華苑印尼餐廳 (已結業)

　上個星期六，對於好似我咁住喺順利邨嘅街坊嚟講，絕對稱得上係黑色星期六。因為順天邨有班修路工人，唔小心掘爛咗地下咸淡水管，慘咯！嗰日一早起身，以為世界末日咁，水又無，又唔可以開熱水爐沖涼，真係想唱番許冠傑嗰支《制水歌》：「又制水的確無樂趣......」　制水啲鋪頭一定唔開㗎啦，唯有同老媽子搭車出觀塘食嘢，不過去到觀塘都唔知食乜，最後都係去番華苑食嘢，因為佢地免收加一，食嘢飲嘢都係同飲餐茶差唔多啫。　去華苑一定要幫襯粟米餅，因為佢哋啲粟米餅係唔同其他印尼餐廳嘅，係傳統一塊塊布滿粟米嘅煎餅，嗰日雖然有少少喉嚨痛，但美食當前，冇辦法吧啦。　我亦好欣賞佢哋啲印尼炒飯同沙爹，卅幾蚊有番咁上下大碟，正一係大件夾抵食也。飲多杯珍多冰，都係盛惠一百蚊鬆啲，就算同埋一大班「鬆啲」（國語音「兄弟」）去幫襯，相信都唔超過二百五蚊。　最美中不足嘅地方係細，嗰日都不知鬼咁多人去幫襯，爆晒棚不特止，仲企滿晒喺出面等添。希望老細可以襯觀塘區重建，搵過一個更大嘅地方，大展鴻圖，我一定會繼續支持佢哋㗎！