諾士佛臺被稱為尖沙咀的SOHO, 但範圍較細, 只有一條街. 假日西式午餐的第二選擇, 第一選擇是尖東海傍的餐廳, 兩者價錢相約, 但尖東景色宜人. 無論如何, 與人有約在美麗華, 這裡來得方便.

友人說: 義大利文 “il meglio”是“最好”之意思, 其實這條街的餐廳多屬一兩個集團之下經營. 是日午餐共有五道: 前菜, 湯, 主菜, 甜品, 咖啡.

前菜: 刁草檸檬三文魚, 刁草多用於烹調魚類以除腥味, 伴以義大利汁沙律, 開胃醒神, 三文魚上還放了幾粒魚子, 可惜三文魚鮮味不足, 略為淡口, 與魚子的濃味未能配合得當.蘑菇忌廉湯, 濃度十足, 有生蘑菇的草腥味道, 新鮮之餘有些少怪, 好味與否, 見仁見智.炭燒牛柳紅油鵝肝汁
餐牌上寫Tenderloin, 屬柔嫩部位, 價格貴. 既然好嘢, 食嫩些, 五成熟吧. 但上檯切開, 近八成熟. 中間只仍有微微粉紅, 幸好肉質本身尚算細軟, 咬落只少少鞋口, 牛排邊的脂肪不多, 香味不足, 未能連邊燒過的脂肪一起吃, 無論如何, 肉質尚佳, 只可惜師傅燒得過時.甜品, 芝士餅, 紐約款式, 只如一吋多些少的一小件, 上面放了一片八份一件的士多啤莉,份量雖少, 但貴精不貴多, 芝士味道超常濃厚.紅酒另叫, House Red, 不知名, 不知地, 不知價錢, 水果味突出, 似新世界, 不俗. 但咖啡不合格, 未加奶, 先試一口黑啡, 味道淡而簿, 奶加熱時間不足, 倒入後, 咖啡後熱度下降.公眾假期中午, 12時半左右到達,只剩門口座位, 店內明顯人手不足, 坐下無人理會, 員工臉部表情冷漠, 上菜超慢, 食完前菜, 20分鐘才上湯, 再等25分鐘才上主菜, 甜品和咖啡遙遙無期. 幸好一早買定兩份報紙, 管他三七廿一, 但不停地聽到隔離左右檯的不耐煩查詢.

遲了起床, 早餐無望, 但又想食粉麵和煎蛋麵包, 專登不行大街, 轉入細巷, 發現最心宜的半露天大排檔式茶餐廳, 全店貼滿餐牌, 其中有…特餐…快餐…, 麥太話齋, 即係早餐啦, 沙嗲牛肉麵, 連火腿奄列配牛油麵包, 特餐收廿七元, 完全一樣食物, 早餐只收廿二, 鬼叫爛訓咩, 比多幾蚊囉.

沙嗲牛肉麵, 咬落唔似大光麵, 有少少似福字麵口感, 但比較淋身, 煙韌不夠, 麵身味道較淡口, 幸好師傅煮得時間唔耐,食落口感尚算有嚼頭,牛肉顏色不俗, 淡淡的啡, 完全沒有暗淤, 望落精神, 但食落完全另一回事, 師傅落手大重, 醃到正是奄奄一息, 變成海綿牛肉.

火腿奄列, 表面看, 煎得頗乾, 全熟的樣子, 形狀成不規則半圓形, 黃色扁扁的一塊, 中間透出淡淡的火腿顏色, 心裡一沉, 又是一件煎過龍的蛋包火腿吧…, 但叉開了表面的煎蛋皮, 果然, 事情總是意想不到, 望見裡面半熟還濕濕的蛋漿與火腿絲混合, 當堂精神翻晒, 將一半奄列放落牛麵變成沙嗲牛肉火腿蛋麵, 餘下一半奄列放入麵包, 麵包入口軟熟,少少牛油香, 咬落火腿爽口, 夾著濕濕半熟的蛋汁,又軟又彈口.

奶茶, 傳統紅線圍邊和圓形厚身白色大口瓦杯, 奶味過重, 茶味太輕.

無意中發現, 用來攪奶茶的小鐵匙羹, 是早期中華航空的標誌”CAL”, 八十年代之後改為梅花圖案,近年所有航空公司都轉為膠匙羹了, 想同老闆買咗隻匙羹, 但走時多人, 忙記了.

