聽同事介紹元朗天天川菜幾好食，呢日我就同家姐姐夫揸車黎到呢間天天川菜試一試。
坐低打開本Menu(本Menu都幾靚)... 都好多川菜菜式，有辣有唔辣~
未叫野食之前，就黎左一小碟既前菜 → 川式蓮藕...小小辣~又幾入味~唔錯唔錯...
o係我同家姐食緊果碟蓮藕之際，
姐夫已經點左 「青椒皮蛋、松子糖醋桂魚、豬油渣娃娃菜、炸子音樂雞、水煮田雞」
(當時心諗：我地得三個人...點食得晒喎 )
好快就已經上菜，樣樣既賣相都唔錯~
炸子音樂雞好岩送酒！對我黎講辣度同埋麻度岩岩好~ 雞粒乾身大小適中，雞皮脆卜卜好香口，連骨頭都脆卜卜，就算炸到咁脆，依然仲好有雞味，音樂雞果然名不虛傳！水煮田雞，好足料呀~^^有田雞，青瓜，粗薯粉，芽菜...等等，撈極都有野食！胃口大既人必食！糖醋桂魚 → 嘩！賣相一流真係一流！一睇條魚，就覺得師傅好有Heart~骨都起埋，條魚好似D魷魚咁介晒花，再拎去炸，再o係上面淋上糖醋汁，好適合我呢D懶人食，可以一舊舊咁夾起，外脆內軟，不過真係要襯熱食。至於豬油渣娃娃菜，因為我未試過食過豬油渣既關係...所以o係我心目中豬油渣係好肥既野，但試過後發覺原來豬油渣咁香脆~ 樣樣都令我好驚喜，最後青椒皮蛋...可能本身皮蛋質量一般~無論配料幾好食都好，都係比較遜色~
但整體黎講，我地非常滿足！(我意想唔到既我地竟然可以清枱！Woo~除左個皮蛋.....)
侍應仲問我地有無揸車黎...滿$500可以有免2小時泊車優惠~ 果然照顧到唔同客人既需要！
比個Good你

尋晚收工諗住去泰國人海南雞度食飯...點知執左
咁就唯有四圍行下搵個地方醫肚啦~
行前多幾步就見到呢間燉奶佬...
見到門口有張海報~『正宗巴基斯坦咖哩牛腩飯』張相真係幾吸引架，上面仲寫話呢個咖哩拎過獎添~
我走入去坐低...打開餐牌...好多都好吸引...價錢都合理~以前既燉奶佬真係無咁多選擇~
見到門口勁大張海報介紹『正宗巴基斯坦咖哩牛腩飯』咁就當然叫呢個『正宗巴基斯坦咖哩牛腩飯』再叫多杯即磨咖啡 (凍飲 + $3，即磨咖啡 + $5，要凍即磨咖啡就要再加多 $3)~

好快就黎左個飯...一見到個飯就知「奶野」~
咖哩好似水咁...所謂既牛腩就好似煲完湯既瘦肉咁...最正常就係好大舊既薯仔...
因為太肚餓既關係...都要食架啦~~~ 

肚餓既時候食都咁難食...

我朋友就揀左喇沙牛肉河~我唔敢評論太多(因為我無食)，但佢就同我講...無味...