大家在沙田茵晚飯,徒步回到大圍,找地方去補回沙田茵之失,記起上年Dragon Fire吃過的點心店,但時間尚早未有點心供應,結果,行多兩步,去"傅師傅"吃甜品.

同行的子陵最愛大家樂的香蕉船,來到傅師傅也來一客.而且更即場唱出廿幾三十年前的兒歌"香蕉船",幸好我們制止,否則又再出洋相.說回香蕉船,用三色雪糕加香蕉,再加點士多啤梨,忌廉上面便成.賣相比大家樂佳,但一向對此味興趣不大,還是留待吃其他甜品.

梳乎里不久便上,我們懷疑是否一早整定,結果這個梳乎里是凍冰冰,不知道梳乎里凍食,是不是這甜品店的一向特色,但我們所有人,沒有一個接受這個梳乎里.炸雪糕外表如沙翁,一切開,內裏仍保持雪糕的質感,如果同早前"甜品革命"的炸雪糕相比,此店好得多.

心太軟有點過火,流心程度近乎沒有,只有一劈野.火焰雪山沒有火焰上,吃落當然沒有火花.口感有點空泛.

自稱為酒店級人馬主理,不過酒店這個範圍是很闊,半島四季,維景悅來,甚至百佳維多利亞,也是酒店.當然級數也不一.所以,一聽到什麼酒店級師傅主理的地方,請不要大驚小怪.

因為楂車~所以有得拍車係好主要黎大圍食甜品既原因~
今次黎傅師傅~係睇完食評先黎既~所以叫左鮮果千層酥~

鮮果千層酥~ 味道可以~酥皮好新鮮~又趣又香~
但賣相又真係求其左D~唔太靚...
生果就...好多都唔甜~得哈蜜瓜係甜少少...

另外叫左香草綠豆沙~
算係幾香~不過食落就同海帶綠豆沙一樣~還可以啦~

上個月應承左男朋友食心太軟,陪佢去喇,又唔食喎!!善變唔係女人既專利~

大圍冇左松記之後班夜遊人都迫晒去傅師傅,生意有增無減,但係質數就有待改進!

上次我地食左心太軟,真係冇得頂.今次得閒無事做,叫左另外兩款甜品★

繽紛世界>> 個甜品colourful d,食起上黎都開心d~甜品最面層係新鮮水果.西瓜,哈密瓜,蜜瓜,芒果,strawberry等,再加上大粒西米.底層係椰汁大菜糕.簡簡單單咁,唔錯!
凍芒果梳乎里>> 做乜梳乎里係凍既???冇睇清楚就叫,出事喇~~平時起酒店食開果d,好細個架,仲用個杯裝住添,今次成個雪山咁上,俾佢嚇親.
第一啖就已經覺得怪怪喇,食多幾啖好似食緊發泡膠咁,又冇味,又大個唔食又唔係喎~仲要個芒果酸既!!

店員應該係一班仔女,態度麻麻,有位十幾歲既童工唔知將d乜野滴左入糖水度,直頭起人地面前用手整走佢.即時有個大姐姐叫佢返入店整.不過唔係碗過碗,係俾番同一碗~

店內仲有豬扒包,雞翼等等供應,等我下次又試下先.

食完串燒, 係大埔道行返落山, 溝貨團已經組成, 一行7人, 吃不到點心, 便去吃甜品. 在大圍有什麼甜品店, 地膽朋友便領軍來大圍村, 一間叫傳師傅既甜品屋. 說是什麼酒店師傳, 亦好多不同的新式甜品. 都好, 試一試是什麼吧...

香蕉船, 梳夫哩, 炸雪糕, 心太軟, 同一個火焰雪山.

香蕉船, 是我們其中一位食友所愛, 傳統的混入三色雪糕, (雲呢嗱, 朱古力, 士多啤梨), 果然是非常傳統.

梳夫哩...一向都係熱食, 這裡有個凍既梳夫哩....咁新潮, 就要試下啦. 芒果梳夫哩, 凍食又真係幾特別, 不過硬是覺得太特別....食到中間, 有糖水流出來, 突然令到成個梳夫哩好甜.....而且凍冰冰....好唔慣....下次都係要食熱既好.

