講左好耐話想去食韓燒,終於有機會!上到去,環境唔錯,枱同枱之間唔會太迫,電視播住K-POP,待應仲多數係韓國人,夠晒地道!叫左一份牛一份雞,落完單就即刻比配菜黎,有沙律,泡菜,洋蔥..沙律唔錯,夠清新開胃,食燒肉前最岩!不過泡菜就好似咸左少少…最期待係佢爐上面蛋既同芝士粟米,睇住D芝士慢慢溶,未食已經覺得好正!粟米好甜,溝埋芝士食味道好新奇,又咸又甜咁,但要快D食,因為D芝士燒得耐會燶…蛋好滑, 蛋味都算濃。主角終於上枱,雖然份量唔多但夠新鮮, 牛肉燒一陣已經好快熟,食落幾嫩滑,可以食到濃濃既牛肉味,相比牛肉, 雞肉就令人有D失望,太普通,重香料味,蓋過晒肉味。

成日聽朋友講，終於到自己黎食。裝修確係幾特別，充滿左旅行特色。叫左三文魚沙律，有四片三文魚，三文魚幾新鮮，但沙律菜有少少苦，不過份量幾大下，四個人食都ＯＫ。仲有香腸大會（半份），有唔同款的香腸，味道淡左少少，但有唔同的醬提供，配埋醬個味道岩岩好，而且有得選半份ＯＲ全份，幾貼心，人多人少都可以叫。蜜糖雞翼，總共有六隻，而且旁邊有送少許沙律菜，雞翼好正，係輕輕炸過，再淋蜜糖，蜜糖都幾多，好香好甜。跟住主食叫左紅酒牛尾飯，份量充足，唔會話得兩件牛尾咁少，有成四件，味道一流，好入味，都見到好多人叫呢個主食。整身黎間餐廳都唔錯，野食好味，份量亦幾多，下次再黎食過！

去觀塘廣場曬相，見小小肚餓，望到呢間隔離鋪有兩個大廚食緊牛腩飯，心諗廚房佬都食應該唔會差，於是就入去叫左碟牛腩飯。個阿姐問我食咩野腩，我就求其要左半肥瘦，再要多杯豆腐添。牛腩飯上枱，份量都幾多，牛腩切粒上，囗感唔錯，夠林唔靱冇渣，半肥瘦啲肥油好香牛味，估唔到呢間涼茶鋪樣既牛腩飯水準咁高，唔怪得酒樓師傅都黎食。

純粹行過想坐火車返屋企食杯面,
但被張poster吸引.
唔係食物poster. 而係Hoegarrden poster~
突然之間好想飲. 結果就入左黎喇.
我當然係叫Hoegarrden.
家姐就叫左1664blanc 白啤酒.
兩杯都好好味~
唔知係咪因為有啤酒飲太高興,
d野都覺得好好味,
蠔, 扇貝都好鮮味,
牛骨髓滑一滑配麻辣汁係堅正~
焦糖菠蘿又甜又多汁,鍾意食甜野既我就必like~
懷舊一口魷魚仔,呢個即係細個戲院門口賣果隻,超懷念~ 好味~
飲過1664blanc 白啤酒, 好似覺得仲好味過Hoegarrden.
下次主力飲呢個~

同事生日, 有人提議食餐好, 於是就黎左呢間"星級" 酒家喇.
價錢係就係貴D, 但真係物超所值!
紅燒蘿蔔牛腩煲: 完全有紅燒既香味, 牛坑腩不太肥也不太瘦, 而且入晒味, 超正!
燕窩釀雞翼: 外皮好脆, 裡面完全係釀滿晒燕窩, 唔係得少少!
花雕焗飛天雞: 雞肉嫩滑,配合輕輕的酒香, 係會令人食完一件又一件!
一定會間中就返黎食一次!!!!!!