gd food ， i like the chinese environment；）

those lattern hanging made with red envelope（lai see）
women boss 60yr o ，staff say she compete in
miss hk in the past ，same time as lee 司棋；P

姑公情痴煲仔飯﹐ 從添樂園到大家樂﹐ 蛇王芬到鏞記﹐ 通通唔放過。 今試富來﹐ 食評唔多理想。

拜日晚七點幾﹐ 鋪面仍然水靜鵝飛﹐ 察覺唔多妥。

紫砂茶壺送上壽眉茶﹐ 濃而不香﹐ 但好過大部份的大餐館。 姑公亦是茶痴。

二人一份套餐 $180﹐ 唔平。 包括﹕
1) 竹絲雞首烏湯﹐ 淡淡藥味無雞味﹐ 湯渣鞋到無倫﹐ 翻渣再翻渣﹐ 無晒味。
2) 海參黃鱔煲仔飯﹐ 細食者 OK。 飯量勉強夠兩人﹐ 但無乜料。 兩嚿海參﹐ 一嚿冧﹐ 一嚿唔冧。 煲仔飯豉油 =/= 隨煲無附送﹐ 奇奇奇﹖﹖﹖
3) 最差係蓮藕腩仔煲。 一上檯就知係用萬年 走油 的油炸過。 懶+無料D廚師一定將所有的食物先走油放一邊。 單到時打獻上。 美其名鎖住肉汁﹐ 實則係懶﹐ 貪方便。 食物經萬年走 油炸過﹐ 所有味道都一樣。 講衰D係其臭無倫。 蓮藕冧 BETBET﹐ 腩肉鞋+UN﹐ 成煲送番俾佢﹐ 再交叉多一次。
4) 甜品雞旦馬蹄露﹐好食。 馬蹄多又唔太甜﹐ 清清地。

伙記推薦$68 鮑魚一隻﹐ 又幾好食

埋單 $275﹐ 門口大大字﹐ 全日免加一。 唔知點解 $180+$68 = $148。 三十蚊去咗邊﹖ 兩位茶+ 一碟甜南乳肉 = $30﹖ 難怪樓下有幾位食家噪噪恭啦。

地點偏僻﹐ 樓面清雅﹐ 服務普通﹐ 無講得甘差﹐ 有問有答。

一次起﹐ 兩次唔會在嚟挪。

兩個人....食左:
蝦飯 - 原本想要蝦蟹飯...可惜是晚冇蟹....飯冇咩特別....好彩可以用蝦上的蒜蓉撈飯....每人可以吃到兩碗仔....$80一煲.....好似唔多值....
XO醬茄子炒牛肉 - 一上檯....點解咁多汁既???唔係炒架咩????好彩味道都唔錯.....仲可以用D 汁黎撈飯.....
原本仲想叫其他野食...但係好似好大煲咁....怕食唔哂.....所以就咁罷手.....
埋單 $152...叫做試過.....

剛才(15/9/2008)去左呢間食肆食晚飯, 真係食到一肚氣!!!!!!

我地俾左信用卡佢, 但好快就發現張單係唔啱數既!!!! 我地就立即截住黎問.

細menu(圖一)明明寫住涼拌青瓜係$20, 但佢張單係$25!!! 我地咪立即問佢為何收$25而不是$20, 跟住佢俾左佢地的大menu, 指住係$25. 跟住我話我係睇住張細menu黎叫架嘛, 跟住職員就話咁張大menu係寫$25架嘛, 細menu舊架, 我地係跟menu打單架嘛, 跟住我朋友話, 咁張細menu係咪menu先, 咁你張細menu唔好擺係度呀. 跟住佢地唔出聲, 我地見住收銀姐姐係收銀機個度做野, 咁我以為佢地會減番$5啦, 點知佢碌左卡叫我地簽, 佢特登唔擺番張單係度, 淨係比碌卡個張要簽的收據, 我一望, 個價錢跟本無改過, 我就話, 個價錢都未傾好, 就擅自碌卡, 搞錯呀, 我唔會簽架. 跟住收銀姐姐話張單改唔到價錢架啦, 你地可以向公司投訴架, 我地都好難做架嘛(態度勁晦氣勁差). 跟住我朋友問叫經理黎講, 收銀姐姐就話, 唔係度喎, 跟住我朋友再問, 咁邊個最大呀?? 收銀姐姐話, 無最大喎(勁串). 跟住我地叫佢俾番張單我地, 我地諗住影相, 影番張單, 跟住收銀姐姐無啦啦又話, 唔使影啦, 張單俾你架(又係勁串)

最終, 我朋友都係簽左張單, 唉......

