星期六下了班, 決定再闖皇后街大排檔, 上次太夜, 陳春記已經關了門, 今次來到, 就試試馳名的豬雜湯吧.

日頭上到來, 依然是這些店子. 只是開門的多了, 今次毫不猶豫. 直指呢一碗豬雜湯底既麵. 不過, 豬雜, 豬紅不想食了. 要了他們的豬雜湯底, 配上豬頸肉同雲吞.

說明這裡是潮州巷的前身. 整個皇后街熟食市場大部份是潮州食店. 陳春記, 等等, 都是潮州鋪.

豬什湯底。麵, 到來時, 面頭有少許胡椒, 加重其味道. 飲過潮州式的豬肚湯, 蠔仔粥, 發覺那少少胡椒粉, 對辟一辟腥味, 好重要. 而胡椒呢個大配角, 吊出了豬雜湯的好味道.

豬頸肉同雲吞雖不什麼大出色, 但個湯底一的的確稱得上掂. 仲有不少正既鋪頭, 小小的皇后街熟食市場, 值得來多幾次.

是日假期，老婆話想黎呢度試下豬雜湯。

老婆豬紅豬雜米線，我就要豬紅豬雜粗麵，每碗都係$20。另加一碗菜。其實當日無乜人，但仍等了十分鐘才上枱，相信都係有心機之作。

湯幾鮮，有胡椒味，豬雜也洗得好乾淨，無異味，又夠冧，唔錯。但我的粗麵就攪到成碗湯都有鹹水味，下次都係叫粉線或淨豬雜湯啦。

菜就普通啦，5蚊細細碗。

回味韮菜粿峙之餘再回味豬什湯, 可是好像退步了

吃一碗少的, 湯是太咸, 不知是否用保溫煲煲太耐, 水份蒸發的結果? 還是另有原因? 但見偏咸的湯色水都像深了

粉腸, 豬肚, 豬肺等材料跟以前一樣好吃, 不過豬肺好像不像以前一樣淋, 事頭婆有點孤寒, 看到我用他們的辣椒油點韮菜粿好像不太開心!

會再來的, 只是希望不會再變失望啦

食野食到落上環. ..

一個都幾多人嚟既熟食中心, 中午時份都坐滿了人, 食物幾特別, 一般熟食中心都係奶茶 蛋治 乾牛河, 最多有雙丸河, 不過呢度除左打冷檔經常接觸之外, 有好多特別野..

例如豬什湯, 喺第二度未食過, 有胡椒粉味既豬什湯仲有豬肺, 豬肚, 粉腸做主角, 西洋菜做配角, 味道好, 香濃豬骨味從每啖湯可以清楚感受得到..

加上香辣辣椒油嚟食, 好味!

為食嘅我喜歡到處搵食,開飯網俾左好多食店資訊我,令我食到好多好野 唔係呢個網,都唔識得去皇后街街市食潮州野

上到街市,有六檔係開左門做生意,尼泊爾菜我唔啱食,同陳春記買左一碗細豬什,配料有豬肚,粉腸,西洋菜,豬紅,豬肺. 湯係豬骨味道,我覺得味道好似淡左少少,反而因為胡椒粉落得比較多,所以有點辣過頭嘅感覺!

豬肚幾爽口,豬紅就無咩味,有點血嘅味道,西洋菜就多左一啲根,豬肺煮得好淋,係咁多樣野最好食嘅一樣

味道不過不失,因為餐牌比較簡單唔係太多選擇,所以會叫其他檔嘅野一齊食

主人與奴隸獸剛聽聞此食店的豬什湯十分了得，所以專程去試一試。

我們點了西洋菜豬紅豬什湯（HK$20）及豬紅豬什湯河（HK$20）。湯底尚算清甜，豬什夠腍無異味，尤其是豬粉腸，口感豐腴爽滑。豬紅的味道就較為一般。總體來說，確是不錯。

不過，光顧此食店是需要有點兒耐心，因為只有一位女士負責落單，這位女士亦是負責上菜，忙得不可開交，心情不是太好，加上有些顧客較為心急，難免與這位女士擦出一些火花。其實飲飲食食都是開心事，不需要怒氣，放輕鬆一些吧！

