威軒酒家 (已結業)

今日要去醫院探公公，所以係小巴站附近搵野食，平時LUNCH都有落黎食，今日就試試飲早茶。酒樓係商業大廈入面，我諗除左返工都好少人會特登黎飲茶，所以唔駛等位仲好多枱任揀唔嬲。炸雲吞一向係我既最愛，加左芝士又會係點呢？結果係有啲怪，佢係蝦中間加左芝士，但係太咸，同埋唔襯點雲吞既甜酸醬。通常酒樓既炸雲吞都係炸定放係度，但佢應該係即叫即炸，非常炙口。新鮮值得一讚，所以芝士係半溶狀態。蝦餃係一般貨色，淨係蝦肉，無豬肉，不過蝦夠大隻同幾爽口。鳯爪通常都唔會差得去邊，但我覺得佢呢度甜左啲。蒜容蒸鮮魷值得一讚，通常都係見到蒜容但食唔到味，但佢呢度D鮮魷煮到好入味。但切得太大舊同太厚，如果細舊啲會更加易食。呢個係我最鍾意食既菜，仲有個蜜糖雞翼都好正，但今日得2個人食唔哂2款雞翼，所以淨係叫左呢個。佢係用左類似避風塘既煮法，將雞翼開邊，非常惹味，用配料黎送飯一絶。不過呢個雞翼每次既辣度都唔同，有時唔辣，有時又辣到要不停飲水。如果可以保持一貫辣度會好一點。小籠包都算皮薄，唯獨頂太厚，成舊麵粉。汁都算多，但係完全無鮮味，好似飲緊油咁，豬肉都唔夠爽口，不算好吃。