突然想打邊爐, 見娛樂城果邊冇任飲任食, 就黎左呢間睇,
有任飲任食喎! 正~

打邊爐果邊都幾多人喎, 我地係最後一張枱!
佢啲卡位有得睇電視, 好似好正, 不過我地坐普通枱都OK

雖然只得我同男朋友2個人, 但叫野食絕對唔手軟!
都係左丸, 菜, 雞, 豬, 蝦, 魚皮餃, 蠔, 金菇等等
個醉雞煱好耐先黎, 追過2,3次, 啲叔叔嬸嬸既態度都唔錯!
值得一讚係啲肥牛好足料, 好大碟 仲好夠肥haha
啲蝦亦非常爽口, 一個字, 正!
但碟豬肉就都係一般...
除此之外, 其他都OK

另外就係有位部長叔叔, 身穿制服但腳踏水靴, 成晚吹住口哨, 好輕鬆的樣子, 好好笑

食物質素一般～
汽水任飲，食物任叫，窩底免費，
而且都多食物選擇，大部份食物都新鮮，
肥牛、鵝腸、羊肉、蝦、其他菜都好新鮮，
環境都唔錯，好多電視機，
星期一至五8:30後入座仲會平$10添！
所以好抵食！！！

但服務態度極之差！！
ｄ侍應愈叫愈走，明明望到我地叫佢，但就即刻走開扮執枱！
但都有一個短頭髮加成日都笑容滿面既阿姐，
同一個戴眼鏡既後生男侍應服務好好
其餘既都唔係做野，係度博炒～

最離譜既係埋單時，佢地計錯左我地＄68位（應計我地＄58位）
我地問個女部長，佢一味死撐同顯得好唔耐煩
跟住佢竟然同我地講”唉～你地計好先同我講喇！”就即刻走人
最後個男經理同我地check下先承認佢地計錯數
我地唔係冇錢比，只係唔滿意佢地咁既服務態度仲要我地比多百幾蚊囉～！

＊所以以後請我都唔會再去！！！＊

$58 位宵夜任食火鍋係幾抵既, 但如果大家唔介意等半個鐘先上第一輪火鍋料及火鍋湯底, 又唔介意服務員人手嚴重不足, 又唔介意坐到鬼死咁逼既話, 大家可以黎皇都試下囉!

我地 8:50 入座, 點左火鍋料, 湯底, 汽水後, 除了汽水即時上檯外, 其他食物足足等左半個鐘先黎, 最令我地不滿既係服務員質素勁低, 可以講唔理客人. 我地摧過幾次, 幾個服務員既回應簡直係差到極, 佢既既回應分別有:

1.話幫你摧左啦, 人多係等咁耐o架喇! (火鍋料唔係放好係碟上拿出黎就得咩?洗唔洗咁耐?)
2.同我地講唔洗急喎, 一定夠時間俾我地食喎! ( 夠時間還夠時間丫, 而家九點幾, 我地都肚餓喇, 唔通十二點先黎食物咩? !)
3.叫我地寫過第二張火鍋料喎! (完全唔打算幫我地摧)
4.應左我地, 但冇去摧
5.直頭當睇我地唔到

受到咁既待遇, 又等左半個鐘, d 食物終於開始黎了. 我地食左:
1.肥牛肉 (肉味 ok, 但有點”鞋”!)
2.羊肉 (肉味不錯, 唔”蘇”!)
3.鵝腸 (都幾爽口)
4.魚片 (無魚既鮮甜味, 亦”臨”左 d, 冇口感!)
5.白鱔片 (比魚片好, 無論鮮味及口感都不錯!)
6.三寶丸 (都係一般水平!)
7.娃娃菜 (得幾條, 有點乾, 唔太新鮮!)
8.小唐菜 (又係得幾條, 有點乾, 唔太新鮮!)
9.金菇菜 (ok, 幾鮮甜, 份量都唔少!)
10.魚滑 (味道及格, 但份量較少, 亦係我地火鍋燶底既來源!)
11.蝦 (一碟 6 隻, 新鮮, 算好吃!)
12.烏冬 (都係一般既味道!)
13.魚皮餃 (好吃, 皮又唔算厚!)
14.炸腐竹 (味道還可以.)

其實整體食物水平係 ok 的, 但皇都俾到客人既服務真係太差了, 真係食龍肉都冇味. 講多一樣皇都唔掂既地方, 就係佢地既火鍋爐竟然唔可以調校. 話說我地見火鍋爐太滾, 想叫佢地校細 d, 佢地話冇得校的, 所以也令到火鍋有少許燶底!