行完K11, 行過隔離一條街: 寶勒行, 風味完全不同, 沒有K11和名鑄的豪華裝皇感覺, 全條街都是食肆, 港式茶餐廳佔了四間, 這間名為 “讚記廚房”, 只聽唔睇, 以為私房菜添, 頭頂招牌設計新穎, 耀眼光彩閃燈, 晚上應該更觸目.

非常多人的下午茶時段, 員工姐姐非常有效率地“點”了我們坐入最尾的二人卡位, 用“點”一字, 大家細意思考箇中意思吧…

餐牌設計精美, 食品圖文並茂, 友人喜歡慢慢研究, 我先落單, 揀了有“手指公”的招牌出品: XO醬海鮮炒飯, 餐飲熱奶茶, 三十六元, 友人考慮又再考慮, 研究又再研究, 考試溫書都無讀得咁仔細地最終選擇了: 乾炒黑椒牛柳絲烏冬, 連熱奶茶, 三十四元.

近幾次幫襯的茶餐廳都有此情況, 奶茶杯無底碟.., 底碟好麻煩咩? 真疑惑! 友人認為奶和茶味兩方平衡適中, 我則認為茶味欠濃, 奶味蓋過了茶味, 然而, 入口頗算順滑

XO醬海鮮炒飯先上檯, 賣相滿意, 少油, 飯身和碟都無多出的油份, 夠乾身, 飯身粒粒分名, 沒有黐起未散, 蛋絲傘開沒有一舊, 蝦屎已經切除, 蝦味不足但彈牙, 伴炒材料有四季豆, 口感爽脆, 魚柳和蟹柳, 使乾身炒飯有軟軟口感, 還有些蝦米和乾辣椒碎, 增加香味, 下午茶有此素質, 我給八十分!

老友落單的乾炒黑椒牛柳絲烏冬, 上檯時也香氣撲鼻, 但相比剛才的炒飯, 油份明顯多, 可能炒烏冬關係, 烏冬原身黐起一餅塊, 麵身又容易黐镬, 相對要落多些油來炒, 導致碟身望見都油淋淋, 烏冬咬口, 彈力一般, 不算太煙韌, 質感較實, 唯牛柳絲炒得香口, 醃粉量度不高, 尚留有原始牛肉的口感, 黑椒惹味, 洋蔥和紅綠椒絲爽脆, 熱氣騰騰, 鑊氣十足, 仍屬上等佳作, 我給七十五分

到鴨寮街買工具, 行入一條街, 就到這店, 門四小一大的麵包櫃, 放著不同種類的麵包, 以電腦打字標名不同品種, 清晰, 乾淨, 整齊, 而且隻隻又大又脹.

但今天不想吃包, 下午茶時段, 叫了餐牌上寫著的“瑞士汁炒牛河”, 上檯賣相一流, 顏色光鮮, 洒了些芝麻在表面, 挾上口, 很熱, 味道不太鹹, 河粉彈牙, 牛肉醃粉不多, 雖些少鞋口, 但有原始牛肉質感. 唯獨師傅炒得頗油膩, 食完後, 碟面仍有一層簿油.

吃完後記起, 名為“瑞士汁炒牛河”, 但沒有瑞士汁的甜蜜美, 又係巧立名目的“乾炒牛河”啫. 三十四元連熱飲, 可口不貴, 下次一定要試巨形菠蘿包.

節日氣氛濃烈, 加連威老道迫爆, The One針插不入, 等電梯都要兩輪. 自從遊客與本地人不同價的新聞後(有興趣在網上找吧), 已很久沒有去源記了, 希望轉新裝修和新形象後會改過自新吧.

下午茶時間, 醫醫肚, 一碟叉燒炒飯. 材料不算多, 叉燒五、六粒, 火腿碎數片, 蔥花一些, 沒有蝦, 沒有最喜歡的雜菜粒, 一部份飯身尚算粒粒分明, 但可能臨近聖誕新年, 師傅假日心情高漲, 炒得比較求其, 落镬時間不足, 一部份飯仍然粘起一舊未散開,顏色白白未著色. 無論如何, 整體炒得乾身少油, 入口仍算爽口, 味道不俗. 餐飲奶茶, 熱度差一些, 奶味夠重, 茶味略簿, 特細瓦杯, 唔夠喉.

值得一讚: 超強辣椒油, 勁度十足, 落些少已經不得了.

