更多
2014-10-11
3473 瀏覽
契妹個哥哥生日請食飯,愛吃意大利菜o既佢原本訂咗位去半山區試食,但為怕賓客們交通不便,最終決定留守喺灣仔區,地點改為一間大家只需步行就可到達o既Papi。Papi位於灣仔核心地段,合和中心對面o既QRE Plaza二十六樓,顧客除咗可乘搭地鐡,好多主要o既巴士同小巴線仍然運作,方便程度無減。一出升降機門就留意到餐廳logo上面個「i」好似就快跌落黎咁,好搞鬼 (請看上圖)。Papi間隔開揚,光線充足,右手邊為開放式廚房,左手邊一角為酒吧區,格調輕鬆舒適。其地板及枱櫈全為木造,簡潔乾爽衛生,四方形o既木枱更可隨意拼成大小不同o既長枱,無論係小情侶一雙,友人一大班,甚至扶老攜幼o既家庭聚會都咁合適。全男班o既廚師們及服務生,不論職位高底,態度同樣親民和藹。雖然我地大伙兒遲遲未點菜,佢地都完全冇催促過,仲會自動添水,好有耐性,亦非常細心。主理我地張枱嗰位Eric哥哥除咗不時為我地替換餐具之外,佢對餐廳o既菜式及所選用o既各種食材簡直係瞭如指掌;我地向佢提問o既問題,佢都可以熟識地續一解答,XO仔真係佩服得五體投地!壽星仔好民主架,見大家都想試多幾款唔同食物,就決定乜都叫啲黎分,有提議只需發
Papi凱撒沙律($88):「Caesar Salad好新鮮,啲lettuce好爽脆,quite nice。」 軟心意大利蛋菠菜松子仁沙律($98):沙律外形唔係好吸引,大家都唔知點樣入手去分, Eric哥哥見狀即自薦為我地撈攪。契妹食後感想為「平時好少有咁o既配搭,口味獨特,菠菜好新鮮。意大利蛋個蛋黃味道香濃,比本地蛋美味得多。」 薄切日本油甘魚($148):油甘魚薄切質感有少少好似熟咗咁,即使油份足,肉質卻唔夠嫩滑,表妹話此乃用檸檬「拿」過後所致 ,建議師傅加檸檬汁時輕手少少,或可改用松露油,效果應更香嫩。 意大利火腿Gorgonzola芝士蛋卷($68):蛋卷芝士味濃,入口先知原來係涷食o既 ,大家對此抱有不同意見,正負都有,個人就唔係好習慣囉。 翡冷翠燴牛肚($98):飲茶成日都會食牛肚,喺西餐廳食都係第一次,真係唔知意大利人都識食 。牛肚勁爽,用茄醬香草煮製聽落雖然有啲怪怪,但味道其實好似食緊肉醬意粉咁,甜多過酸,幾得意。 炸意大利Mozzarella芝士($88):炸芝士為契妹所點選:「其外層同平時啲mozzarella sticks好唔同,配上橙醬好奇怪囉。」 香煎北海道帶子($128):個人覺得帶子過熟,嚡咗少少,而伴碟細細粒o既實心意粉就較韌。 扒原隻魷魚($118):小肥平時好少食魷魚,因為怕韌同腥。Papi依條燒魷魚不但爽脆非常,而且一啲都唔腥,微辣o既調味醒胃野味,送酒一流 ! 黑松露醬薄餅($208):黑松露醬薄餅一上枱,女士們都嫌其芝士味勁得滯,唔係好敢試,Eric哥哥解釋,薄餅所選用o既芝士有三,分別為mozzarella、gorgonzola及parmesan,當中gorgonzola味道同blue cheese頗為接近,應該就係令女士們反感之元兇。細佬對濃味芝士絕不抗拒,聞到o既亦只有香濃o既松露味,心中當然係暗暗自喜啦,可以食埋佢地嗰分嘛 。黑松露醬薄餅夠薄夠脆,芝士三重奏雖然強勁,但並無奪走黑松露o既味道,而且一啲都唔溜,四者非常協調,必吃推介也! 巴馬火腿火箭菜薄餅($188):S友人同XO仔一樣都好欣賞Papi個黑松露醬薄餅,但就略嫌薄餅冇肉,所以就較為鍾意食有肉o既巴馬火腿火箭菜薄餅。 鮮海膽扁意粉($208):師傅選用咗linguine煮製海膽意粉,麵條煙韌彈牙,味道香濃,雖則醬汁唔夠滑溜,但仍不失美味。個人最愛食天使麵,純粹喜好問題,如果食客可選擇用天使麵煮製海膽意粉咁就perfect啦! 辣蕃茄醬手造粗麵($118):手造粗麵又長又粗,外層好滑,煙煙韌韌,配上微辣o既蕃茄醬幾醒神。 話明係契妹個哥哥生日wor,當然係有蛋糕食啦!蛋糕購自附近一家餅舖,Papi不但冇收切餅費,兩位師傅仲同Eric哥哥夾好為我地扭出驚喜 !師傅用心地扭出金黃色o既糖絲為蛋糕裝飾,哥哥仔們更一同高歌生日曲調,幫忙拍照,萬分感激 ! Papi灣仔分店位於QRE Plaza,交通四通八達,駕車人士更可享用合和中心之免費泊車優惠。餐廳並無花巧o既裝修,簡潔舒適。食材高質,菜式配搭有心思, 廚師又有創意,最緊要係價廉物美,男女老幼都啱食。清一色o既男服務生親切友善,誠懇有禮,為當晚生日飯局增添歡樂,賓客們都盡興而回 !
張貼