這是一間老字號的茶餐廳以前賣過西餐，還好似曾經做過私房菜，熱鬧過一個時期。
今天我是被28元的焗豬扒飯吸引而來，與B君兩人大約在下午2時半左右來到，入門口前發現門前的青板石牆壁已經開始剝落，入了餐廳裡面留意到以往時常坐滿人的大梳發椅（大概是模仿90年代美國電視劇「老友記」劇中咖啡館的長梳發），皮椅的表面已經殘舊縫線也開始破裂了，室內的空氣調節彌漫著一股難以形容的氣息。
看著B君想退出門口的神色，我馬上告訴他「可能鮮風唔夠」示意他在靠近走廊後門的桌子坐下；看見他的眼神，我強調說「焗豬扒飯套餐只賣28元呢！」，兩人坐低後，他忽然說不想吃飯了「食唔落！」，我於是為他叫了個「扒芝士腿治」配凍檸檬茶，我吃焗豬扒飯配奶茶。
除了我們兩人外，還有一班附近地盤的工程人員午飯後坐在大沙發椅那邊的長檯閒談，有一陣子的細聲的說話跟著一陣子的大聲狂笑。另一邊有對父子坐在水吧檯前吃飯，是一位孝順的兒子在細心的餵飯給抱病的父親。水吧內的收音機輕聲的播著老歌，服務員自顧自的聚在收銀櫃前閒談；時光恍惚停頓了在某一個年代。
「扒芝士腿治」的製作流程；這裡是由水吧師傅打開水吧內的冰箱先取出芝士火腿後再往麵包箱取麵包，由水吧出來兜過我們的座位，再從水吧後的傳菜窗遞入廚房。看在B君的眼裡也忍不住笑了出來，氣氛鬆馳了許多。
不一下子「扒芝士腿治」再從傳菜窗送出來，B君試過一口表示味道不錯因為牛油不是太多麵包又煎得香口，分了一片給我，火腿是香口但芝士用錯了低鈣芝士片；我就喜歡牛油多一點。焗豬扒飯不久也到了，除了顏色差一點（因為燒汁多又落少茄膏）豬扒份量雖不多但蕃茄新鮮，「面火」焗得時間不夠，賣相不好但炒飯新鮮有蛋香已經值得加分，這裡比「一哥焗豬扒飯」已經優勝的多了。兩杯茶水不過不失，這餐消費兩人合計53元，出品水準還可以接受，我自已會再來的。
店內的服務員與水吧師傅應該是一家人吧，看似是家庭式的運作；想起那殘舊的座椅、水吧櫃面、燈飾、佈置、各樣器具及牆身的灰塵，這間店一班伙計與家人經歷了那麼多，生意還有得做為什麼還不翻新裝修呢？

樂嚐軒裝潢屬西餐廳格局，但店內提供各式中西食品。晚市點了一個三人中式晚餐，四餸一湯，連白飯餐飲甜品。
餐湯有三款選擇，有羅宋湯、忌廉湯及老黃瓜赤小豆湯。最後揀選了後者，配料尚算不少，但有欠「家常」味道，OK喇！
小菜點了「瑶柱」貴妃雞、鐵板「大蒜」牛柳、金莎黃金蝦及上湯浸雜菜。先說「瑶柱」貴妃雞，揾勻碟餸都揾唔到半條瑶柱，取而代之的是西蘭花。其實都無所謂，但作為負責任的食肆應預先和人客交代一聲。說回食物，雞件肉質尚算滑溜，不過鮮味不足。接下來的鐵板「大蒜」牛柳更誇張，明顯似青咖喱牛柳吧，又是貨不對辦。同樣地牛柳用料很一般，無乜味道。比較好的已是金莎黃金蝦，雖蝦不算大隻，是雪藏貨，黃金外層亦沒有甘香感覺，但至少和想像中的黃金蝦差不多。最差的是上湯浸雜菜，有一股怪怪的味道。最後換了另一碟炒雜菜，簡單一碟菜式，亦做得不好。
埋單六七十蚊一個人，唔係好值囉！
[17/7/2010; Sat; iPhone]

今日3個人去食午餐 , 只order 左 2 個set 都食唔曬
1份什扒配薯菜 : 什扒有 豬 (唔ok - 鞋口) ,牛 (一般), 雞 (比較好 - 香口又唔 un) 配勁多美味炸薯角 - 新鮮炸起 份量十足, 1個人實食唔曬 2 個人食就啱啱好
1 份海鮮焗意粉 : 友人食 - 賣相一般 , 意粉唔太林, 海鮮份量ok
跟餐上嘅蒜容包 , 餐湯都唔錯
每個 set 都唔洗 $50.

有一次行過想入去食, 但可能太早無咩人 (6:30pm)....所以直覺覺得唔太好食, 因此無入去! 今晚再經過時 (7:30pm) 多左幾台客, 就放心少少..咁就做錯左個決定!!!!
我兩個人order左一個6成熟的西冷扒餐 (主菜+餐湯+包 ~ $75) & 一個牛肉石頭鍋飯餐 (包青檸布丁 ~ $48)
** 西冷扒 : 喊到亞媽都唔認得...(1到10級的話有9.9級), 但只有3-4成熟..格梗食左一半;
** 餐湯 (紅湯): 都算好飲, 可以接受;
** 牛肉鍋飯 : 勁熱..睇個樣都ok, 食落就知一樣係好喊, 但無咁嚴重, 7級喊啦;
** 青檸布丁 : 有青檸味, 但質地好實, 似食緊擦膠, 只食左2啖;
結論 : 唔會再去, 就連今次都覺得行錯左入去...!!!!! 好難食呀! 今晚唔知飲幾多杯水先掂!!!:huffy:

