更多
2014-10-08
7220 瀏覽
有時一大班人同枱食飯，要食得開心愉快，又或夠盡慶，唔單止嘢食好，仲要睇吓喺咩飯腳。同班死佬朋友，天南地北乜都講；同班食友，就交換吓飲食情報，以及研究吓菜式、味道；同班親友，彼此關心，寒暄問暖；唯一最怕，就代公司出席友好晚宴，同枱個個三唔識七，唔知有咩好講。今晚，可以食得逍遙自在，皆因一枱都喺相熟朋友 ！深宵食堂位處銅鑼灣商廈，一出電梯就見，以「食堂」為名，總有種小店嘅感覺。果然，鋪內唔大，大概廿多個座位左右，既橫又直嘅條木作為牆身木板，配深啡皮梳化，有份暖和而樸實嘅味道 。餐廳一角牆上嘅書架，放置一列安倍夜郎創作嘅日本漫畫「深夜食堂」，大抵你明白點解店主會將店名改為深宵食堂吧。睇嚟店主喺個喜歡日本漫畫之人，因為除深夜食堂，仲發現有其他漫畫。細看餐牌，食物大致分為主食、燒物、炸物、一品料理、蔬菜、小食及另一張點菜紙嘅甜點及飲品等。牆上掛有一小塊黑板，寫住好幾款深宵推介。先分享一下小食類，因為都喺一啲細細份，或者用作開開胃嘅前菜。 辣味花螺 $58 螺肉頗為爽口，味道鮮辣，辣得嚟唔會太嗆，食起嚟幾醒神。 芥茉八爪魚 $48 雖則混入芥茉，但辣度中等，唔會太攻鼻，而八爪魚幾鮮爽
深宵食堂位處銅鑼灣商廈，一出電梯就見，以「食堂」為名，總有種小店嘅感覺。果然，鋪內唔大，大概廿多個座位左右，既橫又直嘅條木作為牆身木板，配深啡皮梳化，有份暖和而樸實嘅味道 。
餐廳一角牆上嘅書架，放置一列安倍夜郎創作嘅日本漫畫「深夜食堂」，大抵你明白點解店主會將店名改為深宵食堂吧。睇嚟店主喺個喜歡日本漫畫之人，因為除深夜食堂，仲發現有其他漫畫。
細看餐牌，食物大致分為主食、燒物、炸物、一品料理、蔬菜、小食及另一張點菜紙嘅甜點及飲品等。牆上掛有一小塊黑板，寫住好幾款深宵推介。
先分享一下小食類，因為都喺一啲細細份，或者用作開開胃嘅前菜。辣味花螺 $58
螺肉頗為爽口，味道鮮辣，辣得嚟唔會太嗆，食起嚟幾醒神。
芥茉八爪魚 $48 雖則混入芥茉，但辣度中等，唔會太攻鼻，而八爪魚幾鮮爽，口感帶煙韌。
蟹肉沙律 $48沙律菜、車厘茄、少許蟹肉、胡麻汁，幾典型嘅西日菜式。原來仲加咗黑醋汁，更酸香醒胃，為之後一串接一串嘅燒物作個清新開始。
胡麻蕃茄 $48 唔使多講，好多串燒店都以此道菜式作為冷盤前菜，鮮紅清甜嘅蕃茄配濃郁胡麻汁，簡單好味。
跟住想介紹燒物，上菜次序當然唔會逐個類別上啦，不過，等大家易於理解，所以，就想每個類別歸納一齊，再逐樣分享。黑豚露筍卷 $28
聽店長介紹，佢哋好都食材都喺晌附近街市入貨，務求揀手新鮮。就好似露筍，就喺晌附近買嘅街市貨，眼前嘅黑豚露筍卷喺4客嘅份量，露筍質感纖細，爽脆無渣，黑豚肉既薄又富油香。
雞泡魚干 $78質感好似食啲肉乾咁，軟軟哋身，又燒得有少少焦香，都頗惹味。
一口牛 $68 / 兩串 一口牛應該取自牛柳位置，咬落軟腍，又香又夠肉味，$68有兩串，其實都幾抵食。
汁燒白鱔 $78 / 串 個人覺得喺必食推介，因為白鱔燒得皮脆，鱔肉爽口彈牙，油潤又有點點蜜糖香。