全場個收銀都係勁串咁同我地講野, 其實個$5我地俾貼士都可以俾左佢啦, 但佢張menu誤導人, 我地同佢講番佢地就咁既態度, 我以後一定唔再去呢間食肆食飯啦!!!!!!

這家店就在我家附近, 老是經過都覺得挺有特色, 所以昨日便專程去品嚐一下.
老實說, 真的平平無奇, 全部都用紫砂煮，所以有些不太入味.
我開了壺茶, 並叫了個套歺, 有一湯一飯一餸,
壼茶香濃, 真不錯,
湯是雪梨海底椰, 同樣不錯, 不過不加味精會好d
飯是北菇滑雞飯，飯好少，女仔食免強足夠
餸是京烤骨，是煮好後，再加汁，　所以肉淋而不入味


如果外國人去，　一定會好NICE,　因為裝修富有中國色， 但對於香港人來說，唔係食裝修，　味道好重要，　價錢又不是大衆化，　而且唔可以好大班人去，所以這個價錢，　真係有好多CHOOSE　

許多小型飯局，誘因會是一位食友吃完後令到其他人都產生了興趣而成局的。今天這個小飯局，便是由一位有心食友負責安排，在此要再一次多謝他。

從太子步行過來不用二十分鐘，進店時客人已佔了三分之一左右，店內都以大量的中式燈籠來作主要的佈置，加上用淺灰色的磚牆，感覺很不錯。我們被安排到在較入的"偏廳"，跟在外邊的客人有一點距離，沒有那麼嘈雜。

到了相約時間，各食友亦陸續到達。其一位食友(惡男兄)特地帶了"手信"小吃過來，實在是客氣呢。

茶方面要了龍井，用紫砂茶壺盛著的茶，味道當然...............不會有甚麼分別，只是感覺好一點而已。 而點菜方面，大部份由"攪事者"KKK兄負責"發辦"。先點了蝦蟹煲仔飯、再來淮山杞子鳳爪燉響螺(大盅)、川貝海底椰雪梨豬展湯(大盅)、梅子鴨、窩蛋牛肉煲仔飯(加蛋)、臘味糯米煲仔飯、梅菜肉餅煲仔飯、咕嚕肉、烏醬白鱔煲和瑤柱技竹浸勝瓜。

先來的，是兩個大盅燉湯:
<<淮山杞子鳳爪燉響螺>> 較鮮甜濃味而重膠味
<<川貝海底椰雪梨豬展湯>> 燉出來的湯，味道比煲出來的完全唔同。這個清潤帶甜，如果熱氣喝這個最好。
<<梅子鴨>> 梅子味道進不了鴨肉內，汁鴨味道分離，鴨肉嚡且味淡.....
<<咕嚕肉>> 炸粉入口時仍是脆口，甜酸有序，最特別是用上了水蜜桃代替菠蘿，頗香甜
<<梅菜肉餅煲仔飯>> 梅菜沒有過咸而且有少少甜味，肉餅尚算滑身，做得不錯的~
<<臘味糯米煲仔飯>> 雖然不時不食，但是臘味癮起也是沒法子的。 當蓋子打開時，那股強勁的臘味香味簡直是爆發出來，令我們都食指大動。亦因為臘味份量多的關係，所以整個米飯都充滿著臘味的油香，讚!
<<蝦蟹煲仔飯>> 蝦蟹用蒜蓉開邊蒸的方法，所有的汁都滲入了米飯裡去，每粒飯都帶著香味和鮮味。只是，略嫌蝦肉蒸到乾了一點點而已~
<<窩蛋牛肉煲仔飯(加蛋)>> 一個講求原味的飯，不過牛肉受到不少的梳打照顧，實在是敗筆之所在。
<<瑤柱技竹浸勝瓜>> 味道正常，沒有多大的師傅痕跡，勝瓜亦清甜。
<<烏醬白鱔煲>> 份量比較少一點點，不過烏醬(麵豉醬)與底部的蔥段煮至非常入哂，拿來送飯一流。而白鱔方面，口感頗滑而無甚腥味，魚則算肥美，很不錯的小菜。
後來有一點點不夠喉，便追加了一碟<<椒鹽豆腐>>，雖然曾懷疑一度"漏單"，但是它的味道又真的不錯啊。乾身而夠惹味，又是送酒佳物呢~
而送的<<蕃薯糖水>> 薑味強而甜度適中，算是不錯的免費甜品了~

