好彩海鮮酒家(太子)

今日同媽咪係聯合做d野，跟住去食飯，見好耐好似無飲茶咁就上左去 3 樓好彩飲啦。佢下午茶去到 5 點，一去到就有位啦。

不過佢食物選擇真係唔太多，得好少野揀，同埋都係一D好大路既野，無咩特別既野食。

叫左個香麻花生捲，佢似係一個甜品黎架，好似D夾餅咁，入面係好多花生芝麻等等，甜甜地幾好食。不過佢個皮就厚左D，而且無味既，但作為甜品都唔錯。另外叫左個荔灣艇仔粥，碗粥份量不大，幾快就食完。而且唔係太夠味，偏淡，咁都好既好過係味精多! 入面有魷魚，豬腸等等，但都係個句... 無咩味。不過清清地要黎調和下都幾好。因為我地之後叫左個好濃味既炒麵，就係味菜牛柳片炒麵，呢個好食呀! 佢D麵唔會好硬好似個麵餅咁，淋淋地剛剛好，而且係好惹味，因為有豉椒，味菜，紅青椒等! D牛肉好淋又有肉味，好食。

最後仲有個馬拉糕同埋綠豆沙。兩個都唔錯，不過馬拉糕好似乾左少少，但味道是好的。另外綠豆沙幾好食呀，好香臭草味，又多豆，唔會過甜，不過幾細碗下。

佢有茶錢有加一，加埋都唔平架。不過算啦，我地都係旨在舒舒服服飲餐茶姐。

豪園茶餐廳(太子)

今晚行到好累好累，只係恨不得搵間野坐低休息下同食個晚飯，就係附近入左呢間豪園茶餐廳啦。

入到去一坐低阿姐話煲仔飯快D叫先，跟住諗下都好喎，因為好耐未食過煲仔飯。所以就叫左個土魷肉餅煲仔飯，再加一個粟米木瓜肉片生滾湯配米線。

最好笑係唔知D阿哥阿姐落單係咪唔寫檯號，佢地拎住個飯問邊個叫左，跟住我舉手佢就拎過黎...... 如果有兩個人叫左咁點算?

煲仔飯一般，唔係咁好食，豉油唔夠味，而且個肉餅都係偏淡無咩味。唯一感覺到食緊煲仔飯就係個陣飯焦既味道，其剩同普通食個飯無咩分別。粟米木瓜肉片生滾湯，呢個都幾清下，幾好! D木瓜好甜又唔會太淋，好好食。不過佢D粟米就好鬼酸.... 湯底都有魚湯既味道，但唔算濃，都係似味精湯多D，所以都係普通啦。

結論就係唔難食唔好食，但一定唔會主動話黎食。

板前壽司(旺角)

其實基本上我係無咩食過板前/板將，因為我唔認為佢會好食到值得我排成個鐘等成幾十張飛，所以我見到條隊都已經唔願意去食。

今日經過見到佢有D午市定食好似幾好幾抵咁，又唔駛排隊，所以我地 2 個人就入左去試啦。無哂卡位，唯有坐吧檯啦。叫左一個魚生飯定食，佢仲有生春卷同埋麵豉湯。另外叫左個韓式豚肉烏冬+壽司定食。

生春卷幾好食，因為真係有好FRESH既感覺，有蟹柳青瓜等，食落好爽口! 加埋佢同D蛋黃醬好夾，所以真係幾好食。魚生飯就勉強OK啦，魚生唔算多但勝在都算新鮮唔太差，不過我覺得佢D飯太黏，個人黎講就唔太喜歡。份量都唔小架。

壽司得 4 件，個刺身好鬼薄架咋，而且唔係用好靚既部分，但都唔難食既。鱈場蟹柳幾好食，不過解凍未夠。反而豚肉烏冬就好食喎，有好微既辣好惹味，豚肉好肥美好正，不過得幾舊。用料多，不過烏冬少，芽菜仲多過烏冬，份量真係幾細下。

不過$38既價錢又唔可以有太高既要求，下次再有新野都可以試下，不過大前題一定係唔駛排隊。=)

Antique Patisserie(中環)

食完沾仔記雲吞麵，諗住行去巴士站搭車，咁啱見到ANTIQUE，其實我上次黎已經差唔多係兩年前既事，特登入去望一望，睇下有無野買。

諗起想買件小禮物俾一個朋友，因為晏D約左佢食TEA，咁就決定買兩個MACARONS俾佢啦，因為夠靚嘛。我仲買左個俾自己添。

好多時我都覺得MACARONS真係甜到爆，所以都唔係好想買D好甜既味道，最後買左 2 個EARL GREY同一個ROSE。我剩係試左個EARL GREY，因為另外個兩個係送俾人的。

一食落去有好香既伯爵茶味漫延於口中，有D奶茶既味道，一D都唔會過份甜，實在太好了。之前食過某間真係甜到爆炸，佢個餅一D都唔會太硬，個人覺得剛剛好，作為甜品真係唔錯。

要黎送禮真係覺得好靚，不過唔知收到個個人開唔開心呢?

