周六與友人去完尖咀飲完紅白酒，晚飯大家決定試下旺角和味﹗

和味賣點係炭爐打邊爐，七點來到岩岩好仲有一張枱。

環境在大廈後巷，當然麻麻地不過又未至於超dirty，我呢0的地盤工友無咩問題，至起碼後巷條坑渠未有污水進進出出。

天氣凍有個炭爐0係前面感覺確係唔同，12度之下都可以只穿短袖衫﹔湯底我們點了個大豬骨鍋。

份量相當大，豬骨、粟米、蘿蔔等滿到瀉，先試湯頭入口陣陣胡椒肉香，正﹗

牛就不可少，價錢唔算貴75蚊有一大碟手切牛，另外要了牛肉粒，$40，我唔食既鵝腸、墨魚刺身、丸類、水餃等。

牛肉比較肥，肥一半瘦一半，油脂甘香，牛味卻未算濃，而且比較韌一點﹗

反而牛粒雖然只係$40，淥佢十五分鐘味道十分之甘香，牛味香濃，呢個反而encore﹗

和味門口有新鮮游水墨魚，見阿叔推介呢度既墨魚刺身就試一試，好似12蚊兩，切完之後用冰鎮上碟，超新鮮0的墨魚鬚仲係郁來郁去的，蘸少少日本豉油及芥辣同吃，入口軟糯得不得了，鮮甜味美，我呢個墨魚魷魚怪覺得超好食﹔不過在後巷吃刺身，怕唔乾淨感覺就唔太好，但實在太美味都唔理得咁多，最後食完完全無事，可放心開懷大吃﹗

水餃超大粒，飽滿足料﹔鵝腸佢地話夠哂肥，超正，仲話我唔食是唔識食﹗

啤酒十一二蚊支，呢0的地方當然係咁飲先似番個工友啦，友人吃過土瓜灣的鴻福，話和味呢度比那兒來說已算乾淨﹗

由於呢度後巷上面加左帆布遮雨，當成條後巷爆滿時真係炭味處處比較焗，食完唔想俾人白眼建議回家最好搭的士，因為成身炭味自己唔覺。

三條長氣友飲大兩杯高談闊論，飲左成廿支啤酒，這一夜大家細說往事，不知不覺，醉了﹗

記得小時和家人在街邊打邊爐,當時只得炭爐,配料的選擇沒有現在那麼多.只得大或小的雜錦或海鮮可以揀,用一隻蒸魚用的大鵝春碟,粉絲同菜墊底跟住牛肉、雞件、丸類、豬膶、水魷每樣都有小小咁排滿隻碟,再插多幾隻用竹籤穿著的蝦,面頭擺一隻雞蛋(到現在也不明白那"一隻雞蛋"的用途!打落隻碗度定打落個煱度?定係成隻烚嚟食?唔知!)
這夜和數名80年代尾出生的小朋友來這裡見識炭爐的風味.
五個人沒有大肆掃場:
羊腩煲(大)----羊腩全部好似粒甄沾記椰子糖咁嘅Size!肉質炆得很淋很軟身!尚有少少羶味.
配料只有枝竹無馬蹄,不過份量真係細!汁的味道很濃,加幾次水都仲夠味.
手切肥牛----一碟有二十片左右,肉質出奇地軟滑!而且牛味頗重.
即劏鱔片----即叫即劏,半條都已經好大碟!而且上檯時個頭仲郁緊,新鮮!肉質爽脆,食味與雪藏貨無得比!(因為平時食果D多數係劏好唔知喺雪櫃擺咗幾耐)
豬頸肉($35)----急凍豬頸肉切條.
四寶丸----四款凍肉舖的"雪"丸.
滑雞件----雞件斬得頗碎有肉的部位不多,多數是皮連骨!不過食落都幾滑.
雲吞拼魚皮餃($45)、芝士腸($30)----全部都雪得幾實吓!
出前一丁x2----羊腩汁煮麵想唔好食都幾難.
環境不用提,怕小強唔好嚟!
價錢唔算平,質素唔係高!
食物份量小,食完成身炭味!
但係踎喺街邊用炭爐打邊爐有幾多人試過?

