今晚同爸爸去食峰呢間日本野，幾次嘅水準都一樣keep住，環境乾淨，係值得再去嘅餐廳。😙


個人黎講我好中意南瓜，而呢碟煎南瓜無咩特別，屋企都整到，不過不失。🙎


唔太中意食蠔嘅我都比呢個吸引到！上面果層鹹鹹甜甜嘅味噌醬好濃好香，但同時唔會遮左蠔嘅味而互相襯托，好味到連汁都舔埋😛。


好似我呢啲芝士愛好者一定唔可以錯過嘅芝士薯波！外層香脆，內裡係熱騰騰、融入左芝士嘅薯蓉，足以拉出一縷縷芝士絲。淋上適當份量嘅甜醬、沙津醬，再灑上芝士粉同木魚絲，滋味溶入心扉。😌👍


牛舌係一樣偉大發明，加上烘過嘅芥末，本身刻骨銘心嘅攻鼻消失左，淨返清清淡淡嘅芥末味，我先知芥末係禁香口！呢個青芥牛舌好值得試！😋


雞翼嘅做法多不勝數，點整亦都好食，而呢款就好少見。塗上醬油嘅表皮烘得微燶，香甜味更突出，加上檸檬點綴，但非常清新嘅味覺享受！☺️

最後叫左個煎鵝肝蛋飯，無咩特別，只係將太陽蛋、鵝肝同飯放埋一齊😅。

  整體我都好滿意，大家可以一試💁。

曾經我都去過呢間甜品舖，好中意，所以今次再度一訪。😙
  啲員工比我嘅感覺係熱情同親切，會同客人有交流，比起連鎖式甜品舖更有人情味，呢個亦係我再黎嘅原因之一。😊
 佢遞左個menu比我，好多選擇得黎，甜品創意亦爆燈！資料亦詳細，圖文並茂寫明有咩料👍。

雪糕布甸胚芽好立克冰露，第二次黎又再點過😍。顧名思義，最上係Dreyer's香草雪糕，下面係胚芽好立克沙冰，配上粒粒焦糖同牛奶布甸點綴。我本身唔係特別中意好立克，但呢個沙冰有淡淡嘅清香，甜度恰到好處。雪糕沙冰布甸，三種口感，十份滿足🍨😋。男女老少都啱食！


新推出綠茶心太軟，啱哂我呢個綠茶愛好者😝👍👍！未上枱就開始聞到綠茶味，上枱唔夠10分鐘就食哂😂。一篤開個蛋糕，一陣濃烈嘅綠茶香溢出，綠茶醬湧現。沾上綠茶醬嘅綠茶蛋糕，令蛋糕不到於太乾。脆脆嘅表面，軟熟嘅內心，蕩熱嘅熔岩，滿食道嘅綠茶味，滿足😌。雪糕紅豆同蛋糕一齊食亦另有味道，用糖水煮嘅紅豆果依舊保存並散發獨有嘅味道。士多啤梨甜甜酸酸，難得唔似出面果啲酸到面容扭曲😚。
  
  品嘗完甜品，佢地都會鼓勵客人填寫意見表，重會送張會員卡。佢地力求完美嘅態度的確埋下我再一次黎貴花甜嘅衝動。🏃

以前去瓊華都只係唱k，今次就去左呢間牛角日本燒肉專門店同朋友慶祝生日🎂。一出升降機就有唔少人等位，7點幾出到黎都預左等好耐，但半個鐘就有得入座，比想像中快👍。
  環境好乾淨，光暗亦調較得啱啱好✨。點左嘅野食都好快上枱 。



  牛肋肉上枱，我就興致勃勃㚒落去燒，重好快熟😄。我怕屙，所以煮到6,7成熟。食落囗，果下牛肉嘅香味好濃，好煙靭有咬口，油滲透個口腔，真係齒甲留香。😌👍🐮




薑蒜豚燒肉，一放上爐就開始彈油，可想而知佢地有幾肥🐷。豬肉就要煮熟啲，燶少少都唔緊要，脆脆地好香嘅豬肉味，出奇唔會好油膩！😋👍🐷


牛油帶子，鮮味同牛油簡直絕配😙👍懶醒，亂燒，笨手笨腳，下次都係唔好心急睇清楚個煮法😂。

爐中嘅芝士雞腿肉，肉嫩滑，富雞香味。遺憾太早放上芝士熔岩碗，燒到燶同乾哂😔，又係唔睇指示嘅禍😭。



石鍋香蔥拉麵，唔係拉麵專門店，所以有啲遜色。拉麵太淋，無𡁻口而且無咩湯，唔講重以為係撈麵😅。完全無蔥味，淨係得芝麻香味。唔推薦😕。


掛住食唔記得影嘅厚燒牛舌，成晚最深刻😝😍☺️。上枱嘅時候見到係相中大小嘅一半，有少少傷心😢。熟左未吹涼就立即食😆。哇...不得了...軟熟得黎不失少許嘅爽口，同時又有韌勁(矛盾，但的確如此)，好易入口，牛舌味沾上燒汁味瀰漫口中，久久不散。必食！😌👄👅


牛腹胸肉，比牛肋肉較韌，但唔會𡁻得好費勁，個人認為呢個同牛肋肉味道不相上下，但更喜歡牛肋肉的柔軟。同樣推薦。😉👍

  雖然份量唔多，但重質不重量，食材新鮮味美，環境舒適，價錢亦算抵食，絕對係日本燒肉嘅首選。

有次同朋友行完街好熱出哂汗😅，諗住食下甜品涼下，就近近地去呢間糖百府。
坐低想叫杯凍水，個職員話得熱水，難免有啲扣分。🙈
  由於唔係繁忙時間，好快就黎左個宇治金時綿綿冰(同朋友share)。個樣就幾大幾令，食左一啖就知伏😱。
  雖然做到綿綿地嘅口感，但完全無清香嘅抹茶味，反而係一種腥溫溫嘅怪味😩😩😩。我去過日本京都(近宇治市)，食過果到嘅抹茶產品(特別係雪糕)，所以知道真正嘅抹茶味係香濃而不甜膩🍵😋，令人難以忘懷，但香港唔少甜品店都做唔到接近嘅水準😔。
  另外，紅豆就太甜，我估係浸過糖水，所以紅豆嘅香味都出唔到😕。而小丸子就太硬，𡁻左好耐，重痴住啲牙😲。
   雖然我朋友覺得可以接受，但我對糖百府大失所望(其實唔止一次)，無下次。🙊🙊🙊