更多
2014-05-09
3670 瀏覽
今日一家大細突然興起想出外食蒲飛，本來想去大角咀某酒店的自助晚餐，點知該處臨時問話爆咗冇位，立即上網摷料，終於搵到小飛象葡國餐廳原來依家有半自助，個接電話的男仕"好老實"咁話今日（星期日）天氣唔多好，仲有位可以訂咁咁咁，好熱情的感覺，於是訂咗七點開餐。（"好老實"係佢自己講的 ）門口個水牌寫話佢新張冇耐，咁又好似係，因為我記得好耐以前去兆萬小飛象係要撳電梯上，依家只要沿手扶電梯上到三樓，一個U Turn就見到。我哋一家三口搵埋我老友一行四人喺1900前去到，即刻可以入座。一坐低我就問佢啲任食出得快唔快，個女侍話：好快咖放心啦！（都果然幾快，可能唔爆檯有關吧？）其實佢係有散叫，咁當然試下佢個半自助係咩料先，至於呢個半自助原來係點玩法呢？佢個半自助餐限時90分鐘，有所謂任食鵝肝生蠔，另外包一個主菜，因為費事涉及商業機密，所以唔影佢餐牌，主菜係有共十一款，其中有：燒乳豬炒飯，燒葡式豬手，煎龍脷魚柳，燒肉眼扒，燒羊架，葡國雞，辣非洲雞....等等，而你的單價就視乎你叫咩主菜而定，例如你叫豬手，咁你單價就係$188+10%，如你叫雞（兩款一樣價），咁你埋單單價就係$158+10%，如此類推
門口個水牌寫話佢新張冇耐，咁又好似係，因為我記得好耐以前去兆萬小飛象係要撳電梯上，依家只要沿手扶電梯上到三樓，一個U Turn就見到。
我哋一家三口搵埋我老友一行四人喺1900前去到，即刻可以入座。
一坐低我就問佢啲任食出得快唔快，個女侍話：好快咖放心啦！（都果然幾快，可能唔爆檯有關吧？）
其實佢係有散叫，咁當然試下佢個半自助係咩料先，至於呢個半自助原來係點玩法呢？
佢個半自助餐限時90分鐘，有所謂任食鵝肝生蠔，另外包一個主菜，因為費事涉及商業機密，所以唔影佢餐牌，主菜係有共十一款，其中有：燒乳豬炒飯，燒葡式豬手，煎龍脷魚柳，燒肉眼扒，燒羊架，葡國雞，辣非洲雞....等等，而你的單價就視乎你叫咩主菜而定，例如你叫豬手，咁你單價就係$188+10%，如你叫雞（兩款一樣價），咁你埋單單價就係$158+10%，如此類推。
至於個鵝肝生蠔任食，實情係同之前有人講的類同，即係一檯人只可叫一種任食，咁到時就共識要揀定全體任食生蠔，抑或全體任食鵝肝，如果想雙拼其實亦可以，但就冇得任食，變咗每人只有六件的限額，例如我哋四個人，即係總共可以任意叫24件，冇咗任食。
老實講其實任食都食唔到幾多件，因為個主菜都咁大份，況且個我估係經理的＂好老實＂男仕話齋，佢哋想啲客人樣樣都試吓佢哋的食物，唔好全攻一兩味，咁我覺得又係道理，所以我哋都揀咗雙拼。
生蠔比較瘦，唔係好大隻，但都算鮮，應該係即開的。
個鵝肝就唔算肥，少少乾，叫做不過不失。
自助部份有兩個湯：菌類白湯，及龍蝦湯。
個人覺得個龍蝦湯好味，龍蝦頭精華出哂，但其他人就覺得個龍蝦湯偏淡，反而個菌湯好啲，各有各口味。
仲有壽司盤同埋沙律吧，及有類似天婦羅的炸物，好似仲有個飯定意粉，及生果。
三文魚要落柯打，每次每人叫四件，四人合共十二件，食完再叫，因為佢用冰鎮關係，唔夠碗用吧？（一笑）
另外有張紙仔可以剔幾款任食的食品，似係即叫即製，個芝士燒帶子我覺得係最好，芝味濃，帶子唔會靭；
芝麻雞全翼少少乾，但都幾入味；
個好似叫海鮮酥盒的乒乓球大小的小東西，一啖一個，出奇地好味！
至於個燒秋刀魚就燒得太乾啦，兩條擺喺碟上好似兩把＂尚方寶劍＂咁挺直硬淨，難以入口。
炸馬介休球整得唔會好肥漏也唔太鹹，OK！
講到主菜，四人分別叫咗一隻豬手，乳豬炒飯，非洲雞，龍脷柳。
龍脷柳開一邊，都好大條，有十吋左右咁長，但偏乾，口感一般；
隻燒豬手真係大件！塊皮Lok lok脆，帶點脂肪的肉也唔會好漏，值得一試；
乳豬飯個燒乳豬仔就真係冇得頂！皮脆肉嫩，香口到不得之了，跟個炒飯都好大兜，也好香口惹味；
至於個非洲雞..........