沾仔記(中環)

今日來到中環吃午餐，想起這只消$16元便可於中環吃個好午餐的沾仔記，便一直行行行來到了。大概 12 點到，也不停有客人出出入入，本地人也有，外國人也有，真的好不熱鬧。

另外有兩名也是獨自來吃的人和我坐在一起，我們三人也一樣，唔該一碗雲吞麵呀!

等了大概數分鐘便來到了，嘩，那三粒雲吞真係好似乒乓球咁大，好巨形呀! 麵很幼，而且爽口又彈牙，真的不錯。只是份量真的不算多，很快便吃完了，不過對於我這些常常大吃大喝的偶然吃少一點也是一件好事! 湯底很清甜，不是味精湯，我看見旁邊那位客人連湯也喝光，一滴不剩呢! 最後當然要說雲吞，雲吞皮很薄，內裡餡料充足，豬肉和蝦也很新鮮，真的很好吃。

下次要再來吃過三寶麵呢! =)

生龍清湯腩(旺角)

是晚不準備煮飯，又看見這間店子新開，便和媽咪來試試了。

大概 7 點多，客人不少，但也很易就搵到位了，阿姐們也算熱情招呼著客人呢! 想了一會，我們當然要試試招牌的清湯腩河粉，另外叫了一碗蕃茄豬膶牛肉湯飯再加一枝黑豆漿。

先來的是蕃茄豬膶牛肉湯飯，份量不少，可以看見它有超多蕃茄，是健康的食物@@ 味道不差，因為不會很淡，酸酸的挺開胃。豬膶也不錯，夠淋和入味，只是牛肉就太差了，真的丁點肉味也沒有，只有很淋的感覺，大概下了太多鬆肉粉吧。但也算是可以一吃的。

清湯腩就真的不太好了，下單時已經叫他要淋一點，來到的時候依然是非常un，有點難咀嚼，感覺像在吃瘦肉呢! 湯底感覺是味精湯，喝完是會很口乾的。黑豆漿也算有豆味，沒什麼特別，口渴的時候喝這個比喝汽水好吧。

看見很多人吃清湯腩，不知他們覺得好不好吃呢?

沙田18(沙田)

「十二‧十七‧十八」呢個標題可以話有意思又得，無意思都得，其實我只係將一D有意思既數字擺埋一齊就成為左呢個標題。

今晚，我地係十二度既十七號晚上到訪沙田十八，原因是因為慶祝我大學畢業啦。沙田18久聞其名，有人已經向我推介多次，但一拖再拖，終於和家人決定今晚來這裡吃一頓好的。於大概五天前預訂也沒有問題，由於只有三個人，所以只訂了半隻北京填鴨。

大概 7:30 來到，也不是很滿，大概只有50%滿吧，店員帶了我們到較內裡的位置，唯一美中不足的是那個位近它的另一邊出口，不時有風吹過，真的很凍呢。

等了很久很久，填鴨才來到呢! 店員也有道歉說還未可以，只是我們亦不趕時間，所以就叫他們不用急著上菜。終於望穿秋水，有得吃了! 師傅在我們面前切切切，刀工真的很厲害! 分三部分吃，店員也有詳細解釋，真的很不錯。先講鴨胸皮，店員說是沾砂糖吃的，嘩，這個真的入口即融，我們真的很好奇為何會這樣呢? 帶點點炭燒的味道，真的很不錯! 雖然它底下有一層脂肪，但食的時候是完全不覺的，因為一放進口中它就已經融化了。

另外再分鴨胸肉和鴨腿皮連肉，這個一樣沒有問題啦。後者店員建議可和蒜一起吃，但我個人覺得蒜的味道太搶了，蓋過填鴨的味道呢! 大家也大讚不錯，媽媽還說比北京全聚德的還要好吃。另外他們把鴨崧和芽菜椒絲等等混在一起再加生菜包，這個是真的很好吃，我們全部人也大讚，因為真的炒得超惹味，爽脆的生菜中和了點點辣的味道，是真的好吃的! 沒有騙你們!

