星期四中午，剛好放假去半山探朋友及剛出世既BB。離開後，我地就係中環半山閒逛兼覓食，在半山寧靜街道上看到一間特式意大利餐廳，以外國鄉村感覺為裝修概念既西式小餐館及生蠔專門店，從玻璃望向餐廳裡面，感覺一種輕鬆和悠閒既感覺，正好適合放假既心情。 看看餐廳menu，set lunch選擇非常多，共12款，價錢由$72 - $88，set lunch包括餐湯，仲可以加錢配餐飲品及甜品，最後決定試試。首先來餐包同餐湯。餐湯有蘑菇湯及羅宋湯，蘑菇湯蘑菇味好香濃，食落去到粒粒蘑菇，有咬口。羅宋湯味道鮮甜濃郁，略帶微辣。而餐包就係法式麵包。 C.鵝肝醬焗豬扒飯 鵝肝醬焗豬扒飯，有鵝肝醬、肉醬及豬扒，味道出乎意料的夾，豬扒鬆軟多汁，醬汁香濃，味道豐富有層次。 F.免翁牛柳伴意粉 配上意粉及沙律菜。雖然牛柳叫左七成熟，但又腍又好吃，牛肉味濃。主要係個餐唔貴，性價比黎講都幾高。

香港人喜歡吃拉麵，連鎖拉麵店林立，但我比較喜歡小店既風味。今日lunch朋友話去東大街試下呢間，因為我最怕排隊，所以等到2點後先去，避開午市排隊人潮。 我地每人order一碗拉麵，一碗係九洲地獄拉麵、博多黑蒜油拉麵，口味可伙選擇湯底濃淡、麵質軟硬、多蔥少蔥。
桌上既調味料，最左邊既炸蒜蓉，配埋拉麵好惹味。 博多黑蒜油拉麵 ~ 有叉燒、木耳、紙菜，湯底係濃厚黑蒜油豬骨湯，黑蒜油超香！叉燒入口即溶，肥瘦適中，加埋黑蒜油香味真係不得了。至於麵身，係我喜歡既幼麵，麵質有咬口，絕對可以encore哦！ 九洲地獄拉麵 ~ 雖然好想食辣，但又怕太辣既關係，所以要求小辣，作為嘗試點。都有叉燒、木耳、紙菜…..湯底雖然辣，但唔會蓋過豬骨湯既甜味。 依個價錢有依個質素，真係非常超值！一定會有下次 ~ 睇返D相都想再食。

上個月去完名古屋旅行，可惜行程太趕，去唔到居酒屋食串燒。一直耿耿於懷，決定返香港要瘋狂食返夠數！呢間位於東大街既小店，開業多年，經過幾次想試，今次就揀呢間試下啦！餐廳面積需小，店內掛滿手寫既餐牌，有種日式家庭小店既感覺。 星期六正值午飯時間，餐廳提供午餐 (午餐由 HK$68–HK$98)，由日式定食到西餐都有供應。不過今天我們的主要目標，是一眾串燒，我們點了招牌串燒拼盤A及B餐。  招牌串燒拼盤A 食肉獸必點，有鹽燒雞中翼、黑豚五花腩、牛仔骨，再配上紫心蕃薯蓉，及沙律。牛仔骨真係好厚肉，燒得剛剛好，唔會咬唔開，一啖咬落去牛肉油花慢慢浸出香氣，非常美味。紫心蕃薯蓉香甜，比起一般餐廳提供既薯蓉，更加特別，更加出色。 招牌串燒拼盤B 串燒除了燒肉出色，蔬菜串燒也是必食。拼盤B有煙肉荔枝卷、脆皮豆腐、日本蕃薯仔、露荀及沙律。煙肉荔枝卷，鹹鹹煙肉特出荔枝香甜juicy，露荀新鮮爽脆，脆皮豆腐外焦內嫩，必定會再嚟食。

雖然我唔係食得好辣，但我一向都鍾意同朋友四出找尋麻辣美食，享受食完大汗淋漓既感覺。之前有朋友介紹左依間餐廳，今個星期特登過嚟銅鑼灣試嚇。 先講個四川擔擔麵，係四川傳統式乾撈。初初食既時候覺得唔係好辣，但麻辣味慢慢滲出。麵質彈牙，醬汁味道唔錯，麻味充足，仲有我最鍾意既蔥花。 點了一客麻辣雞翼，用了很多四川調味料醃製，味道很香濃，帶點微辣，非常惹味。 不一樣的明蝦～一道很特別既菜式，大量青蔥、芽菜、小豆苗、明蝦球，加上酸辣汁。我依位青蔥愛好者，當然非常喜歡！ 簡單形容為大腸版辣子雞。首先看見大量既辣椒就認為一定很辣，其實只是充滿著香辣味道，大腸炸得香酥，一旦試過，必定愛上食辣。 一碟出色既炒通菜，色香味三方面缺一不可。通菜配合炒香既辣椒乾，惹味醒胃，送飯首選！ 水煮石斑魚既精隨在於鮮嫩既新鮮魚肉，配上又香又辣既湯底，麻辣、嫩滑、鮮香合一，一下子就把白飯清光。 