由於公司係皇后街街市對面～
有時候都會同Ｄ同事去呢到食野～
不過如果你係係１：００－２：００黎食物既話～
你務必有好好的耐性以及忍耐力
如果唔得～１點先食／２點後都係一個好好既選擇
人多唔關蔡生既～
佢得個３張檯～上菜又慢唔多人等就有鬼啦～
成個廚房得個一個人煮～
個婆婆好老的了～又唔寫字
得一個女人可以幫手落單～
有時最慘就係個個會落單的女人又會走左去送外賣～
你話死唔死～

記得有一次上到去～
叫左佢１５分鐘都唔理人～
咁我地同事嬲嬲地就叫左隔離個間食啦～
好了～佢得閒理我地個時１：３０
見到我地食另外既野嘈到咩咁～
成日行埋黎就罵罵罵～
ｄ食客見到佢都驚～
我地話等左咁耐～
你都唔想幫我地落單我地咪自己叫其他ｌａｗ
個次見到個個其他食家口中既眼鏡惡女人咁樣～
我係點都唔會再去食～
點知有個迎同事上到去又話想食～
ｏｋ啦～我地叫返佢地野都ｏｋ掛？！
又一次個個眼鏡惡女人又送外賣～
唉。。。好心佢如果鋪頭無人可以寫野得佢先識就唔好送啦～
個婆婆又只係叫我地等等等～真係火都黎～
如果你咁樣做即係叫ｄ去你度食野既客等咩咁等～
完全無唸過嫁～
好啦～等到佢黎啦～
又掛著做外賣客叫我地又等等等～佢既態度係好差下嫁～
叫到了～等左２０ｍｉｎｓ先有得食～
好啦～食啦～佢ｄ野無問題嫁～都ｏｋ好食～
不過佢又係叫菜又無菜ｌａｗ
當中發生好多小插曲可以引證佢地既問題
有２個食客實在等得太耐～
由等佢落單到等食物到我唸等左ｏｖｅｒ３０ｍｉｎｓ
好唔ｈａｐｐｙ走出去話個個眼鏡惡女人
我唸大家都會估佢個個眼鏡惡女人會有咩反應
佢話～
你唔等得咪唔好等ｌａｗ
大家都係咁等啦～要食就係要等嫁啦～完全係無任何的服務可言～
我身為一個消費者
我想黎你度食野～我比＄消費
你比唔到好ｓｅｒｖｉｃｅ我之餘仲要咁樣罵ｄ客
我真係好想知佢咩心態
當然個位客人亦都好嘩言於佢既回答
佢話＂真係有無搞錯嫁，明明係你既問題咁都講得出＂
在旁食緊既我都真係戥個客慘～
第二話～
有２個新人客坐低想叫野食～
不過個位亞仔又唔想食～
咁得亞媽叫啦～
個位眼鏡惡女人就問～
你叫一碗咋？２個人要叫２碗ｗｏｒ
客人：下？我地２個人食一碗得啦～
眼鏡惡女人：唔得ｗｏｒ！你２個人一定要叫２碗～
客人：嘩。。。咁都得嫁～走啦走啦～

無錯～其實個時都成１：４０分～
都無咩人會黎食了～
不過佢都驚食無位～同驚ｄ人霸住佢個位咁～逼ｄ客一定要一人一碗～
我實在好不齒佢既服務

比０分簡單益左佢
佢唔單止無服務，仲要話返係轉頭～
ｔｅｒｉｂｌｅ！

聽講皇后街熟食中心是昔日的潮州巷再生,小弟未去過潮州巷,不知道大約是什麼.

又聽講在熟食中心內,有檔買豬什湯很出名,叫做"陳春記".

再三聽講這檔的服務好差,經過小弟臨場實驗証明,又不是.

四度聽講其店的豬什,連蔡瀾先生也讚好,在豬什米內的豬肺很爽,中間有層不知是薄膜抑或軟骨,非常爽脆.粉腸夠肥沒有異味,豬肚一樣爽,豬紅嫌味道不夠濃,而豬利都幾軟稔.湯底加上點點胡椒,少少辣度帶出湯底的清甜.這個豬什湯,著實不錯.但小弟最想吃的,就是豬腦.年前在台北士林夜市,同澳門三盞燈某小店吃過豬腦,非常難忘.

