]
好難得有機會兩母子去昂平坐轉360 上到去真係冇咩特別嘢食 是是但但就去咗呢間 枱唔大勝在唔太多人,都坐得舒服 因為我未食 Lunch 所以叫咗一個烏冬兩個餸,2個人食 以為呢間食物都係細細份,但原來嚟到都大大份,有點意外
]
牛肉烏冬 首先~份量都大碗 牛肉~都食到應有嘅味道 烏冬~彈牙 豬骨湯底~味精湯底feel 配菜“昆布”~有少少未淋好硬身
]
雞排配薯角 雞排~雞皮脆,肉有少少乾 另外仲叫咗個“鐵板炒雜菇” 有椰菜但炒得好硬,好似未太熟咁 其他雜菇都有撈黑椒炒,所以都嘢味的

今年二月份係一個好月份，又放新年假，又出花紅；成間公司同事一於出去食好D，雖然老闆有約嚟唔到，但佢都好識做打電話嚟張單入佢數！
千挑萬選，全部同事終於選定呢一間 “金牌火鍋”，入到去個門面靚得嚟舒服唔浮誇，仲要安排咗我哋坐房。叫咗好多好多轉食物，食到好開心同好滿足；攪到我掛住食都唔記得影靚靚食物相鮮鮑魚片冷盤
鮑魚呀~~~~如果老闆早D打嚟話入佢數的話，我一定會堅持叫多碟
爽口彈牙，濃郁嘅鮑魚味冇雪味，本人覺得絕對正貨。牛雜火鍋湯底
超多牛雜絕對唔係流料，平時出去食碗淨牛雜都覺得唔夠喉，今次真係回晒本。
牛雜味道仲濃郁過其他食牛雜專門店，牛肺好滑好入味( 因為之前喺其他舖頭食個口感好似食石頭咁硬 )；牛肚超淋冇渣唔怕痴牙；牛腸少少肥唔漏口夠晒香肥瘦適中嘅靚靚牛肉
本身牛肉味好重，入口即溶齒峽溜香！手打魚旦
好耐冇見成粒乒乓球咁大粒嘅魚旦，又夠彈牙又有魚味即炸響玲
嚟到枱聞到少少油香味，全條響玲浸晒落個牛雜鍋到三秒鐘，食落口唔太淋仲有爽口翠翠嘅感覺

其實一直都有少少抗拒食韓燒, 因為間舖頭如果抽煙做得唔好就食完之後好怕成身成頭都係油煙味！但始終都要應吓朋友要求… …
7080 係我咁多次韓燒食完之後最有清新感覺嘅一韓燒舖，枱與枱之間坐得好舒服；仲要所有侍應都好有禮貌會耐不耐就過嚟幫我哋燒埋，仲要有韓仔韓妹好有韓國 feel免費麥茶好濃厚嘅麥味，酒精飲品選擇唔太多，我一個人飲咗兩round soju ( Litchi & Peach ) 易入口但又唔易醉
食物都真係好多款，仲要有好多都幾特別
以下我覺得真係要必食，仲要當晚番食咗三轉燒豬皮
一路燒一路跳舞，
見到就興奮到個個嘩嘩大叫食慾大增燒香辣豬腸
堅夠香辣，冇豬臭內臟味冇咩肥膏食落口脆脆幾口感絕對一流多春魚
用錫紙兜燒，燒幾耐都唔乾身仲有好香嘅魚味同埋 D 春爽口食落去有卜卜聲帶子
都係用錫紙兜燒，燒幾耐都唔乾身仲有帶子肉夠厚身不是薄薄一片，好鮮甜多汁牛舌
大大片冇平時嘅 so 味

同個客食飯,個客搵地方,都知呢間嘢貴,但冇諗做真係好貴( 成餐飯埋單差唔多$3,900.-),最慘個客知道老闆請,我去到梗係唔好咁寒酸啦…


前菜 一份麵包,個樣好 high ,味道一般




d 蠔個味新鮮唔錯,但唔夠肥叫咗三款都好瘦

燒海鮮併盤 講真,真係好好食 蟹腳好新鮮,龍蝦好多膏;呢兩款係最好味 仲有車厘蝢,生蠔同帶子都好好味
雜莓脆餅配吉士 好好味好靚 紅豆配蕉糖蛋 好香滑唔太甜

本人一直都好鍾意幫襯細鋪同街頭小食. 其實,當日只想去搵雞蛋仔食,但見到呢間鋪梗係要試吓啦！

喜樂牛肉米線配豬耳同皮蛋 米線~爽滑有口感 豬耳~爽口有麻辣味 皮蛋~蛋黃軟綿綿好香 話梅花生~就算成個米線撈混晒其他醬料,個話梅花生個味仍然好出,好香話梅味 撈米線辣醬~夠麻夠香夠辣但我自己就略欠咸咗少少 青檸汁~因未飲過梗係試吓啦！ 個味覺好似飲緊果汁,飲過試下就算

