八月芳 (已結業)

週末雖然太古坊裡面嘅寫字樓放假，由於近住宅區所以星期六、日無論飲茶、晚飯八月芳都要等位。 星期日落去飲下午茶兩點前去攞籌等約十五分鐘都算快。 下午茶有特價點心紙， 選擇頗多樣樣都想叫。酸菜- 酸菜乾爽唔會太酸同太咸味道剛好，花生烘得香脆， 一啲都唔馬夫。芝麻卷-呢個係懷舊點心，小朋友時候最愛， 黑芝麻好香濃仲食到芝麻碎。章魚肉餅飯-煲仔上唔見飯焦似係原煲蒸， 肉餅有好多章魚粒夠鬆軟，份量唔少。炸雲呑-一碟有四隻皮薄餡靚，每隻雲呑老有大大粒鮮蝦，配埋甜酸醬食。香芋糯米包-傳統糯米包用黃色皮包住糯米飯，裡面有臘味、芋頭粒，好多料。蟲草花雞絲腸-賣相精美，腸粉夠滑餡料特別，加埋調過味豉油，好好味。盤糕-好少一盤上，鐵盤載蒸完放於木盤內，好嫩滑又多蘿蔔絲，原汁原味。煎釀三寶-一客六件放於小鐵鑊內賣相吸引，茄子上有魚肉、豆腐釀有豬肉、青椒釀有蝦肉。焗西米布甸-表面焗到焦黃，有濃郁蛋、奶、糖味，又滑又香甜。環境舒適，食物用心製作。