南北小廚(西貢)

多年來南北小廚都被公認為最平既酒樓. 當然係下午茶時段
哩日入科大既南北試下.
原來畢業禮期間去食係冇平, 照正價. 咁照道理應該貴好多了.

叫左幾多點心, 但就冇叫炒野. 平時下午茶時段炒野$20都唔駛, 望到個餐牌一碟野要$4x, 真係摺得埋.
腸粉, 蝦腸入面得兩隻蝦. 有點急凍點心既feel. 只係比較滑d
馬拉糕唔夠鬆, 奶皇包個咸太甜, 個包實的的, 兩樣野食落個感覺就心諗"係咪超值牌黎架...".
鳳爪可以啦, 味道都係普通, 都幾多隻, 所以都抵既
鴛鴦燒賣同燒賣完全一樣. 只係鴛鴦有埋乾蒸牛肉. 曾幾何時乾蒸牛肉係自己可以獨掂一籠, 依家要同普通既燒賣搭檔
燒賣食唔到有蝦, d 肉幾爽. 仲有條冬菇絲
有籠唔知叫咩鴛鴦餃, 一籠又係有兩款, 一款係餃, 一款好似糯米包咁, 食左隻餃, 好難食... 已經唔記得入面係咩
叉燒酥, 太多叉燒, 個酥皮唔夠厚. 我還是喜歡酥皮為主既叉燒酥
仲有叫其他普通野, 普通到都不太記得了.

下午茶o個時$8/籠真係好抵, 食到勁飽都要需$20
但係一冇既話就要差唔多$40了. 以佢咁普通既水準, 認真麻麻. 唔係貪平都未必去.

金圓軒(紅磡)

哩日影完相拉大隊黎左都會食晚飯.
揀左哩間. 講真, 活躍於紅磡既3年入面, 只係三年前黎過一次食個下午茶.
o個時覺得佢個多士唔及隔離o個間好, 珍珠奶茶冇味, 所以blacklist 左佢.
今次就真真正正黎食一個正餐.
叫左個八爪魚卷金絲麵, 加$8 有埋甜品同朱古力珍珠, 合共$37, 價錢中等啦.

第一次食金絲麵, 都唔知係咩黎.
睇英文原來係abalone noodle. 但係就再幼身d.
個樣睇落去又真係幾幼, 食落唔錯. 幼得黎好滑而且唔易斷.
台上有瓶芝麻可以任落, 加埋芝麻落d 湯麵度食真係好香
八爪魚卷只係將八爪魚蛋整成條狀再用腐皮包住煎.
腐皮夠脆同夠薄.
八爪魚蛋好彈牙, 幾多八爪魚粒, 真材實料. 而且八爪魚既味道都好突出.

朱古力珍珠, 有點過甜. 但朱古力味夠濃搭夠.
珍珠煙韌, 但比較大浸涼茶海藻之類既味道. 有點怪怪地.

冇食過最出名o個樣野就定了死罪
離別先發現優點, 有點太遲了. 但都留下一個美好既回憶.

金太陽美食快餐(上環)

金太陽係以前哩頭返工幫襯開既外賣鋪黎.
事隔兩年依然記得, 係因為抵食而且多選擇.
d 飯名貼滿晒成幅牆. 每個飯都要係$22 仲有埋野飲/湯, 去邊度搵

一見到有吉列豬扒飯就即刻衝去買飛, 加埋凍奶茶$24
凍奶茶超甜... d 冰溶晒都仲係勁甜. 如果唔咁甜其實應該都幾好飲, 茶味都夠

打開個飯盒, 好驚人, 有兩大塊吉豬. 未食就feel 到餸多過飯. 果然抵食!
雖然係好油, 但係真係好脆. 佢係先淋汁後再放豬扒上面, 所以d 扒唔會林
豬扒唔係好多炸粉, 只係一層麵包糠. 夠林而且冇骨, 用隻膠羹就可切開.
冇骨真係最緊要, 食個飯都咁多障礙, 邊度會開心
螢光汁係我既至愛. 鍾意在佢橙色但味道係一d 蕃茄味都冇. 又或者類似洋蔥汁咁. 因為本人唔食茄汁的.

