為咗開會搵咗依個地方 ～ 真·龍蝦肉 蕃茄醬意粉 睇咗好多食評先敢叫依個粉，真係龍蝦肉嚟㗎，蕃茄粉就正常嘅茄粉，冇乜特別。本身鍾意食酸野，整體味道唔錯。 到嘢飲啦，依杯Americano打破咗我對咖啡嘅印象，我竟然飲得出涼茶嘅味道，好淡同少苦，冇乜咖啡嘅香味...話係飲過最難飲嘅咖啡都不為過。作為「文青聖地」但咖啡難飲好似有點說不過去。 另外如果你好肚餓，千祈唔好嚟依度，因為佢哋出嘢食嘅速度係奇慢！我哋成枱六個人，每個人都要等45分鐘至一個鐘先拎到嘢食，食物嘅質素祗係好一般。 雖然杯嘢係好唔掂同嘢食都係一般，不過喺尖沙咀有一處可以買杯嘢飲就唔限時、有wifi、有得叉電、又啱開會討論嘅地方，實在唔容易。依度樓底唔高，聲音集中（不過相對亦會容易聽到隔離檯嘅聲），如果想需要用電腦工作或者開會都唔錯，同埋通常wall-in都會有位。 見佢好評都唔少，依個質素嚟講有點失望。

坐忘我已經幫襯咗好幾年，都唔記得食過幾多次喇，每次都係點炒15種野菜咖喱飯或豬軟骨咖喱飯。好鍾意佢果種日式家庭料理嘅感覺，覺得好warm好舒服。 咁多年嚟水準都保持穩定，豬軟骨煮得好淋好容易入口，好大份好正，應該滿足到各位食肉獸。有位朋友平時唔食豬軟骨，我俾咗一舊佢試之後，佢問我再拎多一嚿（笑） 至於15種野菜咖喱飯，據佢哋所講350g嘅蔬菜已經係人體一日所需嘅蔬菜份量，而且有15種咁多，口感非常豐富。我最鍾意食炸蓮藕片，薄薄脆脆好好味。素食嘅朋友可以揀依個！ 咖喱飯份量都唔少，建議細食嘅朋友叫少飯避免浪費 ～ 佢地午市/晚市同價，以天后區嘅晚飯嚟講，性價比真係冇得輸，難怪晚飯時段總見到一條人龍。

朋友話想食西班牙菜，去附近見到呢一間評價唔錯，就入咗去。 唔係好肚餓，只係點咗兩道小菜同一杯啤酒。 1）伊比利亞豬肩肉, 燒茄子 有驚喜，豬要整得好食比較考功夫，肉汁鎖得好，香得嚟又多汁。茄子燒得夠淋同香。講起都流口水🤤 2）西班牙鱈魚, 墨汁小米 朋友食咗舊鱈話好鹹，我再試試，鱈魚係鹹但而D飯好淡，但兩樣夾埋一齊食嘅話味道竟然意外地夾，點埋cream的話味道層次會再豐富D。 3）環境 比較relaxing，我哋去到嗰陣已經冇晒卡位，唯有坐吧檯。佢哋係open kitchen，坐吧檯你可以睇到晒佢哋點樣處理食物同埋煮每一道菜，廚房衛生都唔錯。 兩道菜嘅份量唔多，但貴精不貴多，都係高質素嘅。好多道菜都想試，下次會call多啲朋友一齊嚟食！

難得嚟中環做義工，晏晝就搵吓附近有乜嘢好食啦！記得好耐之前有喺附近返工嘅朋友介紹過，就嚟咗陶館。 入到去好似去咗另一個世界咁，牆上有用粉筆畫嘅小忌廉同一啲插畫，仲有啲心靈雞湯嘅句子，係爭分奪秒嘅中環區見到份外覺得窩心。 點咗原條鰻魚蛋包珍珠飯，一上菜 ～ 哇 ～ 鰻魚肥美，鰻魚汁好掂，蛋又香又滑 撈飯一流 ～ 搞到本身Keep fit緊嘅我都忍唔住食晒成碟飯。份量唔細，應該一般男士都會夠飽。 午餐仲包埋一杯台式飲品，因為要養生，我點咗韓國蜂蜜人蔘紅棗茶。 咁嘅食物水準同配搭都只係$74，喺中環區嚟講，真心係良心價，嚟開一定會再幫襯！

不俗的中式點心

是日與友人在旺角飯聚，揀選了這間一嘗點心，不到三分鐘即可進入。

或因門外無食客輪候，店員沒有催我們點餐。 上菜速度蠻快，雖然誤把淨雞翼連飯上，不過很快就更換了。用餐完畢，店員旋即替我們結帳(有人在外面等候吧)。

總括而言，食物質素中上，必食生煎包，喜愛點心的朋友值得一試。

昨日與朋友一嘗此日本料理，質素不俗，大快朵頤，團購而言非常實惠。

店內人流不多，星期六晚上亦只有七成入座，店員人手充裕，服務周到，並沒因做❛團購客❜而怠慢之。

個人感覺刺身素質優於吉x、松x, 略遜於大x屋(嘗過的放題不多，只可作於比較)。 火炙壽司乃一流之作，五款都非常美味，飯團不會過於大塊。烏冬頗彈牙。如有興趣與朋友放題可以一嘗，收費不大清楚，好像約二百元。不過套餐並無燒物，未知質素如何。

總括而言，對食物、服務、環境都頗滿意，有機會會帶朋友過來再嘗此味！