近來與朋友愛上食拉麵，試過多間不同既日式拉麵店。今日就趁來星街探朋友，先來灣仔試一下幸屋拉麵。 有別於一般小店，店面很大、座位舒適、充滿和風感覺，到處放滿日式小擺設，裝潢別有心思。 我們點了一份「胡麻王」、「玄武王」冷沾麵、豆腐沙律及明太子雞翼。 這裡主打超濃豬骨湯底。果然是招牌湯底，湯底濃稠，以豬骨熬製十多個小時出來，才有那麼香濃而不油膩。
「胡麻王」~ 濃湯配大量黑芝麻，更能突出豚骨湯的香濃味道，溏心蛋醬油浸到很入味，叉燒薄薄的，肥瘦均勻，入口軟綿，肉質嫩滑。 「玄武王」冷沾麵 ~配料很足量，紫菜、肉醬、木耳絲、明太子、溏心蛋，配上豚角煮。而沾面既湯係凍的，帶點酸甜味，好開胃，非常適合現在熱辣辣既天氣。 豆腐沙律 ~ 蔬菜新鮮，配上胡麻沙律醬，非常清新。 明太子雞翼 ~ 個人特別鍾情明太子，香香辣辣，無得輸。

已經唔係第一次來Burger Joys，上個月lunch經過，買左個外賣試下，非常驚喜，一直對佢念念不忘。今次決定帶埋同事一齊去食個late lunch。 餐廳位於灣仔酒吧區，所以裝潢與酒吧相似，另外更有酒精飲品提供給顧客選擇。 我地點左一份特式雙層芝士牛肉漢堡、芝士薯條、經典水牛雞翼、一杯朱古力奶昔和橙汁。 漢堡上層有酸瓜、紫洋蔥、番茄和生菜，蔬菜非常新鮮；牛肉漢堡以100％美國安格斯自家製成，而且火候十足，所以外皮微脆而內裡嫩滑，super juicy。加埋濃濃芝士片，非常惹味！  入到去有得食漢堡包嘅店，又點少得薯條。芝士醬非常濃郁，份量剛剛好，唔會太少芝士 (因為食到一半通常就會冇晒芝士醬，得返啲薯條)。 但最令我覺得好食既，仲有佢既水牛雞翼，醬汁非常濃烈，味道酸中帶辣，係美式傳統味道，香口惹味，包你食到停不到口。 朱古力奶昔有一層厚厚既cream，唔係好甜，但又做到濃濃朱古力既感覺，而且仲要好滑！

今日約左朋友到中環樓上舖揾食，朋友係中環上班，佢話帶我去食一間超正既越南餐廳，浪漫一番！ 入到餐廳，就感受到濃濃既法式情懷！越南曾經受到法國的統治殖民有六十年之久，於越南菜味道裡總會感受到法國味。所餐廳以法式裝潢配合現代美術來表現出新派越南菜既感覺。 嘩！非常華麗既menu，令人十分驚喜。 特強宿醉製 (法式火車頭金邊粉) $188 新派越式火車頭 (淨係個presentation已經非常吸引)，有安格斯牛肉、崩砂腩、牛丸、牛柏葉、油炸鬼、虎蝦等配搭來自越南的金邊粉，真係啱曬啲牛魔王。崩砂腩夠冧、牛肉片嫩得入口即化、牛丸爆湯，牛栢葉夠爽，虎蝦肉厚，牛肉湯清甜濃郁！仲可以加入九層塔、生豆芽放入湯裡，最後擠入青檸檬汁，喜歡吃辣椒的還可以加辣椒碎。 芒果軟殼蟹米紙卷 $88 軟殼蟹香脆，薄薄的米紙煙煙韌韌有咬口，加上新鮮芒果的酸甜味，清新又開胃，而且份量也不少呀。 櫻花蝦遁地通菜 $68 追加龍蝦肉 $10 通菜最緊要夠新鮮才會爽口，加上香炸既櫻花蝦，惹味非常！ Fresh Lime Soda $28 & Young Coconut $48

