翔龍拉麵小籠包 (已結業)

環境很唔錯既翔龍係我朋友比左幾間選擇我嘅其中一間，因為未試過，都想試下，住係呢頭嘅我，好求其著到好似攀山咁嘅裝束，就咁就行左入去，真係有D唔好意思，環境裝修都唔錯，都幾有心思。好彩進場時己經差不多九點幾，人唔係好多，有張卡位坐下，侍應放低左個menu，覺得個menu都好靚，都有心機設計過。其實有幾味餸我都好想食，但因為今次試新野，咁都想食下未食過嘅，之前都試過好多黃金乜，黃金物，今次試下個黃金鍋巴，幾特別，之前都未食過，朋友就話食完好包，其實可以當飯食，最尾其實都食唔晒。冷盤有口水雞，本人覺得好食過重口味嘅口水雞，辣得黎好野味，仲唔係好油，另外試左一個之前亦都未食過嘅京燒羊腩，雖然話羊腩，但係一D都唔肥，仲無咩穌味，因為我唔鐘意食有好穌味嘅羊肉。講到小籠包，本來只叫左一籠，但因為好食，所以再叫多左一籠，小籠包做得好精緻，小小一個但夠汁，皮薄但不易夾爛，肉方便夠軟滑，真係feel到用心制作，有水準。到甜品方面，諗住佢咁大間餐廳都會出雷沙湯丸，結果都係無，其實真係唔知香港仲有邊度搵到一間好食嘅雷沙湯丸了。