百份百餐廳 (已結業)

同老公屋企人求其食個lunch，就嚟咗呢間。集團式嘅茶餐廳，亦係集團式嘅態度問題。我食咗海南雞飯，好味，雞雖然唔多，但夠滑，亦唔會好雪味，而且我好鍾意個汁，酸酸哋，油飯亦香，唔算太多油。老公話佢個熱狗普通啦。其餘奶奶、家姐叫粉食，味道普通，但價錢真係唔平。原本都算滿意.....但最激氣係佢哋計錯數.....我哋叫咗四個餐，兩杯珍珠奶奶，每杯加五蚊，一個菜蜜，又係加五蚊，其餘熱奶茶唔駛加錢。唔知點解張單計極都唔啱，最初計多十蚊，同個侍應講，個侍應仲話……電腦計嘅，唔會錯喎……攞過張重新計過嘅單嚟，但都仲係多咗五蚊，再叫侍應，侍應又話，無理由喎……電腦計架。咁我就問，唔係電腦錯，咁係咪我錯呢？侍應’睥’咗我一下，好悔氣話’唔係’，然後拎走張單。第三次，原本講果五蚊減咗兩蚊??? 我真係唔明究竟攪乜。終於忍唔住話搵個最大嘅，有個副經理走埋嚟，最後第四次張單終於啱收。可惜，攪咗咁耐，一句對唔住同唔好意思都無……最後，珍珠奶茶嘅珍珠未煮熟，咬唔到，要退回……又要扣十蚊~~所以唔好以為電腦出單唔會錯…….係……電腦當然唔會計錯數，但入單果個’人’會錯嘛~~