橋底辣蟹 (雅閣大廈) (已結業)

我想黎試橋底辣蟹好耐架喇，依間老店咁多人讚，好奇心作怪啦 ﹗就試下您有幾好食 ﹗水晶妹妹將近返英國，而佢又就快生日，就搵個藉口食餐勁既 ﹗哈哈 ﹗研究下個 menu 先，橋底辣蟹個價都幾那利噃 ﹗蟹分大中細 size，最平都差不多五百蚊，最貴千幾蚊囉 ﹗辣蟹專門店居然配燒味，都幾搞笑，有點格格不入，可能為左迎合國內人仕啦 ﹗左望右望，發現有過半場食客大都係操國語，就算聽唔到，都有樣睇啦。紅燒蟹肉翅，最愛食翅，正呀 ﹗話知佢環保唔環保，飲食男女食左先講 ﹗熱騰騰湯底濃郁，厚薄得宜，雞湯夾雜蟹肉鮮味，清香甜美，仲食都一粒粒既蟹肉，連醋都可以慳返，好好味架呢 ﹗豉椒炒蜆，比想像中好食百倍喎 ﹗即叫即做，生炒無過火，蜆肉依然保持肥美飽滿 ﹗味道清甜肉質彈牙，豉椒帶微辣，惹味得黎唔會太濃太嗆，滿意滿意 ﹗最討厭有部份食肆會預先炒定，熟到咬落似橡膠 ﹗又最怕啲食店將蜆一早烚好晒或煮蜆飛過水，搞到無晒味道。有 order 就埋個芡炒兩炒就出貨，太過份喇 ﹗食落半點蜆味都沒有，都唔知食緊咩肉。辣酒煮東風螺，咁細粒既？似花螺多啲。食落辣度屬中辣，浸得入味軟棉 ﹗越食越辣，越食越刺激，越食越想食，正呀 ﹗