個飯又唔係好多, 對我黎講岩岩好. 未話非常飽o個隻.
$24 就食到個自己想食既飯盒, 唔駛比d ABC餐限住, 仲有埋野飲, 真係幾好!
如果堂食位置大d 就正啦.

喇沙王(中環)

喇沙王又係一間我想去試既鋪頭. 今個星期黎左兩次.
其實d 飯類比較吸引d , 但係話明"喇沙王"唔係唔食喇沙呀嘛...
所以第一次就叫左個豬頸肉喇沙配銀針粉, 加埋凍飲$36 好似...

碗野望落去好似得好少. 只剛剛夠飽.
太耐冇食喇沙, 所以都唔記得通常係配咩粉.
銀針粉都不失為一個好配搭. 銀針粉唔會過林. 用匙羹一不有粉又有喇沙湯
喇沙湯味好濃, 有點似咖喱味, 但較甜一點. 但就冇乜椰汁味. 我都唔太好椰汁, 所以冇乜關係.
只係少辣. 味道唔錯
豬頸肉夠爽而大片.
配料仲有豆卜同雞蛋半隻. 豆卜索晒湯, 都ok.


第二日再黎就叫左個沙嗲炸魚黃薑飯
第一口食左啖之後個反應就係... 凍既...
d 汁係凍, d 飯都係凍
d 沙嗲汁係雪完冇煮過o個隻凍, 對我來說凍汁有點奇怪, 仲要用黎撈飯...
至於味道. 偏濃烈同偏鹹. 唔太好味.
黃薑飯好似仲差過d 白飯咁, 白飯睇起上黎都粒粒分明. 但黃薑飯就偏林黐埋一齊, 落得多水了.
味道亦冇咩特別. 冇黃薑味. 唔通整d 色水就可以想像係d 咩味黎.
塊炸魚就真係鮮炸, 好熱好辣口. 夠脆但好油. 令身的魚塊.
開頭抱有憧憬既一個飯, 但倒頭來卻轉來失望.

喇沙王... 飯真係唔掂
至於喇沙, 唔係話特別好食. 就個價錢黎睇, 唔駛揀佢.

筷子記(中環)

哩日等到下午茶黎食筷子記. 平日lunch 見出面勁多人排隊, 心諗哩間野只係食車仔麵, 而且$3x 一個撈麵唔係平, 點解仲咁多人黎食呢.
所以今日趁星期六下午冇乜人入左黎試下究竟乜頭乜路.

麥奶奶茶. 甜味恰到好處, 但味道真係99% 似麥精. 飲唔到有任何茶味.

叫左個烏冬, 沙茶汁, 2 餸, 連頭先杯野飲 $29, 下午茶都唔算話好平.
烏冬夠彈牙, 沙茶汁甜甜地咁, 但就唔太辣, 所以唔食辣既朋友都可以放心. 撈埋一齊又幾好食
包心卷, 幾特別, 魚蛋入面包住d 豬肉咁既野, 有少少蔥既香味, 幾彈牙
香菇肉片扒, 似豆付多過似肉片, 菇係切粒撈o係入面, 其實都唔係好食到有菇既存在.
份量唔好expect 多, 話晒其實都只係一餅麵.

格局有點舊式冰室既感覺.
唔知點解睇過所有餐牌只係寫住下午茶幾錢, 冇lunch/dinner 既menu
哩度d 餸既款式都幾多, 而且好少地方食到, 食試晒都起碼食多2,3次.
有機會再黎

老地方(中環)

今日行遠點, 去到一幢幾靚既商廈. 睇個門面真係一幢幾高檔既寫字樓. 但竟然1 樓係茶餐廳??
上到去, 地方好大, 同時亦好多人等位. 哩度係自己等位, 唔係伙計帶位.
環境ok, 有卡位, 地方亦算乾淨. 再加上o係間個lobby 咁靚既商廈入面, 好難唔令人聯想到價錢都有返咁上下
但又唔係喎, 一個set lunch 只係$31? 同出面差唔多咋喎

坐低後叫左個沙嗲汁雞扒火腿飯+熱奶茶.

