benc1231 等級2 | 關注 留言給此食家 |
排序方法:
日期 笑臉 喊臉
編輯推介 餐廳總分
文章形式 | 地圖形式
2021-08-23 Seoul Bite (元朗)
呢間早排開張花牌多到擺滿成條街,十分誇張,心諗咩料呀,係咪明星開架?今晚終於有機會試下。 點左任揀三式炸雞,皇牌芝士、甜辣、密糖牛油。星期日晚大約6點半左右,唔係等得太耐,3-4個字左右就搞店。店員後生仔好快手,有禮貌。 雖然攞到返屋企耐左些少,影響左少少無咁熱,下次都係要快手啲開餐。 三款口味都好正,我自己最鍾意皇牌芝士,屋企人就鍾意甜辣。炸雞仲好juicy,唔會乾晒,口感味道都非常好。 下次會試埋其他口味! 推介美食: 皇牌芝士味炸雞
評分: 味道 5 環境 5 服務 5 衛生 5 抵食 4
2018-04-14
今日老婆放工嘈之巴閉要食好啲,左諗右諗又黎左呢間屋企樓下既日本料理。 今次已經係第二次黎,上次試過壽司,壽喜燒,冷烏冬。 壽司正,魚生夠就鮮,加上新張期內第二件半價。 壽喜燒,湯濃郁好味,牛肉入口溶夠牛味,只係略嫌份量少左啲,以呢個份量黎講價錢略貴。 冷烏冬份量就夠晒多,但偏淋唔夠爽口唔夠彈牙,個汁都偏淡唔夠味。 今次當然安歌壽司,好食之餘貪佢第二件半價。 再黎雞翼串燒,串燒亦都係第二串半價。雞翼好得,皮香肉嫩,juicy! 然後加一個咖哩豬扒飯,中規中矩,不太突出,合格。 最後係重點喇,上次黎無試炸嘢,今次點左個櫻花蝦炸豆腐。一流呀!🤤諗起都想再食呀!滑豆腐沾左薄炸粉同櫻花蝦一齊炸,櫻花蝦既濃味加脆口,同豆腐既嫩滑加清淡配合得天衣無縫!不過有一點要注意,唔好比啲汁浸住太耐,盡快夾起,否則淋左唔夠完美。 是晚兩人消費$400。 😌上次開張無耐見人客不多,今次再黎已經坐滿人,聽到鋪面經理(老細?!)講鋪頭其實係開業多年,加租迫遷先搬黎。食品質素好,希望生意越做越好,繼續努力! 推介美食: 櫻花蝦炸豆腐
評分: 味道 4 環境 5 服務 5 衛生 5 抵食 3
2017-02-12
13人限時1個鐘? _ 昨晚一行13人到德記慶祝元宵佳節,估唔到敗興而歸。 _ 德記幫襯多年,以往是街坊,而家搬左都不時返黎幫襯,一間咁多人排隊既飯店黎講,食物質素一直保持得唔錯,而且價錢亦相對合理,呢點抵讚。 _ 昨晚點菜如下: 1. 前菜陳醋鳳尾魚 2. 胡椒豬肚湯 3. 炸蠔餅 4. 鵝肉片 5. 炸蝦棗拼墨魚餅 6. 蠔仔粥 7. 凍烏頭 8. 梅羔骨 9. 川椒雞 10. 鹵水掌翼 11. 方魚炒芥蘭 12. 糖醋麵 13. 炒魚麵 14. 欖菜四季豆炒飯 _ 大陪份既食物質素都相當唔錯,尤其係凍烏頭,相當鮮甜。 至於要改善既首先係炸蝦棗拼墨魚餅,一次比一次厚粉,只食到配料如馬蹄同粉頭。 梅羔骨用豬排而唔係骨,鍾意食肉既啱,鍾意啜骨既就麻麻。 _ 服務方面...幫襯咁耐都係第一次,比人三催四請地趕走!無誇張,係趕你走! 首先,訂枱時係講明限時個半鐘,大家同意,願者上釣合理。 去過既朋友都會知道,德記上菜速度非常快,我地6:00到,大約6:10叫餸。 到7:00開始第一個女伙記過黎叫我地埋單,我地問點解,唔肯埋住。當時枱面仲有5碟餸未食完。 1分鐘後男伙記過黎又叫埋單,我地問佢唔係限時個半鐘咩?佢反問我地坐左幾耐... 