和味菜館 (已結業)

又是冷得要命的星期六，理所當然又係吹雞去打邊爐，友人提議幾年沒到的和味菜館﹗晚上八點，一行八人，幸好有朋友早到取位，唔係要搵個位都難，成條後巷插針都插唔入﹗和味我於幾年前已提交過食評，今次來到，環境仲惡劣過三年前，後巷既迫又人多，咁岩又要坐在傾倒廚餘的竹籮旁，真係睇見都驚﹗但為了其美味的炭爐邊爐，值得忍一忍，呢度既生料的確出色﹗點了醉雞鍋，一隻雞$198，湯底有濃甜的藥材香，雞大隻唔肥亦嫩滑﹗手切牛肉大碟，是雪藏貨切片，牛味濃，有點點韌但好吃﹗這兒的牛肉粒很出色，四成肥六成瘦，灼熟後牛味香濃，那份油脂香叫人難忘，是夜點了三碟﹗有膽既可以試佢地既游水墨魚刺身，$10兩，要了一斤四的，墨魚即劏，上碟時魚鬚還在動，蘸日本芥辣吃，鮮甜美甘濃，一百分﹗如怕吃刺身亦都在鍋中輕灼再吃，也一樣的爽脆鮮味﹗韭菜餃自家製，韭菜偏多夠香﹔蝦滑與墨魚滑都是新鮮打的，彈牙好吃﹔友人點了鴨粉腸及泥鯭，兩樣也新鮮出色﹔四寶丸就普通街市貨，一般﹗是夜藍妹叫完一轉又一轉，懷疑喝了廿多支，街邊吃可開懷大笑，開心盡情﹗埋單一人才$250，抵吃，炭後的後遺症當然係衫褲鞋襪一朕味﹗記住唔好著大褸來，唔係炭味吹九日都未必散﹗