香港大學的百周年校園建成後都未回去行過, 今晚到港大聽講座, 特意早一點去遊一遊, 新建的地方, 在黃克競樓平台一直申延到寶翠園方向, 平台上的飯堂裝修完, 從身開業, 空間感變得大了很多. 到達時間, 約四時半, 來一客下午茶, 太耐無去飯堂食飯, 比飯堂的價錢嚇親, ”雪菜肉絲米粉”配“雞扒和牛油麵包”, 連奶茶, 只係港幣廿蚊, 難怪街外人都走上來用餐. 雪菜肉絲米粉十分大碗, 後來再看餐牌, 才知道原來雪菜肉絲米粉有分大碗和細碗, 嘩! 如果揀細碗未重平? 米粉當然唔係細如髮絲卻口感Q韌的新竹米粉啦, 但都入口都好爽口, 雪菜和肉絲, 都恰如其分, 雪菜顏色, 呈淺啡綠色, 尚算光彩, 鹹度不重, 口感鮮脆, 肉絲顏色, 望落精神, 肉質咬口結實彈牙. 至於整體味道就… 無謂掃大家興喇, 望到湯水顏色就有所領會啦, 唔通大家真係咁天真, 會以為用鮮雞湯?雞扒和牛油麵包, 擺放在四方長碟, 襯托頗美觀, 雞扒不算大件, 皮略略煎過, 火力不足呀! 不是黃金色, 煎得不夠時間, 望落還是淡淡肉色, 旁邊伴以淡紅色醬汁, 試一口, 味道是淡淡的蕃茄味, 切開雞扒, 皮不算厚, 但皮下脂肪不少, 加上皮煎得不脆, 無法連雞肉一起吃下, 只好除去皮後才吃. 我當然也唔會咁天真以為係新鮮雞, 但這塊雪雞又醃製得幾好味道, 鹹淡適中, 完全沒有雪味, 肉質沒有醃得過火, 口感咬落尚算軟熟牛油麵包, 麵包一睇就知係嘉頓出品, 熱狗包品種, 牛油放得奇怪, 方形一小片牛油, 打直放, 一半突出了熱狗包外, 經檢測後, 証實並非鮮牛油, 只是雪得比教硬的人造牛油. 麵包口味方面, 食過嘉頓, 心裡有數, 熱狗包, 質感略粗糙, 欠軟熟, 沒有烘熱過, 口感略鞋和粉.奶茶, 用平常茶餐廳盛白開水的膠杯, 無風味可言, 飲一口, 奶味十足, 茶味濃度不重, 尚可接受. 以廿二蚊的價格, 如此評價是否苛刻了一點? 的確係! 而且食完還可以慢慢坐上一小時, 細意俯瞰西環各式各樣的樓景, 慢慢欣賞廣闊的西環天空, 不怕大風, 走出外的坐露座位, 更可從樓與樓的罅隙中略略望到西環的海景, 微微涼風送爽, 確實寫意. 單是景色, 也應該來一個笑臉吧!

聽同事講才知道, 這問以星馬菜為主打的店, 原來背後老闆是日本人.
當日下午已過兩點, 還有午餐嗎? 侍應禮貌地安排的坐在最右邊的角位, 背後無人, 食得安落之餘, 也可以角位拍攝出店內裝潢.海南雞飯 風靡全球, 被譽為新加坡國菜, 當然試其最耍家既“海南雞飯”啦…

