呢晚約左 3 個旅行團友仔出黎聚舊, 左諗右諗, 最後揀左呢間 cafe!! 一黎又可以坐得耐D, 二黎又可以傾下旅行計仔, 三黎又可以玩下 card game, 一舉三得!! 結果, 我既選擇係無錯架......!!! 前一日用 tablemap book 左枱, 即日已經有人打黎同我 confirm booking, 有效率!!! (=..= v) 收工之後, 就搭地鐵出旺角, 先去會合左朋友仔, 再一齊上去~ 大廈外表殘舊, 不過唔使驚, 有 lift, 哈哈哈~ 去到 cafe 門口, 暗暗既燈光, 深紅既牆色, 好有神秘既氣氛, 呵呵~ 同侍應 表明身份之後, 就安排左我地去另一個 area 既一張 4 人枱~ 然後就放低左 menu 比我地慢慢睇~ 呢度既氣氛唔錯, 無咩人理, 好自由自在既感覺~ 研究完個 menu, 我地決定要一個 4 人 set.... 不過, 因為仲有一粒朋友仔未到既關係, 干坐實在好苦悶, 所以我地唯有先 order 左餐飲先.... 終於等到果粒朋友仔都黎到啦, 我地就落單嚕.... 前菜: 炭燒蜜糖豬肋骨 配 BBQ 汁 餐湯: 波菜忌廉湯 小食: 蜜汁法蘭克福腸 + 芝士煙肉焗薯角 主菜: 紫蘇忌廉汁燴雞肉闊條麵 + 日式麻香醬炒海蝦扁意粉 + 忌廉燴海鮮意大利飯 餐飲我要左: 焦糖榛子朱古力 (熱) 一開始既時候, 我地都係傾下計, 講下去旅行既野~ 到野食上枱, 我地就一邊食一邊吹水, 真係好開心~
炭燒蜜糖豬肋骨 配 BBQ 汁 - 記憶中都有大約 6-7 條骨, 仲有一堆新鮮既蔬菜配碟, 豬肋骨入味又夠味, 但係唔會過咸, 讚~
波菜忌廉湯 - 味道比較淡, 開餐前清清味雷, 唔錯~ 再加少少黑椒之後就更好味~ 讚~
蜜汁法蘭克福腸 - 腸仔切得薄薄的, 彎彎的, 每次 1-2 粒入口, 每一片都充滿左蜜糖既甜味香味, 讚~
芝士煙肉焗薯角 - 其實唔太食到煙肉, 可能係碎切呱~ 但係薯角配芝之再焗....真係最佳拍擋~ 又香又好味, 讚~
紫蘇忌廉汁燴雞肉闊條麵 - 紫蘇!? 果度既燈光比較暗, 所以都唔係好見到有無紫紫地色, 哈哈~ 雞肉長條形, 幾嫩滑, 而佢個忌廉汁好味之餘, 但係又唔會另人覺得好膩, 麵條軟硬適中, 有咬口, 讚~
日式麻香醬炒海蝦扁意粉 - 佢個粉其實同 "闊條麵" 差唔多, 無論外形定口感, 麻醬夠滑, 不過味唔夠香, 有少少失色~ 還好海蝦嬴返 D 分, 新鮮之餘都唔細隻, 而且蝦肉彈牙無霉肉, 讚~
忌廉燴海鮮意大利飯 - 又係忌廉, 哈哈, 的確佢呢度既忌廉幾好味, 海鮮咩都有D, 全部都係細切, 意大利飯軟淋適中, 讚~
焦糖榛子朱古力 (熱) - 2 個字, 好味!! 雖然榛子味唔夠出, 不過勝在焦糖味夠香, 加上濃濃朱古力, 竟然又唔會喪甜喎, 甜度啱啱好, 熱呼呼又曖凹凹, 讚~ 食飽飽之後, 計亦傾得差唔多, 然後就開始我地既 card game 之旅!!! 搵呀搵, 點知搵唔到我地識玩既 game !! 唯有其求拎左幾樣返黎研究!! 研究!! 但係研究左一陣子, 仍然無咩頭緒, 所以....我地唯有請教 cafe!! 我地直接拎個 game 出櫃面問佢, 諗住佢可以就咁講比我地知啦, 點知.............................. 太好啦~ 佢竟然百忙都抽空過黎 face to face 教我地點玩, 仲幫我地搵到之前想玩又搵唔到既 card game !! 另外有隻我地未玩過既 card game 都幾好玩, 佢仲同我地玩左幾舖, 等我地都明白晒佢先返去做野, 讚讚!!!!! 呢間 cafe 雖然野食唔係平, 一般西餐價左右啦.... 但係佢既食物質數, 待客態度, 環境氣氛, 都已經足夠令我加佢入我個心水 list, 哈哈.... 下次有朋友聚又想去 cafe, 我都會帶佢地黎呢度....
題外話/補充資料:
溫馨提示:唯一要提既係.....................廁所~
因為佢係舊樓果D, 果層都係D舖仔之類既東東, 佢個廁所就響果層既中間位~
地下有水又濕之餘, 一格就無燈, 一格個門又爛左, 得返一格叫做好少少~
整體好有....戰後 feel~ = ="
夜麻麻去都真係..............要小心!! 最好搵個人陪埋一齊去啦~
(以上食評乃用戶個人意見 , 並不代表OpenRice之觀點。)