雖然最後埋單 $232, 每人唔洗 $80, 算幾平, 但我地真係唔想拿苦黎辛, 以後就算請我都唔會再幫襯.

相片可參考:
http://hk.myblog.yahoo.com/thxdtsdd/article?new=1&mid=2548

之前偏好揀日式或西式食肆，但近來想轉轉口味，就提議母親大人食中菜。臨近放假前夕，心情靚靚，兩個人叫左三個餸。

金菇炒雜菜: 睇菜既色澤都知麻麻，佢炒得太老，有少少黃。而個獻汁又太杰，即使 d 菜之後出水都無補於事。佢鍋氣係有，但覺得比大排檔既仲要再油少少，唔係我杯茶。

帶子象拔蚌蒸豆腐: 呢個唔錯，豆腐本身味道較淡，配上較濃的豆豉汁是不錯的。而帶子偏細粒，口感就唔錯的.. 至於象拔蚌都係比較細粒，較爽口 ~ 用黎撈飯真係幾好。

薑蔥炒蟹: 特價小菜，$38 碟... 對於坐得舒服既酒樓黎講係好抵。蟹就唔好 expect 佢好肥美，但 d 肉就真係.. 有少少霉囉。佢個汁比較濃，但都補救唔到佢 d 蟹唔夠鮮美.. 所以都係一次就夠了。

飲品叫左酸梅湯: 好淡，好似飲水咁 ~ 就算冇加冰都唔合格﹗

笑面就比唔到了，不過如果想搵間酒樓聚聚，又唔太貴的話... 可以揀皇都。

2個人8點入去,見佢蟹有特價38蚊斤,任叫任食
叫左
一斤蟹.---38蚊有3隻...蟹比較細..炸得岩岩好無燶..有水準!
沙茶通菜肥牛--通菜OK,肥牛就太熟喇.好UN...
仲有紅豆沙送添.
食完9點走個時排大隊...人人等食9點特價..

下次來會再幫襯!
埋單130

噚晚同阿媽&AUNTIE去打邊爐。阿媽話印象中打邊爐呢間係唔錯喎, 我打過都唔記得左, 又見到裝修完靚左咁多, 就入左去。D人做野, 時快時慢, 個鍋晨早黎左, 但D料就遲遲都唔黎, 要催兩三次, 不過佢地都好有禮貌既。
明顯地肥牛俾最多, 真係超多, 同埋望落D肥牛已經幾靚, 食落都真係幾好, 同一般其他酒樓D肥牛好唔同, 呢度係厚切D, 同埋新鮮D, 總之食落就幾唔同啦!! 其他丸類肉類都俾好少, 三個人咪俾三粒咁囉, 其實咁都OK既, 都費事食唔哂。菜都係會俾超多, 成座山咁, 不過最後都俾我一個人食哂, 因為我中意食菜。
見到有個黑豚肉, 咁新奇就試下啦, 嘩, 一D都唔好食, 好硬, 同埋望落似雞肉, 食落唔知似咩....不敢恭維呀!! 豬潤都幾好味, 因為好多地方既豬潤都唔好食,但呢度都OK。
AUNTIE話點出前一丁, 所以點左出前一丁, 真係成包出前一丁拎黎, 就算唔落味精粉, 淥完個麵都好好味, 以後打邊爐都可以試下出前一丁, 因為我通常只食烏冬。潮州魚旦同黑椒牛丸都幾好味, 前者非常彈牙, 後者就好大粒好黑椒。
唔明點解雲吞水餃果D要另外俾錢, 通常D酒樓任食都會包埋, 可能呢間D餃類係自己包又好靚果種啦!!
整體上, D服務好好, 都幾殷勤, 經常黎換碟執野, 真係難得!!
我地7點鐘入黎, 就$65一位, 可食兩個半鐘, 最後埋單大約$106, 可能係D茶錢呀, 同埋湯底錢咁啦, 都可接受啦!! 因為確實幾多野食, 又坐得舒服, 食得開心。每個卡位仲有小型電視, 有好多台, 除左一般既台之外, 仲有NOW同有線。

前幾日去左呢度食飯 之前都黎過一次 價錢合理
叫左特價羊腩煲n茄子豆腐煲n芋頭臘肉煲n老火湯
羊腩煲都OK 夠腍 味道可以再入味d
另外兩個煲都唔錯 芋頭有D唔粉的
老火湯好夠味 唔識分有冇落味精 但幾好飲
有紅豆沙送
不過呢度既侍應做野都幾慢 而且叫幾次先做到囉

