丸亀製麵 (已結業)

首次接觸丸龜製麵，是在The One的總店，當時是一位朋友介紹，話呢間野好玩又好食。印象中那時沒幾多客人，仲擔心唔知頂唔頂得住。轉瞬間，這品牌已在荃灣廣場 (以前四海游龍的位置)開分店，已經是第三間了，真係唔講得笑。大概係新屎坑既關係，荃灣店人山人海，見到排隊買野食既人龍，有點嚇了一跳，怎麼可以跟尖沙咀店有咁大的對比呢?或者再講多次遊戲規則，就是先排隊去選烏冬 (有冷有熱有跟溫泉蛋)，再走過天婦羅那邊自已「夾」心水炸物，最後到收銀處付款，之後返埋位食，就係咁簡單。至於天婦羅醬油、蔥花以及白開水等，也是整整齊齊的放好，大家悉隨尊便。這個近乎全自助的做法，一方面慳人手，大家又覺得好玩 (尤其是青年人)，絕對是雙贏。好啦！究竟我買了什麼回來吃呢? 答案是：海老天婦羅、茄子天婦羅以及炸半熟蛋，配以冷烏冬。烏冬仍然是爽滑又有咬口；茄子天婦羅粉漿不太厚，外鬆脆內軟腍，但最大問題是凍冰冰；海老天婦羅亦然，雖然屬外脆內爽口，不過就是預期中的冰凍和沒味道；流心炸蛋，我依然不懂欣賞。總的說，我喜歡這裡的烏冬多於天婦羅。另外，像我這份食物，盛惠五十八個大洋，價錢雖不算十分經濟，但間中來吃一餐，未嚐不可。