帶了兩位好友來，上一次來已是兩年前還在這附近返學時
三人要了四個tea set，原因是吃完各自的後發覺依然餓

- 肉醬意粉（$35）：想不到這個最好，肉醬加CHEESE很香，不是大x樂那般普通
- 忌廉雜菌天使麵（$30）：味淡，汁也不夠，朋友加了很多芝士粉，還有天使麵其實是米粉
- 三文魚橄欖油天使麵(名字不太記得)（$30）：這碟『炒米』真的唔多掂，偏乾，還有那些是三文魚『碎』
- 炸雞翼薯仔沙律（$28）：薯仔、紅蘿蔔等也太細粒了，菜有點苦澀味，而雞翼炸得像kfc的

從石塘咀坐的士來，因為以前吃過數次，印象也不錯，但今次有點失望
tea set真的很麻麻，不過人不多，我們可坐六人座位
想來的話，吃午/晚餐吧

還有，一向很喜歡這裡的人形鹽罌，可是現在一個也沒有了
一切也變了

我來過多次，其實每一次都係為咗佢杯咖啡…

雖然只是一杯即磨咖啡，但配合適量泡沫一啖入喉，既香帶滑，簡直係享受。很多時酒店都飲唔到咁嘅水準，有機會真係要問吓老闆娘究竟用咗邊種咖啡豆。

依家可以改加大裝份量，其實係整起咗兩杯然後倒轉去一隻大膠杯，我始終喜歡用隻白瓷杯盛著，係細杯咗啲，但感覺差好遠呢!

今日下午茶要咗份鹹牛肉飛碟，普普通通，皆因饀料少啲，而且收得都唔算平( $22 )，不過杯咖啡己經補番數矣…

今日約了朋友在這兒吃
叫了橙汁鴨胸意粉
味道ok..意粉冇乜味..鴨胸係一般既肉囉
有湯同糖水送
湯我叫左個中湯..好多味精喎
椰汁西米露..幾好味
四十五元..價錢一般啦

20070304

迎接honey順利跑完馬拉松（而且是超水準發揮喔~~~），避開人潮，搭車過來這邊，想吃一個靜靜的早餐。

這樣的時間，略向西一點過了水街，就間間餐廳都水泄不通，不論味道如何都座無虛席。反而這裏獨處一隅，十分清靜，如果不是門外叮噹而過的電車，只看室內，倒像是身處SOHO。

兩份早餐，一個是牛奶麥皮跟鮮什果，另一個是炒蛋魚柳，都跟了果醬多與熱咖啡。

麥皮用了深口碟，有點像喂貓：P煉奶另上，是一個體貼之處；
什果新鮮切出來，小小粒放在白色杯子裏，色彩繽紛的很；
聽honey說炒蛋還不錯，魚柳就非常一般；
多士烘得剛剛好，而且不用加錢喔：）
最推介的是這裏的咖啡，香滑無比，入口綿醇，只為了它，也值得再來：）

妹妹講過呢間餐廳食物麻麻，價錢在此區屬貴；但都與男朋友試一試虛實！
一望見餐牌，果然比常去的尼斯餐廳set dinner貴,
成九十幾蚊!叫左一個牛柳同T骨扒,味道好淡...淡而無味!相信換食較濃味的黑椒汁都差不多...(當時係要燒汁)
覺得佢地著重碟上裝飾多於菜式味道,放左橙同火龍果,顏色鮮艷(哈哈,配襯生果反而仲有味道)
至於塊扒亦唔係煮得太好,男友T骨扒切到最後好難切,仲要要求侍應換把利刀添...
最後到甜品部份, 反而我地二人都覺得幾好, 佢地有幾個選擇俾客人選,我地要左朱古力&益力多摩斯,幾好味!
聽到老闆娘同客人講,佢地有d芝士蛋糕係批發做,然後送黎餐廳,賣相都看似幾好味,好似係餐廳重點!
侍應服務態度好,即使係外賣客都好殷勤對待,值得加許!
餐廳裝修都ok,相信花了不少心思;但座位比較少,好有機會有唔識0既人坐得好近!
見老闆娘同幾檯客人傾計,詢問味道如何,似乎係熟客居多,否則好難在此區花費成佰蚊食一個晚餐!

平時我同阿K去西環食嘢，搭電車番阿K屋企嘅時候都會經過呢間舖頭。是晚我地就專程嚟到呢度食嘢。此店英文名用上kitchen，比人感覺佢地嘅客路係針對一啲想食住家菜嘅人，至於實情如何又可能係另一回事。我地點咗個二人餐，裡面包兩碗雞湯、半隻海南雞、炒豬頸肉、甜品同埋糖水。

海南雞嘅用料唔係新鮮雞，所以全無雞味，不過奉上嘅醬汁有三款，包括甜豉油、酸辣醬同羌蓉，無味雞點上醬汁，再加上價錢嘅考慮尚可合格。炒豬頸肉就炒得好滑，應該係用咗比較多油嘅緣故。平時出街食飯多油係預咗，不過打正kitchen 旗號就不太適當。不過，伴菜都炒得幾爽，值得一讚。二人餐每人可叫一款甜品同一款糖水，甜品一件，味道不過不失。糖水我嗌咗杏仁露，好香、幾杰，幾足料。

埋單158蚊唔收加一，睇咗價錢諗番冇新鮮雞食都係有原因。最後，我要特別稱讚呢度嘅服務態度。我見隔籬檯埋單用咗成堆散銀，侍應只是微笑，冇露出不悅表情，咁係應該嘅，難得嘅係個客走咗之後佢都冇同同事“呻”，仍然保持笑容，年紀仲幾後生。咁嘅服務態度，我十分滿意。