早已有聞土瓜灣這間以炭爐火鍋作招徠的小鋪，但身為港島人礙於地區較遠，遲遲未有一試，今趟特意約好一檯共七人於星期六的晚上試試菜。

鴻福身處土瓜灣橫街的後巷內，環境可以用「嚇人」來形容，燈光陰暗、滿地污水，加上滿佈燒炭煙霧，走進去先要有無比的勇氣。話雖如此，這裡有外出難見的炭爐火鍋與燒烤，再加上電影「無間道」的取景，令這條小小橫巷充斥著冒名而來的食客，每晚均坐無虛席，尤以假期為甚。

走過長長黑巷，我們有幸被安排在簡陋的小鋪內，不用真正「坐街」。甫坐低，店員先問我們會否燒烤，我們當然不會放過燒海鮮這個環節，隨後店員便放上兩個載滿火紅炭枝的炭爐待用。

我們點了各式各樣的火鍋食品，還有到賣相欠佳的魚缸揀選不同海鮮，如扇貝、大蜆、生蠔及大蝦等。

燒烤：
燒大蜆：大蜆每隻有如小碗般大，乾淨無沙，隨意放在炭爐上燒，待開口後便成。單計蜆肉也有湯匙般大，味道鮮甜，喜歡味重的還可略加上椒鹽伴吃。
燒扇貝：相比於大蜆，扇貝殼當然較大，但扇貝肉則較為細小，可能因為部份不太新鮮位置在清除腸臟時被一併去掉吧。味道方面也只能說是一般，新鮮程度也不及大蜆。
燒生蠔：生蠔大隻肉厚，單看賣相已相當吸引。把生蠔直接放在炭爐上烤至稍為乾身便可，記緊要趁熱吃，新鮮之餘也可一嘗入口即溶的感覺。
燒大蝦：大蝦有近八吋長，以竹籤串起。由於蝦殼本身略呈橙紅，加上殼質較厚，最後燒得過火了，肉質變得太實太老，浪費了。
燒鱔碌：大鱔切成片狀上碟，既可打邊爐亦可燒烤。經朋友介紹燒烤風味較佳，所以我們把少量生油塗在鱔碌上便放上鐵網燒烤，不一會已烤熟。鱔碌烤成微焦，外脆內軟，還滲出淡淡炭燒香味，簡直是一流。

火鍋：
豬骨：點了豬骨湯底，材料當然不乏豬骨。以 $88 價錢，湯底也算足料，豬骨每件皆屬巨型，正合我們一眾等待燒海鮮的餓鬼頂頂肚吧。
肉類：除了小弟不敢吃的補品雞子，我們只點了吃火鍋不能缺少的牛。我們點了肥牛及新鮮滑牛兩款，兩者不算突出但也不差，其中以滑牛更具牛味。
海鮮：燒海鮮實在太吸引了，所以火鍋我們只點了鯇魚片。魚片尚算新鮮，但對比起之前的燒海鮮實在乏善可陳哩。
丸類：這裡的丸類款式頗多，我們點了麻辣丸、醬爆貢丸、火牛丸及一般的墨魚丸、潮州魚蛋等。奇怪的是麻辣丸不覺麻辣，醬爆貢丸不見爆醬，似乎只是綽頭而已。反而大路的墨丸及潮州魚蛋較為正宗，但後者似乎過於鬆散吧。
蔬菜：點了金菇、生根、生菜、海帶及皇帝菜等，全都是一般火鍋食材，不值多提，反而海帶及有少許像芫茜味的皇帝菜則較為新鮮少見哩。

炭爐燒烤配上新鮮的海鮮的確美味且無比吸引，但如果單單是炭爐火鍋則只屬普通貨色。環境方面這裡異常擠迫欠佳，還不時要留神不被店員添加的炭火打中。加上價錢絕非便宜，來這裡可算是來吃「風味」多於吃「美味」。但畢竟炭爐火鍋燒烤在外少見，未到過的朋友不妨一試，但記緊預早訂座以免撲空。

朋友話天氣突然凍o左咁多,不如去打邊爐!
之前在人地個blog度見到呢度, 好似好得意咁, 又有得打邊爐又有得燒烤, 決定來一試!!
我地一行三人向土瓜灣出發, 好彩其中一位朋友來過, 如果唔係我一定搵唔到!
出面就有車位, 都算方便!

四周環境真係唔多衛生,地下長期有水...
不過D野好好食...D海鮮好新鮮, 燒牛舌都好好味!