沙嗲雞扒火腿飯好多汁... d 汁唔太似沙嗲. 唔辣. 偏甜. 但撈飯都仲係一流
雞扒細塊, 味道麻麻. 但都唔算鞋. 煎得未夠香
係一個普普通通既頹飯.

但計環境, 衛生, 兼夾中環食飯既價錢黎講, 哩間真係算唔話得

Baraka Restaurant(中環)

是日黎左哩一間食印度野. 係一間我次次經過都想黎試既餐廳.
平時見到印度人企o係出面, 就自不然覺得哩間野應該幾正宗. 問題係外賣既價錢的確係平得有點驚人. 令人覺得唔會正宗得去邊
望入去以為得2,3張台, 原來樓上仲有閣樓. 都幾好坐. 但係張台就唔夠大放佢d 野食, 因為樣樣都分開上實在太丫位了.
叫左咖喱羊配roti, 同埋拉茶, 堂食貴好多, $49

拉茶, 茶味唔夠突出, 味道有點特別, 怪怪地, 主要因為用既糖漿唔同

咖喱羊, 個咖哩好紅. 食落唔多辣. 冇乜香料味, 亦都唔似重慶既咁甜.
咖喱同樓下所講一樣, 係微暖, 但如果配roti 食就唔需太熱了.
羊有4 舊左右, 食落冇羊羶味. 埋單o個時見到佢寫beef, 唔知係咪比錯牛腩我. 但d 肉都食唔出有牛味呀...
個roti 真係值得一讚. 其他印度鋪頭既薄餅就叫naan, 哩度就叫roti
naan 就好似d 麵包烤餅咁. 而roti 就似大陸d 手抓餅咁, 層次分明, 好鬆脆, 比naan 還煙韌. 未能似naan 一般可以用單手撕開
哩度整出黎又唔會太油, 所以唔駛擔心.
一籃共有兩大塊. 食晒真係好鬼飽.

結論: 咖喱一般, 用多d 印度既香料會較有特色. Roti 真係好正!
不俗既一間印度餐廳

民園麵家(中環)

o係中環兜左大半個圈, 最後都係決定食麵.
揀左民園麵家, 叫得"麵家"即係主打都係麵. 應有一定水準
本身睇佢間鋪頭咁細未必有位, 原來有潛建既後巷.
睇餐牌有"原汁豬手撈麵" $22, 即刻唔駛諗, 就要了哩個.
我平時唔會食豬手, 但見佢原汁咁, 就試下佢點原汁法

碗麵等左好耐先到, 得一個人淥麵, 等10分鐘左右. 對叫一個麵黎講算耐.
豬手有兩隻. 好有膠質, 但注定冇乜肉. 同埋最後食淨勁大舊骨, o係我既立場黎睇豬手唔係好抵食, 又唔覺係好入味.
撈麵既原汁應該係南乳汁黎. 我自己本身唔係好鍾意南乳汁. 但叫o個時又冇考慮咁多
開頭以為d 汁會好似蠔油咁杰身. 但係只係一堆水咁. 有d 失望. 撈起麵上黎唔上色
麵質唔錯, 好彈牙, 彈到咬唔開咁.

我出街食飯唔鍾意食有骨既野, 但今次就來個例外了. 就咁中招了.
睇住隔離d 人食牛腩撈麵同水餃撈麵反而覺得唔錯. 看來自己叫錯野了.

多寶樂茶餐廳(上環)

哩日lunch 入左黎哩間, 見到d 午餐$28 一個都ok.
睇左陣個餐牌, 覺得冇咩特別想食, 盅頭飯又驚好似酒樓o個d 咁細又少餸. 但最後都係叫左盅頭飯, 因為見到"窩蛋牛肉"就開眼了.

