見食物都適合小朋友而且環境都幾舒適所以決定食呢間，點了個西班牙海鮮飯，有齊餐飲、湯或沙律及甜品，我還加了份薯條及咖啡，份量都夠一大一小食，味道都唔錯，只可惜原來個西班牙海鮮飯是辣的，但menu上無寫明，要召喚職員已經不易，佢哋人手有限我要久等，到有人應我佢嘅回答竟然是叫我下次講明走辣，我真係佩服佢哋嘅態度！佢一定係知我企起廚房睇住煮啦！其實menu唔寫唔緊要，但落單可唔可以提下人呢？唔好話大人order自己食，如果唔食得辣嘅真係多謝晒你哋呀，更可況同行有小朋友！再講食物味道係幾好嘅但不至於一試難忘，二百幾三百一個午餐，其實服務都係價錢嘅一部分，只需要做多一步基本步原來唔係必然

突然想食個傳統茶記早餐，諗住去返有咁上下歷史嘅茶記會穩陣，都唔係食特別野，只係沙嗲牛肉米加凍檸茶少甜，沙嗲牛嚟到個賣相已經令我打個突，真心第一次見腸仔煎蛋唔係另上而係放埋一齊，浸淋晒嘅感覺好差，牛肉又厚切味道又普通，食到我失去意志但又怕唔飽，諗住食埋個馳名菠蘿包打底，個菠蘿包係好重秤並非空氣包，可惜唔暖又唔脆好似食緊粉團咁，杯檸茶係大杯抵飲嘅不過少甜後又鬼咁苦跟本唔想飲，好後悔太子咁多茶記唔揀偏偏揀正中伏嗰間 so sad

很幸運，能在沒有預約下可以一嚐這間評價不俗的和風餐廳 午餐選擇不算很多，只得三款不同餐供應，我選了啤酒炸雞 炸雞很香脆都算嫩滑，啤酒酒精成份雖已揮發但酒香味還在，味道調教得很好👍🏻 不過漬物就很一般，酸蘿蔔同忘了是什麼的南瓜，如果有些沙律菜會好些，可減少炸物的油膩感，而碗飯一定夠飽肚，很大碗但可惜並非用上圓身飽滿的珍珠米，飯香欠佳，如果可加上少許飯素襯托，不論味道或賣相相信都會有所提升，不竟這並非數十塊的定食而是過百，對其質素當然會較高要求 飲品我點了青森蘋果，無什麼可以評價 甜品點了兩款，一款是抹茶蛋捲，蛋糕有少少硬化，似是因接足空氣時間長所致的感覺，抹茶味又只屬普通不算太出色；而另一款是蘋果cheesecake，這個非常出色👍🏻芝士味不會太濃，整體亦不會太甜，有蘋果肉桂清清的味道，口感又不會太硬，值得一試 整體似乎是甜品出色過主菜，食物都可以，但加分位始終在於和式的裝潢之上

同朋友飯聚一致決定試大家未試過嘅春水堂。 餐廳環境唔錯，寬躺整潔，雖然無得訂枱，但平日六點半前人唔多可以輕輕鬆鬆入座唔洗等，仲要無限時可以慢慢吹水慢慢食，非常好！ 因為我無做定功課所以嚟之前我並唔知道原來係台式餐廳，仲要係自私食即係一人一個餐無得share！ 我點咗個紅燒牛肉麵，雖然有幾款唔同嘅麵款，但由於係預設餐單麵款配搭無得隨意轉換，我碗麵淋到連無牙婆都食到，無口感又無質感，基本上唔係麵而係麵狀嘅糊仔先啱。而件牛腩雖然煮到好淋但一啲都唔入味，如果唔話我知我仲以為係湯渣。記得menu上碗麵係有辣椒示意，但湯底卻完全唔辣又唔香濃，整體來講就係難食！ 至於飲品我點咗珍珠綠茶少甜，珍珠都幾多而且偏細粒幾煙韌，而綠茶都唔錯算幾清香，即使少甜都唔覺茶底苦澀！ 最後我哋八點幾左右走門口已經大排長龍，今餐每人百四蚊左右，睌餐來講價錢算合理，但可惜食物唔得，但飲品同環境是可以的，我諗下次可能嚟tea會適合啲！

好耐好耐之前睇過雜誌介紹大和堂，知道係由歷史悠久嘅中藥舖變身而成，覺得幾有特色想試好耐。 環境就幾舒服，樓底高感覺寛敞，播放中嘅流行歌曲襯托著古色古香嘅裝潢帶出強烈對比。 Menu唔算很特別跟一般cafe差唔多，但總有幾款特色食品作為店舖招牌，我點咗”雞蛋仔與雞” 同mocha 雞蛋仔無蛋香味又唔脆，個汁仲好醋帶酸，根本同個雞蛋仔好唔match，而炸雞因為唔熱油益味出晒嚟，如果改韓式炸雞會有誠意啲 至於杯咖啡，一點咖啡餘香都無，連朱古力味都唔覺，只係得個甜，好失望 如果只追求環境呢間都算滿分，但對食物真係唔好抱高期望