我地叫左好多野...埋單差唔多一千蚊!

今餐有朋友請, 特別好味~~

之後仲去左九龍城食糖水!

好耐之前聽同事講過lee間炭火燒烤0家啦! 但土瓜灣好少去,所以一直都冇試過!
今晚終於去會一會佢啦!
都唔算難搵,雖然事前已經有晒心理準備後巷係好污穢不堪,但行入去0個下都真係好大勇氣!
勁驚有老鼠,曱甴走出來...touchwood...今次我地坐入邊我一隻都見唔到囉!

我地3個人叫左一燒一爐,但其實邊爐既選擇都唔算好多..而燒烤既野食都幾貴!
難得我地黎到...所以大家推介既都有食~

燒烤食物:
大蝦 - 真係超級大隻0家!好爽好彈牙
鮑魚 - 細細隻...我自己覺得冇咩特別同埋都唔知佢幾時熟既
生蠔 - 連埋個殼燒好似好耐先得咁...加少少淮鹽已經好好味
腸仔 - 燒黎食都幾得意丫!
豬下青 - 都幾多幾好味,好脆咁0家!
大蜆 - 見住佢噴水好攪鬼...我0個隻仲有隻蟹仔係入邊...點解既? 隻蜆食左隻蟹仔??
雞軟骨 - 冇咩特別...

打邊爐因為冇咩影相我都唔係好記得食過d咩囉! 番茄湯底好淡, 我覺得味道麻麻地!

其實黎lee 度真係一定要食佢d海鮮真係好得~我會為左佢d蝦而再黎0家!!
另外一提既係....服務真係麻麻地! d人好忙好惡...有個阿姐成日都比人鬧!
因為佢又真係成日都倒瀉籮蟹~

最好就book位啦!! 我地就有book 位...但8點幾就開始有人等...到走的時候成十點都仲有人等緊!
but 我會再黎食0家!! 因為真係幾特別...但我只會為燒烤而來囉!! 打邊爐真係冇咩特別!!

大家爭相說殘忍但又爭相要去吃的燒鮑魚

首先多謝爐兄的安排，得已讓我重臨舊地，一次過在此吃了很多不同的食物，記得上回和女友來的時候，只有二人的胃納也吃不了那麼多，最後捨了燒烤，光吃火鍋，而今回終於有幸一吃其燒海鮮的美味。

記得上回來的時候，真的是骯髒得不得了，而且成地濕透兼有小強，今回來竟然改善了不少，可能是位置是的問題吧，上回被安排坐外邊，今回坐了進一個如冷氣房的餐室，雖然也不是好了到那裡，但至少沒有小強及有強勁的抽氣，要不然真的怕會發生一幕密室燒炭事件。

在等吃的時候，見大家已在狂隊酸梅湯，啊！原來是任飲的，真不錯，但本人對酸梅湯興趣不大，志其實在啤酒，打邊爐真的是喝啤酒多，今天點了燕京純生，也是冰凍順喉，純生的往往也是啤酒花味較輕，但燕京的連麥味也很輕，大陸啤酒，永遠也是青島好一點，另外個人認為哈爾濱的也不錯。

之後也來吃的了，今回攪手發板，我當然是坐着等吃，今晚兩圍人馬，每圍三個炭，一個用作燒烤，兩個用作火鍋，另外再點了一個鹽水灼角螺及椒鹽魚扣，火鍋配料很自由，大家想吃什麼就點雙份給兩圍各一就可。

先來介紹點熟吃，椒鹽魚扣別看一小碟，其實都不知要用上多少條魚命，加上事前功夫繁複，魚扣要用粗鹽擦洗，再以白醋洗淨才可沖走其腥味，所以好吃的魚扣永遠也是值得一吃再吃，而此處的魚扣偏細，但吃起來又夠乾身，又一點也不腥，入口煙韌得來又爽脆，加上店家用了濃郁的椒鹽去炒，吃起來很是惹味，用來下酒一流；另外的鹽水灼角螺也是不徨多樣，螺肉美味肥大，肉質煙韌有咬口，一點泥沙腥味也沒有，鹽水味不太嗆，吃其螺肉天然的味道，不錯。

之後也來湯底，今晚沒有魔鬼魚湯底，繼而轉吃的鹹菜鯊魚窩也可說是不錯，魚味不是很濃但至少有一點點的，加上鹹菜下得夠，湯喝起來鹹鹹酸酸的，令人更加開胃，而鯊魚肉也是煲至尾聲仍舊嫩滑，不錯；另外的番茄薯仔湯底聽人說是比老坑的差很多，本人未曾到訪過老坑，但光是以譚魚頭的蕃茄窩也是差了一點點，湯喝起來不夠蕃茄香及味，而且其甜味來得很不自然，相信不是已原材料煲出來的味道，莫非店家下了點糖？

