位於蘭桂坊號意大利餐廳扒房，環境舒適，坐位之間都幾闊落，傾計都唔會好嘈。Seafood buffet 同dessert table 嘅選擇唔算好多，雖然佢係appetiser，(main course 當然要另外點啦)，但係每樣食物都好高水準，而且食足3個鐘，食物會不斷refill。結果我哋都無點main course，淨係食buffet 已經好滿足🤤！ 呢個buffet全部都係冷盤類，平時食buffet我對於熱食都唔係太大興趣，所以呢個全冷盤我都覺得ok。食物選擇方面，海鮮類有生蠔、龍蝦仔、阿拉斯加蟹腳、蜆、青口。Cold cut 有 Parma ham、salami、煙三文魚，另外仲幾款沙律，生果，甜品。星期日每位$288，原來星期六嚟食係超抵㗎，只係$148🤑！不過buffet就唔包餐飲嘅，我哋飲水咋🙂。亦都可以另外叫free flow 紅白餐酒，每位加$138

今日試鎮江骨飯。 其實由買完到返到公司都只係5分鐘，但係一打開盒飯係凍嘅。 個外賣包裝係用兩個微波爐膠盒即係可以重用嗰種，不過人地買得外賣，就未必方便去洗返個盒啦，真係好唔環保！因為佢個汁係水汪汪咁，所以飯同餸係有需要分開裝。 個鎮江骨完全無鎮江醋嘅味，只係甜酸味，不過又唔係難食嘅，只係同預期有d出入囉。而且d肉係勁痴骨，炆得唔夠耐。 呢個鎮江骨係配菜飯嘅，咁佢個菜飯係ok嘅，d菜都仲係綠色唔會焗到變黃。

下午放假，一個人去咗黃埔翠華食午飯。 食晏時間唔爆場，但係樓面都唔算多。 入去當然無人招呼啦，自己隨便搵個位坐低。 張枱無餐牌嘅，自己起身行過兩張枱拎。 今日食嘅係翠華豬軟骨炒飯，賣相普普通通，味道都唔錯嘅，豬軟骨幾淋有膠質，碎椰菜都幾爽口，小小辣，幾惹味。 對面枱係一行10人扮工室人士食lunch，其中一位哥哥跟餐+$4轉凍西洋菜蜜，但係黎咗杯凍檸茶。佢即刻問個waiter係咪黎錯咗。 Waiter：「呢杯係菜蜜，你試吓先。」 成枱人O晒咀，問：「菜蜜有檸檬？」 Waiter :「有架！你飲吓先講」 事主飲咗啖，証實係100%檸茶。 其實換過杯咪得囉，好小事啫，洗乜死撐？

中環平靚正嘅四川菜，外賣自取仲有九折！
最鍾意佢嘅啤酒鴨，鴨件同一舊舊嘅蒟蒻浸喺麻辣汁，麻得黎唔太辣，撈飯一流。仲配埋涼拌前菜同飲品，自取九折後48蚊！
唔食鴨嘅話，可以試吓魚同牛腩。今日試咗魚塊，炸完再放落辣汁，一樣惹味，唯獨是魚比較多骨，食時要好小心。

食咖喱牛腩飯，識得食梗係食佢個薯仔，薯仔炆得入味嘅話分分鐘好食過牛腩。星期五晚，一個人的晚餐，唯有買個飯盒返屋企，睇住電視食飯。
咦～喂！點解舊薯仔會變咗做番薯架？有冇搞錯！居然冇咗我最期待嘅薯仔，即刻冇晒mood！

香港站間原味家作，平時多數去飲湯，都唔錯嘅。今日自己食飯，諗住些吓佢個肉餅飯啦⋯⋯ 個底全部都係油，肉餅又老又鞋，糙米飯有生米。完全中伏！個飯食到一半都忍唔住要寫遍文先！

今日叫咗個梅子排骨南瓜飯+湯。 熱度夠 行到返公司已經係十分鐘後，食嘅時候依然飯餸同湯依然好熱。 飯比較硬+有生米 無轉菜飯，因為之前試過，同埋d菜黃晒，口感唔好。但係今次個糙米飯真係好硬，除咗糙米之外仲食到有生米 餸無味精（應該係），但係好油 梅子排骨ok林同入味，酸酸地好開胃，南瓜好甜但係比較少。佢個兜有好多可以撈飯，但係上面層油都好誇張吓！要筆走d油先好撈飯！ 蘋果瘦肉湯 平時都鍾意飲佢嘅湯，好甜好濃不過無湯渣嘅。跟餐有細細杯，其實食晒個餐已經好飽，呢個細份量湯係岩岩好。