五番聽講價錢不算貴,這碗一人前的豬什米,盛惠$20.

潮州妹又出動...今次跟爸媽黎到上環...好期待啊
因為佢地黎過好多次架啦, 但係次次都無我份...
呢輪成功成為雙失, 就跟住佢地痴飲痴食啦!

0係曾記叫左一堆野食(另文)...再0係陳春記加左個中豬雜湯 ($30)
d 湯白雪雪好清又無油...飲落都几清甜, 湯入面既西洋菜都好嫰
不過d 豬雜真係比較失望...全部都白雪雪...係咪漂過黎?
仲有...全碗除左豬潤同粉腸之外其他全部係無味...真係漂過黎?
豬肚豬肺豬腸豬紅全部都無味...好失望...

如果係為左豬雜而黎既...我勸你都唔好la...
豬雜不如去牛頭角下村...

筆者與父母、姐姐及女兒(4歲)共五人於上周五中午午膳時間去了皇后街熟食中心試菜，一心想試吃曾記棵品及陳春記的豬什湯。我姐姐於12點45分先往陳春記找位子，已經多次被惡伙記(戴眼鏡女人，約40多50歲)驅趕，本來我姐諗住先叫一碗豬什湯，點知惡伙記唔比，理由係唔知其他人係唔係全部人都叫豬什湯。我姐惟有先行離開，到會合我地後，見原先的位置仍未有人，我地就坐埋去。

由於中午繁忙，我地見無伙記招呼我地，於是就走出去檔口點菜，點知惡伙記黑口黑面話唔比，仲惡形惡相叫我地返埋位，因為唔知我地坐邊，要等她過來幫我地落單。點知這一等，差唔多半個鐘，惡伙記終於記得我地仲未落單，由於我地未食過豬什湯，唔知份量如何，加上已於等點菜期間叫了曾記棵品的炒糕棵及6個唔同味道的茶棵，於是打算先叫兩個豬什湯米線及豬什湯米粉再決定。點知惡伙記即刻發火鬧人，話我地霸住張枱咁耐，唔可以只叫兩碗，於是我地再加點一碗豬頸肉粗面，惡伙記依然唔收貨，話我地4個大人一定要叫足4碗,，我地只好再加一個紫菜四寶河(因為除了聲稱〝馳名〞的豬什湯外，也沒有什麼特別的菜式)。我認為咁嘅要求絕對唔合理，大牌檔的不成文規條就係無論坐喺邊都可以叫唔同檔口嘅食物，只要其中有叫坐枱檔口的食物就可以，唔通我個女坐一個位又要叫一碗咩?

其實叫幾多碗唔係問題，重要的是服務態度。雖然喺大牌檔唔期望會服務殷勤，賓至如歸，但飲食業點計都係服務業，我地幫襯嘅就係客人，點都應該客氣點，但個惡伙記一點都唔尊重客人，真係令人印象分大扣。本來如果食物水準一流嘅話，都可以勉強接受現實，奈何當豬什湯於再半個鐘頭後送上時(本來要米線，但賣清了要轉粗面)，首先賣相已經無甚驚喜，湯底一如普通的潮州湯面，配料有豬紅、豬肺、粉腸及大腸等，味道全是淡淡的，就像普通灼熟的味道。惟一可取的是豬內贓算是洗得乾淨，沒有腥味，只是食完整碗都唔覺有什麼特別之處，令人不吃不可。因此我地已決定不會再幫襯陳春記，雖然豬什湯沒有很多家在賣，但綜合服務水平及食物水準，皆不屬水準之作，不吃亦不會是損失。更可免受惡氣。如果陳春記真的其門如市，唔該請多些伙記，檔口只得一個惡女人同一個已經駝背的婆婆，想唔待慢人客才怪。又如果陳春記唔係太好生意的話，而惡女人又好似唔憂做嘅話，不如索性執左個檔口去享福好過，無謂折磨食客，比錢你地賺仲要睇你面色，學劉德華話齋，今時今日咁嘅服務態度點得。就算食物好食到飛起，如果配咁嘅服務態度，阿蘇實話執左去好過!