炸雪糕, 若不切開, 似沙翁多一點, 一客三舊, 一樣三色. 感覺上, 此店的雪糕類甜品比起其他甜品更勝一籌.

心太軟....沒有看其橫切面, 沒有去食, 只知道食友叫道....唔流汁既. 熱唔熱就唔知, 但一聽到, 已經不是果回事.

火焰雪山....如果係一D正式既餐廳, 酒店...應該係燒住上, 這裡的, 明顯地是預先在廚房燒完才來, 外層只是少少脆, 裡面蛋糕同雪糕OK啦.....

味道是可以的, 不過佢話係什麼酒店大師傅.....令我們期望高了....今次負分...

o個日同朋友踏完單車，朋友推介呢道的心太軟好好食，結果我地一行三人叫左四個甜品試試。

招牌菜-心太軟
心太軟的份量稍少，皮很鬆軟像剛出爐的蛋糕。朱古力的分量亦適中。味道不錯。

鮮果千層酥
一層層薄薄的鬆化的皮，包著很多的生果和cream。感覺好豐富同形成強烈對比。

其餘兩個是雪糕香蕉船同錢袋藍莓蘋果酥，認真麻麻。

總括來講，這裏的雪糕好似雪山牌的家庭裝雪糕唔食唔食係損失，生果味道稍淡及稍為不新鮮。

但是之這個價錢來講，我覺得可以接受。
尤其如果大家鍾意食 心太軟同鮮果千層酥 的朋友，我更會強烈推介。
但其它甜品，就不敢恭維了。

甜品是喜愛的,但從不佔有巧克力的甜點.
心太軟是此點招牌貨,一試無妨,卻就愛上了!
份量少少的,由於巧克力不是我的最愛,
跟男朋友share就剛剛好~
還點了合桃露呢★

今晚去完沙田食飯，回家途中同朋友去大圍食糖水
可惜錯誤地選擇了傅師傳
（揀佢都係因為當年小妹仲係中學生既時候，貪佢午餐送糖水，質素ｏｋ又有得食甜品）

但好可惜，水準如今不再！！今晚之後我以後都唔會再黎啦！！

我地一共ｏｒｄｅｒ左兩種甜品
繽紛世界
芒果雙皮奶

繽紛世界：　ｍｅｎｕ寫明有大菜糕，ｊｅｌｌｙ，水果，明珠，黎到既時候少咁一樣－ｊｅｌｌｙ，嘩！我都係想食ｊｅｌｌｙ先點姐，於是我就問Ａ師奶員工，佢竟然一句「唔好意思」都無，就大條道理同我講「今晚少咁ｄ　ｏ者喱」，　我心諗：有無搞錯呀，其他料又唔見佢比多ｄ．不過算啦，佢ｄ料比我既感覺係好唔新鮮，ｄ生果又酸，芒果，士多啤梨酸既程度達到令人瞇眼．完全就係一大堆野加奶溝埋一齊

芒果雙皮奶：　雙皮奶味道還可，但凍熱程度難分！芒果顏色鮮艷，大大啖咬落口就知出事．．．　另外，兩碗甜品最差既地方就係Ｄ明珠　一咬就散，完全唔係明珠既口感，味道仲怪怪地．．．好似食到Ｄ滾水味咁


食左幾啖已經好激氣，諗住睇下電視上既超級巨聲，點知有個Ｂ師奶員工二話不說ｏ係我地面前飄過轉左去黑白色既亞視！（我知我無權呻呢一樣，但間舖咁細，做街坊生意就理下在場既顧客啦．．．）　呢樣都算喇，幾位師奶員工，加個後生既，全間舖最嘈就係佢地，個後生既後來仲唔知出面發生咩事，一行入黎就「ｘ你老母！」嘩．．．真係令整個甜品宵夜錦上添花！

唉！當年幫襯過唔少次，覺得抵食味道又不錯，如今竟然要我動哂氣咁上黎寫第一篇食評，真係唔抵幫呀！講真價錢係比連鎖式甜品店平，但既然開門做生意，就算唔休做，都唔好提供咁樣質素既甜品同服務啦！甜品店係應該拎個心出黎做既！

