污穢物)呢d咪係誠意囉!

椒鹽鮑魚仔，椒鹽味道大家都知道是甚麼回事，想講講那隻鮑魚仔，彈牙得出奇，且一點都不過火，老虎哥稱廚師煮鮑魚仔前下了一番功夫(又搥又打…)才有這個效果。

沙皮星班兩食，一半是椒鹽，另一半是炒球；這味餸幾貴下，但貴得有道理。

之後的豉椒炒聖子﹑蛋白花雕蒸花蟹﹑椒鹽賴尿蝦都十分有水準，因為全部用料都很新鮮，要我再寫我都只會寫新鮮，鮮味，鮮甜等形容詞，但卻又是事實。

跟不同的海鮮激鬥一輪後，最後出場的南乳燒雞及炒飯已變了當天的大配角。

12人吃這餐飯搞掂6枝紅﹑白酒，大家吃罷仍不捨得離開，飲到high high地，還不停的碰杯互勉，去到這個年紀，總是有很多集體回憶，說不完的話題，意猶未盡，已即時約定下一回繼續分解……

地方好乾淨(廁所比滿分)且帶點氣派，招呼妥當，起碼一定有一個夥計在左右，
消費絕對物有所值，一定會再來。

連續幾日開PARTY, 今日突然想遠離市區, 去郊外走走, 過番一日寧靜嘅生活! 知道西貢有一間餐館入選米之蓮, 於是決定往西貢走一趟, 順便試試這一間米之蓮星級餐館!

西貢魚湯 : 必試, 隔渣冇油, 鮮甜無比, 濃郁甘香, 還有蓄茄味!

粉絲蒸元貝 : 推介, 元貝彈牙, 粉絲入味!

沙薑雞腳 : 沙薑完全浸入雞腳, 好味!

蒜蓉西蘭花 : 火候恰到好處, 排列整齊上碟!

楊州炒飯 : 炒飯粒粒金黃乾身, 夠鑊氣!

服務員態度友善, 不停幫客人換碟, 連奉送的甜品也絕不馬虎, 最值得一讚就是洗手間都簡潔乾淨! 難怪它脫穎而出而得獎!

大部分的食物都好食... 環境清潔, Overall 這間海鮮餐廳是值得一試
下次可以自備海鮮!
ps: 值得一讚的仲有免開瓶費

本校中六領袖訓練營選址於西貢，好不容易才找到肯以「學生價」接待我們的地方。
我們用膳的時間為5:45-7:00PM，八檯超過一百人的晚膳。菜館有三層，負責人安排我們包了地下和一樓；另外二樓一檯12人的，另加老師一檯4人。

學生的菜單(6餸1飯1麵)：糖脆豆腐、古法荷葉蒸雞、炒蜆、生炒骨、菜X2、炒飯及炒麵 ($600/檯，送甜品)
大家早上十時開始便一直玩城市定向，跑了一整天，吃了這頓晚膳，沒有一個說不夠飽的！而且事後檢討還一致好評呢！

我們是老師，4人點的菜又是不同：豉椒炒蟶子、椒鹽鮮魷、蝦醬通菜炒牛肉、炒蛋(有菜的，忘了菜名)、生炒骨($100/人，送桂花糕和生果)；

豉椒炒蟶子非常大隻，而且十分新鮮，辣味也適中；
椒鹽鮮魷也非常大隻，炸粉不厚，金黃色的，金蒜不太多；菜館的油絕對不是萬年油；
蝦醬通菜炒牛肉的牛肉非常嫩滑；
炒蛋很嫩，清而不膩；
生炒骨的味道適中，肥瘦均勻。
總的來說，幾味餸皆份量十足。我六時半吃完晚飯，到凌晨三時半也不肚餓~

菜館的裝修簡雅別緻，十分整潔！負責人非常友善，聽見咱們是中學來的，便絞盡腦汁為我們想了一個六餸一飯一麵的菜單，而且價錢便宜得只$600一檯！他為我們調動其他客人的預約，還答應汽水特價，真的好人得讓我們有點不好意思呢！

在西貢的海鮮酒家，通常一檯最少要一千大元，但六福菜館竟然願意做我們的生意，其高尚情操怎能不讓我們無限安哥呢？

去半月灣游水, 奈何三號波要回岸
沖埋涼三點九, 走去搵野食, 友人推介這間六福, 都算易找, 牌坊的全記後一條街
朋友話佢地拎的海鮮不錯, 就不自己買了, 話晒出面大風大雨(好在走時又放回晴)

點了八樣野
蒜蓉粉絲扇貝: 夠大隻, 蒜及粉絲無慳住用
豉椒炒大聖子: 切開炒, 大家食得方便點, 略嫌唔夠熱
白灼蝦: 夠新鮮
椒鹽鮑魚: 未試過咁的食法, 但又幾好喎
椒鹽豆腐: 極度推介, 好好食, 夠脆, 豆腐夠滑
生炒骨: 即炸, ok, 不過唔夠波蘿
竹笙扒白菜仔: 正常啦
瑤柱旦白炒反: 正常啦

另外服務好, 環境乾淨, 又夠闊(不過張椅無靠背....)上菜碟好"骨子"
有西瓜及桂花糕送, 桂花糕是驚喜, 於食完濃味的野食, 一口桂花糕, 口氣清新晒

聽西貢人說及介紹, 先去碼頭買d料番黎, 再拎去餐館叫佢地整, 加錢整好d喎~

先去睇下有咩買啦! 點知所剩的不是很多呢~
買左200蚊料(有斑有花蟹), 見扇貝不是很多, 轉到街市買算罷, 44蚊有8只, 抵呀!