整體上感覺也不錯的食店，雖然跟一般常吃的煲仔飯有點出入，但是也有其特色的。

謝謝kkk兄策劃有得吃有得玩紫砂宴，九人安排在內堂位置，自成一閣，言笑間亦不怕被其他食客打擾。

全店清一式紫砂菜系列，主人家已安排了幾味煲仔飯，又寫下了幾味小菜，睇睇價錢，小炒平均$40左右，價錢認真大眾化，位置雖隔涉卻其門如市。

先來海底椰豬肉燉湯，很清很消暑的湯品，餐前暖暖胃，也不錯，之後的響螺燉湯，食友大讚濃郁美味。

幾味煲仔飯，食友問起紫砂作用，熱烈討論鬧出連番笑話，笑言臘味飯同海鮮飯如此「香噴噴」，都是托紫砂之福，將雜質吸走，連帶毒素亦透過空氣排走。吃了碗海鮮煲仔飯，蒜茸蒸蝦汁滲到飯內，每口汁香，也能輕易吃掉兩碗。

夏天無胃口時，不是吃辣就是吃酸，梅子鴨，原以為是梅醬那作炆鴨，看鴨樣子「實實淨淨」，是鴨還鴨煮，醬是後加，味道很抽離，胃納還是留給白鱔好了。

烏醬炆白鱔，醬汁輕描淡寫，白鱔卻出奇地鮮嫩而不帶泥腥，油脂豐腴，為食地吃了幾件，身邊食友亦吃得滿意，$58壹煲，是意料之外的好。

香桃咕嚕肉，如DragonFire兄所言，用地門水蜜桃代替菠蘿，甜重於酸不著嗆喉醋味，但炸漿打得很厚，影相後開始變腍，可幸肉質無經化學，吃落亦有彈性，$28壹碟，認真經濟抵吃。

柴娃娃玩得高興，叫下啤酒，卻無小吃，叫店小二做個椒鹽豆腐出來，結果酒是喝了2 round，笑說是比即叫做更高級的「即叫即磨（豆）」豆腐，最後上來是炸豆腐淋上椒蒜之物，碟頭大亦炸得不油膩，滿意了。

大獎最後由靚女食友，吃得稱心高興，謝謝「粉絲會」會長的安排！其待「粉絲會」接下來更精彩的活動！

前幾晚黎試下, 結果有d失望:

南瓜荔芋菇粒+白鱔煲仔飯: 好豐富. 但味道好似唔係好夠, 就算加左少少豉油都無咩味

涼伴青瓜海哲: 糖水味好重. 不過就好清涼. 夏天食好舒服

我覺得好屈錢係茶錢每位$6, 都算, 我都飲. 但佢一定要人要碟花生, 又唔好味, 又熱氣, 根本就係唔想食. 但都收十幾蚊碟. 之後仲要加一!! 兩個人茶錢加埋呢碟花生未叫飯都要比二十幾蚊, 出面食到碟飯啦!

請注意, 煲仔飯最少要等半個鐘, 如果你係超級肚餓就唔好諗黎呢度食. 唔係會越等越忟.

仲有...service好一般....點解要加一呢?

需然不是〔超好〕，尚算o.k.不彷一試，因為有〔中國特色〕，晚飯惠顧必定有〔香芋西米〕糖水送，而端午節個晚還有〔〕送添，不過這飯店還有好多可改善的餘地，如禮貌等…………

昨晚到富來一試紫砂煲飯.選了個二人套餐$168:
要了一個花旗參日月魚煲竹絲雞,
一個海參黃鱔煲仔飯,
一個雜菜煲.
餸菜尚算一般,但環境很是古典;只恨環境配合服務態度很不協調(服務態度唔得)可惜可惜!
餐後埋單離枱先話有糖水送
埋單茶介加一$209

冬天啦, 食煲仔飯最合時. 呢度食紫砂煲仔飯, 細煲(份量: 3碗仔左右) 三四十蚊, 大煲(5碗仔), 都係五六十蚊, 價錢可以, 款式又多. 仲有好多款煲仔菜, 小菜等.

