更多
2013-10-24
1047 瀏覽
首先, 我本身係唔寫開食評既。但係由於琴日嗰餐食完嘅感覺同樓下堆食評出入太大，所以忍唔住都想寫吓。話說早排睇雜誌見到有間過江龍居酒屋嚟香港開舖，主打新潮、抵食。咁話說咁多年來喺香港我真係冇乜食過好食嘅居酒屋，又難得幾個食評都咁非常正面，咁當然要試吓啦。小弟有個習慣，去任何餐廳（除咗茶記）都會睇drink menu先，因為酒牌同標價通常都會好明確反映到一間餐廳嘅定位。一打開個drink menu，已經發現D神奇野 - 綠茶: 50蚊。吓???咩食日本野連茶都唔俾杯人???再望吓隔離枱，哇又真係茶都冇杯架喎，好波! 老老實實嗰50蚊一杯（定係一壺？）茶究竟係咩料我真係冇考究到，各位有興趣嘅人士不妨自己試吓。咁去居酒屋就當然叫啤酒架啦（我麻麻鐘意泡盛）,睇吓有咩啤酒先：有Orion draft, Orion bottle, Kirin bottle, asahi bottle，四款。係四款咁多，當中仲要有三款係bottle, 百佳都有得賣。冇得捒下叫咗Orion draft。同行嘅朋友唔飲酒，幫佢叫咗個唔知咩梳打，68蚊。基本上係LKF mocktail價。果然舖租貴。到到叫野食。我哋比較大
話說早排睇雜誌見到有間過江龍居酒屋嚟香港開舖，主打新潮、抵食。咁話說咁多年來喺香港我真係冇乜食過好食嘅居酒屋，又難得幾個食評都咁非常正面，咁當然要試吓啦。
小弟有個習慣，去任何餐廳（除咗茶記）都會睇drink menu先，因為酒牌同標價通常都會好明確反映到一間餐廳嘅定位。一打開個drink menu，已經發現D神奇野 - 綠茶: 50蚊。吓???咩食日本野連茶都唔俾杯人???再望吓隔離枱，哇又真係茶都冇杯架喎，好波! 老老實實嗰50蚊一杯（定係一壺？）茶究竟係咩料我真係冇考究到，各位有興趣嘅人士不妨自己試吓。
咁去居酒屋就當然叫啤酒架啦（我麻麻鐘意泡盛）,睇吓有咩啤酒先：有Orion draft, Orion bottle, Kirin bottle, asahi bottle，四款。係四款咁多，當中仲要有三款係bottle, 百佳都有得賣。冇得捒下叫咗Orion draft。同行嘅朋友唔飲酒，幫佢叫咗個唔知咩梳打，68蚊。基本上係LKF mocktail價。果然舖租貴。
到到叫野食。我哋比較大食，前後叫咗8樣嘢，遂樣遂樣睇。
第一樣嚟到係個鴨肉烏冬。成碟野最好食係D鴨。因為佢唔係煙鴨胸嚟，而係有D似燒鴨嘅新鮮(or 冰鮮）鴨，可惜得四片。兩片攤咗喺度，兩片浮喺Ｄ汁度（呢度冇影到）。隻蛋係普通嘅糖心蛋，冇咩特別。個烏冬汁係普通嘅醬油，同樣冇驚喜。個烏冬本身，係好夠凍，甚至有D凍得濡，但係唔知點解有少少糊糊哋，完全唔爽口，唔得。整體嚟講唔算好食。
第二樣係雜綿壽司。差唔多三舊水嘅十件壽司，竟然有兩件三文魚。整體同連鎖壽司店冇分別。我認我嚟居酒屋叫壽司係我笨，我下次絕對唔會再叫。
跟著係燒牛舌。幾好食。不過話說回來牛舌都幾難可以整到難食。
炭火燒拼盤。全晚最好食同最抵食果樣。當中有軟骨嘅雞肉唔錯。雞翼反而麻麻。食完以上幾樣野，基本上係半飽都未到嘅。咁就繼續叫多兩樣啦。
燒帆立貝。同佢menu張相相比，實物只有三吋半大（連殼）。重點係佢下面係著火既。哇好靚靚。味道呢？大細隻未食到味已經吞咗。跟住到今晚最後一樣咸嘅野食。
燒薯仔配八爪魚。我開頭以為上面嗰D係芝士，或者係一D類似hollandaise嘅汁。但原來係沙律醬嚟。好彩都仲係日本美乃滋，如果唔係嘅話佢只係一個燒過吓嘅茶記薯仔沙律。至於D八爪魚，原來只係點綴用途，同飯團裏面果粒酸梅差唔多。圖中喺個薯仔中間紅色果一點就係八爪魚喇，係得咁多架渣。基本上除非你係美乃滋狂人或者係茶記薯仔沙律嘅超級fans，否則呢碟野都幾難食。食到呢個位，都幾乎放棄咗再叫主菜，因為都幾伏。直接叫甜品算。
雞蛋布甸，即係焦糖布丁。同行友人係咁話好食，但我覺得焦糖同雞蛋味唔夠。反而好重奶味（定係牛油味）。但以全晚嘅野食嚟講佢係算好好食。
蒸紅豆餅－基本上係個好食D嘅茶果。個皮好Q，紅豆都算好食。賣相相當唔錯。呢度D甜品出奇地份量同水準都相當唔錯。夾埋食咗八樣野同兩杯野飲，埋單一千零幾蚊，唔算話好貴，但絕對唔抵。同埋作為一間過江龍居酒屋，我完全食唔出佢同同區其他local舖有咩分別。無論係用料定煮法，都只係local水準，完全唔值個premium。
另外，我覺得成間舖最差嘅地方係酒水嘅服務。我都做過餐飲業，知道酒水係最賺錢，想客人叫野飲係好自然嘅事。但即使係純靠酒水揾食嘅酒吧，都會喺個客飲完第一杯野唔再添飲後倒杯水俾人，點解一間主打食物嘅居酒屋會成餐飯連水都冇杯?係咪我嘅消費水平太低連你一杯水都唔值?淨係呢一點已經令人對呢間野感覺好差。
不過我都唔會再嚟架喇。
張貼