黑心ｄ講句，他日大圍開多幾間服務態度好ｄ既甜品點，你仲有得做？

打完呢篇食評真係好似出左啖氣呀！不過個肚．．．好似有ｄ絞絞下．．．．

其實我好少會寫食評，個人口味太主觀，無謂無辜地影響食肆聲譽嘛。

不過琴日食完傅師傅之後，我明白有時一兩句意見，總係有佢存在價值0既。

係大圍食完晚飯，同行友人建議食糖水。見到呢間小店外牆貼滿色彩繽紛0既相，仲高朋滿坐咁0既格局，諗住實無死！

坐低，見到隔離檯有個忌廉旦糕幾得意，望下Menu，冇0既？再望下牆上0既相，哦！原來係火焰雪山！

然後見到D相有個賣相幾精緻0既梳乎厘，諗住難食極有個譜……點知，就係咁令自己失左一個大大0既望！

個梳乎厘黎到，賣相係完全倒人胃口，完全唔係梳乎厘應該有0既白！再叉開放入口，果種難食0既感覺，真係難以形容。朋友食完一啖之後，即刻吐番出黎！果種好似清蒸發粉加旦白0既味道，同梳乎厘完全扯唔上關係，食完只係想嘔！

其他甜品水準都係偏低，最基本0既鮮果椰汁西米露，都可以整得難食。椰汁稀到好似用水加糖開出黎咁，生果得幾舊仔，刻薄講句你送俾我都唔會食！豆腐花完全欠軟滑，好似食石膏粉咁，朋友本著 "非洲兒童無野食" 呢種心態，先可以將佢吞晒落肚。

最後我地每樣野都只係食到一半，因為實在太難食喇！

與數十名舊朋友聚會，
晚上"地頭蟲"提議來此店吃吃甜品。
因為店中沒有足夠座位
一名應該是老闆娘的女士嚴厲地對我們說 :
"我而家係外面開張台俾你地，你地唔準嘈 !!! "

當時正值夜深，而且鄰近民居，我們當然不會高聲談話，
再者，我們的manner 是十分良好，友善的，
何解她不以平和的語調去事先提醒我們呢 ?
確令我們百思不得其解 !

我們一行數十人，落單順利，
只是出食物的時候，
他們員工內部出錯，多出了數個甜品，
那位女士惡言相向，責怪我們落了很多次單，
** 更正，我們是真的只下了一次單，
而且還跟waitress說了total 多少個

食物質素平平，
友人說，芝麻糊是他吃過最worst 的.....

服務奇差，只勝在比較便宜 !

今晚同女朋友黎食.. 叫左個新出既士多啤梨奶酪布甸同埋什果黑珍珠..

佢食左一啖什果黑珍珠已經唔想食... 初初仲以為佢因為食慣松記要求高，點知，食左一啖.. 真係.. 唔好好得... 無味.. 好淡.. 淨係得椰汁同奶... 食左兩啖都唔已經唔想食.. 連埋生果一齊都無味..

見到佢食士多啤梨奶酪布甸終於有返少少笑容.. 試左一啖，真係相差好遠.. 呢個士多啤梨奶酪布甸好好食.. 而且佢仲要有層啫哩係底.. 幾好食... 值得一試...

可惜既係.. 岩岩撞正間鋪黎左兩堆OVER 10 個人既客.. 所以食完未抹咀已經比人趕..

二月廿五‧陰陰天

單車同樂日的「真正」最後一站，順理成章的是吃甜品。因為下午在大尾篤吃了個過份流心的心太軟，大家都決定在是日的終結前要吃回一個正常版。還記得這裡有一間賣特色甜品的地方，就在新翠村那邊走了一段不短的路程過來。

周六的晚上，人客自然不少，可幸這裡佔了兩間舖位，大家吃完就走，我們一行十二人，也可以立即分坐兩張的六人檯。這裡是村屋舖位，面積不大，但坐落幾舒服，因為我的位置對正分體式冷氣機，又背靠大雪櫃，涼快舒適。