1分鐘後,另外兩個女伙記過黎收碟,我地叫住未食完,又催埋單又收嘢算點,女伙記笑笑口話元宵多人唔好勞氣乜乜乜。 再過5分鐘,另一女伙記再來,我地見都真係食晒喇,屈服了埋單。 張單未黎期間,再有另一女伙記黎,佢真係唔好彩...埋緊都仲比人派過黎催。 最後當然唔少得,喺迫夾既環境,未離座強行收嘢執枱,趕時間。 _ 及後出到櫃面,有其他兩枱食客投訴緊同樣情況,仲一早收走茶壺,即係叫你唔好坐喇。個疑似老闆既男人不段loop:「咁佢地唔啱.....係囉......真係唔好意思....」扯貓尾,如果唔係老闆落柯打,啲伙記會咁做咩? _ 唔好同我講生意難做,多客派隊乜乜乜,老實講句13人,比1個鐘你坐低、睇餸、叫、等、食,去個洗水間都唔奢望,合唔合理?呢個係咪飯店合理既服務? 咁趕我去食大家樂啦! _ 再多人排隊既日子我都有黎幫襯過,但從來未遇過呢個情況,希望只係老闆一時睇唔開落錯呢個柯打,難為左班前線伙記做醜人。 _ 短期內不再幫襯留意下食評仲有冇呢個情況先。
評分: 味道 4 環境 2 服務 1 衛生 4 抵食 5
2015-03-15
住喺附近咁耐都唔知有間好嘢喺熟食中心,網上見到介紹即刻仆黎試下,星期六十二點零唔使等位。 四款口味既餃子,送番茄蛋花湯,係咁多一心一意品嚐北方餃子。 一碟十二隻,水餃或煎餃,本身覺得太多打算叫一款但女友唔食羊我又想試羊,最終都叫左兩款,煎京蔥羊肉餃,北京豆苗豬肉水餃。 皮唔算薄,但食落無一口粉頭既感覺,而且唔膩,餡料新鮮,羊肉有香港少有食到既真正羊肉味道,回味到喺江蘇食到新鮮黑草羊肉既味道。女友既豆苗餃重點喺豆苗度,無將豆苗切得太碎,保留咬口而且食得出豆苗獨特既味道。食完無口乾,無加味精既食店值得讚揚。 果然不錯。 推介美食: 京蔥羊肉餃
評分: 味道 4 環境 2 服務 3 衛生 3 抵食 2
2015-03-07
喺面書見到朋友推介專程黎試下,七點鐘到唯一一枱客正離開,星期六黎計算淡,但無論如何黎到都入去一試。 喺門口睇餐牌都見價位偏抵食,唔使就住嗌,一人一個set。 先黎蒜蓉包,羅宋湯。 羅宋湯足料,略嫌差些少熱。蒜蓉包就正喇,熱辣辣! 再黎黑松露香菇大蝦忌廉炒意粉 呢個係朋友推介既意粉,果然無得頂,入口黑松露味道好重,之後就係忌廉,咬落意粉煙韌適中,正!份量亦算多,一個人分分鐘食唔晒。 再黎美國費城A級穀飼西冷 呢度啲餐名稱都好長...哈。 牛扒本身屬於中規中矩,但廚師手勢非常好,表面燒得少少燶邊封住肉汁,裡面肉質仲好嫩。 最後就係餐茶,點左即磨啡要加$2合理,仲好大杯,其實係太大杯,飯後唔需要飲咁大杯。 不過讚完食物,就要彈下服務,照觀察應該係家庭生意,樓面唔夠專業,對答反應笑容都要執執。用餐過程發生左小插曲,侍應喺我背後幫其他客人落汁之後唔小心倒左些少落地,本來不以為意,點知離開之後先發現原來件褸背後中晒招... 小小意見: 1. train train 樓面 2. 換好一份完整有圖靚仔既餐牌,增加吸引力 3. 除套餐外加其他類別,例如小食、甜品 4. 加啲裝飾,例如掛下「是日推介」餐牌 5. 張舖面估計係上手留落既麵檔位拆除吧,開揚啲更加吸引而且西餐廳呢個位有啲怪怪 用餐中途餐廳已經坐滿人,食物水準一流而且抵食,仲要無加一!希望長做長有,一定會再幫襯! 推介美食: 黑松露香菇大蝦忌廉炒意粉
評分: 味道 5 環境 3 服務 2 衛生 4 抵食 5
|