另外我非常超過推薦花雕蒸鮮雞，這個是我覺得整晚最美味的食物，雞肉非常嫩滑，而且吃的時候充滿著花雕的香味，絕對沒有蒸發掉，喜歡花雕的不可錯過。它還有紅棗杞子冬菇等藥材，真的很香的。初吃第一口覺得有點淡，但待雞肉浸久一點的時候，香味就完全進了雞肉裡。店員說是用上三十年的靚花雕，所以味道絕不欺場! 這個真的是我的誠意推介。

另外我們還叫了寮步豆醬燜腩排和炒五秀。寮步豆醬燜腩排我覺得還可以，但不是特別突出，腩排有肥有瘦，有肥肉那些真的很嫩滑和香口。瘦那些也不至於很難咀嚼，也是易入口的，但當然沒有肥腩排吸引了。我覺得豆醬略嫌較淡，我想大概是酒店要將就外國人的口味，所以味道不會太濃。炒五秀是我們想炒個較特別的菜，其實它是挺好吃的，味道很清淡適合我們這些不停吃肉的人。只是它有些材料例如淮山，菱角等等吃下去很粉，並不適合送飯。馬蹄和蜜豆也不錯，很爽口和清甜，算是可以調劑一下。

它的白飯可是很大碗的，我和媽媽每人只吃了半碗也夠了，剩下的全給哥哥吃光光。不過它的碗很重呢，令我吃的時候有點吃力，哈哈。最後來了個鴨湯，其實味道是不錯的，只是不知是否有鴨尾的部分，所以有一點點羶，但是可以接受的。

原本我們還說要吃甜品，但吃畢這些東西我們每個人都非常飽了，所以最後決定留待下次。服務當然是非常好的，所有服務員整晚也是笑咪咪的，而且很詳細解釋和友善，又問我們食物好不好吃等等。吃畢每人二百多元，於酒店來說當然不算貴，我們也說下次再想食填鴨時會再來呢。=)

Monster Burger(中環)

上次食完monster burger佢俾左張 $20 現金卷我，係無限你食幾多錢的，但就一定要係11月用左佢，所以今日黎開中環又得自己一個人就決定用埋佢啦。

唔係太肚餓，我今次只係要左個包咋，要左個煙肉磨菇牛肉漢堡，原本要$36，但用左coupon只係 $16，非常之抵，嘻嘻 =)

估唔到我兩點幾去到都仲咁多人食緊同幫襯，睇黎佢都幾受歡迎，不過你問我我都係覺得monster burger係咁多間之中平衡質素價錢最好的! 等左都大概 10 分鐘個包先黎到，真係熱辣辣的，而且你見到好多料係入面。入面有成4-5塊煙肉，好似食極都有咁，D煙肉好在唔係好肥膩。磨菇都有好多架，上面有D黑椒幾香，但就掩蓋左D磨菇既香味。

牛肉依然好食，好多肉汁同有肉味，唔係好厚但因為佢已經有幾塊煙肉所以都覺得ok。個包有好多汁，但我就搞到隻手周圍都係，唔知點解我次次都好論盡。

Anyway，今日呢個包又好味，$16真係好抵食，大家得閒都試下呢間monster burger啦，真係好味架。

杯子蛋糕(旺角)

雖然這間店子在我家附近，可是我從來也沒有試過單獨買來給自己吃的。我兩次光顧兩次都是送給一群人，今天剛好又是，大概 2 點來到也有數個客人在試和買，我看了一會不敢亂買別的味道給人，所以就買了最熱門的蛋白檸檬和朱古力爆炸糖。原本想買忌廉曲奇的，不過我看見它上面的那堆cream我就卻步了。

今天買10個又是$8一個，價錢真的是很便宜的，他們還幫我們包裝好真的很好人，幸好我自己帶了環保袋去，不然又要浪費膠袋了。

最後由於10個買多了，所以我可以偷嚐一個朱古力爆炸糖蛋糕，一吃下去真的很不錯。甜度絕對OK，不會過甜，而且朱古力忌廉很香很滑。重點是它真的有爆炸糖呀，雖然不是很多，可是真的有"吱吱吱"的感覺! 朱古力蛋糕也ok，又會不會過甜，而且也算鬆軟，所以真的算不錯。收到蛋糕的人也說好吃呢!