先講吓我坐個位比較昏暗，個女待一嚟放低只講：＂雞嚟了＂，我見幾件雞一些配菜及大量汁的焗兜在面前放下，就奇怪點解非洲雞乜唔係深色啲咩？點解個汁咁淺色？黃黃白白咁，覺得葡式的非洲雞的確有點令我失望而唔係好想食，於是決定先繼續攻其它食物，諗住轉頭再慢慢處理，點知過咗差唔多廿幾卅分鐘，到我終於拿起支叉撩咗一吓個底睇吓個＂非洲雞＂有咩配菜，扁咀究竟食唔食好的時候，突然有個女侍走埋嚟問我哋隻非洲雞嚟咗未，吓？乜我面前呢兜唔係.....咩？佢話係葡國雞！原來係上錯檯.........上錯檯成半粒鐘先知？
咁我又＂好老實＂話我用叉撩過，我驚一陣撩過佢又攞返入去，轉頭俾咗第二檯客咪食我口水尾？橫豎價錢一樣就唔換啦。而事實上個葡雞我唔係好識欣賞，因為我本身真係唔係好鐘意，所以最後剩咗要攞盒拎走，味道如何我也不便評價。
甜品我唔知係咩（據聞係雪糕），因為食得太急，臨走竟然忘記了；
然而我好在意我至愛的西瓜，其實我見就只有蜜瓜及西瓜，每次出都唔係好大量，點知有兩檯客次次一砌好攞上檯佢哋就衝出去搶，攞親就一大半，排到我攞時只剩兩三塊冇乜肉的西瓜皮。
西瓜都要搶，真係唔明白。
夠鐘前半小時就會有人嚟問仲有冇任食部份要落單，所以想食多啲就要注意一下；
而主菜部份就唔限你食的時間，你可以坐到食完先走都冇問題。個女侍講的。
題外話/補充資料：
我個人嚟講呢，真係好唔鐘意喺旺區食限時個零兩鐘要走人的放題及自助餐，試過APM食燒牛的餐廳，可能人太多，啲嘢上得慢，最後挖雪糕個個好似掘礦咁，搞到要排隊等成廿幾分鐘，終於到我掘完埋到位都未開始食，一個小姐就埋嚟話要交檯，另一個小姐一邊抹檯並預備舖新墊檯紙，原來呢次已經係摧第二次（第一次係我正在排雪糕時），我見我太太同個仔已經整裝待發，咁我唯有拿林一啖含哂個雪糕球，一路執嘢走個冰感一路尺到上太陽穴，成個感覺真係好憎好憎。
不過小飛象佢就咁，除咗自助部份係要限時90分鐘，要快快落柯打，其實個主菜係可以慢慢食，慢慢坐唔會趕人走，咁我覺得都可以，只係好笑在，我哋唔知係咪慣咗其它放題咁嘭嘭聲食完，潛意識就諗住快快交檯個模式，所以最後都冇話坐好耐就已經走了，都唔記得咗食飯後甜品。
仲有一樣一定要講，佢話個半自助餐係冇得攞走的，咁食開自助餐的呢個基本都明，如果唔係因為上文所述的俾錯咗個葡雞俾我，係唔可以俾人攞嘢走，話今次係因為佢哋搞錯咗先破例。
咁其實個主菜唔屬於自助餐的食物，咁食唔哂點解唔俾攞走？好似我個仔六歲人仔都要當大人咁叫一個餐，成隻豬手咁大點搞呢？如果話驚包嘢時會俾人偷偷哋包埋啲自助食物，咁佢哋職員攞去包冇問題啩？或者我本身係咁矛盾，鐘意自助餐放題，但又怕喺自己身上出現冇衣食剩咗浪費的情況，所以對此做法係有少許意見。
(以上食評乃用戶個人意見 , 並不代表OpenRice之觀點。)
張貼