卡拉奇 (葵涌)

一次放假四圍行，居然發現葵涌都有個南亞小社區，短短一條小街，就已經有兩三間中東食肆及雜貨店。見到門口餐牌幾吸引，仲要係南亞人煮理，直覺一定唔差得去邊，就入去試一試先。
點咗燒雞Kebab,羊肉黃薑飯同masala tea。當中羊肉黃薑飯味道最出色，羊肉冧、有肉味，黃薑飯用各種香料煮成，見到的有肉桂，丁香，黃薑粉，酸梅，辣粉，香料味道平均，黃薑粉份量剛好，只取其香，不會放太多以至有苦味，飯好明顯有炒過，粒粒分明，乾身，油份剛好，辣味令到飯有香口感，但又不太搶喉。
燒雞kebab不過不失，燒雞不是香口那種，有點乾，但因為有其他醬汁，所以可以平衡返。
Masala tea滑，但香料味不夠，可以再濃些就更好。
小店家庭式經營，老板，員工各人友善，有機會一定再嚟！

木槿花韓牛專門店 (中環)

朋友生日，請佢去食個韓式烤肉晚餐。選木槿花，因爲之前朋友提過想去，仲因為嗰度有生牛肉他他。兩個人理所當然點了兩份晚餐，先上一個沙律菜，芝麻醬配新鮮沙律菜，芝麻醬味濃，沙律菜新鮮，一度好fresh的前菜。
之後上雪濃湯，熱辣辣，牛骨味濃，仲有三大片韓牛，份量估唔到咁大，如配一碗白飯已可以成一個午餐，飲一碗已好滿足。
上完湯，立即來一道生拌韓牛，本人未食過全生牛肉，食前都有啲驚受唔到，但試一口後，又沒有那種血淋淋的味道，生肉拌上雞蛋蘿蔔絲青瓜，口感又唔似食生牛肉，份量之大，又係如來一碗白飯，已經是一個午餐。
接著，驚喜繼續，又上了一道午餐份量的燜牛肋骨，有好幾大件，味道甜甜的，牛肋骨燜得好淋，好入味，餸鈑最好，因為驚食完牛肋骨會太飽食不到燒肉，所以食一件牛肋骨之後，餘下的要打包。
之後，主角出場，烤肉除有韓牛後腰肉外，還點了牛舌，美國牛仔肉，牛小排及肉眼。咁多款肉，除牛舌不好之外，其他肉質都好好。牛舌怪是因為佢連牛脷胎切，脷胎硬硬的，感覺不好。
最後，甜品是紅棗蜂蜜，好潤，好飮。
其實兩個晚餐足夠三人食用。是日晚餐真係好飽好豐富。

祥興記上海生煎包 (灣仔)

路過譚臣道，被門口一大鑊生煎包吸引，望一望門口，細仔睇一睇，米芝蓮推介喎，就試一試佢睇吓有幾得。叫了一客生煎包，熱辣辣，朋友搶先取一個咬一口，堅爆汁，爆到一枱都是湯汁，我輕輕咬一口，來慢慢啜生煎包內的湯汁，又真係好味喎。總括來說，包算薄，湯汁多，有肉味，作為小食很不錯！

川婆婆麻辣燙 (尖沙咀)

收工要OT，同事去川婆婆買麻辣麫，麻辣麫就冇我份，但送既辣魚蛋就請咗我食，魚蛋彈牙又夠麻，好味喎。不過因為佢係魚蛋之上再加辣粉，所以有啲乾同搶喉，如果可以咖哩魚蛋咁，有啲汁就好好多。

泰簡單 (銅鑼灣)

舊同事同我慶祝生日，去了泰簡單，好耐以前食過一次，覺得一啲都唔好味，但今次再食，唔同晒，好幾好味幾啱我口味。

叫了冬蔭功、沙嗲串燒、炒通菜、咖哩、燒牛肉沙律同炸蝦餅。

冬蔭功夠辣開胃，辣得來又不會搶喉。燒牛肉沙律酸酸地，辣辣地，牛肉半生，又係一個開胃前菜。炒通菜有鑊氣。沙嗲串燒，沙嗲汁有椰香，少少甜味，不錯。炸蝦餅夠脆，蝦餅彈牙，好味。仲有一個咖哩，咖哩香滑冶味。今餐好滿意，之前唔好既印象抹走晒。