兩邊各自吃自己想吃的，我們跟Oli一檯，當然第一時間要了兩個心太軟，另外還有雜果千層酥、炸雪糕、焦糖燉蛋、龍眼雪耳燉雪梨及香蕉船。

雖然這裡人客不少，但甜品上檯的速度奇快，眨眼間已一檯都是甜點。最受我們注目的當然是心太軟，看見這裡的是「正常版」，大家自然又說回是日下午的開心事﹝詳見環保農場餐廳的食評﹞。這裡的心太軟有點流心，但不算澎湃。吃起上來味道正常，不算好吃，而比較之下，大家一致裁定下午在大尾篤吃到的「純流心版」味道比這裡勝幾籌。不過這裡的是伴雪糕，追回一點點分數；雜果千層酥是我點的，因為似乎是這裡的名物。但賣相很一般，疊得很求其，薄薄的酥皮，中間的雜果切得極大粒，吉士醬像是亂唧一通的，做得很不用心，甜品賣相不好，已輸了一半。吃起上來不方便，也不好吃，是不值得試的一味；

炸雪糕一客三粒，炸皮很厚，雪糕的份量相對地少了。六人分吃，一人半粒已經很足夠，而Oli更是棄吃了那個厚炸皮，是明智之選；焦糖燉蛋要了凍的，賣相依舊是「求其」路線，只用一個細飯碗盛上，如Susan所言，感覺就像中式的燉蛋。吃起上來果真如是，更弊的就是沒有蛋香，也不甜美，平平無奇；龍眼雪耳燉梨子不清甜，吃過梨子，也燉得不稔。專兄吃後的評語是什麼也沒有味的；香蕉船最正常，是香蕉有香蕉味﹝如要令香蕉沒香蕉味，可能更難﹞，三色雪糕亦沒有令大家意外，只是賣相是一般的差。

隔離檯吃的是差不多，只是要了另外兩個「名物」，芒果疏乎里及火焰雪山。前者有睇頭又大大個，味道方面，問三位食友，兩位反對，一位說幾好，大家自己判斷；火焰雪山是沒有火焰的，原在在上檯前已經燒完，那叫什麼火焰雪山？如其他甜品的賣相一般，誠意欠奉，建議大家不要花錢吃這個。

服務是兩極化，先來招呼的兩個女的絕對是「晚娘臉」，感覺像欠了她錢似的。之後的一位阿姐卻甚健談，不停的推介各式食物。總結而言，仍然是水準以下，只給2分。

埋單每人廿五蚊，不貴，只是水準不高。

今日試左個士多啤梨奶酪布甸..
可自選雪糕口味..估唔到士多啤梨奶酪布甸好驚喜..好好味..個布甸底仲有少少啫哩..口味好新鮮..不過美中不足係雪糕面有D溶..不過整體都好正..係必食之選

同朋友一行八人食完雞粥過左黎呢度食甜品

點左心太軟、芒果酥、炸雪糕、蘋果袋(唔係好記得個名)、梳乎厘、火焰雪山

頭四樣幾好，心太軟唔漏，芒果酥同蘋果酥都幾脆，不過梳乎厘偏甜，火焰雪山更加甜，總括食物都算幾好，如果甜度降低d會更加好

同妹妹去附近睇醫生...順便同佢去食d野
選左呢度....間鋪有個阿姐全程黑口黑面咁「招呼」你 好似爭佢錢咁
(服務如果可以比0分...呢度算0分)

同妹妹點左鮮果千層酥同芒果世界

鮮果千層酥: 酥皮好薄同脆, 生果有蜜瓜,哈蜜瓜,西瓜,芒果...中間有d cream同吉士
整體不算太甜...生果似乎太大粒...我地食個時要酥皮同生果分開食...怪怪地

芒果世界: 呢個有一半整好既大菜糕係底...唔知係咪椰汁..因為食唔出咩味
仲有jelly,明珠,芒果同勁小小小芒果汁同正常分量既椰汁
芒果係酸既...明珠即係大西米..好淋好淋..好似就化開...唔好食

咁既食物質素同服務... 不再來了。

前日考完試, 終於都畢業了, 哈哈, 回家途中就買點糖水獎勵下自己先...

買咗什果西米露 ($16)

真係好普通, 但什果睇得出好吾新鮮, 同埋d 西米露係無味d, 又吾夠凍..差點可以叫難食...幸好的是花奶不是太多...

以前覺得呢度既糖水吾錯, 但是次後就真係覺得好一般lu...最後,要多謝openrice送給我的ticket..