套餐上檯, 以黑色木餐盤, 黃色的湯, 米色的飯, 綠色的菜, 黑橙黃三色的醬汁, 很豐富的樣子, 賣相先拿一個”讚”!脹卜卜的油飯, 表面蓋得圓勻, 飯身雖然粒粒分明, 但飯身雞油不足, 沒有光亮出彩. 扒一口, 飯身較鞋口, 無米飯的彈性質感, 咬落較為粉, 但尚有微微的雞油味香,啞黃色的雞湯, 香味隱隱出來, 湯內幾件冬瓜, 冬瓜已經切皮, 煲得軟綿綿, 入口即化, 喝一口, 雞湯鮮味足. 長方形碟載著切成兩節的菜心, 陳設有些淩亂, 淥得時間剛好, 食落爽口無過淋.一碟已經去骨的雞肉, 份量十足, 切成十四、五塊, 放在貝殼形狀的碟上, 再以切了皮的青瓜條伴碟, 放上些少莞茜, 美觀大方.
先挾來試一試功夫, 雞皮不算厚, 可連皮一起吃, 細心留意, 還可以望到皮肉間尚有一點點啫喱狀膠汁, 雖不算多, 但總好過無, 咬一口不蘸醬汁試一試, 雞肉肉質雖嫩滑, 但欠缺雞味.老友認為: “海南雞飯最重要係醬汁! 海南雞係要連埋個“飯”字一齊讀, 即海南雞飯包含了 雞, 飯, 醬, 湯 四樣元素, 絕不能分開來講, 咁執著雞味, 去食清遠雞飯啦!” 好! 又俾你駁到, 就睇睇醬汁是否達標!?三小碟醬汁, 顏色分別是, 黑 黑醬油 紅 酸辣醬 黃 薑蔥醬 , 整體襯托著養眼的圖像. 三醬汁若果只能擇其一, 我會揀黑醬油, 正所謂爛gag: “黑醬油, 送飯確一流!”黑醬油質感厚身, 比較杰, 而且入口甜多鹹少, 合我心水, 我喜歡較甜的醬油, 配合嫩滑雞肉, 美味可口. 薑蔥醬, 其實是薑蓉, 因為沒有蔥花, 而且是十分”蓉”的薑蓉, 完全是糊狀, 肯定是攪拌機攪成, 然而, 沒刀切也無所謂, 但都不要攪到薑渣都沒有吧, 入口全無質感, 味道有微微苦澀, 可能除薑皮不力. 第一, 無蔥花, 原因係攪拌機攪唔到蔥, 第二, 用攪伴機攪碎薑蓉, 得出結論: “嫌麻煩”, 即係懶啦! 酸辣醬, 水狀, 十分稀, 無落蒜粒, 味道少少甜, 微微酸, 完全唔辣, 與有名無實的”酸辣醬”!本來不應該要一杯與海南雞飯格格不入的凍奶茶, 點都應該來一杯苿莉香片, 但今早未嘗奶茶香, 加上跑來時熱呼呼, 就揀了它. 奶味多過茶味, 茶味夠, 但不算濃, 飲凍奶茶要有竅門噢, 尤其是早來的凍奶茶, 放得耐, 冰溶解, 變淡, 上檯時只攪拌一次, 之後不要再攪, 溶解了的冰便永遠浮在面, 而飲管飲到的都是沒有被稀釋的底部.

本來想食漢堡包, 老闆話 “暫停供應”, 叫我改試吓 “香滑炒蛋治”. 吓! 全店主打食品都暫停供應! 唔係化?! 一邊向員工阿姐指示: ”唔記得呀? 唔再賣漢堡包喇!” 老闆一邊指著貼在牆上的招紙, 招紙印著 “非試不可-厚身香滑炒蛋治”.

好大既口氣呀, 你夠膽講, 我夠膽試, 就呢個啦! “麻煩加塊火腿添, 唔該!”奶茶, 近年多用的黑白奶公司出的瓦杯, 比傳統有紅邊線的瓦杯略為窄口和細小, 某些餐廳為了不想加價, 唯有減少份量來替代成本增加的壓力, 真係生意難做.

飲一口, 味道一般, 奶味重, 茶味濃度…. 適中啦, 不覺苦澀. 但怪怪的, 無付底碟, 要輕力攪拌, 慎防淺出, 心想, 人真是奇怪, 其實有底碟都唔應該大力攪拌使奶茶淺出啦, 但實事係, 無底碟既情況下, 係會小心地輕輕攪拌的, 人就係咁怪喇.等了三分鐘, “非試不可”的 “火腿香滑炒蛋治”終於出場, 哎呀…貨不對板呀…”, 又話厚身? 發展商賣樓呀?, 售樓時講建築面積, 收樓時變成實用面積? 件三文治細咗一半喎, 好無耐囉…無耐都要食啦, 咬一口, 麵包確實軟熟, 自少係佐敦長大, 細細個阿媽就帶我去食”澳洲牛奶公司”, 個陣時只不過係 無人留意 萬千間茶餐廳的其中一間, 炒蛋炒得滑有兩種, 一種係炒到半生熟, 生熟混起, 食落口感便覺得濕濕軟軟, 另一種係”佐敦澳洲”式炒蛋, 加入了一些流質材料, 多數係牛奶或油, 攪混了才放镬慢燴和炒至全熟, 炒出來一樣軟滑, 呢件炒蛋有些少似”佐敦澳洲”既炒蛋, 但顏色偏淺, 味道明顯偏淡.

無論如何, 火腿爽口, 炒蛋軟滑, 麵包軟熟, 縱使違反了「貨品售賣條例」, 份量交貨不足, 但質素尚可免強補夠, 今次算啦, 以後唔好再厄人喇!同場加影, 婆婆買飯記, 婆婆向老闆講, 想食雞髀飯,但又怕雞骨, 老闆好人, 應承婆婆, 替她先拆雞骨後才炸, 一讚!