我唔知道係唔係蔡瀾先生去過陳春記之後多左生意所以令到個伙記咁燥，如果係嘅話，蔡生真係好心做壞事。蔡生去幫襯及拍野，一定會好好招呼啦，所以我覺得蔡生電視節目介紹食肆前應該先搵人做臥底試下菜順便睇下d服務態度，如果認為合格才好推薦比人去，因為電視節目接觸面大，很多觀眾睇完會慕名而去幫襯，如果外地旅客去到遇到咁嘅服務，真係失禮死人。筆者好少咁勞氣，但係這檔食肆真係超級離譜，所以不吐不快，有膽識的人士不妨去挑戰一下。

因為我一家人都係潮州人,所以都愛吃潮州野,有時會落九龍城創發食!今次就去西環,喺皇后街熟食市場入面,有幾檔賣潮州食物既舖頭都係好好味!!買左曾記既韮菜果(另文),另外幫襯左陳春記既細豬什湯,豬什湯雖然係細碗,但係原來份量已經可以當一餐午飯,好彩仲有妹妹同我食,如果一個人食就食唔落個韮菜果了!好鍾意食啲豬肺,煲到好淋,好好味,湯可以當西洋菜湯飲,十分滋味!

除左食潮州粿之外,仲叫左碗豬什湯食添

胡椒味既豬什湯,內裡有煲到淋哂既豬肺,粉腸,豬紅,西洋菜,味道好!清清地唔使餐餐都食煎炸野,食完碗豬什湯之後都覺得腸胃舒服左,十六蚊一碗物有所值呀

聽朋友說食潮州野要來這地,一定唔會失望wor

坐低之後,就點了一碗細豬什來吃,十六蚊的代價,原來已經可以給我享受緊人間美食了

一飲啖湯,有點胡椒味,加上強烈的豬骨味,好食!材料有豬肺,粉腸,豬肚,豬紅(主理人強調是豬紅,不是雞紅),西洋菜.全部煮得淋淋的,易入口,又好味

很開心品嘗了一碗如此美味的豬什湯呢

其實我都幫襯左好耐..我之前都寫過...但我覺得味道係變左少少
佢D豬雜都係好好..冇異味..好乾淨..但佢個湯係好少少唔同..佢係變淡左少少..之前係辛甜..但而家好似冇咁甜..清左少少..但都可以一試..都幾不錯
但我希望各位最好試試佢地個原味先..覺得唔好食先茖調味料..唔好浪費一樣好既食物..我上次去食見到個女人..叫左豬雜河..但佢又落辣椒又落醋..之後同人話好味..=.=..我其實想同佢講..你其實係話調味料好味而唔係佢原味..佢咁食法..間間都一樣架啦=.=..浪費晒...

雖然0係港島區「打滾」年資尚淺, 但自問未到路盲地步, 今日竟然誤將「皇后街」當成「域多利皇后街」, 搞到由中環行到0黎西環環頭先搵到0黎, 真係(火羅)到阿媽都唔認得... 終於搵到0黎後, 0拿0拿臨叫了招牌豬紅豬雜湯米粉(細碗$16) 試試.

原來細碗都好大碗, 好在無叫「中」碗0者... d 湯望落好清, 飲落除0左好勁胡椒味之外, 就係淡出個鳥來, 麻麻0地鍾意; 豬雜有豬肚, 豬粉腸, 豬肺及豬紅各2 件, 洗得好乾淨: 豬肚幾有咬口; 豬粉腸幾腍又帶輕微臊味, 入面粉粉的; 豬肺爽口; 豬紅就比較實, 口感似落了勁多魚膠粉的0者喱糖. 全部都無異味, 不過除0左胡椒之外無乜鮮味, 麻麻0地鍾意, 而且始終欠缺我最鍾意的豬潤及豬腰, 感覺若有所失; 米粉淥得爽口, 唔錯.

呢度同跑馬地0個邊差不多, 環境衛生比好多熟食中心乾淨得多; 招呼亦好, 老闆娘好好人.

$16 食一碗米粉係勁平, 叫做試過咁啦... 雖然唔算好好食, 不過相信會再0黎mou 街市-- 隔幾個位0個檔潮州0野好似好吸引!