睇個盅以為份量都ok, 但食到最尾真係食唔晒咁濟. 勁多飯, 加上塊牛肉勁大塊
飯蒸得唔夠硬. 如果再硬d 更好. 豉油唔夠多, 中途要問佢拎. 但原來隔離台都有人想加. 證明唔係我自己問題
塊牛肉真係好勁. 佔1/3個盅咁厚, 份量實在驚人
味道亦唔差, 好爽口好彈牙, 唔會話好咸/冇味, 味道岩岩好.
窩蛋係成隻生蛋打上去, 如果唔食生蛋就唔好叫啦. 我就勁鍾意食!
由於盅飯太大盅既關係, 食食下會覺得得塊肉餅好寡, 所以後期會唔太想繼續食落去.

奶茶唔夠滑, 但奶同茶份量岩岩好. 糖亦都落一包就夠甜.

個湯係跟餐送既, 但係佢唔記得送過黎. 之後見隔離台個個都有先問佢拎
個湯都幾夠料, 冇乜味精, 唔錯呀!

$28 幾抵食, 有湯有野飲. 大大份味道又唔錯

Asia Pacific Catering(西貢)

哩日去ust. 到2:30 即衝去食下午茶. 條隊唔多人, 但過左一陣就勁多人.
叫左薯角, 西多, 仲有碗雪菜肉絲米. 凍奶茶, 只係$18

薯角唔脆. 仲煮得唔透, 入面d 薯仔唔夠林, 有d 硬生生地咁. 下午茶時段只係岩岩開始, 但d 野都已經唔新鮮.
西多唔錯, 但入面d 花生醬係超超超少. 少到好似得3滴咁. 但塊包就炸得脆既
雪菜肉絲米, 一睇就知好多油. 米粉煮得岩岩好, 唔會過林, 雪菜同肉絲冇味而且得好少.
凍奶茶少甜, 唔係話茶味好突出, 但尚算可以.

can 通常唔可以expect 好好食, 但比起紅磡o個間, 真係好好多了. 起碼價錢平d 先.

吉野家(觀塘)

晚上原本諗住去赤丸, 但係有點震驚, 9點幾都要排隊?! 雖然條隊得1,2個人, 但都知入面地方唔大.
講講下又有d 想食吉野家, 太耐冇去, 所以都係走上兩層

邊爐冇晒.. 真係可惜
叫左特盛牛肉飯同可樂. 依家先知得牛肉飯先有特盛... $33.5

碗飯就咁睇好似好少咁, 但食落又幾飽...
突然間覺得d 牛肉幾好食, 肥瘦適中. 肥既部份好彈.
開頭睇d 牛肉好似好少咁, 好彩都撈得晒碗飯.
7味粉... 以前覺得好辣, 依家哩d 變左獨立包裝, 落左成5,6包都仲係冇乜味...

豐明苑茶餐廳(尖沙咀)

原本諗住去食新o個間日本野, 但係睇到餐牌, 冇野飲要$4x, 不如食茶餐廳
之前黎過豐明苑食過覺得d 咖喱ok, 所以揀返黎哩度
咁岩西餐有得揀焗紅咖喱牛扒煙肉, 就試下哩個. 佢另外有個餐牌寫左"青咖喱", 連佢地d staff 都唔知寫錯左, 等我地仲以為有兩款可以揀
$40 跟湯同野飲, 凍飲+$2, 原本係配羅宋湯, 但我轉左中湯.

我o個碗係走榨, 但走左榨都仲有好多榨, 成個湯都好粉. 但勝在冇味精而且用好多料煲.
應該係蓮藕紅蘿蔔豬肉

朋友叫中式豬扒餐, 佢話d 汁好甜, 我自己覺得ok.
但係d 豬扒真係麻麻地, 出面有汁, 但入面冇味.
份量好多

自己o個個西餐唔記得影相
等左勁耐先黎, 因為要焗.
紅咖喱係黃色. 上面有少少芝士焗. 有三塊牛扒同一塊煙肉
牛扒真係好失望. 原來係bbq 牛扒黎. 冇厚度o個d. 睇黎我太高估哩間茶記.
而且唔夠林, 有d 難咬. 多筋. 煙肉反而ok, 可能唔係煎既其實冇乜難度.
咖喱幾辣, 有d 甜味, 我就係貪哩度d 咖喱夠辣岩岩好先黎.
d 飯好多, 我平時會食晒d 野, 哩次都食唔晒... 到最後只係食左一塊牛扒同煙肉, 基本上主要係用汁撈飯
廢事晒咁多野所以夾硬啃多塊牛扒, 但都只係咬左幾啖, 真係唔太得