先來介紹燒物，用來燒的食材主要不是海鮮，就是牛舌及牛肉，最過癮的是有人點了午餐肉來燒，究竟燒的午餐肉好吃嗎？本人不清楚，因為它實在是太搶手了。

燒的海鮮最重要也是吃海鮮的基本原則，要新鮮，此點鴻福就真的做得很不錯，看看我們燒的活鮑魚可知一二，那活鮑魚在燒烤網上掙扎的模樣，真的有點殘忍，但燒好後，不加任何醬料吃，真的是好吃無比，立時什麼畫面已忘記得一乾二淨，口裡就咬着那鮮美的鮑魚肉，吃起來煙韌，但又不會如橡皮擦般，非常有咬口及鮮美；鱔圈其實分別用了來燒及灼，燒鱔圈外皮焦脆，塗了點蜜糖來燒更是惹味，加上鱔肉韌脆可口，真的很好吃，而灼的吃起來也有韌脆的口感，但論惹味程度及鱔圈皮的好吃度，燒真的是好吃多了。

帶子比較難熟，要等上幾輪才有得吃，再此先多謝專責燒東西吃的食友，帶子也是不加修飾的吃下，味道鮮甜而有點海水鹹香，帶子肉不太肥厚，但連其帶子群邊同吃，很有咬口而且勝在夠鮮，也就足夠了吧；扇貝也是如帶子一樣的情形，中心貝柱雖然不太厚，但咬起來鮮就是鮮，肉身是有彈性的，不錯不錯。

薄切牛舌用了來燒，也真的記不起全晚點了幾多碟牛舌了，好吃的就不斷encore，牛舌用來燒真的是最好不過，吃起來有丁點韌但很有咬口的，雪味極輕，而牛舌天然的油份在燒過後，留在牛舌自身上，吃起來就是美味；大家也認為牛舌可以是再有咬口一點，所以最後再叫多兩碟厚切的來燒吃，用上猛火將更厚身的牛舌內的肉汁鎖得更好，肉汁更多，更有咬口，外層更焦脆，吃得更過癮。

接下還有最靚的豬腩肉，豬腩肉看起來真的很肥美，脂肪佔了大半，所以在燒過後來吃，每口雖然只是薄薄的肉，但又是吃得人滿口油脂，美味；另外大家也點了鱷魚肉，真的不說也不知，雖然聽起來罕聞，而且聽聞具有醫哮喘的功用，但當然也要好吃才成，可是此肉吃起來又粗又嚡又韌，真的想不到它有什麼好處，所以最後應該是吃剩了一點的，所以本人也絕不推介。

最後的牛柳粒既有放湯來吃，也有用來網燒，燒的牛柳粒吃起來真的很有火氣，加上油脂夠多，融化了的油脂吃起來與肉在口中混為一體，又是一口豐腴美味的感覺；用來煮的就建議加進蕃茄湯來煮，在吃的時候連湯一起吃，實在有點像吃蕃茄牛肉湯的感覺，在高溫下半融的脂肪，一口咬下那些油花就在我口中四濺，也是另一番美味。

除了上述的牛柳粒，用來灼的還有很多很多，先談雞腸及豬天梯，雞腸粉潤嫩滑而有點油香，但個人認為是可以再肥美一點；而豬天梯即豬的咽喉，咬起來一口爽脆，加上處理得沒什麼異味，不錯；另外也當然有在香港火鍋最大路的手切肥牛，手切的肥牛脂肪不多，吃起來沒有了豐腴的油潤，但在細嚼之下，又是有濃濃的牛肉味，而且不「痴」牙不韌，又是可以個人吃光一碟的火鍋料。

隨後又用上鯊魚湯底來煮海/河鮮，先談鯇魚腩，吃起來口感粗嚡不夠細嫩，是我灼得過久還是其本身的問題呢？鯇魚腩肉厚但就不太鮮美；魚卜又是難得的火鍋料，而且本人也是第一次用火鍋這個形式來吃魚卜，聽說魚卜擁有豐富的骨膠源，可以令皮膚更好，但對我來說也是好吃要緊，今天吃到的魚卜，沒有卜脆的口感，吃起來只有潺腥，莫非我灼得不夠熟？再來的是墨魚滑，墨魚滑有點蟹籽及馬蹄，吃起來有咬勁之外，也帶着馬蹄的爽口及蟹籽的卜脆鹹香，加上墨魚肉新鮮彈牙，所以當然好吃。

