合興潮州粉面專家 (已結業)

夜晚十點半放工行去大友商場嗰頭搵嘢食，見到呢間舖仲燈光火著於是入去試吓。 樓面得一位阿姐，佢忙於攪手機叫咗三次至過嚟落單。見舖名有潮洲粉麵呢幾隻字所以叫咗蠔仔肉碎米粉($35)、四寶麵 ($32)、加$5要油菜。約幾分鐘後食物到，望一望碗米粉得七、八成滿，夾落湯多米粉少，料唔多蠔仔好細粒肉碎無乜而方魚得兩粒，最多係葱同唐芹，但係毫無芹菜味，湯更加無色無味。 朋友碗四寶麵好似睇落好少少，有兩粒豬肉丸、兩粒貢丸、兩舊魚扎、一粒魚餃，全部都好大舊，但係唔知點解會無魚旦或魚片或墨丸！ 麵都係少而湯都係無味， 魚餃ok，貢丸、肉丸都似外來貨重調味好實，魚扎最差好腥裡面得兩條幼幼嘅發黃西芹，食完啲丸仲好喉乾！ 碟菜$5應該對佢無要求，但就係咁簡單可整到啲芥蘭俾梘水拿到咬落淋晒毫無質感，嘥晒啲食材！ 做食肆食物要用良心經營，否則食客一次無回頭。