總括來說是要挑選味道的，我自己本人真的不太願挑選那些很鮮艷顏色的，應該會有很多色素吧! 越簡單應該是越穩陣的。=)

利強記北角雞蛋仔(灣仔)

今日食完牛肉飯趕住走，又唔係好夠飽，就黎左呢度買底雞蛋仔食。無咩人排隊，唔駛 3 分鐘已經買到。個阿姐都整定哂，我一去到佢收完錢佢已經俾份雞蛋仔我。

$12一底都真係一D都唔平，不過呢$12計埋佢係灣仔呢個地域，無辦法啦。

開頭熱辣辣食就好D，幾夠脆，而且都有蛋香，不過就真係無咩內涵啦。入面係乜都無，蛋餡勁少，都唔知去唔去到一半，對比起其他就真係好似過份左D。朋友都話另外幾間都好過佢。

點都好，只係過下口癮，黎開又想食咪食下囉。

Epoch Coffee Bar and Desserterie(鰂魚涌)

最近煩惱問題多多，怎也下不到決定想不到解決的辦法，很想什麼也不理，今天來到這裡，我選擇了不停吃吃吃來逃避一下。難怪書說中國人以吃來選擇逃避問題，大概真的沒錯。

大概 3 點多來到，整天什麼也沒吃，肚子餓到不得了，店員說午餐只去到 3 點，那我唯有叫下午茶好了。有兩款下午茶，一個是烤餅，另一個是甜品。我叫了一個夏威夷烤餅，主要以火腿和菠蘿做餡，來到的時候真的不錯。賣相不小，而且面頭感覺超多芝士，好像很好吃似的。切下去時真的不錯，餅底不厚，而且亦不會太硬，很易入口。有香的番茄和番茄醬，酸酸的很開胃。再說火腿和菠蘿的餡料也不少，芝士煙煙UNUN的，非常不錯。

加$5要了杯Cappuccino，覺得細杯了一點點，很快就喝完了! 可是卻是不錯的，奶泡算很滑，而且也非常厚呢。表面有些可可粉，更添甜味，不過咖啡香倒是略嫌不夠了。

吃完的時候，心情仍是很差，最後決定再要一個甜品。想了一會要了一件Opera，朱古力很香濃，而且還有淡淡的咖啡香。只是我覺得蛋糕濕了一點點，變得感覺怪怪的，但整體來說味道也是好吃的!

看見有明星在影相做訪問，可是我想極也想不出他的名字。想不到在平日下午茶時段，這間店子也挺多人幫襯的，下次有機會再來試試它的午餐。

唉...... 明天便是要下決定的日子，我會努力的!!!

King Ludwig Beerhall(灣仔)

今晚我地返完hku拎gown，一早book左檯食飯，我book左8:30，點知我地8:10就去到。問阿姐可唔可以早少少有檯，其實我完全無催佢既意思，點知佢勁激動講一輪野，叫我等等，我覺得其實佢可以冷靜少少。最後我地都係要等到8:30，阿姐話唔好意思，其實又唔關佢事既，係我地自己早到姐.... 唔通我個樣好惡咩?

今晚好多人生日，佢有live show架嘛，我地成晚要keep住唱happy birthday，唱左好鬼多次，多人都唔緊要，但坐我後面檯客真係嘈到爆，我地係keep住要好大聲講野，有少少辛苦。

同學仔想叫酒飲，但我就唔係太想飲酒，因為呢輪皮膚都已經唔係太好，所以最後佢地叫酒，我就叫左杯Summer Drink - MangoTango，哈哈，佢係芒果汁，七喜幾樣野溝埋，都幾好飲架，好冰凍，有d好微細既冰粒，唔會太甜，又香芒果味，gd!

我地叫左個酸希靈魚配蛋沙律，d希靈魚好酸呀，但我又覺得酸得黎幾好味，因為幾肥美架，但朋友就麻麻地鍾意話覺得腥同鹹左D，我覺得OK呀! 蛋沙律下面有好多紅色一粒粒，食落去有D似莓既物體，呢個就無咩特別，普通既蛋沙律咁，唔會難食。

之後就係MAIN COURSE啦，首先係德國腸拼盤拌燒薯、酸椰菜及薯仔沙律，其實我又唔係太識得分d腸仔係邊隻打邊隻，不過普遍都係好味的，有一隻食落去有好多芝士流出黎，好正架。 D腸仔通常都係過鹹，好彩有D酸椰菜可以調劑下個味道。我覺得薯仔沙律幾好味，味道適中，亦唔會有好滯既感覺。

脆皮燒豬肘配酸椰菜及薯仔，服務員幫我地分左 7 份先放上檯，真係細心，個皮好脆，不過脆到有D過頭，好鬼硬。肥肉不多，啱哂我地，朋友話佢係德國係唔係燒係焗既，而且更加大份好多，同埋佢話呢度鹹左少少。不過我覺得都ok呀，肉質又嫩口，點甜芥辣食下真係唔錯。食完都已經飽哂。