金錢展要了來灼，一大碟的金錢展其實加起來又不是太多，因為師傅的刀法真的頗厲害的，片片很少很薄，所以索性一次過整碟分別放進了鍋中，因為枱面面積有限，還有很多的食物要上桌，金錢展吃起來的牛味比手切牛肉低，但就多了一份爽口的感覺，但就是切得太細塊了，吃起來爽口得不夠徹底；三秒魚皮放了在蕃茄湯內，等了三秒就吃，但魚片脆就是炸得夠脆，但好像是炸得太乾身，而且又太鹹，放湯吃也不知吃出個什麼味道來。

生根乃一吸湯之物，在湯頭還算不錯的環境下，當然不會難吃，但好像其殘餘的油份是太多了吧，吃起來很油膩；雞腎挺為新鮮，沒有雪味之外，吃起來更是爽口非常，可惜一碟不太多，要不然，都不知要吸收幾多膽固醇先夠我胃口；大家戰至最後，戰鬥力還是那麼頑強，所以最後要用上公仔麵來泡製我們，本人吃了兩款的公仔麵，一款是以撈麵的形式出現，放湯灼好的出前一丁，撈了點泰式辣醬來吃，再加燒牛柳粒來吃，味道不錯；另外也弄了一個蕃茄湯公仔麵來吃，當然是沒能跟勝香園的比，但至少一定不是難吃，加上湯頭夠熱，冬天吃一碗也是無比受用。最後另外也點了生菜及皇帝菜，蔬菜夠新鮮嫩綠，味道如何也不用多說了。

吃得很是飽足，而且真的很有氣氛，全程有一半時間站立一起來涮，而且今回多人來分薄了湯底及炭爐的價錢，所以每人只是一百八十實在相當實惠，在此再次多謝爐兄及南瓜的安排，另外也多謝同枱食友勞苦功高的只燒不吃，下回再煲過。

天開始凍喇, 最好就是去打邊爐, 兩個人六點半去到, 人開始多起來了
幸好早來一步,要不然又要等到9點先可以入座喇!
地方真係好地道, 好似黑社會的打架場面! 桌靠桌, 肩觸肩!

叫了半打鮑魚仔, 又有半打大蝦, 再黎一碟蠔, 黎多個西洋菜,
又有一碟多春魚, 大硯半打, 汽水3枝, 而湯底係魚雲豆腐煲, 再黎多個魚面

其實如果我大食d都未必夠食!
貝類要燒好耐先會熟, 不過真係好新鮮好正! 見到只鮑魚係度掙扎
又見到只只蝦都跳跳紮, 雖然比那支竹吉住左, 佢地仲可以跳個下真係見到生命力強的生物

吃了兩個半鐘, 兩人都要企係度先可以打到邊爐
因為d蝦難熟, 所以就下了煱去, 免得佢又掙扎, 像熱煱上的大蝦一樣!

最後要780蚊, 嘩! 食物新鮮, 係要用錢去換番黎咖! 兩人食, 都真係幾貴!

近年來.差不多每年都會攪一次火鍋大會,今年亦不例外,OR好友一行二十六人,高高興興坐滿兩檯.

每檯都是兩湯一爐,另加椒鹽魚扣,酸梅湯任飲,啤酒狂隊.

蕃茄牛肉湯 : 可能茄膏落得比較少,味道老坑火鍋比真的是差一皮,而且呷一口時,奇怪地感覺有點腥.

鯊魚鹹菜湯 : 以往是魔鬼魚鹹菜湯,但由於是日無魔鬼魚,只好改用鯊魚,的而且確,味道是魔鬼魚的魚味比較濃郁,配上鹹菜,真的冶味得多.

椒鹽魚扣 : 一條魚得一個胃,炒一碟至少都十幾隻,真係早叫先有,而且炒得夠乾身,入口爽脆,冶味,用作送酒一流.

鮑魚 : 一人一隻,其實真係好殘忍,原隻炭爐燒,睇住佢掙扎既樣但係又忍唔到口,加點豉油食,煙韌彈牙,又係每次都要叫,對唔住都要做多次.

扇貝 : 同鮑魚差不多,但肉質較嫩,放點湯,鮮味更濃,蘸點辣椒豉油食,跟平常用蒜蓉煎又是另一種風味.