煙肉荔枝卷 $32 / 串 另一個推介喺依款煙肉荔枝卷，煙肉一向被人覺得好肥好膩，但夾埋荔枝肉，一啲無油膩感，食落多咗份清甜。
講完啲串燒肉類，又講講串燒菜類，前後分別試咗兩款：茄子及秋葵。川式茄子 $68
一大條茄子開邊燒，賣相好有霸氣。茄子加咗唔少蒜粒、孜然粉，所以香氣四溢，而且，燒得恰到好處，唔會「乾爭爭」，唯一少少美中不足喺有輕微過鹹啫。
燒秋葵 $22 / 4條極之簡單嘅鹽燒做法，燒完下鹽再加啲木魚碎就完喇。秋葵屬好有益嘅蔬菜，口感帶黏黏潺潺，所以，未必人人喜歡。
日式一口雞 $42 好幾款燒物都做得唔錯，炸物又如何呢？日式一口雞，雞肉嘅大細做到一啖一粒，方便入口，外皮酥香甘脆，雞肉嫩滑度亦唔差，個人喜歡唧啲檸汁嚟提味多過沾沙律醬。
餐牌上有好幾款一品料理，算當喺燒物、炸物以外嘅類別。芝士蟹肉玉子燒 $62
未見過咁大嚿玉子燒，加埋以蕃茄醬唧成個「深」字，感覺好可愛。最估唔到，件玉子燒做到咁大嚿都仲幾柔滑，內裡喺流心芝士，不過，蟹肉似乎下得唔多。
臨講啲飽肚嘅飯麵主食之前，想分享一下佢哋嘅「深宵推介」，主要喺一啲較特別嘅菜式，或較時令嘅食材所做，一般供應都不定時。磯煮鮑魚 $98 / 隻
睇賣相已經相當吸引，鮑魚擺得精美，最窩心喺鮑魚已經切成小粒，方便食用。雖然師傅話主要食個汁，但啲鮑魚柔韌有嚼勁，細嚼下慢慢滲出鮑魚本味；此外，伴碟嘅蘿蔔醃煮過，軟腍清甜，同樣精彩。
燒北極深海鱸魚 $198 / 件 深海鱸魚厚切扒燒，燒得金黃好睇，而肉質細滑，魚油豐腴，入口甘香鮮甜，甚有質素。因為喺野生貨式，所以著實唔平，而來貨又唔穩定，師傅話試賣一、兩水，睇吓食客反應先再考慮入唔入貨，所以，今晚遇到都實屬走運。但始終價格頗貴，或許會影響銷情。
鵝肝什菌石窩飯 $108 食串燒志在過口癮，一般都較難食到飽，所以頂肚嘅飯麵喺時候出場。先嚟個石窩飯，一大片鵝肝，加埋什菌，睇樣已經叫人流口水，食依個飯要將鵝肝壓碎，跟其他食材與飯粒撈勻。入口不單飯粒分明，而且，油潤甘香，非常惹味，又喺小弟心水之選。
貓飯 $26見個名好有趣就好想知佢底世，原來喺白飯加木魚碎，事後被告知原來喺漫畫深夜食堂裡出現過嘅一個菜式。
習慣性，以甜點作為一餐嘅完結，雖然唔喺必然，但唔食又總喺有少少若有所失嘅感覺，哈哈！甜蜜蜜 $48
甜蜜蜜真喺用上兩個「蜜」：蜜糖及麥芽糖，配以冰凍蜜瓜，不過，麥芽糖凝固咗，好影響個口感，補充多句，相中依個喺兩份嚟，咪以為$48有咁大碟呀！
冰燒菠蘿 $48 / 兩串 串燒生果中，燒菠蘿真喺開正我嗰瓣，菠蘿燒過之後，甜味更濃縮，加上新鮮菠蘿嘅清甜，少許蜜糖嘅蜜香，真喺次次食都覺得好味。
朱古力燒蕉 $38原條香蕉開邊略燒，之後再雪，再搽上朱古力漿做成脆皮，但感覺未達效果，況且，$38食一隻「燒蕉」應該點計都唔多划算。
晚上嚟散叫消費真喺幾高，所以，如果晌附近返工嘅朋友不妨考慮吓午市嚟食個晏仔，午餐定食都只不過$52-$66，已奉送前菜、味噌湯及飲品；而且，午市竟然都有供應鵝肝什菌石窩飯（非定食），仲只賣$88添 。
正如文初所講，跟相熟朋友食一餐，談天又說地，輕鬆自在，當然，想嚟依個小「食堂」就唔使「深宵」先嚟，不過，越夜越人多。
張貼