朋友想試試炭爐火鍋，就來了這店試試看。雖然天氣已經回暖，但仍是頗多人的。剛好店內還有一小圍，走慢一步就要坐後巷了。矮矮的一圍，一陣陣的炭味，頗有風味。一行三人所點不多亦不特別，本地牛肉，雞件，四寶丸，魚滑，牛柏葉，雲吞，水餃，冬姑，烏冬，菜等。食物質數跟酒樓任食火鍋不相伯仲，用炭爐火鍋滾出來的味道跟電池爐亦沒什麼分別。有伙計推介一個墨魚剌身，但想起這裡的環境，衛生，都是不要了！值得一提是有阿叔自動過來加炭加水，服務算是不錯吧！

食物不算特別好吃，價錢也不算平，試過就算了，相信沒下次了！

尋晚(22-1-2009Thur)放工後,join男友一齊o黎呢o度打邊爐,只係8點多啲啲,已經full晒,真係咁旺場?我o地同個女仔講要兩個位,佢就求祈叫我o地上樓上,我同男友講上去就唔係用炭爐,係電爐o黎o架喇,咁佢一心想試炭爐邊爐嘛,於是我o地就問過個亞叔.亞叔就指住後巷話o個張.

我o地入到去,啊,呢張枱都唔係好入,重有張椅畀我o地擺o野.亞叔好快就問我o地要咩湯,要咩食……

我o地揀o左$35.00o既蕃茄薯仔湯.好快o黎到,湯冇油,好清.而我o地叫o左:

1. $35.00o既美國肥牛
呢個冇咩問題.

2. $30.00o既雞腎
好爽脆,好正,又大大碟,呢個抵呀!

3. 雞腸
好大碟,不過我唔係咁鍾意食,因為熟o左後口感好粉同有陣味,如果係喧 ,我寧願食鵝腸.

4. $45.00o既牛心頂
第一次食呢樣o野,好爽口,不過味道淡淡的.

5. 10兩海蝦(時價)
有8隻重要係大大隻,好新鮮o既蝦.男友話正,咁至有口感嘛.

唐生菜
漏o左單,一直都冇畀過.

後加:

6. 烏冬一包
滑滑鳥冬撈湯飲好正.

7. $48.00o既鱔片
呢個都係漏o左單,但我死心不息又叫多次.終於o黎到,都幾大塊,仍都爽口o既.

8. $30.00o既鯪魚滑
男友突然記起,問有冇,亞叔答梗係有啦.o黎到,我o地自己用膠匙整落啲湯o度,好好玩.食落已有胡椒味,鯪魚肉亦滑,OK o既.

最後我o地叫o左一支酒,而因亞叔開頭收o左我o地兩隻水杯(因我o地各自飲一罐忌廉),佢就即刻畀兩個杯我o地,重幫我加熱水後遞界我.

而其實男友開頭order完o野後,自己出去睇,返o黎話冇晒帶子.嘩!咁早就冇晒,真係咁抵食?

脆肉鯇,其實叫鱔片時問亞叔有冇脆肉鯇o既,佢答冇.之後見我o地叫啤酒,佢就問我o地要唔要鯇魚片?話見我o地咁拆得喎.哈哈,如果冇叫烏冬都或者可以o既.

服務:
一坐低就畀盤滾水同食具你自己洗,真好.

衛生:
o係後巷食就一定唔好,但都好彩冇咩臭味.

環境:
後巷被佢o地都整得算光猛,不過因o係o度洗碗,所以地下都好濕,要小心,但總好過上樓上o既樓梯好,因為佢都係幾濕滑吓,下次再有機會o黎都唔會上去.
啲枱好矮,同幾迫,我就要側側身咁坐,坐到到腳好攰.
呢晚唔係好凍,散熱比較慢,不過有時有風吹o黎時,我就食晒啲炭味.

呢餐要$506.00,真係食風味o既,但冇諗到都咁貴,唔係好抵.但如果想食正o野,真係要好早o黎喇.

用到炭爐來打邊爐,除大家廣為人識,土瓜灣落山道的鴻福之外,還有在旺角新填地街,"黑帝"咸美頓街交街的和味菜館.