豬天梯 : 即是豬咽喉,較為薄身的部份,淥的時間不宜過長,否則就會變韌,其實如果時間掌握得好,是會變得爽脆的.

牛'月利' : 基本上是用作燒烤用,但亦可以作火鍋料,當然,個人是喜歡烤熟的口感,薄薄的一片,肉味香濃.

竹笙 : 事實上是比早兩年差了一截,不論份量或者質素,以前是吸滿湯之後發漲但依然爽口.不過今次就比較稔.

魚腩 : 梗是覺得不夠厚切,少了啖啖肉的口感,而早兩年有鱘龍魚肉,實在在肉味或口感上都比魚腩好.

手切牛肉 : 肉味鮮濃,碎切之下,好難撈,始終比肥牛好得多.

五花腩 : 薄薄一塊,脂肪分佈清晰,不論白灼或是燒烤,入口豐腴,肥美,難怪大家追加幾次.

牛肉粒 : 肉味重,但部份幾多根,放湯白灼可以話肉味全面流失,反而燒烤,大火將肉汁鎖住,再灑點椒鹽上面,同食牛扒差不多.

墨魚滑 : 份量又係少左,水準亦差左,可能是來貨而非自家出品,肉質有點實,墨魚味輕柔.

角螺 : 可燒可灼,唔知邊個叫,白灼上檯,都好,唔駛乜都燒,其實肉味同東風螺相差不大.

雞腸 : 至愛之一,但膽固醇超高,一圍一碟,食幾條頂癮,放湯淥十幾廿秒,入口肥厚,油脂亦因高溫灼過,紛紛浮上湯面.

鱔圈 : 部份切得較薄,個人認為用作燒烤的話,厚身一點,讓油脂滲出,不單香口,更爽口滑溜.

'魚噩'魚肉 : 原先以為用作火鍋用,一上檯先發覺串成一串,油脂不多,食落爽口,與想像中的感覺完全不同.

炸魚皮 : 放落湯浸一浸即食,外軟內脆,又係一味送酒菜.

再加帶子,生根,雞腎,午餐肉,公仔麵,生菜同皇帝菜............豐富得不得了,埋單一人一百八十

p.s : 第二重奏將會係~~~老坑火鍋

第三重奏係鬍鬚勇火鍋......................大家有無興趣一齊黎呀?

一行十一人, 冬風起, 鴻福好似好有風味, 而且真係未試過炭爐火煱, 所以決定一試.

我們一去到就唔係好自在, 因為地方真係幾唔衛生, 坐得迫, 週圍都好黑炆炆, 好污糟, 服務態度係惡劣架, 叫五次先應你一次, 落單要急口令, 否則佢又走咗去, 又要叫幾次先返嚟!! 上菜好慢, 但係海鮮就幾快!!

我地試咗幾種海鮮, 肥蜆(好味), 鮑魚(新鮮肉爽), 鱔(超好味), 我地沒有燒蠔, 因為怕唔乾淨, 同埋見到隔離兩枱d蠔燒到爆開, 嚇到同枱的女仔走晒位, 好恐佈呀!!

其實海鮮都算新鮮, 炭爐火煱亦見風味, 唔知係唔係心理作用, 炭爐火煱ge食物係好味d架, 墨魚丸有墨魚味, 芝士腸有芝士味, 不過呢, 一路打一路覺得好辛苦, 可能因為個炭爐在枱上太近喇, 而且當枱枱都係咁ge時候, 我有種"在廟宇內打邊爐"的感覺!! 又覺得自己正在燒炭自殺!! 不得不提, 明明返到屋企已經由頭洗到落腳, 但我第二日起身ge時候, 仍然覺得好大陣炭味!!

總括來話, 可以一試, 但建議最多三五人一圍好喇!!