近年西環急速豪宅化, 單棟式的新樓都賣過萬蚊一呎, 地鐵建成後更不敢想像, 舊式陳年老店必定買少見少.

這間不起眼, 平常過平常的茶餐廳, 由香港大學經水街往下走, 轉入皇后大道西, 門口設計為窄三角凹入的店, 玻璃窗廚並非水平而建, 而是大約二十度的角度切入店內, 莫非與風水有關?下午茶炒粉麵有六項, 炒飯只得一種: "西炒飯", 胃口唔多好, 西炒飯正合心意, 少少酸和鹹味結合.先來一杯奶茶, 不喜歡金屬杯, 冷冰冰的感覺, 話我主觀也好, 點都覺得唔及瓦杯來得夠風味, 飲港式奶茶唔同飲西茶, 個人口味認為, 濃而奶重的飲品要用厚身杯, 淡而味香的飲品宜用薄身杯, 所以, 飲”伯爵茶”, 適宜用薄薄的骨瓷杯,飲港式奶茶一定要用厚身耳仔瓦杯, 重係傳統重手有條紅邊款式, 飲餐酒都有分不同杯, 不同味道, 窄口和闊的味覺不同, 奶茶都有分別噢選用鮮藍色的圓碟, 裝上橙紅色的西炒飯, 養眼宜神, 香氣騰騰,相貌相當吸引, 不知色香之餘是否味美? 炒飯材料有蝦仁, 洋蔥, 雜菜, 火腿, 腸仔, 蕃茄, 蛋絲. 蝦仁夠大粒, 去除蝦腸, 一讚!唯師傅炒得唔夠乾身, 不過此仍”西炒蛋”的通病, 西炒飯與其它炒飯不同之處, 炒時需要落蕃茄醬,導致水份增加, 其他炒飯便不需要, 縱使如此, 這碟飯炒得尚算粒粒分明,絕無黏著一舊舊和濕淋淋的感覺, 反而飯身粘滿蕃茄汁, 口味鹹中些少酸, 酸中些少甜,開胃醒神.

[這店位於民泰街, 在紅磡黃埔新村的內街, 就算唔係開得最耐的一間, 也是排頭二三名, 其他大多數的店, 開了又執, 執了又開, 可以捱到長時間, 唔通真係夠平? 一碗其大無比, 三個餸的車仔麵, 由兩年前的十八蚊, 加到今天也不過是廿四蚊.

時間不早, 已晚上十時四十五分, 不想吃太多, 一心打算食串魚蛋和腸粉, 真是人算不如天算, 入內望一望, 俗語”鬼黯眼”, 見個個都食車仔麵, 阿姐大聲一問”要咩麵呀? 揀咗麵先呀!!”, 來不及反應, 便回答”油麵吖…” 阿姐再問: “要唔要腩汁?”, …”… 噭…要吖.”人的心理真奇怪, 只睇餐牌和親眼揀既餸係會完全唔同, 阿姐不斷問: ”要咩嘢?..要咩嘢?”, 唔好以為大聲就係無禮貌, 查實阿姐十分友善, 只不過中氣好, 比較大聲啫, 但都係有壓力, 加上親眼望到, 總覺得賣相唔太吸引. 最後, 在未完全研究清楚下, 揀了三個餸: 蘿蔔, 豆卜, 牛腩.阿姐將碗麵搦俾我時, 真真嚇我一跳, 大碗到吖…! 比我家的大湯碗還要大, 滿到碗邊只剩不夠一厘米.
調味配料任加任落, 好豪氣, 落了大量蔥花, 炸菜和炸蒜容 蘿蔔, 煮得極淋, 已經吸收滷汁味, 件件挾上手, 見到蘿蔔的角位和邊位都微微爛, 証明已經煮了很耐時間. 豆卜, 對切成二開, 一手壓下, 索一索腩汁, 咬開, 有嚼勁, 味道略咸, 油麵, 軟度適中, 韌韌地, 彈牙, 口感不錯 牛腩, 令我最疑惑的餸, 咬一口, 感覺有些少彈口, 似牛筋, 又有些少軟身, 似肥膏, 每一件牛腩都係兩節色, 分別係深啡色和淺啡色, 望落以為深啡色係瘦肉部份, 淺啡色係肥肉, 但兩節唔同顏色, 咬落的口感係完全一樣, 就係那種彈口軟身, 到底係咩家伙? 最後無食店內食具不太清潔, 但又未致於污穢, 檯面和載碗筷的箱子感覺油笠笠