The Petit Café (金鐘)

難以想像佢地可以將呢2杯latte 交到客人手上。一個有自覺嘅咖啡師有咩可能有面目將呢2杯咖啡交畀客人！？ 呢度係金鐘PP，而佢會好意思叫呢2杯嘢做latte。

The petit cafe 以前沖嘅咖啡係有品質有保證，員工有質素餐廳有管理。依杯咖啡除左似一pat 加左咖啡味嘅淡水，完全同咖啡扯唔上關係。以為counter 做嘢嘅人只係由外國人轉左做香港人，但似乎連靈魂都轉售埋。

除左隻花花紙杯，呢度無嘢值得留戀。

ChumChum味 (尖沙咀)

變哂喇。

如果你以前去開呢間餐廳，係因為佢份量夠味道好，全店內外工作嘅都係韓國人而嚟嘅話，或者你之後要重新考慮吓先好去喇。

昨晚去到店內無咩人，平時明明唔book位得bar 檯坐，昨晚講緊一行五人walk-in都可以畀張八人檯你你就知，佢地無咩客。

店內外連水吧廚房都轉哂少數族裔朋友嚟服務你，雖然餐牌同價錢不變，但食物味道、質感、賣相全部變哂。明明叫番之前食過三次都覺得好食嘅牛肉Gimbap，今次碟嘢嚟到可以用「鬆散無味堆埋一碟」嚟形容。前菜亦由六碟變四碟，而且其中一碟係沙津醬溝三色豆啲friend，我見到嗰刻都呆一呆。

總之一句，如果你以前去過想再去嘅話，當新餐廳咁去好喇，你唔會再聽到啲待應用韓文溝通，成間餐廳只有電視播住嘅韓文MV先似韓國嘢。

Waalah (銅鑼灣)

Very comfy cafe, feel like a bar but it's more than what u can see from outside after. It's chill but warm and friendly. Very nice food with reasonable price, interesting menu and u can feel that they make it with their total heart. Highly recommend.

小王牛肉麵 (鑽石山)

原本一心嚟呢個商場係想試佢隔離間抹茶主題餐廳，但去到之後佢竟然唔做生意，之但係我又好肚餓喇，於是就試試呢間標明「台灣雙料冠軍牛肉麵」喇，果真一試便知龍與鳳，早知睇完食評先點菜啦……

坐低睇睇MENU，睇落每樣嘢都好似好好食，非常之滿心歡喜，而且啲相影得好靚，我都知「相片只供參考」，但係到啲食物一嚟，先發現啲相片不但同實物相差極遠，甚至我個人認為佢唔應該擺相出嚟誤導食客。

先嚟一個香辣牛肚粉皮($28)，睇相好靚仔，嚟到啲牛肚條少到……我以為有人食完先畀我，攪一攪先發現，其實佢只係放咗啲辣油落去就算，放入口除咗辣味同埋好油之外，就咩味都無，食到後尾我發覺，不如自己開樽辣椒油出嚟仲好食過佢，仲要係好難得先食到一條牛肚條，仲要係用「條」嚟形容，少到呢……之後係招牌「半筋半腩麵」($52) ，整體味道尚可，喜歡「藥材」味嘅朋友可能會特別喜歡。啲筋非常非常之軟淋淋，好勉強先夾得起，不過就無咩特別嘅味道；而啲腩亦非常非常之淋，淋到完全唔似肉，亦無咩特別味，口感有啲奇怪。成碗都就係得２條筋、２條肉，抵唔抵食見仁見智。唯一可取係佢嘅黑糖Latte ($18)，黑糖味出奇地濃厚，非常抵讚。

最後一樣要提提，喺同一碗麵入面竟然浮住2條好長嘅眉毛，我唯有當佢係牛腩毛，無洗乾淨……不過都無理由有咁多架？！佢應該改名做「台灣雙毛冠軍牛肉麵」　=_="
 
 

佢哋收錢嘅地方，同時係員工打卡、廚房出菜位、水吧出菜位同埋廚房落單位，真係迫到呢……大家一齊迫喺一個只得２呎幾嘅地方，但係佢間舖好大，好多空位，我真係唔明點解咁都得！

caffè HABITŪ the table (九龍塘)

上回講到我無啦啦去咗The One嘅Habitu分店，點咗兩杯「頂級」自我分離咖啡之後，都諗住我呢一世人應該都唔會再去呢度食飯飲咖啡，點知最近有朋友邀我去又一城食飯，好揀唔揀就揀咗Habitu，結果……好滿意~~ 今次我要讚讚又一城呢間分店，員工好有禮貌，動作勤快，面對橫衝直撞嘅內地遊客仍然保持專業態度，以禮待人，非常抵讚；而食物亦令我大感驚喜。先講吓我最愛嘅咖啡。今次點咗杯Caramel Latte，咖啡面有一層燒得脆脆嘅焦糖，份量剛剛好，咖啡香、濃、滑，而且夠熱，做得非常有水準。本身我除咗係咖啡精一名，更加係Egg Benedict嘅diehard fans，基本上我每去一間餐廳都會先睇menu，睇佢有無提供Egg Benedict，如果有就一定會試。原因好簡單，Egg Benedict其實一啲都唔難整，但就係因為太簡單，所以更能睇出廚師風格用心同埋餐廳質素。好多時好多人見Egg Benedict太易整就會掉以輕心，做出味道只屬普通嘅貨式，而好食嘅Egg Benedict真係可遇不可求。既然呢度都有，我當然要試試。我點嘅係Smoked Salmon Egg Benedict，整體味道不錯，而配菜－potato & salad都同樣出色，Holland sauce 做得唔錯，只可惜Egg Benedict配上生菜係敗北之處，佢哋完全唔夾，生菜味太搶而且太硬身，令整體味道同質感失去平衡，或者改配菠菜會好啲。雖然係咁，我都對今餐非常滿意。做得好！(欲知前篇故事內容，請到The One 分店查過究竟)