鴻福四季火鍋.係土瓜灣落山道下段一條暗巷中, 只係大街有個燈箱, 平時好易就MISS左...
行入果條又滴水又污糟既冷巷, 你點都估唔到入面既水準係咁高


其實哩度好出名, 好多電影人都黎哩度食, 所以先係無間道電影中用作場景

好講返野食先~

今日6個人食

有飲啤酒

食左$1128

食物方面~
角螺
我未食過, 今次第一食, 嘩!好鮮甜, 用老細設計既獨家武器黎了D肉出黎, 好方便~

沙蜆
因為今日冇返芒果大蜆, 我叫左沙蜆, 個名叫沙蜆. 其實冇沙


巨大的蟹
好大隻既蟹, 我冇叫到...因為真係太大

有殼生蠔~$15隻, 咩都唔落就咁燒, 唔腥好JUICY, 仲有好既海水味~好新鮮

帶子, $6隻, 細細隻但係一樣鮮甜好味

大大隻花蝦, 今次我都冇叫

惹火雞心串, 夠曬惹火, 加淮鹽燒非常慈味

必食牛柳粒, 雖然我唔食牛, 但係都一定叫比朋友食

鹽燒鱔圈, 又係必食

乾吊片
吊片, 自己燒,燒到一半加豉油燒, 好食過出面買既

日本雞軟骨,用串串哩隻, 係貴價貨黎, 鹽燒又係惹味小食, 送啤酒最ARM

魚扣JE係魚既胃, 好爽口架, 佢地清潔得好乾淨, 可以放心食

墨魚滑
加入左馬蹄粒既墨魚滑, 爽口彈食鮮甜~

生麵, 食過就知好
生麵, 用個殼兜住淥30秒就夠啦, 加D佢地既豉油撈, 一流!

手切牛, 淥兩下食得

皇帝菜,好嫩~唔會咬唔斷

新鮮鯇魚卜, 一D都唔腥, 又重膠質

沙爹湯底, 不二之選!

天下第一酸梅湯
超好味酸梅湯, 平時唔飲既都飲2支

食物新鮮係哩度最大既賣點, 如果唔知食咩好, 可以去睇下佢放海鮮果度,或者問下肥妹~

肥妹好似好串, 但係好好人架, 今晚2度ENCALL角螺, 佢地話唔夠, 得半碟, 送埋我地食囉~

仲有, 今日冇既魚春, 田雞扣, 芒果大蜆都係燒烤最好既野, 下次記得問下有冇啦~

炭爐慢火打邊爐, 十足慢火抝湯. 正
港色爐端燒 好玩又好食.
有定心理準備, 間野係喺條巷仔裡面, 環境唔會同靚有任何關係. 所以拍無間道咪啱晒

無論人多人少, 加$10蚊開多個爐, 一邊火鍋, 一邊燒烤最過癮

必食推介!
大蜆 - 大而不老, 不過好快賣晒
田雞 - 肶滑 多肉
燒鮑魚仔 - 新鮮! 仲郁嫁
墨魚sashimi 超新鮮, 甜 爽. 可遇不可求 唔係日日有. 好彩問阿姐有乜推介, 唔係都唔識食.
農湯烏東!! - 慢火煲咗個靚湯, 淥烏東Good!

再加例牌 多春魚, 肥牛, 燒雞翼...

不過粟米真係麻麻, 可能唔當造. 生蠔就好玩多過好食~

一年多前跟幾個同事黎試過之後就一直心思思想食多次, 終於同幾個朋友一齊黎食過!

蝦好新鮮, 有隻仲生猛到整斷左支竹籤
蛽大隻得黎又鮮甜
墨魚丸係另一樣必叫o既餸, 無論燒定用爐滾都好好食, 好彈牙
魔鬼魚好鮮好滑, 而且唔會有魚腥味
同埋叫左蜂巢豆腐, 都幾似豆卜, 有興趣o既朋友可以一試

仲叫左其他野, 但唔算好特別所以唔多講了 =)

7個人total食左$12xx
因為每人都叫左好多野飲, 所以價錢算合理

無間道火煱
炭爐打邊爐

海鮮一流
個人NO.1 燒大肥蜆
個人NO.2 燒雞腎
個人NO.3 燒大蝦 (有膏)

同事們首推燒大鱔圈
佢地又中意醉雞湯底 (補湯味)

成餐唔洗點叫平時食果d圓
因為有大把野可以揀

污糟程度*****
行入巷仔已經頭頂滴水
入到似大排擋
不過你地咁多男仔應該ok

我經理請食飯
1201蚊6個人
唔太貴
o岩你地一大班人食

不過要book 枱都幾full

莫拉非來港前的週四，天氣極悶熱，酷然天氣警告高高掛；三名中國藉男女，竟然唔識死，走咗去土瓜灣某條巷仔內，玩炭爐打邊爐兼燒烤。

走到巷中間，柳暗花明天一村，原來巷內有一舖位；店員見我們走近，即問：打邊爐？燒唔燒埋烤？隨後，入座，店員隨即為我們設置了兩個炭爐，一個上面放著鐵網，供燒烤用。

外面有個海鮮缸，可選擇新鮮海產打邊爐；成枱唯一的男士走出去千挑萬選，選了六隻珍珠蜆回來，置在炭爐上燒，看著其殼緩緩打開，食得！蜆肉相當大隻，鮮味不算大濃郁，但清清地都唔錯，而且吐沙吐得非常乾淨，很好！