論名氣自然不及,但一樣地墟陷,在這一個入冬以來最寒冷的晚上,食客川流不息,後巷長蛇陣貫穿咸美頓街同碧街,眼前的景像,足以成為旺角黑夜之一大奇景.

難得遇著如此景像,自然地拿出手上的相機來拍拍照,須知道這一帶三教九流,前面是一樓一,後面是果欄,什麼公仔佬,社團中人,附近各大馬房的馬夫等,也可能集結在此暗巷內,鎂光燈一閃,隨時惹來一輪粗言來問候,輕則涉及娘親,重則會講起手來,我們來吃宵夜,也犯不著惹來麻煩.

入一入後巷鑽探,在帳蓬之遮蓋下,環境極為侷促,後巷渠味,廁所味,加上炭味,實在令人窒息,環境同鴻福一樣差.出到街上,索一索身上的軍褸,已沾上一些炭味.如果在後巷對住兜炭坐成個幾兩個鐘,一定渾身是炭味,好不自在.但我們去鴻福,其實也是如此,只是這一夜小弟沒有特別準備.如果知道會去燒炭,穿得越簡單越好.穿樽領冷衫上陣,有排你受.之所以我每次去鴻福,從未著過長袖衫.

{呢晚得十一,二度,你會唔會都係著短袖衫黎咁勇?}

在外面安頓之後,本來是摺檯,店方換上發泡膠箱,再放上圓板,比檯更低,大家要"烏"低身去吃,名乎其實為個炭爐卑躬屈膝,每一檯坐後巷的火山孝子,也是如此,想吃得乾淨一點,可以上樓上雅座,但不是炭爐而是用電爐,來到和味不用炭爐,非好漢之所為也.

湯底是鴛鴦湯底,沙爹加清湯是必然組合,火鍋配料也是一些大路貨色,海鮮不及鴻福的多元化,因為這處火窩就火窩,沒有鐵絲網比你放在炭爐上,一邊灼肥牛,一邊燒鮑魚,燒到潮吹那麼過癮.而其他牛豬家禽類,有美國肥牛,手切肥牛.學身旁的新手兄說:我們是肥牛七子!來打邊爐,最怕同一些不吃牛的朋友同桌,火窩同牛肉,從來唇齒相依.但這處係得肥牛,手切牛,同牛柳粒,另外亦有牛心錠,想吃得刁嘴一點?什麼牛頸脊,牛胸油等部位,請移玉步到佐敦.

先來的牛丸,支竹,脆鱔先行,有你無你,在湯汁內起勢地涮,牛丸粗獷不作狀,入口夠粗豪,肉味濃郁.脆鱔入口爽脆,味道帶鮮.牛肉系列我們要美國肥牛,同本地手切牛.論味道,當然是本地牛較為濃郁,論到質感,美國牛的油香,更勝一籌.即刻梅開二度.

四四方方的牛柳粒,肥瘦分明,脂肪位有咬口兼帶油香,肉質夠鬆化,很有肉味.本來要牛心錠,上來就是豬潤同粉腸雙拼,既來之則安之.粉腸真是肥美,果然先感到一口粉,再來爽脆的感覺,豬潤是薄切上,不用灼太久.點些豉油吃,是最佳之配搭.而豉油上的辣椒,也非同小可,一口咬中,即刻大叫一支"黑水"救命.

雖然坐在外面,通風比後巷好得多,但炭味依然兜口兜面撲過來,為了不想身上的軍褸沾上味,結果在寒冷的天氣之下,全程短袖衫上陣,;連我覺得自己有點過勇.打炭爐邊爐同玩一夜情一樣,都是事後不想惹上身.

邊爐之外,同時亦有羊腩煲出爐,用炭爐來做羊腩煲,我真的未試過,滋味如何?有待下回再分解.

眼見其他食客,不論男女,有很多也是"盛裝"赴會,似乎是來得這些地方,就預料會如此,誰像我一樣地多多事實?但我始終建議如果女子組專程前來,用不著化妝,事後卸妝又要做幾次Mask,燒一次炭後,又要同塊面補水,又要光顧洗衣店,粗俗一點說句:真係麻x煩!

