漁場台風 (旺角)

本來已經係荃灣台風拉麵既fans
一聽到旺角開左分店 只知道地址就走去試
本來一般餐廳分店都會比本店失色
但對漁場台風絕對唔係
首先餐廳格局比荃灣舒服得多
燈光較柔和 而凳亦無本店咁高 坐得更舒適



由於新開張 客人都唔係好多
亦見到部分荃灣店既師傅黎左幫手

而到主角 - 拉麵 - 亦同本店有分別
日間只賣沾麵 而到夜間就賣湯麵
今次我地食既分別係本店無既 鏗魚豚骨湯 同埋 海蝦湯

海蝦湯既湯底非常濃郁 而台風一般麵既分量比其他拉麵店為1.5倍
平時係未必食到 但因為今次湯底實在太好味 居然響唔太餓既情況下無食剩


而鏗魚湯就一定會受熱愛魚介湯拉麵既人喜歡
如果唔想試新既 可以先試呢個
而本來荃灣店既叉燒經常都會被話太鞋
分店既叉燒做法同荃灣店完全唔同
叉燒改為薄片 （只係比荃灣薄 唔係真係好薄個隻） 入口即溶 非常美味！！
而溏心蛋亦維持一貫水準 好好食

總括而言 旺角店比荃灣店有過之而無不及 
非常期待下一次去試沾麵
如果唯一美中不足就只係旺角店唔可以選擇麵既軟硬度 希望之後去會有得選擇喇 

岩手拉麵 (旺角)

平時真係好少寫食評
不過唔寫唔得 今次真係好中伏

叫左一個九洲拉麵 一個味噌拉麵
份量少已經唔多講 兩個湯底都非常淡
完全無豬骨湯應有既味道
飲得出個湯唔係煮出泥 而係撈出泥

另外叉燒又係另一失望位 
雖然肥瘦均勻 咬口唔錯 但只係食到好"蘇"既豬肉味 

隻蛋亦無任何味道

最後只可以讚waiter好有禮貌 服務幾好
但野食真係唔好食 唔會再去

妹記大排檔 (尖沙咀)

估唔到妹記可以訂枱! 為左唔洗等就梗係一早訂左枱
點知去到7:30pm 都係冇咩客

以前泥過幾次 當然鬼馬油炸鬼就少不免喇
仲叫左魚香茄子, 沙嗲牛肉粉絲煲 同埋 黃金蝦
味道泥講,魚香茄子冇咩魚香味,沙嗲牛肉粉絲煲好少沙嗲味
黃金蝦一炸出泥都唔錯.但係真係唔夠惹味 一凍左就更加唔好食
另外鬼馬油炸鬼唔知係唔係因為原材料貴哂,佢既粉比以前厚左好多呀

價錢泥講佢真係好平 但係野食質素好似愈泥愈下降 希望下次去食既時侯會變好喇....
.

豚王 (尖沙咀)

之前已經去過中環豚王食 排左好耐隊但係真係等得抵

今次打算去尖沙咀近D食豚王
去到門口 一個人都冇 入面仲有幾多空位
都估到冇咁好食架喇
最後決定叫 1個黑王1個翠王

一上枱 個層油厚到......
食落口 湯底同中環豚王差太遠喇 今次只係感覺都一陣油味

下次都係唔好貪方便 去番中環食好過

北口韓國地道小食 (尖沙咀)

其實已經係第2次泥食架喇! 呢間舖既位都算好辟下..上次都係有朋友帶我泥先識泥
本身間舖頭好細.可能只係坐到15人.上次我泥等左位一陣.同埋重點係我地4個人.根本冇一張枱係可以坐到4個人既.大家要留意一下.
好彩今次下午4點泥.冇咩人.唔洗好似上次咁等位!

今次第2次泥叫左 甜酸雞球同埋 迷你飯團 雞球我上一次已經食過架喇! 其實今次番泥再食完全因為佢!
太好食喇.酸酸甜甜既食物我食得多.呢一個真係數一數二最愛!
佢既肉質勁鮮嫩又多肉汁.仲好熱TIM! 呢個我上次都食過架喇.因為我怕就咁食雞球會太咸所以叫左泥送雞球. $15/3粒好平呀!

佢其實仲有其他野食我上次都食過..
公仔面我本人就覺得還可以.唔係佢唔好食.而家我覺得出街食公仔面...唔係太慣
佢有D魚串同埋炒年糕都同真正韓國街頭既一樣.想去韓國又未去到住既朋友可以泥食頂一頂癮

最後佢地全舖得3個人.一個廚師一個洗碗一個waitress.
服務好好.即叫即整.D野食都好快到.
同埋佢地平時同韓文溝通多架
廚師係真正韓國人 難怪食物味道既質素咁高 而且價錢實在太大眾化!

一定會再去!