仲有個牛尾肉醬汁天使麵，份量比我想像中小，但食下食下又差唔多。天使麵好滑，但我覺得個醬汁少左d，變左有d麵好淡。有d細細既牛尾粒好食，好鬼入味，牛尾整得好真係好唔錯架。最後我地仲有2個甜品，軟心朱古力蛋糕同埋蘋果酥餅，2個都唔差，但又唔可以話好好食。個朱古力蛋糕入面係軟心，但唔會有朱古力流出黎架，不過佢焗到出面個層脆脆地幾得意。蘋果個個佢有好多藍莓係隔離，不過覺得有d似藥水味，哈哈。

埋單每人都要過二百蚊，都唔平架，但事實上我地都食左幾多野。服務可以接受，但環境就真係嘈到拆天咁......

Bubble Factory(天后)

係隔離食完日本野，距離下個工作仍有一段頗長的時間，唯有找個地方坐坐看看書。走過幾步看見這間小店，它門口有個牌寫住買咖啡送一款任選朱古力或者MACARON，好似唔錯咁喎，咁就入左去啦。

入到去店員解釋如果唔送朱古力，可以選擇加$20買一件蛋糕，又或者買第二杯咖啡半價。最後我選擇了要杯大的Cappuccino，因為價錢相差幾蚊而已，同埋要了一粒Chocolate Macaron。

等了一會咖啡與Macaron也好了，先試咖啡，真的頗苦，最後我加了一包brown sugar，但也沒有什麼作用似的，依舊是苦。它除了偏苦外，還不太香，奶泡算是厚的，可是不滑而且有很稀的感覺，總之要我簡單的說我就是覺得不好喝。雖然我不太懂評價，不過可能和之前喝過的有比較，真的麻麻地。

Chocolate Macaron也不太好吃，很硬很難咬，朱古力味不算濃，總之也是不太好吃。我坐了個多小時也沒有人光顧過，是在我差不多走時才有人進來光顧，他們最後應該有買吧我相信。但我想要我再來應該也沒什麼機會了。

一町目日本料理(北角)

今日係炮台山做完野，沿住電氣道一直行行行，鬼咁肚餓，只係想快D坐低食個LUNCH，見到呢間日本野午餐幾平，好似幾好咁，就入左去啦。

Lunch有多款選擇，價錢由四十幾至九十幾不等。我有兩樣野想食，第一個係牛肉火鍋，第二個係壽司定食，最後我選擇左後者。等左大概10分鐘都唔駛就有野食黎啦。原來壽司定食有碗烏冬跟。個烏冬個湯幾好飲，清清地，相反個烏冬就一般啦，唔彈牙，無咩口感。

但個壽司定食幾好喎，有大概十件到，賣相都幾靚呀。刺身解凍得剛剛好，好多時刺身解凍得唔夠好難食，而且佢D刺身亦都算肥美，真係唔錯。個人覺得大部分都好食，例如瀨尿蝦，三文魚，醋鯖魚等。油甘魚最正，又肥美又甘香，唔錯! 個玉子都唔差架，佢唔會過甜，而且佢有D醬汁，食落去好夾。

食完個定食，佢仲有粒糯米糍送添，係芒果味。埋單$52，唔收加一，真係一個唔錯既選擇。我走既時候大概係一點幾，出面都有六七個人係度排緊隊。下次再黎食下佢個牛肉火鍋先。=)

陳記燒鵝粉麵茶餐廳(太子)

今日做野做到 4 點到先正正經經坐低食野，同媽咪兩個人黎左陳記食下午茶。佢D下午茶都有幾多唔同既選擇，我地都幾肚餓，所以就叫左炒飯同麵，都唔算特別平，下午茶都要$27架。

起初我們進去時店舖內無咩客人，只有一兩檯後，我們坐下後客人變得越來越多，後來的客人還要搭檯一起坐呢。我們叫了一個深井炒飯 + XO醬平炒牛河。先來的是炒飯，炒飯一來到相當香呢，可是份量不算特別大，但材料卻看出非常豐富，有很多叉燒和燒鵝。炒飯很乾爽，吃下口時很香，燒鵝頗有肉味，不過有點點過鹹。不知為何吃到一些類似蝦醬的味道，吃下去是挺香口的。

再來的是XO醬干炒牛河，老實說不太見到也不太嚐到XO醬，一點香和辣的感覺也沒有。份量頗大，不過實在是肥膩到不得了，吃到底時見到那些油也驚。整碟河粉偏淡，牛肉不多，不是特別好吃。

不算特別差也不算好，看見身邊很多人吃燒味飯或河粉，下次有機會再嚐吧。