還要了多春魚和墨魚筒作燒烤用；多春魚是一般貨色，不過實在太容易「痴底」，不容易燒得好，避免叫這較好；墨魚筒，其實是墨魚仔，雖仍見未解凍之冰塊，但燒起來也很爽脆；隨枱附上三碗燒烤醬料，有辣醬，豉油，或溝稀了的蜜糖，以辣醬調味再燒的墨魚仔，最為惹味！

另一邊是打邊爐，我們要個芫茜皮蛋鍋，才$18，很抵；要了客蜂巢豆腐，放湯煮後，豆腐索了湯底芫茜的清香，加上豆腐本身的豆香，味道很好，一致應為是是晚效果最妙的一項。

熱愛麻辣的太公看見餐牌上的麻辣丸，自然又是雙眼大發青光，即點了一客；原來是豬肉丸外層，包著花椒碎，麻辣度就一般且偏乾，不過外層豬肉味道很鮮甜，貪新鮮者可以試試。

墨魚滑當然也不少得，這墨魚滑是鮮打，不過用的墨魚不是游水活墨魚那種，但店家很聰明地下了葱未和馬蹄粒，為這墨魚滑添上葱香兼豐富口感，才三十多元一客，可以收貨有餘。

朋友要了潮州魚蛋，做得幾好幾鮮甜彈牙，太公幾鐘意；魚麵魚鮮味頗濃，只嫌韌度比較遜色；另外皇帝菜夠晒新鮮爽口，不錯。

朋友還要了豬面脥肉，不過太公不好此道未有試食，據悉放湯煮的話非常爽脆，味道不俗。

舖內雖有冷氣供應，但未有很強勁，仍然教人打邊爐時汗流，熱血男士更是尤如關公上身，面色赤紅；猶幸要了四支大啤降溫，店家還很細心地取了裝滿冰塊的筒為他們保溫。

埋單，每人才$137；食物質素雖未算超班，不過勝在平平實實樣樣對板有餘，份量足，店面簡陋卻相當整潔，以炭爐烤又有風味，這個價錢，其實很抵！雖然出了一身的汗，但當晚在座兩位朋友都食得非常開心，身心舒泰！

2008年12月12日，19:30
上一次到鴻福是Dec2004，店仍是特色和出色
但這次的食友可算是人面全非，餘下是衹有爐兄一人。
HGP失靈港爍竟要在紅隧口電聯爐兄問路
經過陰暗后巷后，已聽到爐兄和南瓜的聲音。
桌上已放著四個碳爐，兩個湯鍋、兩個烤爐；各式食材已備好。
深圳人習慣早開飯，越望越肚餓。
人終於齊，可以開始
由於我坐近烤爐，便韌由燒烤開始
烤物：香脆的雞軟骨、鮮甜肥美鱔片、香脆腎片、鮮味九孔鮑、香脆魚扣。
再來是鍋物：肥牛、鵝腸、豬潤、魚片、肥蠔

大伙兒吃得熱熱鬧鬧，姨嘻嘻哈哈說著潮事；相比04年的志在食，氣氛完全兩樣。
老鬼喜歡前者。

其間龍火離席好一陣子，回來時帶上了，老好香滑的土筍凍，忘了說句多謝分享。

前陣子很忙…一直約不到雀友開局…終於有一個星期天有空…雀局後就來到鴻福打邊爐…久仰其名…去還是第一次…一開始已經知道環境不太好…慶幸我還可以接受…
我遲去了…所以友人率先點了湯底和不少火鍋料~我也樂得一坐下就有得吃~

湯底是冬陰公豬骨湯底…很好喝呢~不會太辣…豬骨數量很多…吃極都吃不完…到最後滿檯豬骨…我怕麻煩所以沒有吃~但其中一位友人就不斷吃了五六件…我想應該很不錯吧~

最喜歡吃蜆的我們當然要試試炭爐燒蜆啦~…非常大隻…我吃的那隻沒有沙…但友人說他吃的有…不過燒的時候有點危險…因為蜆殼燒得太久會爆一些殼碎出來…叫了肥美的蠔…一半燒一半滾…同樣好吃…鵝腸真的很肥…肥得有點誇張…雖說鵝腸不肥不好吃…實在是不適宜吃太多的了…落單的姐姐介紹的麻辣丸就很一般了…中間只包著麻辣粉…而且一點也不辣….