日子仍然係咁凍，有咩好得過打邊爐夠晒熱辣辣？今晚去咗呢間有一排都冇幫襯過嘅皇都，食佢個任食任飲打邊爐，$68一位限時食兩個鐘，不過湯底要另收錢，都好啦！叫咗：

皮蛋芫茜湯底：好清，清到冇味咁滯，皮蛋唔多亦唔靚，熟咗之後係黃色唔係靚皮蛋應有嘅黑色，食落脷嚡！

日本黑豚肉：邊係丫！係普通豬肉就真，仲要乸到粉紅色滑潺潺，淥完乜嘢味都冇，得個滑字！

黑椒牛丸：原本我哋叫三寶丸，不過睇嚟三寶即係剩番啲乜就照執比你，而且佢係睇你有幾多人就比幾多你，所以都係每樣得兩粒，散叫又係幾樣嘢撈埋一碟，都係兩粒，點叫都冇乜分別！呢個黑椒牛丸幾好味，肉質夠彈牙！

潮州魚蛋：都係好普通嘅街市貨色，夠彈牙但味道欠奉！

魚蛋：就係通常用嚟整咖喱魚蛋嗰隻，雖然明顯係來貨，都幾好味！

包心貢丸：點解白雪雪咁嘅，一啲都唔似貢丸喎！佢啲包心嘅餡係肥豬肉，好多油漏出嚟！

豬紅：夠實淨淥完唔會散晒，還可以！

美國肥牛：好肥有啲羶，我食咗一塊就食唔到嘞，要我老公食晒！

炸魚皮：呢個正常啲，唔會稔晒，淥完味道都唔錯！

西洋菜：佢上枱時我差啲噴茶！ 竟然係熟嘅？真係打咁耐邊爐都未見過呀，搞咩整到咁騎呢！唔淥又凍冰冰，熟咗再淥咪黃晒囉！搞笑！

龍崗雞片：好滑，好人工化，味道冇晒！

滑肉片：同頭先嘅日本黑豚肉完全冇分別，味道都係一樣！會唔會根本就係同一樣嘢？

滑牛片：又係乸到粉紅色，完全冇牛肉味，真係食到一嚿肉咁囉！

新鮮牛滑：真係未食過！未淥個樣唔好睇，一pat 嘢咁，熟咗食落勁似山竹牛肉！味道就還可以！

芝士腸：好味因為最夠味！

釀豆卜：味道普通啦！

出前一丁：一定係大光麪扮一丁，因為食開一丁所以食得出！快淥都幾好味嘅！

烏冬：好味，我哋真係好少出街打邊爐要食麪同烏冬，仲要覺得好味先搞笑！

睇 run down 成晚好似食咗好多嘢，不過全部都係得幾件，好就好在可以試好多嘢食！不過佢啲嘢食尤其係肉全部放晒同一碟，搞到好鬼難睇，有啲趕客！可以改吓就好嘞！

服務方面就真係唔得嘞，成晚笑死街坊！我哋末食完第一轉就有個侍應叫我哋埋單先，都未食完咁我問佢係唔係夠鐘啦，佢話唔係，不過睇吓你哋夠未唧！咁都得？ 我都唔知夠未喎，所以叫佢一陣先！

原本佢係有汽水任飲嘅，不過你唔好諗有可樂嗰啲喎，係市面上都好少見嘅紅罐檸檬可樂同埋同一牌子嘅綠罐檸檬梳打！我哋隔離嗰枱對情侶坐低食緊先叫嘢飲，個侍應竟然話：冇啦！得番一罐！你哋邊個要丫？個客再問：咁有咩嘢飲呢！個侍應話：冇啦！乜都冇啦，我都幫你唔到囉！笑到我肚痛！好彩有個阿姐唔知喺邊度班多一罐番嚟先搞掂！仲有食食吓想問佢攞多一碟鼓油，個侍應竟然話，連鼓油都冇晒囉！有冇搞錯？咁大間酒樓冇鼓油？？？真係我咁大個人第一次聽到呀！

呢度啲侍應咁妙語如珠，如果想笑爆嘴都可以嚟試吓！走嘅時候，隔離嗰枱對情侶同個侍應講佢個爐唔得，個侍應埋緊我哋張枱嘅單，我哋起身時，聽到個侍應同佢哋講：呢枱都走啦，不如你哋淨番啲嘢食過嚟呢邊淥啦！枱客當堂冇晒反應， o 晒嘴！

去過食點心﹐亦去過打邊爐。

點心 - 好普通﹐炸嘅野好似未炸透﹐不過係好平嘅。

打邊爐 - 牛肉好肥﹐墨魚丸好細粒﹐經常漏單﹗

服務 - 完全無服務可言﹗叫極到唔應﹗見到扮見唔到﹐仲要好明顯﹗簡直離譜﹗

星期日老豆贏馬仔買左半隻燒鴨加料
燒鴨勁多汁,超juicy,皮又脆,肥膏又不多,好好食
連皮都食埋超正^____^
不過食完之後充滿罪惡感,要做番多d運動先得了~_~

食蝦皇 冇徬徨

叫左好多送....

