豬仔糖水 (土瓜灣)

六個人係附近食完味濃的食物，諗住食個甜品清清味蕾...

見到裡面坐滿人，又見有好多甜品款式，於是入去試下

叫左芝麻糊、椰汁西米露、紫米露、桂花芋圓...

芝麻糊先到，好"杰"，一試就知係用粉開出來的，好似"多多"咁既效果...
我好訝異一間糖水舖會有咁既芝麻糊，又杰又冇heart...

大家你眼望我眼，希望下一碗好D..紫米露一樣係好杰...中間既紫米黏在一起..一pat pat 咁...

希望落在椰汁西米露上，應該好D掛...

一個好普通而又好甜的西米露，椰汁味冇乜..甜得滯食唔晒...

最後見係推介既桂花芋圓，應該冇事啦...

芋圓個湯淡到不得了...桂花有D細既枝..有個好似啫喱的另上，試過加入個芋圓湯度，但係芋圓太淡...都係怪怪的...

六碗，全部食唔晒！

好耐未食過咁冇heart 的糖水店... 你主力賣雪糕、冰類咪賣淨係賣雪糕、冰lor.. 其他糖水你冇心機整就唔好加落餐牌俾人揀啦... 試一次就唔會再幫襯...

我都好耐冇寫食評，今次都忍唔住要寫下...

大漠 (土瓜灣)

一向好鍾意食羊，朋友推介這家餐廳，一向認為土瓜灣好吃的餐廳不多，但這家卻令人喜出望外...

假日去要訂位..

試了鎮店古法羊胺，有四件，調味恰到好處，但只有四份不太夠喉..

另外食了粉絲羊肉湯、炒紫椰菜、羊肉卷、孜然牛肉、甜山芋內

粉絲羊肉湯做得好好，有好香的羊肉味、不會太"穌"，羊肉粒好軟，加左D芹菜，帶出羊的香味...

第一次咁食紫椰菜，清清地，提子配合椰菜，好食..
甜山芋有D 驚喜...

孜然牛肉，我覺得孜然都係配羊肉好D

仲有新疆啤酒加戰鬥碗，配羊肉，一流！

會再幫襯，仲有好多菜式想試...

明記飯店 (北角)

係超級失望的一餐...

先旨聲明，我今晚係好想好想食有鑊氣的小炒... 因為我係大尾督食下午茶時，見到隔離枱食個啫啫雞煲，又熱又香，同埋個炒蜆都好靚.. 諗住好耐都諗唔到邊度有大排檔可以食有鑊氣小炒，於是諗不如去東寶，拿，我諗因為有呢一份期望，所以特別失望...

去到見到要等位，又見到呢間都坐滿，不過唔使點等位，亦見到佢有煲仔菜，就諗住俾個機會佢，好食第日可以再幫親...

我地叫左

- 啫啫雞煲
- 豉椒炒蜆
- 炒菜

個雞煲令人好失望，原本諗住係熱騰騰的瓦煲，但來到時，是一個鐵煲，呢個都唔緊要，最重要係佢冇乜煙，唔係好熱... 跟住見到對面枱剛上枱的魚煲，一D煙都冇，心諗我地都未算最差... 夾左舊雞，發覺唔係好熟，然後檢驗下，發覺豬潤仲有少少血，點呀？煲上的食物都可以唔熟... 叫佢地翻熱... 最後出翻來的，係好夠熱的煲，不過個汁多左，我諗佢加左水去煮... 於是連本來覺得OK 的汁，都冇乜味...

豉椒炒蜆，要讚下個蜆冇沙，但係個豉椒唔香，個餸唔夠熱，上枱亦唔覺有香味，更加唔好話有鑊氣啦... 個蜆亦冇乜蜆味... 係冇沙 lor....

個炒菜都係一般啦，不過食到一條長頭髮，所以都停左手.... 我個人都好容忍下，最近食面都食到頭髮，但因為個魚湯米線實在太好食，我都唔同佢計較，但今餐咁多唔滿意，我都冇乜胃口食落去....

下次都係咪貪快... 每件事都總有原因的...

汀角路茶座 (大埔)

今日去大尾督，六點幾，諗住食少少野先出去，原來汀角路呢邊有條街有幾間食肆，想食個茶餐，於是揀左呢間...

叫左兩個茶餐
- 奶醬多 + 華田
- 餐蛋治 + 咸桔蜜

其實係好普通的食物，諗住填下肚，但係有驚喜，個餐蛋治個蛋，係疊左幾層，應該係一塊蛋皮，摺埋一細塊，所以有幾層，個蛋同埋餐肉，係岩岩煎好，仲有一種煎香的味道... 又熱又新鮮...

材料係好普通，但係幾樣野加埋就變成美食，面包皮新鮮，蛋塊，餐肉熱刺刺... 就令人好滿足...

呢一間地道的茶座，好街坊 feel... 我覺得佢係好有 heart... 呢一類的食肆，係應該要俾D 鼓勵佢...

雖然只係一件餐蛋治，但足夠見到佢地整食物的誠意...

另外，奶醬多遲左到，個侍應姐姐都好有禮貎，話會幫我地跟單.. 奶醬多亦係好多料...

題外話，我地見到有其他客人叫餸食晚飯... 個炒蜆同個啫啫雞煲令我地口水流，臨走都忍唔住問下個侍應姐姐個煲叫乜名，下次會去試晚飯...

Jubi Frozen Yogurt Bar (太古)

目前為止食過三間乳酪店，我認為乳酪的質素係最重要，配料的選擇都是其次...

這間的乳酪較"hey"，不夠濃味，也不夠實.... 屬較易溶的一種... 濃味的乳酪係會有CREAMY 的口味加上清新的酸味.. 但這家的乳酪還未到家...

另外，配料的選擇不算多...荔枝珠係幾特別，其他店都未見過... 價錢唔算太貴，但我認為要努力改善下個乳酪的質素先可以係芸芸乳酪店中突圍而出....

另外見到其他食友咁"詳盡"的介紹，連有什麼優惠都不忘推介，都真係幾有趣...