生炒糯米煲仔飯$40
糯米飯都有煲仔飯? 幾得意wo, 又幾好味wo! 唔油, 比起平時食開濕少少, 仲好啦, 感覺無咁熱氣, 而飯又好黏身好有口感, 足料,有好多臘味.

荔芋排骨煲$48
芋頭做得好靚, 夠粉又有少少硬身. 排骨份量略少, 味道都唔錯.

蕃薯糖水
食晚飯, 送糖水! 薑湯好夠味, 蕃薯好甜又淋, 好正!

全店賣係無味精健康菜, 食落都覺得少油少味精, 食飽都唔會口渴. 服務都唔錯, 而且不設搭, 坐得舒服. 晚晚都好多人, 今晚我九點先到, 都要等半個鐘, 下次都係訂好d啦.

今晚同2個朋友嚟食煲仔飯，我們叫了一個2人套餐$148(包一盅細燉湯、一個煲仔飯、一個小菜同飯後甜品)另加一個煲仔飯同小菜；燉湯係川貝海底椰妥瘦肉燉雪梨(套餐)，煲仔飯係梅菜肉餅飯(套餐)同北菇滑雞飯$40，小菜係鮮竹什菌浸時蔬(波菜)(套餐)同烏醬魚頭煲$55，甜品係香芋西米露(套餐)；茶芥每位$5小食$10另收加一，全張單合共$294.8，每人都係$100，我們認為價錢合理。

燉湯好清甜，又唔油膩又無味精超正；煲仔飯的飯焦非常好味，我們只是加熱水已經好香脆，用料新鮮尤以北菇滑雞煲仔飯雞好滑亦有雞汁滲入飯內，所以比較香，小菜用料亦見新鮮，烏醬魚頭煲有少少辣味，好香口，鮮竹什菌浸時蔬亦係少油少鹽。

有一點我要為這間店平反的，其實這間店的出品份量並不少，只是個砂鍋實在太大，所以會令人有錯覺份量少吧？煲仔飯有3碗幾，餸的份量也不少，我們3個人亦食光了全部食品(因為好好味)。

我們非常欣賞呢間飯店，裝修得古色古香坐位舒適，服務也不錯一叫就有人落單、加水，而且出品大都少油少鹽非常適合愛健康的人士，下次一定會再光顧。

日期：2007年11月21日
我同男友黎試下用紫砂煮既食物，都係不外如是姐！首先，我地七點鐘去到，得小貓幾隻，睇下餐牌有ｄ咩招牌喇！叫肥阿姐黎落單，佢既眼神話我知，佢好唔like我地．問佢有咩湯，講到一舊舊，救命！之後問佢ｄ湯可唔可以兩個人都唔同，問我即係點，講清楚ｄ俾佢聽，佢話點可以咁架，兩個人梗係一盅喇！意思即係一盅足夠兩人飲用．叫左個二人套餐HK$148，有燉湯，一個煲仔飯，一個煲仔菜，或是唔要飯，就要兩個菜呢？我地揀左前者：－
１．川貝海底椰燉雪梨豬展：每人兩碗仔，清清地幾好飲啊！
２．梅菜肉餅飯：加左少少既醬汁，好鹹，好多肥膏！每人碗仔幾．
３．瑤柱鮮竹浸勝瓜：勝瓜好焾，鮮竹好味，無咩特別！
甜品－南瓜西米露：太甜，太稀，okey喇！
茶芥HK$20，加一，埋單HK$185．好唔抵既一餐，食完唔夠半個鐘，我已經要去解決喇！
臭到隔離果ｄ都唔係好香，無咩紫砂既風味，劣啊！！！

叫了一客黃膳煲仔飯和淮山子燉水魚。湯足料，兩位四碗，不多不少，味道尚可但吃不出水魚味。煲仔飯有別於一般坊間香口熱氣的風格，類近蒸飯(但紫砂煲底有飯焦)，黃膳味道一般，汁液未能滲入飯身，中規中矩之作。餐牌內有引述清代袁枚<<隨園食單- 飯粥單>>，可惜未能於其出品中得到引證。是夜連茶芥花生$148。