每次都是點招牌紅燒牛肉麵，因為實在太合我這個重口味的人，簡直將我迷惑😆 首先，湯底的確香濃且帶點辣，超惹味，味道亦有點像肉骨茶，帶有一點點藥材味道，可能是用上肉來淆湯，有點骨膠黏口感覺，並不似味精湯。其次，麵質彈牙有質感，似刀削麵口感，並非淋淋的漿糊麵或硬條麵。牛𦟌雖然大件，但尚且嫩滑滷得正好。即使並非人間美食但卻配得上為招牌菜👍🏻 飲品方面我試了百香果綠茶，味道頗酸並非人人受落。 跟餐配一款自選小食，有我喜愛的涼拌茄子，醬汁調得很好，無搶喉的醋酸，份量亦適中。

每次lunch time都坐滿了人，很難才有機會試到，有幸今次第二次試，距離上次光顧已相隔三個多月，見午餐menu有好幾款都轉了，今次有鰻魚蛋飯好吸引，但我還是依然鐘情All Day Breakfast 單憑裝潢就猜想到店主是用心經營的，即使開於樓梯底下店主亦講究店内環境氣氛，以小木屋概念修飾小店，不單雅致還增添舒適感！ 食物方面，午餐來說無論款式或份量都很足，味道當然好！All Day Breakfast有香滑半熟炒蛋、兩小塊香煎嫩滑雞扒、香軟熱辣鋪滿蒜粒的蒜蓉包，還有一大塊鮮蜜瓜！如果蒜蓉包能多一點牛油味會更好！ 飲品方面，如不加錢可點餐牌內$39以內的飲品，以上的要另加$15，跟一粒蛋糕，那個蛋糕細細粒卻有點脆、很重咖啡香，外表彷如一粒咖啡豆，我很喜歡！ 而我點了凍蜜桃茶，因為起初沒有把飲品攪拌，只嚐到苦澀茶味，但攪拌過後就嚐到甜甜的帶點清香的桃、茶味，其實跟凍檸茶很似！下次如有幸再食，我會試咖啡呢！

同另一半嚟食嘢起初純粹貪裝修夠特別夠靚，點知食落先知呢間餐廳並非虛有其表喎，飲品同食物真係睇得又食得，不得不推介下！ 我哋點咗: <OMG啡菇二重奏> 兩款唔同味道嘅大菇各有千秋，但咬落同樣juicy，因為個人口味我就偏向鍾意蟹味嗰隻，雖然味道無另一款咁濃，但同樣燒得好香好味道 <香煎日本帶子配黑松露忌廉意粉> 帶子熟度恰到好處一啲都唔韌，黑松露唔算太出，但忌廉幾creamy，意粉軟硬度適中，眼見份量幾少下但食落都幾漏 <蜜糖燒春雞> 似係用慢煮方式烹調，雞肉一啲都唔’鞋’而且仲幾香口，配埋蜜糖汁真係幾有BBQ風味 <潘朵拉的盒子> 唔只靚同特別仲有得玩，層糖做嘅外殼要敲碎食，以為只係普通莓類蛋糕，原來係類似雪葩嘅餡，唔道唔酸亦唔太甜，好有驚喜 <關你賓治> 似芬達加入什果，味道就夠晒穩陣但就普通 <富士山的雲端> 好靚好特別嘅飲品，可惜本人唔飲奶所以無試 整體上覺得係一間幾有heart嘅餐廳，主題用上萬花筒夠別出心裁之餘亦帶出咗繽紛色彩，給人一種開心千變萬化嘅感覺，入嚟食嘢自然放鬆心情

吃了三次都是點<香酥脆雞沙律便當>，並非脆雞超級好吃，而是沙律真的很棒，當然脆雞不單大件而且也很香口鬆脆，只是調味方面尚有進步空間，若果可以濃味多一點就perfect了👍🏻喜歡這個便當的沙律，除了因為蔬菜方面新鮮之外，無論份量或材料款式也比較多，不愁吃不飽之餘亦很有驚喜！一口炸雞一口鮮菜，平衡之至，亦少了一份罪惡感😆 還有那杯<鳳梨古早味紅茶>酸酸甜甜的帶點茶香，很開胃、很回味！ 雖然只屬小店一間，但食物卻是誠意之作，難怪多人排隊也在所不計，至少本人為了美食也樂意久等，會繼續支持！ PS 最近發現好似冇咗沙律便當

放工5點幾6點有點肚餓好想食個下午茶，想起之前飯後食過呢間嘅甜品，白雪公主、榴槤公主、紫薯金磚等都好好味。因為仲要食晚飯唔想食太甜所以揀咗食返紫薯金磚。 記憶中厚厚的麵包充滿牛油香味，咬落香甜鬆脆，再配以冰凍雲呢嗱雪糕，簡直係味覺一大享受；但今次再食竟然由天堂跌落地獄。首先我揀錯雪糕，紫薯唔應該配綠茶，成件事錯晒，加上舊雪糕仲有一塊塊冰面，一路食一路溶成水浸濕咗每塊麵包，而麵包都無之前咁多牛油咁香脆。結果痴住冰嘅雪糕好難食，浸濕咗嘅發水麵包仲難食，今次同樣有味覺刺激但呢種剌激真係令人作嘔無下次！