同師傅慶祝生日,梗係去我哋大家最愛嘅地方。其實,不經不覺我都帶唔少朋友嚟呢到食過,真係好開心個個都鍾意嚟呢到食. 其實我今個星期第二次去食蠔,早幾日去咗 iSquare 28/F 食海鮮同生蠔，先發覺呢間蠔嘅價錢真係食得好開心
今次食咗三款新蠔 Tatihou, Carantec & Quehan 都係濃味嘅蠔,而Quehan 個味有少少似銅蠔嘅味,可以當係食 Belon 0000 嘅入門版

麵包蟹 冇花冇假真係好大隻,仲要有好多好多膏,蟹肉好鮮甜,呢隻size 嘅麵包蟹真係好滿足

香煎雞件 講真一般,試吓就算 首先,雞皮燒得唔香口食落去好油,雞肉入口好滑但冇咩特別.





另外梗係叫埋青口同墨魚麵,水準依然 keep 到

叫咗一個二人餐,兩個唔係太肚餓的大人加兩個剛剛打完波的小朋友啱啱好
杏汁豬肺湯 個味而入口少少杏汁味唔太濃, 我呢個湯份量可以四個人每人一碗滿的,另外豬肺都有成7至8嚿，真係好足料。

燒味雙併 义燒配燒腩仔 义燒夠味但略欠唔夠林身 燒腩仔個皮好脆,肉質都好味

牛肉蕃茄炒蛋 酸味唔太重,冇咩蕃茄味,牛肉好林身但食唔到有牛肉味

今日同三個同事出去尖沙咀睇場，公司包 lunch 大家又想飲茶又想坐得舒服，之前見過呢間餐廳有好多明星上去，既然公司俾大家就豪少少啦!
雖然lunch時間但上到去個環境真係坐得好舒服，裝修又真係好靚。心諗一定唔會平得去邊，但上到嚟點都試一次啦！
點知佢lunch 都有 set，仲要個價錢合理又多嘢選擇，可以 share 一齊食；而我又係一個 “蝦皇” 梗係首選有蝦嘅點心先啦
尖筍鮮蝦餃蝦餃好大隻，皮又好薄；食落去 D 蝦係原隻大大隻，而尖荀 size 又啱啱好口感好爽
蟹籽鮮蝦燒賣燒賣又係大大粒又有原隻蝦，豬肉又唔太肥膩 ( 肥瘦適中 )
士的脆春卷春卷上枱仲熱，似係剛剛新鮮炸，所以食入口有少少辣口感覺。首先，個春卷皮炸得好脆又唔油膩，個餡又有大大隻彈牙蝦
刀拍青瓜少少微辣大部份人都會接受到，青瓜雖然加咗少少微辣但仍然食到青瓜本身的爽甜味
白灼菜心呢個時間菜心當做，梗係識食就食菜心啦！果然不負眾望，夠粗身爽甜，蠔油都唔使都已經好好味
麻香乾炒牛河呢個牛河點講好呢？牛肉真係好有牛肉味肉質好滑，河粉炒到分開一條條唔油身；成碟牛河本身好好味夠晒火喉再加埋少少麻辣香味，真係啱晒我口味

因為同阿仔 share 食一碗米線,所以食唔辣。 魚旦腩肉清湯米線 腩肉好鞋口完全冇味 魚旦都彈牙但有少少“魚聲”味 米線食落口嘅口感好油仲要好硬,好似唔多熟 個湯真係好清好清 土匪雞翼 雞翼食到有“雪味”,冇晒胄口

終於約到一班志同道合嘅朋友一齊去食辣嘢。之前有個朋友仔試過舊舖覺得都幾好會啱我哋口味,所以今次知道佢新舖開專登過嚟試吓 新舖論環境真係坐得好舒服,感覺非常好;食物質素同服務就更加好

飲品,今次冇人飲酒;我就叫咗呢杯“檸檬雪梨汁” 甜中帶酸,非常之解渴。我仲飲咗三杯,哈哈哈
土豆絲 土豆絲炒得好爽口唔油膩帶少少麻辣,夾埋d乾辣椒一齊食,爽呀…
辣子雞 師傅唔知加咗咩,碟辣子雞嚟到就好香檸檬味,全枱人都俾呢種香味吸引晒。雞肉有少少炸過,雞皮脆到不得了,而雞肉又唔太乾仲有少少肉汁;成班人都懶得用筷子係咁用匙羹加乾辣椒大大羹放落碗大大啖食
酸辣魚 條魚用咗大魚冇咩骨,個湯夠酸夠辣夠晒味道好好飲,魚嘅肉質好滑仲有好香嘅魚味。個湯配菜仲有蘿蔔又係入晒味 其本上呢間嘅食物就晒辣味,成班人清晒所有食物,一樣都冇剩,呢個情境真係好耐未試過;酸又滿足到,辣又滿足到。