必食牛肉粒,手切肥牛,+ 羊腩煲再整個公仔麵Oishi~

以家天氣凍一流呀~

d小菜都ok好食,不過份量小d @@

環境係坐街的,有d dirty但係好有風味

食得多酒樓火又想轉環境的可以一試

痞街邊，坐凳仔圍在煙燻難嗅的炭爐旁打邊爐，不怕死地偷影幾張炭爐相，唔須要寫得天花亂墜也有一定的吸引力。

埋位幾支啤酒，來幾味新鮮唔貴的牛肉、牛心頂、漏油肥鵝腸，加碟經典的豉油wasabi，當一晚的地痞市井之徒。

開個醉雞鍋，湯底是淮山杞子加清水溝開，醉在雞是酒香入骨，分開上，湯底收$100有他的道理。幾味平價貨，牛肉收$40，切得厚薄適中，沒有多餘雪味，下鍋過一過水，加埋wasabi豉油，夠鮮夠味；難得有牛心頂，處理後血漬盡去，落湯愈滾愈爽，加埋豉油吃也是一絕。

見隔離檯的漏油鵝腸已開始流口水，沒有不叫之理，拖拖水，滲著鵝油的羶香，肥美豐腴，無得頂。

掃完平貨，跟老闆熟稔的朋友轉個頭找來了游水墨魚，聞說是$8一兩，三更半夜覓得此物，也真難以置信，切得薄而均稱，唔知點解食襯呢味都總唔少得平日唔多欣賞的wasabi豉油，撞埋一齊，又真的吊得起味道來。

打了數小時，炭夠靚又夠力，不斷將海陸空三軍投下鍋中，湯底也不會「死」下來，幾時都話炭爐火鍋最夠盡興；盡興一番後，又是時候貢獻樓下的乾洗舖。

冬天期間,最鍾意嚟呢度打邊爐,貪佢用炭爐,有風味,食物並非樣樣好,如丸類就可要可不要,肥牛中等貨式,但如田雞,中蝦,奄仔蟹,鵞腸等則可算極品,外邊真係好難食到呢d貨,買手位仁兄應記一功!尋晚個老友又挑起我條食根,話去呢處打邊爐,嘩!30度喎!大佬,佢話好掛住呢度d田雞同奄仔,ok!一於奉陪到底,去到唔坐街邊,上樓上有冷氣,不過就用石油氣爐,先嚟醉雞窩,奄仔3隻,田雞連皮,大中蝦,o!my god!實在令人回味,並非我吹水,又或者賣廣告,更唔係寫膳稿,呢幾樣嘢實在滿分!如果唔介意佢店鋪環境,絕對絕對值得一試!

我果次同班朋友去食羊腩煲,聽佢地講話好好味,就去試下啦!嗰到係用炭爐,都幾有風味.叫左個羊腩煲同幾味野食,啲羊唔係好多,入面既料小之極小.仲有啲菜洗得唔係太乾淨.因為係類似大排壋既格局,所以都冇得要求咁多.但係我下次一定唔會再去.ps.環境非常惡劣!

久唔久就有D友仔問我旺角有咩平靚正的火鍋？

唔該都無聲，老馮咁。

我就係制NG唔講，淨係OR呢度先講，吹咩。

上次熱氣，唔醉雞，今次覆桌，一定要雞雞佢。

加上雞子…豬腰…肥牛…蒿菜…

埋單唔洗3舊水。

但補度呢…命都短幾年啊咁食法。

再來火鍋…今次去到旺角咸美頓街的和味菜館。
其實唔係肚餓，只不過見又係炭爐加蛋家檯咪試下。
點知因為人小，兩個人被迫上樓，上樓就當然無炭爐，想入山墳咩，檯都高番。

由於感冒未清（日日火爐又點會清），唔比食醉雞鍋。
改為沙爹湯底，加手切牛、鵝腸吊筒（鵝腸肥唔好食咁多喎）同鱔片。
沙爹湯係滾水加沙爹醬，無喊味無花生無香味。
牛得一個size無大中細，所以可能要食兩碟先夠喉。
鵝腸粉膏多過油膏，無左一啖咬落去必油果下快感。
鱔片厚薄剛好，呢下最正斗。

埋單$210，合理有好味，

但，我都係想食醉雞鍋。
我見人地有頭有尾成隻雞咖