多到唔記得...

而家只係列四樣

鼓油蝦皇 + 海皇瑤柱羹 + 西勤炒吊片 + 炸蠔

好好味呀~~~

三個人食左三百幾蚊...

但係叫左六送一湯...真係好飽....

最好味係呢幾味

鼓油蝦皇...佢用鐵板上....

送到上台...先倒d 鼓油落去...

d 豉油真係 溶入晒去d 蝦同蝦殼之間

惹味非常!!

瑤柱羹 夠晒料....好得!!

佢的份量又多...我諗八個人尼食都夠分

食落同真翅真係冇咩分別

炒吊片...點埋蝦醬.....咸甜混合

簡直一流

炸蠔 雖然比較腥...

但係夠晒新鮮熱辣....

差d俾佢熱爆咀tim

今日又同阿媽去左飲茶行街
11.45am 先到，d 人都走到 7788，有好多位淨呀

今次叫左6 籠點心蒸排骨、金錢肚、流沙奶皇飽、蒸蝦腸、棉花雞同山竹牛肉
蒸排骨新鮮熱辣好好味 = 保持水準
金錢肚份量比上次又少了，而且 d 汁好稀 = 水準差了
流沙奶皇飽熱辣辣好好食，不過始終唔夠新星既好食，但水準同上次一樣 = 保持水準
蒸蝦腸好奇怪地有一塊瓜o係蝦腸入面 !? 而且今日 d 腸粉皮勁痴埋一舊 = 水準差了
棉花雞只係一舊棉花既東東墊底上面有舊雞肉仔再加一隻菇而唔係一卷卷 = 水準差了
同排骨一樣係好好味呀 = 保持水準

P.S. 以前另一張紙仔既蝦腸會比正式既點心紙平 $2 架不過宜家同價 ..................

又係飽到晚飯都食唔落 !

返學校考試搏殺前同阿媽去飲茶充充電先
叫左一碗油雞燒鴨飯、糯米雞、流沙奶皇飽、金錢肚

油雞燒鴨飯 d 雞同鴨冇乜肉同都 ok 細件囉 .............. 早知二揀一要脾再撈叉燒啦 ~
糯米雞一籠三件，ok 架，如果可以一件過加有多 d 汁仲正
流沙奶皇飽始終都係新星既係 number one ar !
金錢肚幾好食，但見同台既好似大兜 d 靚 d

兩個人食飽飽都只係 $65 連早茶茶錢同加一
( 12 點前賣單計早茶茶錢咋 )
抵呀 !

P.S. 今次冇位叫腸粉

焗芝士龍蝦伊麪底$168 : 味道一般,有好多芝士仲有一只龍蝦仔同好多伊麪...雖然同明星$3xx比較味道同份量都差d, 不過價錢相差一半wow, 所以都OK食得過...!!!
特價半隻燒鴨$28 : 好好味, 雖然只係暖暖o地, 但係都好好味, d皮仲係脆tim, 一d都唔肥。扺讚!!!!
佢仲有好多特價小菜, 不過實在太飽所以冇叫...
最後仲有糖水送添
(茶錢$9位花生$10碟加一)埋單都係$246咋。
哩間d待應都幾有禮貌!!!

前幾天中學同學眾舊,搞手選了這間酒樓....

一行20人左右,2圍枱,散叫菜式,因為比套餐更靈活,化算

菜式很多,不能盡錄,有灼蝦,雞煲,炆燉鍋菜為主

部長們知道我們是師生飯局,態度好過其他枱....

最搞笑係中途來了一客生菜鮑片,由於我們不太清楚是否點了,大鑊飯咁起筷...各果當第一個义左1片鮑片後,部長話送錯位,在他不知己被"開鮑"的情況下,整客送到對面的正確食桌,我們哭笑不得....XD

食物,一般,但款色很多,當中有些幾有趣...如圖中的"鐵煱素瓜".....即用鐵板的物料的鍋,滾往一些瓜類...賣相過癮,但同學話味道一般

不過環境好亂,好趕....整体還可以,勝在便宜,total $1400 2圍,每人$60已ok了