今個星期放大假，決定唔外遊，好好留在香港休息。
放假最重要既事係：約朋友食飯同放鬆一下自己！難得有假期，絕對要把握機會同好友聚舊，揾間有Live Band既餐廳  ，係假期chill爆佢！ 想欣賞音樂表演之餘，又有西餐食﹖我地決定去銅鑼灣行街shopping後，去Woody好好享受一頓豐富既晚餐。Woody有歌手現場獻唱，仲有歌紙比大家揀歌點唱，非常適合與另一半慶祝生日，可以點番首情歌送比佢。 黑椒肉醬辣肉腸意粉 $76 意粉係扁意粉，很有咬口，以辣肉腸、三色燈籠椒、茄汁肉醬一齊煮，味道酸酸甜甜，非常濃郁。 櫻花蝦餅 $58 櫻花蝦餅係廚師推介，一上枱已有香濃既炸蝦香氣，令到我食指大動。櫻花蝦餅係以新鮮蝦膠黐上滿滿既櫻花蝦，油炸至香脆後，再放上蟹籽，入口又香又脆，蟹籽又卜卜響，真係非常惹味，係我至愛。 Woody's燒春雞 $138 出餐上枱時，我地"嘩"左一聲，燒春雞造型已經贏晒。燒春雞係即叫即燒，所以待應之前已通知我地要等20分鐘，但係值得既。燒春雞新鮮出爐熱辣辣，一手撕開，滿滿既肉汁已經滴出，雞肉嫩滑又juicy，真係好好食！燒雞下面仲鋪滿薯菜，薯菜吸滿肉汁味道，真係雙重享受。

天氣寒冷，我和另半都想吃火鍋，特別喜愛麻辣火鍋。近來很火紅既麻辣火鍋，當然係養心殿，旺角分店晚晚大排長龍！我地早一個星期預約，去到仲要等10分鐘清枱入座。企係門口等入座時，已經聞到濃濃既火鍋味道，已經令我食指大動。 養心殿裝修間隔別緻，以古色木框間房，每台都很有私人空間。 養心殿總共有6款湯底選擇，包括麻辣鍋、酸菜白肉鍋、養生鍋、寧神養心鍋、秘制薑母鴨鍋、美人鍋。今日我地首選當然係麻辣鍋，另外仲想試下寧神養心鍋。選擇鴛鴦鍋的話，就會以高價錢湯底收費。 麻辣鍋配以多種香料及藥材，聞到都好香麻辣味，內裏有鴨血及凍豆腐，額外再送一份鴨血，鴨血已經預先與麻辣鍋煮好，只要煮一陣就可以，吸收了麻辣鍋的精華，非常惹味。 寧神養心鍋以川芎、白芷、天麻、當歸、鮮鷄、豬肉及魚餚製而成，我地滾起時先飲碗湯，帶有陣陣藥材味，非常清甜！ 座位附近仲擺放了自助醬料區，供食客自由添加享用。 極上雪花肥牛$188，雪花好靚，好新鮮，牛肉味重，非常肥美。 炸午餐肉$58，同一般火鍋午餐肉不一樣，因為炸過，特別香口，吸湯能力更高。 寬粉條$38，火鍋必點配菜，寬粉條能吸收湯底精華，太正。 台灣A菜$78，由台灣空運到港，其實味道似油麥菜，但比較爽口，多了一份清甜味。 響鈴$68，唔係一般盒裝現成響鈴，非常新鮮，即刻炸出嚟，卜卜脆。

上次同外國朋友晚餐，試過灣仔上海弄堂，菜肉餛飩一試難忘。今日趁旅行回來要派手信，順便相約朋友來中環店食個午飯聚一聚。 餐廳地方唔算很大，但環境清潔優雅。午市有多款套餐選擇，適合有選擇困難症既我！原來午市套餐於星期一至五中午12時45分前埋單，仲有九折優惠。 但我地今日好肚餓，order左份量比較多既1人套餐。 1.     涼拌小黄瓜+上海炒粗麵 ($98) 涼拌小黄瓜 ~ 開胃、爽脆、入味，唔會太辣，健康又美味！ 上海炒粗麵 ~ 炒得夠乾身，粗麵彈牙，配料有小棠菜、椰菜及豬腩肉片，醬油入味，好味！ 2.     菜肉餛飩+回鍋肉菜飯 ($98) 菜肉餛飩4隻 ~ 上次試過好好食，今次當然亦不負所望。即包菜肉餛飩內饀飽滿實在，滿滿既小棠菜與肉香一入口，滿足既感覺又來了。 回鍋肉菜飯 ~ 回鍋肉炒得有鑊氣，唔會太油，帶有少少辣味。豬腩肉片爽口，椰菜又不會過軟，的送飯真係一流。