服務十分欣勤呀, 勁執碟碟收野,要咩有咩...
2條友坐成2個鐘, 由6點坐到8點, 真係唔話得!!! 臨走仲有生果同dessert送~(桂花糕呢~)
來料加工, 再加埋半只風沙雞同咸菜蕃茄浸菜菜子, 就收你$367~ 都算抵既~

復活節的朋友眾會, 我們選了到這裡大吃一餐! 自己買海鮮入去煑

1. 芝士焗龍蝦加"yi min"底
2. "焦鹽" 鮑魚
3. 清蒸兩細斑
4. 豉"焦" 炒蟶子
5. 清蒸扇貝
6. 西蘭花炒帶子
7. 炸子雞
8. 蛋白炒飯

個蟶子, 扇貝, 斑好好食, 火喉剛剛好!
龍蝦就個芝士味唔夠, 但係都ok
本想清蒸鮑魚, 但係見老細推薦焦鹽, 就試一試啦~ 都幾好味, 焦鹽味有啲啲, 但又唔會cover 左鮑魚既味~ 喜愛焦鹽的朋友讚不絕口. 但我覺得平凡是福, 還是愛清蒸多一點.

但其實炸子雞和蛋白炒飯卻是超水準之作! 個雞炸得外脆, 裡面的肉汁仍在! 是我們來吃飯的必叫作品之一, 另外就係個dried scallop 蛋白炒飯, 炒到一粒粒, 很爽口!! 真係太好味了~~

最好的就係開酒唔另加收費, 所以一眾酒鬼馬上拿出預先準備好的紅酒!

盡興的一餐!

自問半個西貢人, 因大部份假日都會出現在裡面, 這間菜館是那些在岸邊的船家介紹的, 很值得推介大家. 鋪位不大, 裝修雅緻, 唯一挑剔是木圓櫈真的不好坐. 價錢公道, 因菜牌列明每樣外帶海鮮的做法和價錢, 按人數分價錢, 普遍來說, 價錢唔貴...其實食得安心, 因為明碼實價. 服務OK, 如果坐上層就差D, 因為人手不夠. 試過有一次坐下層, 我爸爸帶他的外國朋友一起來, 招呼很好, 所有人都很盡興. 個人覺得海鮮和外面幾間X記差唔多, 但特別推介這裡的咖哩真的很惹味, 咖哩蜆係GOOD 嘅, 必試~

今日同幾個朋友入左西貢，打算行下夜晚就食海鮮啦，
4點幾買完野就去左搵舖頭加工，經我家姐介紹之下，特登去左搵"六福"，初初行到埋去，覺得佢裝修確實係比海旁所見果d海鮮店唔同，而且位置唔算好遠，o係"海鮮街"個牌扁隔離條街就係，好易搵。
入到去，我地就坐一樓，好乾淨，個廁所好似去左酒店果d咁，唔dirty~
而d侍應都幾好招呼，佢地d加工費明碼實價，有menu例明，而且仲會suggest下點煮點煮

我地買左4樣野，墨魚,蜆,花蟹,賴尿蝦(合共$240)
煮成
1)白灼墨魚味道普通啦，不過幾爽口，但冇左d鮮味
2)豉椒炒蜆炒得幾入味，都幾好
3)薑蔥炒蟹都係夠味啦，不過上碟好似唔夠熱
4)椒鹽賴尿蝦最好味呢款，d殼都要啜埋，仲要啜埋手指添
另叫一碟西蘭花炒肉片，ok啦，個人覺得西蘭花太少
不過d野仲會有花伴碟的，幾有心思~

臨尾仲有甜品食，桂花糕同水果，d桂花糕好清甜，唔"流"
叫左4枝野飲，4人埋單$330
下次都會再去~

先行投案，間舖係朋友新開嘅，不過自己食過都覺得唔錯，而且左右其他食客都有好評，所以先敢推薦。

間舖裝修好雅致，有別以前d海鮮業館。一般村屋舖，地下個層好細，不過有二三樓，所以都可以坐唔少客。

上周日中午，二樓都有四枱客。叫咗蜜糖雞中翼、瑞士汁牛河同灼芥蘭。蜜糖雞中翼好香好甜，瑞士汁牛河d河好重米白，芥蘭好新鮮爽脆。

隔離枱話佢食嘅一種??雞都好好味，伙計就話係同咖哩雞差唔多，有機會一定要試下。

是日免茶芥加一，唔知係唔係因為friend?