小插曲: 我們有一碟肥牛在檯上…還沒有吃過…店員在替我們更換一個炭爐的時候把炭碎都濺到肥牛上…我們都”嘩~”了一聲…然後另一位店員就說替我們拿肥牛去沖沖水…再拿回來的時候…炭灰當然還在…而整碟肥牛都是水汪汪的…都幾可怕…

這裡確實是有風味的…但是食物整體來說水準又不算是十分高…而且還要冒著肚痛的危險去…還是建議腸胃不好的人還是不要去了…況且收費都不便宜…下一次還是朋友聚會才會選擇來這裡…

現今既火鍋店各出其式，務必一定要你回味無窮，食過番尋味！不過來來去去仲有幾個多特式仲可以吸引我地呢班善忘既香港人呢！？最始我地都係歸向原始．．．

炭燒海鮮加火鍋，炭爐兩個字，一聽就已經感受到嗰種熱哄哄既風味！試問而家仲有邊一度食市會同你公然燒炭呢？好多都已經講輝煌講服務講品質，難得仲有呢道可以令人回味一番，開懷大嚼！

之不過回味有時都需要付一點點代價！久聞呢間炭爐火鍋位於後巷之中，又濕又污糟！一行六人見到招牌﹐我首先望入去視察一下環境！其實本人都非常怕，不過為食所以冇計！膽粗粗走入去，其實已經見到人頭湧湧，仲要有不少西裝骨骨既男仕已經狂食中，我地８點幾去到，依然要等咗一陣位！

好喇，埋得枱喇！六個人坐出面一張角位枱，因為污糟，所以我都猶豫咗好耐先坐低！望住張餐牌，唔理咁多，先叫大蝦、蠔、鮑魚、''斯堪''、大蜆嚟燒，再叫埋之前食評友推薦既魔鬼魚湯底！火鍋料來來去去又係肥牛呀，丸呀之類咁啦.....

先燒大蜆，唔知點解燒野嗰邊個炭爐好細火，大家又心急咁喺度等呀等~~終於燒好，大家急不及待地熱都唔理喇，辣嘴都放入口！新鮮不愧係新鮮，炭燒保持返原味，海水味加上肥味鮮甜，正到暈....

食完一隻蜆之後，我地似乎大家都唔理四周圍既環境係點喇，望住前面d海鮮大家都幾乎進入忘我境界！我相信裡面食緊人全部都係！坐我地後面班西裝友忘我地高聲粗口不斷，又猜梅又飲酒，全場企起身嚟食既亦大有人在！好不熱鬧！我亦唔理咁多儀態喇，企起身嚟不斷煲裡尋它....

魔鬼魚湯底果然鮮甜，肉質嫩滑，仲要唔係好多地方可以試到，唔錯！肥牛就麻麻地喇，雖然無渣亦唔靱，可惜牛味略嫌偏淡！四寶丸並唔係手打既，實屬凍肉店貨色，奉勸大家唔好試喇！其它火鍋配料都係不過不失，唯獨一樣真係要推介既就係雲呑！

其實本人一向唔鍾意食雲吞既，朋友點咗咁就試一隻啦！六個人一碟雲吞都係得六隻咋～點知一食先知味美！一口一隻既雲吞，皮薄且蝦肉彈牙爽口，亦唔會有肥膏混喺裡面，確係水準之作！我都忍唔住要order多碟....

燒海鮮嗰part真係不得了，ｄ蝦成日意圖想跳出隻碟，ｄ鮑魚不斷想逃跑！我地將佢地試咗兩種整法！不半用嚟燒，一半用嚟勺！結果係兩種不同風味！

燒既方法可令海鮮原汁原味，食到陣陣炭香加鮮美！而勺呢會令海鮮冇咁乾身，肉汁豐富一ｄ，多一份清甜！不過各有喜好，兩種風味都令人難以忘懷！除咗''斯堪''略欠鮮味，其他海鮮都係新鮮肥美！我唔食蠔既，不過朋友就話雖然蠔味唔太重，但又唔知點解好好食喎！！我相信呢個迷要大家去解開喇！

寒冬低下，對住兩個暖笠笠既炭爐，一邊燒一邊滾！最開心既係可以食得忘我，大家唔使好似去到外面既餐廳咁，咁拘緊！！大聲講，放心食.....滿口美食，還要忘著談天說地...朋友相聚，最開心都莫過於此......