訂咗位，不過去到都要等15分鐘先有位。店內嘅位比較密，同埋地下有水有D滑。抽風唔夠，所以食完之後成身油煙味。
食物方面，魚好新鮮，完全唔腥，魚肉好滑，湯底好惹味。
我地兩個女仔叫咗一條魚，一碟牛，一個雜菇，食得好飽。
其中有個年紀比較大嘅侍應叔叔，見我朋友唔識中文，佢就主動過黎用英文介紹個魚煲，仲教我地從邊個部位開始食。我朋友食唔到咁辣，個侍應叔叔仲幫我地「筆」起d辣椒同加湯，叫我地食到咁上下先至加返落去，好細心呀！

夜晚8點放學，搭車返到屋企附近，先無啦啦想打邊爐。老公提議去華威，不過康怡呢間譚魚頭開咗咁耐都無試過，就即管試試。我去到康怡廣場係8:50pm, 老公話仲有5分鐘到，叫我攞位先。我上到樓上，唔洗等位，reception帶我入去，裡面只坐咗4成，星期六都咁靜...
我一坐低，開咗壼茶，老公未到，我先揀火鍋料。有個阿姐走埋呢，叫我落咗湯底先，我話未齊人，轉頭先叫，佢話叫我揀咗自己嗰個先！我即時個反應就係問佢幾點打烊，佢話11點。嘩，仲有2個鐘，使唔使咁趕呀？佢繼續話，湯底要等好耐，驚我唔夠時間食，我咪話，我老公未黎，就算我食完先，都要等埋我老公食完至走得架喎！阿姐都仲係嗰句，湯底等得耐呀麻.... 跟住一路講，一路行開。
老公3分鐘後黎到，因為我已經揀好火鍋料，佢只係揀自己個湯底，跟住我地好快就可以落單。我以為要等好耐啦，結果唔使5分鐘，所有野都到齊！（我係咪要讚佢？）

我地叫咗：
海鮮湯底（1人鍋）x2，麻麻地，得一隻蝦，無海鮮味！
美國肥牛，都算新鮮
花枝片，爽滑
冰豆腐，正
四寶丸，魚丸內有好多碎骨，其他都ok
魚皮餃
生根
唐生菜
一楂竹蔗芧根水，唔太甜，ok

茶芥10蚊位，我開咗壼普洱，佢嗰個特式醬料我覺得味道唔錯，酸菜20蚊碟，都幾開胃嘅，不過就貴咗D囉！

一路食，D阿姐淨係過黎收碟，唔叫都唔識得加湯加茶！我地叫嘅碟數唔係多，我都明白佢收D吉碟＂可能＂係想D食客坐得舒服D，但係我地張枱都幾大，D碟根本就阻唔到我地。阿姐埋黎收碟，我都唔知點解碟上嘅水會倒落我身上？阿姐即刻話，哎呀，原來有水㗎？阿姐連紙巾都唔比張我，我老公已經唔多alright, 叫阿姐唔使收，但係阿姐自言自語話收埋先啦。我老公話D菜未食完，問佢係咪趕住收工，阿姐淨係放低D碟，跟住話唔好意思就行開咗！

10:30我地其實差唔多食完，經理過黎埋單，佢又整跌我對筷子.......

唉，呢餐兩個人，食咗$620，食物尚算ok，但成晚D伙計趕住收工，我覺得真係唔抵食！之前去灣仔嗰陣都唔係咁樣，呢間真係冇下次！

蒸餸有6-7款, 湯有3款, 好似仲有拉麵...

我既午餐:
木耳咸旦蒸肉餅 - 味道唔錯... 唔會太"鞋"
海底椰...竹絲雞 (唔太記得) - 煲得好甜 但係淨湯無湯渣...

應該係無味精....

不過份量太少... 個肉餅直徑大約4", 碗飯好似飲宴食翅個碗咁大, 如果堂食個湯係用保溫瓶,約500ml...

我唔大食, 不過真係食完都唔夠飽