奶茶少甜 = 冇味. 好似奶水咁... 唉...

d 服務態度真係一流, 最掂係個阿姐. 仲有碗湯明明未黎, 轉做中湯, 之後叫佢走渣佢就"你早講呀嘛都不左囉"
之後催單都係叫返d 男士. 阿姐可能更年期都係唔好惹佢.

永和快餐小食店(上環)

今日行黎哩間茶記
出面有幾張台, 入面都幾多人, 但都騰得出4個位比我地, 都係搭左一陣台.
午餐$26 +$2 凍飲, 餐牌我覺得唔太吸引. 最後選了豆付斑腩飯, 凍奶茶

個樣有d 普通同住家feel. 有兩片菜是好事
好多菇, 都幾爽, 豆付冇乜特別, d 魚入面有點硬, 我懷疑佢雪得太耐. 雪左幾日搞成咁.
d 茨汁唔太夠杰.
凍奶茶普通, 冇乜印象

服務ok, 但環境真係非常峽窄. 行都冇位行咁.
整體都係麻麻地, 唔係話好好食. 又唔係抵食.

波記(大排檔)(中環)

哩日又食自己, 去左隔離波記買.
見佢地咁忙都唔太敢打擾, 事頭婆見我企左o係度睇完餐牌, 主動黎問我食咩.
原本想買干炒豬扒米, 但係又見到佢整左d 炸斑腩, 又搞到自己想食. 所以叫左個斑腩炒米兜亂$24
睇住佢點炒, 係一個米粉然後事頭婆再倒d 整好左既餸上面, 再比靚仔們炒

d汁真係兜得勻.
好有鑊氣, 由頭食到尾都仲係熱.
d 米粉好爽, 唔會一pat pat / 食到食口粉. 好正!
斑腩雖然林, 但係都好食.
但d 米粉就好熱, 相比起d 餸就凍. 未炒得夠熱.
仲有食到個口好油咁, 唔知係d 汁定油了. 但自覺就好似油多d

希望可以食埋佢個干炒豬扒河

新光酒樓(鑽石山)

是日去完拜山就行去鑽石山飲茶. 原來哩度哩間係新光. 久遺了.
好耐冇lunch 飲茶食點心. 5人叫左少少野, 都食唔晒

見到有人捧住煎堆, 都幾圓, 就要左碟, 中點
但佢竟然剪爆左個... 好彩拿拿林喝住佢. 唔係比佢剪晒.
叉燒餐包, 入面竟然有洋蔥!! 正喎!! 第一次食有洋蔥既叉燒餐包. 叉燒唔係多. 但個皮都唔係話好厚

煎腸粉$9.8, 8件腸份好整齊排o係度, 同平時d 酒樓既亂放非常唔同.
大大件, 又煎得幾靚, 條條都咁脆

炸雲吞打包左返屋企都仲脆. 不過最唔開心係個侍應收左我地d 汁...炸雲吞既精粹就係o係d 汁度呀嘛...唉...

菊花奶皇包. 好多奶皇咸, 但係就冇乜奶皇味. 外面就好似炸饅頭咁. 但由於入面d 奶皇都冇味, 所以其實成個都好似炸饅頭咁

鳳爪好多隻, 唔辣既
雜菜煲$22, 好抵食, 但好熱, 小心燙口
咕嚕肉$18, 用左罐頭桃代替菠蘿. 雖然碟餸既味道唔會因此改變, 但個人都係比較鍾意菠蘿, 桃比較林
炸得夠脆, 仲幾多件肉. 唔會好油
另外仲有豆花$6.8, 好滑

唔知食左幾多錢. 但味道唔錯. 同埋都幾多平野, 應該50蚊左右掛.